NLÔ AJÔ 09

Meye’elan ma yemete élate jôé a Yéhôva

Nyô a ne ntilan

Ye ô tameya yi mvolane môs éziñ? Ye wo jeñe biyalane ya minsili miziñ? Ye wo yi mvolane nlem? Ye wo kômbô tu’a yemete élate jôé a Yéhôva? Meye’elan me ne volô wo mimfa’a mite mise. Ve, nne ba ye’elan aya? Ye Zambe a vô’ôlô meye’elane mese? Jé ô ne bo asu na Zambe a vô’ôlô meye’elane môé? Bi tame zu jeñe biyalane ya minsili mite.

1. Bia yiane ye’elane za, a bi ne ye’elan asu jé?

Yésus a nga jô na bi ye’elane ve Ésaa wongan ya yôb étam. Émien a mbe a ye’ela’ane nye. A nga jô na: “Ajô te, ye’ela’ane Zambe ana: A Tate wongan a ne yôp . . .” (Matthieu 6:9) Éyoñe bia ye’elane Yéhôva, bia yemete élate jangan a nye.

Bi ne sili Yéhôva abui mam meye’elan. Ve asu na a vô’ôlô bia, da sili na meye’elane mangan me lu’an a nkômbane wé. Bible a jô na: “Nge bia sili jam éziñ aval ane nkômbane [Zambe] ô né, a wô’ô bia.” (1 Jean 5:14) Yésus a nga kate bia mam méziñe bi ne sili Yéhôva meye’elan. (Lañe’e Matthieu 6:9-13.) Bi ne ye’elane Yéhôva asu miñyiane miangane ya môs ôse, ve bia yiane fe nye ve akéva asu mam a bo asu dangane môs ane môs. Bia yiane fe ye’elan asu bôte bevok.

2. Aval avé bia yiane ye’elane Zambe?

Bible a jô na bi “kulane mam me ne [bia] minlem asu [Zambe].” (Besam 62:8) Nalé a tinane na meye’elane mangan ma yiane so nlem. Bi ne ye’elane Yéhôva yôb été, nge ke nleme wongan été. Ve vôm ase bi né, bia yiane de bo a ésemé. Bi ne fe ye’elane Yéhôva éyoñ ése bia yi.

3. Aval avé Zambe a yalane meye’elane mangan?

Yéhôva a belan abui mezen asu na a yalane bia. A nga ve bia Bible asu na bi bi biyalane ya minsili miangan miziñ. Nlañane ya Kalate Zambe ’wo ve bôt be ne te nyemane fek.’ (Besam 19:7; lañe’e Jacques 1:5.) A ne bôé bia minleme si éyoñe bia tôbane minjuk. A ne fe belane bebo bisaé bé na be su’u bia éyoñe bia yi mvolan.

TUKA’A FAK

Yene’ aval ô ne ye’elane Yéhôva avale da yian, a avale meye’elane me ne volô wo.

4. Mam bia yiane bo asu na Yéhôva a vô’ôlô meye’elane mangan

Mam mevé me ne bo na Yéhôva a vô’ôlô meye’elane môé nge momo? Futi’i VIDÉO.

VIDÉO: Ye Zambe a vô’ôlô meye’elane mese?—Éfas (2:42)

Yéhôva a yi na bi ye’elane nye. Lañe’e Besam 65:2, mvuse ya valé, yala’ane minsili mi:

Ye wo simesane na “Nyô a wô’ô meye’elan” a yi na ô ye’elane nye? Amu jé wo jô nalé?

Bia yiane jeñe na bi tôñe metiñe me Zambe nge bia yi na a vô’ôlô meye’elane mangan. Lañe’e Michée 3:4 a 1 Pierre 3:12, mvuse ya valé, yala’ane nsili wu:

Jé bi ne bo asu na Yéhôva a vô’ôlô meye’elane mangan?

Éyoñe bita bi né, bôte ya mengam mese ba ye’elan asu na Yéhôva a ve be medañ. Ve ye Yéhôva a ne yalan avale meye’elan ete?

5. Meye’elane mangan ma yiane so nlem

Bôte béziñ be maneya yembane na ba ye’elan be tote’e ve avale bifia da. Ye nde Yéhôva a yi na bi ye’elane nye nalé? Lañe’e Matthieu 6:7, mvuse ya valé, yala’ane nsili wu:

Jé ô ne bo asu na ô bo teke ba’alan avale bifia da éyoñ ése wo ye’elan?

Môs ôse, simesa’ane mbamba jam Yéhôva a te bo asu dôé, a va’a nye akiba asu jam ete meye’elan. Nge ô bo de tañe ngume sondô, wé yene na meye’elane môé ma funane ki, amu ô mbe ô ye’ela’an asu ngume jam môs ôse.

Mongô a laan a bebiaé bé. — Mbamba ésaa a yi na mone wé a kulane nye mam me ne nye nlem. Aval ete da da, Yéhôva a yi na bi bo nye meye’elane ma so nlem

6. Meye’elan me ne dase Zambe

Aval avé meye’elan ma volô bia, e dañedañ éyoñe bi tele minju’u été? Futi’i VIDÉO.

VIDÉO: Meye’elan ma volô bia na bi jibi minjuk (1:32)

Bible a liti na meye’elan me ne bôé bia minleme si. Lañe’e Bephilippien 4:6, 7. Bi nto ve yalane minsili mi:

Akusa bo na meye’elan ma vaa ki minju’u bia tôbane mie, me ne bia mfi ôvé?
Wo yi na ô ye’elan asu jé?

Ye wo too ô yemek?

Éfia “amen” ja tinane na, “e bo’o nalé” nge ke na “mebôm.” Aso melu mvus, bote ba jô na “amen” éyoñe be maneya ye’elan.—1 Minkañete 16:36.

7. Jeñe’e na ô bi éyoñe ya ye’elan

Biyoñe biziñ bi wô’ô vuane ye’elane Yéhôva amu bi bili abui mame ya bo. Aval avé Yésus nye a mbe a yene’e meye’elan? Lañe’e Matthieu 14:23 a Marc 1:35, mvuse ya valé, yala’ane minsili mi: