Volô’ô beyé’é Bible bôé na be nyoñe ntyi’ane ya bo Yéhôva ésaé

1-2. (a) Amu jé beyé’é Kalate Zambe be wô’ô kate nyoñe ntyi’ane ya tôñe benya mejôô? (b) Jé bia zu yen ayé’é di?

YE MAME méziñe ma bo wo na ô ko woñe ya bo ngaa Yéhôva? Éko éziñe na wo ko bôte mia be be mia saé woñ, a bemvôé bôé, nge na wo mate na bibu’a ya nda bôte jôé bi lume wo mvus. Nge na wo wô’ôtane na ô vo’o semene metiñe me Yéhôva ényiñe jôé. Nge é ne nalé, wôna ô ne kôme yeme tebe été beyé’é Bible béziñ, ô ne fe kôme wôk amu jé é ne bo ayaé asu dap na be nyoñe ntyi’ane ya bo Bengaa be Yéhôva.

² Yésus a mbe a yeme na kane mame te é ne bo na môt a kate nyoñe ntyi’ane ya bo Yéhôva Zambe ésaé. (Matt. 13:20-22) A nga ve ngule na a volô ba bese be mbe be kate nyoñe ntyi’ane ya bo beyé’é bé. Éyoñ a nga bo nalé, a nga volô beyé’é na (1) be yemelane mame ma bo na bôte be kate yaé nsisim, a nyoñe ntyi’ane ya bo Yéhôva Zambe ésaé. A nga volô fe be na (2) be kôme nye’e Yéhôva, a bo fe be na (3) be telé Zambe ôsu binyiñe biap, a (4) kate fe be jôme be ne bo éyoñe bôte ba tibili be. Aval avé bi ne tôñe melebe Yésus a nga ve beyé’é bé éyoñe bia belane kalate Bu’uban ényiñ nnôm éto! na bi volô beyé’é Bible bangane na be tôñe benya mejôô?

VOLÔ BEYÉ’É BIBLE BÔÉ NA BE YEME MAME MA BO NA BE KATE YAÉ NSISIM

3. Amu jé é mbe é too ayaé na Nicodème a bo ñyé’é Yésus?

³ Nicodème, a mbe ntebe ôsu bejuif, ve jam éziñ é nga bo nye na a kate nyoñe ntyi’ane ya bo ñyé’é Yésus. Éyoñe Yésus a nga taté a ésaé nkañete jé, a nga bo fo’o ve jôm ane ngone ésaman, ane Nicodème a nga yemelane na a so be Zambe. (Jean 3:1, 2) Nicodème a nga nyoñe ntyi’ane na a ke yene Yésus asoé amu a “be ko bejuif woñ.” (Jean 7:13; 12:42) Éko éziñ a mbe a ko woñe na a ne jañele beta éto a mbe a bili nge a bo ñyé’é Yésus.a

4. Aval avé Yésus a nga volô Nicodème na a kôme wô’ô jôme Zambe a yi na a bo?

⁴ Nicodème a mbe a kôme yeme Metiñe me Moïse, ve me nji volô nye na a kôme yeme jôme Yéhôva a yi na a bo. Aval avé Yésus a nga volô nye? Yésus a nga belan éyoñe jé a mbe a yiane wo’on asu na ba Nicodème be laan alu. Yésus a nga kôme nye liti ne ngeññ jam a mbe a yiane bo asu na a bo ñyé’é wé, a nga jô nye na a yiane bo mame ma: E jôbane mam abé mé, e duban a e buni Mona Zambe.—Jean 3:5, 14-21.

5. Aval avé bi ne volô ñyé’é Bible na a kôme yemelane mame ma bo na a kate yaé nsisim?

⁵ To’o ñyé’é Bible a ne atyeñe ya kôme wô’ô miñye’elane ya Kalate Zambe, bia yiane volô nye na a yemelane mame ma bo nye na a kate yaé nsisim. Éve’an é ne na, éko éziñe ésaé jé ja nyoñe nye abui éyoñe, nge ki na bibu’a ya nda bôte jé bia yi ki na a bo ngaa Yéhôva. Aval ane Yésus, nyoñ éyoñe ya volô ñyé’é Bible wé. Ô ne bañete nye na a zu mi di mon éfuse mboñe nge ki na mi ke mia wulu. Éyoñe mia bo mame mete nsamba, éko éziñ a ye kate wo abui mame méziñe ya ényiñe jé nge ki minjuk a tôbane mie. Volô’ô nye na a yeme mintyendan a ne bo ényiñe jé, bo’o na a yeme na nge a bo mintyendane mite a ne amu a kômbô ve Yéhôva nlem ava’a sa ke wo.

6. Aval avé ô ne volô ñyé’é Bible wé na a yeme na a ne ngule ya tôñe mam a yé’é? (1 Becorinthien 16:13)

⁶ Éyoñe ñyé’é Bible a too ndi na Yéhôva a ye volô nye, na a bo mame me ne zôsô a ye bi ngule ya bo mame mete. (Lañe’e 1 Becorinthien 16:13.) Ésaé jangan é ne ane di ñye’ele sikôlô a bo. Tame simesan éyoñ ô mbe sikôlô, avale ñye’ele avé ô mbe ô dañe nye’e? Teke bisô na a mbe ñye’ele a mbe a too ôjibi, a volô’ô wo na ô kôme yeme jôme ô ne ngule ya bo a aval ô ne bo je. Avale da fe, mbamba ñye’ele Kalate Zambe, a ye’ele ki ve mame Yéhôva a yi na ñyé’é Bible a bo, a volô fe nye na a kôme tabe ndi na Yéhôva a ye volô nye na a bo mame mete. Jé é ne volô bia na bi bo avale ñye’ele éte?

VOLÔ’Ô ÑYÉ’É BIBLE WÔÉ NA A TU’A KÔME NYE’E YÉHÔVA

7. Aval avé Yésus a nga volô bôte be mbe be vô’ôlô nye na be tu’a nye’e Yéhôva?

⁷ Yésus a mbe a yeme na éyoñe môt a nye’e Zambe, jam éte é ne tindi nye na a tôñe mam a yé’é. Jôm éte nje a mbe a ye’ele béyé’é bé éyoñ ése mame ma bo na be tu’a nye’e Ésa wop ya yôp. Éve’an é ne na, a nga ve’e Yéhôva a ésa a ve bone bé mbamba be biôm. (Matt. 7:9-11) Abui bôt é mbe é vô’ôlô Yésus é mbe ki é bili beésa be mbe be nye’e be. Tame ve’ele simesan avale be nga wô’ôtan éyoñe Yésus a nga laane be nkana ya mbamba ésa a nga ke wubane mone wé a nga mane ndaman akume dé. Yésus a nga volô bôte na be yeme na Yéhôva a nye’e be a yi fe na a volô be.—Luc 15:20-24.

8. Aval avé bi ne volô ñyé’é Bible na a tu’a nye’e Yéhôva?

⁸ Bi ne volô ñyé’é Bible na a tu’a nye’e Yéhôva éyoñe bia ye’ele nye mbamba mefulu mé. Éyoñ ése bia bo ayé’é a nye, bi ne volô nye na a yene nja ô ne zañe e nye’ane Yéhôva a mame a yé’é. Éyoñe bia kobô jame Yéhôva a nga bo na a ve mone wé asu dangan, volô’ô ñyé’é Bible wôé na a kôme tu’a wô’ô na Yéhôva a nji ke bo jam éte fo’o ve amu a nye’e bôte bese ve a nga bo de amu a nye’e nye. (Rom. 5:8; 1 Jean 4:10) Éyoñe ñyé’é Bible a kôme wôk abim avé Yéhôva a nye’e nye, jam éte ja ye volô nye na nye fe a tu’a nye nye’e.—Gal. 2:20.

9. Jé é nga volô Michael na a nyoñe ntyi’ane ya kañe Yéhôva?

⁹ Tame yen éve’ela Michael, môte ya Indonésie. A nga yaé benya mejôô ve a nji duban. Éyoñ a nga bi mimbu 18, a nga ke nyiñe si fe a taté na a dutu bemetua ba be’e mimbe’e. Mvuse ya valé, nde a nga bulane jale dé, e Indonésie a ke lu’u minga. Ve a nga beta bulane vôm a mbe a saék a li’i minga wôé ba ngo jé. Nté a mbe wôé, minga wé ba ngo jé ki be taté na ba yé’é Kalate Zambe a bo mintyendane binyiñe biap. Mvuse awu nyia wé, Michael a nga tyi’i na a bulane si jé na a ke nyoñe ngap a ésa wé, a kañese fe na a beta taté a ayé’é Kalate Zambe. Éyoñe be nga yene ngab é ne na “Tuka’a fak” ya ayé’é 27 ya kalate Bu’uban ényiñ nnôm éto! Jam éte é nga nambe Michael angôndô. Éyoñ a nga kôme fas aval avé Yéhôva a nga yen ane Mone wé a njuk a mintaé, jam éte é nga bo na Michael a taté a yôn. A nga kôme yemelan abim avé Yéhôva ba Yésus ba nye’e nye, jôm éte é nga tindi nye na a bo mintyendan ényiñe jé a na a nyoñe ntyi’ane ya duban.

VOLÔ’Ô ÑYÉ’É BIBLE WÔÉ NA A TÉLÉ YÉHÔVA ÔSU ÉNYIÑE JÉ

10. Jé Yésus a nga bo asu na volô beyé’é bé na be bo mintyendane binyiñe biap a tu’a bo Yéhôva Zambe ésaé? (Luc 5:5-11) (Fombô’ô fe fôtô.)

¹⁰ Beyé’é be Yésus be nga ji’a yemelane na Yésus a mbe Messie be nga nka’ale, ve be mbe be yiane liti be mfi ya telé ésaé nkañete ôsu binyiñe biap. Pierre ba André be mbe be ntoo beyé’é be Yésus ôsusua na Yésus a bañete be na ba be nye be ke nsamba. (Matt. 4:18, 19) Ba be Jacques a Jean be mbe be yobe kos, a ésaé éte é mbe é wulu’u be nya mvo’é. (Marc 1:16-20) Éyoñe Pierre ba André be nga “li’i mevote map,” be nga bo nta’ane mame asu na menda me bôte map me li’i me nyiñe mvo’é nté be mbe nsamba a Yésus. Jé é nga bo be na be lik asu ésaé dap? Nkañete ya kalate Luc wo kañete na asimba Yésus a nga bo é nga yemete ndi nleme jap be Yéhôva na é ke ôsu a nyoñe ngap a be.—Lañe’e Luc 5:5-11.

11. Jé bi ne jô ñyé’é Bible asu na mbunane wé ô bo ngul?

¹¹ Bia vo’o ki bo mesimba avale Yésus a mbe a bo’o, ve bi ne kate ñyé’é Bible wongan avale Yéhôva a nga su’u ba ba télé nye ôsu binyiñe biap. Éve’an é ne na, ye wo beta simesan aval avé Yéhôva a nga volô wo éyoñ ô nga taté na wo tabe bisulan? Éko éziñ ô nga ke laan a masa wôé asu na ô kate nye amu jé wo ye ke bo ô saék ayap mimôse mi ésulan. Kôme’e timine ñyé’é Bible wé avale mbunane wôé ô nga bo ngul éyoñe Yéhôva a nga volô wo na ô télé ékaña’a jé ôsu ényiñe jôé.

12. (a) Amu jé bia yiane bañete bekañete mbamba foé mevale meval éyoñe bia ke bo ayé’é Bible? (b) Jam avé afe bi ne bo asu na bi volô ñyé’é Bible wongane na a telé Yéhôva ôsu ényiñe jé? Va’a éve’an.

¹² É ne mvo’é na bobejañ a besita fe be kate ñyé’é Bible mintyendane be nga bo asu na be telé Yéhôva ôsu binyiñe biap. Jôm éte nje bia yiane kee bobejañ a bekale mevale meval éyoñ bia ke bo ayé’é. Sili’i be na be kate jam é nga volô be na be yeme benya mejôô, a telé ésaé Yéhôva ôsu binyiñe biap. Nde fe, ô ne nyoñ éyoñe na mia ñyé’é Bible mi yene bevidéo ya ngabe ya kalate Bu’uban ényiñ nnôm éto! Afôla é ne na “Tuka’a fak” nge ke “Mam mefe me ne volô wo”. Éve’an é ne na éyoñe wo yé’é nlô ajô 37, a yene vidéo a ne nlô ajô na Yéhôva a ye ve bia mam ma yiane bia. Kobô’ô ajô ya vidéo ate a volô ñyé’é Bible wôé na a yeme na, Yéhôva a ye volô nye éyoñ a ye telé nye ôsu ényiñe jé.

YE’ELE ÑYÉ’É BIBLE WÔÉ JAM A NE BO ÉYOÑ A TÔBANE MEWOSAN

13. Aval avé Yésus a nga volô beyé’é bé na be tabe nkômesane asu étibila’a?

¹³ Yésus a nga kate beyé’é abui biyoñe na ba ye tôban étibila’a ja’a bibu’a ya menda me bôte map bia ye tyibili be. (Matt. 5:11; 10:22, 36) Mon éyoñ ôsusua na Yésus a wu, a nga kate beyé’é bé na bôte ba ye wôé be amu be ne bebo bisaé be Yéhôva. (Matt. 24:9; Jean 15:20; 16:2) A nga jô be na be tabe ntyel éyoñe be ne ésaé nkañete. Éve’an é ne na, a nga jô be na be bo teke sañetan a bôte ba wosane be, a na be tabe ntyel a mame ba ye jô asu na be kee ésaé nkañete jap ôsu.

14. Aval avé bi ne volô ñyé’é Bible na a tabe nkômesan asu étibila’a? (2 Timothée 3:12)

¹⁴ Aval ane Yésus bia ye kate ñyé’é Bible wongane mame bôte ba be nye ba saé nsamba, bemvôé bé, nge ki bibu’a ya nda bôte jé, ba ye jô amu a yé’é Kalate Zambe. (Lañe’e 2 Timothée 3:12.) Bôte béziñe ba be beyé’é Bible ba saé nsamba ba ye pkwe’ele be amu ba tôñe miñye’elane ya Kalate Zambe binyiñe biap. Bôte befe, nge ke bibu’a ya menda me bôte map, ba ye ke kañese mame ba yé’é Kalate Zambe été. É ne mvo’é ya taté na wo ji’a kobô ajô étibila’a a be, nalé a ye volô be na a be bo teke bo fe’e ne vema éyoñe jam éte da ye kui be.

15. Jé é ne volô ñyé’é Bible na a dañe mewosane ya nda bôte jé?

¹⁵ Nge ñyé’é Bible wôé a tôbane mewosane nda bôte jé, volô’ô nye na a yem amu jé bibu’a ya nda bôte jé bia wôk ayé’é Kalate Zambe a bo a Bengaa be Yéhôva abé. Éko éziñe ba simesane na mame bengaa ba ye’ele me ne minsos. Be ne fe simesane na Bengaa be Yéhôva be ne mbia be bôt. Ja’a bibu’a ya nda bôte Yésus bi nji be bi nye’e jam a mbe a bo’o, be nga simesane na a ntoo akut. (Marc 3:21; Jean 7:5) Ye’ele ñyé’é Bible wôé na a bo ôjibi, a na a kobô a bibu’a ya nda bôte jé nge ke bôte befe évôvoé été.

16. Aval avé bi ne volô ñyé’é Bible wongane na a kate bôte mame a yé’é évôvoé été?

¹⁶ Éyoñe bibu’a ya nda bôte jé bia kômbô yeme mame méziñ a lat a Kalate Zambe, ñyé’é Bible a yiane ke be mane timine mame mese a yem éyoñe jia. Nge a bo nalé, bibu’a ya nda bôte jé bi ne kate kui na bi kôme wô’ô mam a kate be a buni me, a jam éte é ne bo na be kate beta bi nkômbane ya laan a nye. Jôm éte nje bia yiane kôme volô ñyé’é Bible wongane na, a laan a bibu’a ya nda bôte jé aval é ne na be beta bi nkômbane ya kee minlañ ôsu môs ôfe. (Col. 4:6) Éko éziñ a ne bo na bibu’a ya nda bôte jé bi ke anjeñe mefoé jw.org. A zen éte be ne kui na be yem abui mam a lat a Bengaa be Yéhôva, a be ne fe bi nkômbane ya lañe mame mefe ba kômbô yem.

17. Aval avé bi ne nyañele ñyé’é Bible wongane na a yeme yalane minsili be ne sili nye a lat a Bengaa be Yéhôva? (Fombô’ô fe fôtô.)

¹⁷ Ô ne belan anjeñe mefoé dangane jw.org, vôm a ne na “Minsili bôte ba dañe sili” asu na ô volô ñyé’é Bible wôé na a kômesane biyale bi ne tyi’ibi, asu na a yalane minsili bivuvumane bié nge ke bôte ba saé a nye afôla da be ne sili nye. (2 Tim. 2:24, 25) Te vuane belane ngab é ne nlô ajô na “Bôte béziñ ba jô na” e kalate Bu’uban ényiñ nnôm éto! memane ya ayé’é ése. Volô’ô ñyé’é Bible wôé na a yalan a bela’ane bifia bié. Nge nalé a sili, volô’ô nye na a kôme belane mbamba bifia na a timine bôte mam a buni. Éyoñe mia nye mia bo besisia, jam éte da ye volô nye na a bo ngule ya kate bôte bevok amu jé a buni mame méziñ.

18. Aval avé ô ne volô ñyé’é Bible wôé na a liti mbunane wé éyoñ a kañete? (Matthieu 10:27)

¹⁸ Yésus a nga jô beyé’é bé na be kañete mbamba foé. (Lañe’e Matthieu 10:27.) Éyoñe ñyé’é Bible a taté na a kañete a ékôane bekristen, jam éte da ye volô nye na a yé’é na a tabe ndi a Yéhôva. Aval avé ô ne volô ñyé’é Bible wôé na a tôé nsôñane wé ya bo nkañete mbamba foé? Éyoñe ba yôtane na ôbane nkañete wo ye boban ékôane bekristene jangan, ô ne volô ñyé’é Bible na a yene mame a ne bo asu ya na a bo nkañete mbamba foé. Kate nye na é ne tyi’ibi asu dé na a taté na a kañete éyoñ ôbane kañete wo boban. Nsôñane ôfe a ne bi ô ne na a taté na a nyoñe ngab a bisaé bia boban ésulane ya ézezañe sondô. Nge a tôñesane nsôñan ôte, a ye yem aval a ne kôme timine bôte mame a yé’é.

LITI’I ÑYÉ’É BIBLE WÔÉ NA Ô TOO NDI NA A NE VE YÉHÔVA NLEM AVAK

19. Aval avé Yésus a nga liti beyé’é bé na a too ndi a be, a avale avé bi ne nye vu?

¹⁹ Ôsusua na Yésus a bulane yôp, a nga jô beyé’é bé na môs éziñe ba be nye ba ye beta tabe nsamba. Be nji be be yeme na Yésus a kobô ajô ya nkeane wop ya yôp. Akusa bo Yésus a mbe a yeme’e na beyé’é ba wô’ô ki mame mese, ve a mbe a too ndi na ba yi na ba tôñe nye. (Jean 14:1-5, 8) A mbe a yeme na da sili be abui éyoñe na be wô’ô mame méziñ, aval ane ajô ya ndi nleme ya ke nyiñe yôp. (Jean 16:12) Aval ane Yésus, bia fe bi ne liti beyé’é Bible bangane na bi too ndi na ba kômbô ve Yéhôva nlem avak.

20. Aval avé sita ya Malawi a nga liti ñyé’é Bible wé na a too nye ndi?

²⁰ Tabe’e ndi na ñyé’é Bible wôé a yi na a bo mame me ne zôsô. Bi tame yen éve’ela sita wongane ya Malawi Chifundo. A nga taté na a yé’é Kalate Zambe e kalate Bu’uban ényiñ nnôm éto!, ba ngone minga ya ñyebe catholique é too éyôlé na Alinafe. Éyoñe be nga mane ayé’é 14, Chifundo a nga sili ñyé’é Bible wé jam a simesan a lat a mbelane bive’ela’a asu ékaña’a. Alinafe a nga jô a nleme wé ôse na: “A ne ntyi’ane mamiene me nga nyoñ!” Mvuse ya valé, Chifundo a nga simesane na éko éziñ ayé’é da zu tebe. Ve, a ôjibi ôse a nga ke ôsu a yé’é a Alinafe, a yeme na nté éyoñe ja ye lôt, é tu’a kôme wô’ô na e belane bive’ela asu ékaña’a a ne jam é ne abé. Mvuse bone bengon, Chifundo a nga sili ñyé’é Bible wé nsili bia kooñe wô ayé’é 34 é ne nlô ajô na: “Aval avé mam ô nga yé’é Kalate Zambe a lat a nya Zambe, Yéhôva, me volôya wo azukui den?” Chifundo a kat aval Alinafe a nga yalane nye a jô’ô na: “A nga kate ma angôndô ya abui mam, jame da ya été é ne na Bengaa ba bo ki mame Kalate Zambe a jô na me ne abé.” Mvuse ya valé, Alinafe a nji ke beta belane bive’ela asu ékaña’a, ane a nga duban.

21. Aval avé ô ne volô ñyé’é Bible wôé na a nyoñe ntyi’ane ya zu kañe Yéhôva?

²¹ Akusa bo na Yéhôva ‘nnye a bo na ñyé’é Bible wongan a yaé,’ bia fe bi ne volô nye mfa’a ôte. (1 Cor. 3:7) Bi ne nye ye’ele abui mame Zambe a yi na a bo. A volô fe nye na a tu’a nye’e Yéhôva. A liti nye aval ane nye’e Yéhôva, a telé nye ôsu ényiñe jé. Bi ye’ele fe nye na a tabe ndi na Yéhôva éyoñe ba tibili nye. Éyoñe bia liti ñyé’é Bible wongane na bi too ndi na a ne ngule ya ve Yéhôva nlem avak, nalé a ye volô nye na a nyoñe ntyi’ane ya bo Yéhôva ésaé.