Avale Yéhôva a volô bia na bi bo mbane ya jibi minjuk

1. Amu jé bia yiane bo mbane ya jibi a jé é ne bia volô? (1 Pierre 5:10)

MBIA biyoñe bia nyiñe melu ya asu’ulane ma, da sili bebo bisaé be Yéhôva fulu mbane ya jibi. Abui ya be be da juk amu mbia be akon. Bevo’o ki amu môt be mbe be nye’e a nga wu. Ba bevo’o ba tôban étibila’a é so’o be bibu’a ya menda me bôte map nge ki bijôé. (Matt. 10:18, 36, 37) Bi ne tabe ndi na akusa bo njuk ôse bi ne tôbane wô, Yéhôva a ye volô bia na bi bo mbane ya jibi.—Lañe’e 1 Pierre 5:10.

2. Fulu mbane ya jibi bekristene ja so be vé?

² E bo mbane ya jibi a tinane na bia ke ôsu a wulu ba’aba’a a Yéhôva a bo nye ésaé a meva’a mese ja’a bia tôbane minjuk, étibila’a nge ke meve’ele. Fulu mbane ya jibi bekristene be bili ja so ki be bebien, ja so be be Yéhôva nnyu a ve “ngule ja dañe nyi ja yian.” (2 Cor. 4:7) Ayé’é di bia zu yene mezene menyine Yéhôva a belane me na a volô bia na bi bo mbane ya jibi. Bia ye fe yen aval avé bi ne bu’uban a zen ése ya été.

MEYE’ELAN

3. Amu jé bi ne jô na meye’elane me ne asimba?

³ Yéhôva a nga bo étu’a jam asu na a volô bia na bi bo mbane ya jibi. A nga ve bia fane ya laan a nye akusa bo bi be’e metyi ya abé. (Héb. 4:16) Tame simesane jame ji: Bi ne ye’elane Yéhôva éyoñ ése a asu jôm ése. A wô’ô nkobô ôse bi ne ye’elane nye, afôla ése bi né, to’o bia wô’ôtane na bi ne étame nge ki nda mimbôk. (Jonas 2:1, 2; Mame mi. 16:25, 26) To’o éyoñe nlem ô tyele bia yôp aval é ne na bi nga kate kuli bifia, Yéhôva a ne ngule ya wô’ô jame bia kômbô jô. (Rom. 8:26, 27) Nalé a liti fo’o na meye’elane me ne angôndô ya beta asimba!

4. Amu jé bi ne jô na éyoñe bia ye’elane Yéhôva na bi bi fulu mbane ya jibi nalé a lu’an a nkômbane wé?

⁴ E kalate wé, Yéhôva a jô bia na “jôm ése bia sili nye é wô’an a nkômbane wé a wô’ô bia.” (1 Jean 5:14) Ye bi ne ñhe sili Yéhôva na a volô bia na bi bo mbane ya jibi? Ôwé! Amu nalé a lu’an a nkômbane wé. Amu jé bia jô nalé? Amu éyoñe bia bo mbane ya jibi minju’u bia tôbane mie, bia ve Yéhôva fane ya yalane Satan nnyu a soñe nye éyoñ ése. (Mink. 27:11) A fe na Kalate Zambe a jô na Yéhôva a ne ôjeja’a ya liti na “a ne ngu mfa’a ngame ya ba minlem miap mi ne nya zôsôô be nye.” (2 Mink. 16:9) Bi ne tabe ndi na Yéhôva a bili nkômban a ngule ya volô bia na bi bo mbane ya jibi.—Ésa. 30:18; 41:10; Luc 11:13.

5. Aval avé meye’elane me ne ve bia mvo’é ya nlem? (Ésaïe 26:3)

⁵ Kalate Zambe a jô na éyoñe bia yoé Yéhôva nleme wongan a zene ya meye’elan, ‘mvo’é Zambe, nje éte é ne anen a dañ abime bi ne simesan, ja ye ba’ale minleme miangan a asimesane dangan.’ (Philip. 4:7) Bi tame yene jôme nalé a tinan. Éyoñe bôte ba kañe ki Yéhôva ba tôbane minjuk, ba jeñe mezene mese asu na be bi mvo’é ya nlem. (Ve’ek a Matthieu 12:43-45.) Ve mvo’é Yéhôva a ve bia éyoñe bia ye’elane nye, ja dañe mvo’é bôte ba jeñe na be bi a mezene mefe. Éyoñe bia ye’elane Yéhôva, bia liti na bi too ndi na a ye ke ôsu a ba’ale minleme miangane “mvo’é mvo’é.” (Lañek Ésaie 26:3.) Zene jia Yéhôva a beta belane je asu na a ve bia mvo’é jé é ne na a volô bia na bi beta simesane bifuse ya Kalate Zambe bi ne volô bia. Bifuse bite bia bôône bia nleme si amu bia yeme na Yéhôva a nyoñe ngap a bia a yi fe na mame mangane me wulu mvo’é.—Bsa. 62:1, 2.

6. Aval avé bi ne kôme bu’uban a meye’elan? (Fombô’ô fe fôtô.)

⁶ Jam ô ne bo. Éyoñe wo tôbane minjuk, kate’e Yéhôva avale wo wô’ôtan, “ke’e Yéhôva mbe’e wôé” a sili’i nye mvo’é jé. (Bsa. 55:22) Sili’i nye na a ve wo fe’e jé asu na ô yeme jôm ô ne bo éyoñ ô tele minjuk été. (Mink. 2:10, 11) Nté wo ye’elane Yéhôva na a volô wo na ô bo mbane ya jibi, te vuane nye ve akiba. (Philip. 4:6) Fombô’ô bone be mame bese Yéhôva a bo môs ane môs, asu na ô bo mbane ya jibi, a va’a nye akiba asu mvolane wé a mbamba be mame bese a ve wo. Te jô’é na minju’u mi bo na ô dime mise bibotan ô biya.—Bsa. 16:5, 6.

KALATE ZAMBE

7. Aval avé ayé’é Kalate Zambe é ne bia volô na bi bo mbane ya jibi?

⁷ Yéhôva a nga ve bia Mejô mé na me volô bia na bi bo mbane ya jibi. Kalate Zambe a bili abui bifuse bia liti aval avé Yéhôva a su’u bia. Bi tame nyoñe ve éve’ane jia. Matthieu 6:8 a jô na: “Ésa wônan a yeme mame mese mia yi ôsusua na mia sili nye me.” Yésus a nga kobô mejô mete amu a mbe a yeme’e Yéhôva a dañe môt ase. Mejô me Yésus mete ma bo na bi bo teke bi bisô na Yéhôva a nyoñe ngap a bia a na a jalé miñyiane miangane to’o éyoñe bia tôbane minjuk. Kalate Zambe a bili abui bifuse bife, bia volô bia na bi ke ôsu a bo mbane ya jibi.—Bsa. 94:19.

8. (a) Melebe mevé Kalate Zambe a ve bia? (b) Aval avé melebe mete me ne bia volô na bi bi bo mbane ya jibi éyoñe bi tele minjuk?

⁸ Kalate Zambe a ve bia melebe ma volô na bi bo mbane ya jibi éyoñe bi tele minjuk. Melebe mete ma volô na bi bi fe’e ja sili asu na bi nyoñe mbamba mintyi’an. (Mink. 2:6, 7) Éve’an é ne na Kalate Zambe a lebe bia na bi nji yiane tyelé minleme yôp asu mame ma ye boban akiti, bia yiane nyiñe môs ane môs. (Matt. 6:34) Nge bi bili fulu ya lañe Kalate Zambe môs ôse a bindi mame bia lañ, da ye bo tyi’ibi na bi ji’a yene miñye’elane bia yi a éyoñe bia yi mie.

9. Aval avé minkañete ya Kalate Zambe mia bo na bi kôme tabe ndi na Yéhôva a ye su’u bia?

⁹ Kalate Zambe a bili minkañete mi bôte be mbe ane bia be nga tabe ndi a Yéhôva a bi fe mvolane wé. (Héb. 11:32-34; Jacq. 5:17) Éyoñe bia tu’a fas avale minkañete éte, nalé a bo na bi tabe ndi na Yéhôva a ne “ôleme viangan a ngule jangan, mvolan w’adañe bebé vôm bi ayen njuk.” (Bsa. 46:1) Éyoñe bia yen avale bebo bisaé be Yéhôva ya melu mvuse be nga wulu ba’aba’a a nye, nalé a tindi bia na bi vu mbunane wop a mbane ya jibi wop.—Jacq. 5:10, 11.

10. Aval avé bi ne kôme bu’uban a Kalate Zambe?

¹⁰ Jam ô ne bo. Lañe’e Kalate Zambe môs ôse a tili’i bifuse wo simesane na bi ne wo kôme volô afôla éziñ. Abui bôte da yene na e lañ éfuse ya môs a ne mbamba zen a volô be na be taté môs a ôsimesane ya Kalate Zambe. Kale jangan é ne jôé na Mariea é nga yene na jam éte é ne été, éyoñe be nga bi bebiaé bé cancer. Jé é nga volô nye na a bo mbane ya jibi nté ôse a mbe a nyoñe’e ngap a be bengone be nga kandane nyiñ? A jô na: “Môs ôse me mbe me lañe’e a bindi éfus é mbe é so’o kalate Emfasané éfuse ya môs. Jam éte é nga volô ma môs ôse na me bem ôsimesane mame Yéhôva a mbe a ye’ele’e ma a lôte na me bem ôsimesane minju’u me mbe me bili.”—Bsa. 61:2.

BEKRISTENE BEVOK

11. Amu jé bia bi ngule nyul éyoñe bia yeme na bi nji bo étame mfa’a ya tôbane minjuk?

¹¹ Yéhôva a nga ve bia bobejañ a bekal asu na be volô bia na bi bo mbane ya jibi. Éyoñe bia yeme na ‘bobenyañe bangane ya si ése be fe ba tôban avale minjuk éte.’ Jam éte ja bôône bia nleme si na bi nji bo étam. (1 P. 5:9) Ajô te bi ne tabe ndi na njuk ôse bia tôbane wô, bôte befe be nga tôban avale njuk éte a be nga bo mbane ya jibi. Nalé a liti na bia fe bi ne ngule ya jibi!—Mame mi. 14:22.

12. Aval avé bekristene bevo’o be ne ngule ya volô bia, a aval avé bia fe bi ne volô be? (2 Becorinthien 1:3, 4)

¹² Bekristene bevo’o be ne bia volô na bi bo mbane ya jibi. Nlômane Paul ô nga yene na jam éte é ne mebôm. Bekalate bé, a nga tili biyôlé bi bobejañe be nga volô nye éyoñe a mbe nda mimbôk a nga ve fe be akiba. Be nga ve Paul ngule nyul a su’u nye mimfa’a mise. (Philip. 2:25, 29, 30; Col. 4:10, 11) Dene fe, bobejañ a besita ba ve bia ngule nyul a volô bia na bi bo mbane ya jibi minju’u bia tôbane mie. Bia fe bi ne bo be avale da.—Lañe’e 2 Becorinthien 1:3, 4.

13. Jé é nga volô sita Maya na a ke ôsu a bo mbane ya jibi minjuk?

¹³ Bekristene bevo’o be nga volô sita Maya a nyiñe Russie. Mbu 2020, bezimbi be nga zu vune nda jé, mvuse ya valé be nga kee nye nda mejô amu a nga kañete bôte bevo’o mam a buni. Maya a jô na : “Biyoñe me mbe me bili’i atek, bobenyañ a bendôme bame ya nsisime be mbe be tili’i ma bekalate a loone ma, be liti’i abim avé ba nye’e ma. Me mbe me yeme’e na me ne beta nda bôt é ne nye’an. Ve mbu 2020, ñwô me nga tu’a yene nye’an ôte.”

14. Jé ô ne bo asu na ô bu’uban a mvolane bobejañ a bekal? (Fombô’ô fe fôtô.)

¹⁴ Jam ô ne bo. Éyoñe wo tôbane njuk éziñ é ne mfi na ô kate wô bobenyoñ a benyo bekal a lôt éyoñ a be. Te ko woñe ya sili bemvendé mvolan. Be ne ane “vôme ya sobô mfa’a ya évuñulu, a aval ane asoé mfa’a ya ôkôs.” (Ésa. 32:2.) Bi nji yiane vuane na bekristene bevo’o fe ba jibi minjuk ane bia. Éyoñe bia bo bôte be tele minju’u mbamba be mam, nalé a ye volô bia na bi ke ôsu a bo mbane ya jibi minju’u miangan.—Mame mi. 20:35.

NDI NLEME BI BILI

15. Aval avé ndi nlem é nga volô Yésus, a aval avé é ne fe bia volô? (Behébreu 12:2)

¹⁵ Yéhôva a nga ve bia nya ndii nleme ja volô bia na bi bo mbane ya jibi. (Rom. 15:13) Tame simesan aval avé ndi nlem é nga volô Yésus na a bo mbane ya jibi minju’u mise a nga tôbane mie éyoñ a mbe si va. (Lañe’e Behébreu 12:2.) Yésus a mbe a yeme’e na nge a ke ôsu a wulu ba’aba’a a Yéhôva, Yéhôva a ye volô nye na a fubu éyôlé jé. Yésus a mbe a yange’e a ôjeja’a ôse na a ke koone Ésa wé, a na, ane éyoñe ja ye lôt a jôé a bobenyañe bé Éjôé ya yôp. Avale te da da, ndi nleme ya nyiñe nnôm éto Zambe a ka’ale bia ja volô bia na bi bo mbane ya jibi minju’u mise émo Satan ja bo na bi tôbane mie.

16. Aval avé ndi nlem é nga volô sita éziñ a jé bi ne yé’é jam a nga jô?

¹⁶ Bi tame yen aval avé ngaka’a ya Éjôé Zambe é nga volô sita Anna a nyiñe Russie éyoñe be nga bi nnôme wé a futi nye mimbôk asu mone nté. Éyoñe jam éte é nga boban Anna a nga jô na: “Éyoñe ma ye’elan a bindi ndi nleme ya melu ma zu, nalé a volô ma na me bo teke bili atek. Ma yeme na mvaé é solô minju’u yat. Yéhôva a ye dañe besiñe bé a botane bia.”

17. Aval avé bi ne liti na bia ve Yéhôva akiba asu mbamba ndi nlem a ve bia? (Fombô’ô fe fôtô.)

¹⁷ Jam ô ne bo. Nyoñe’ éyoñe ya fase mbamba be mame Yéhôva a ka’ale bia. Bo’o ane ô ntoo mfefé émo a yene bibotane wo ye bi. A njuk ôse ô ne tôbane wô éyoñe di ô ne fo’o ve asu “ôyôme nté, [ô ne] fe éfufup.” (2 Cor. 4:17) Va’a fe ngule ya kate bôte bevo’o mame wo buni. Tame simesan avale jam éte é ne bo ayaé asu dap na be jibi minju’u ya émo Satan ji, teke yeme nsôñane Zambe asu melu ma zu. To’o wo jô be bone be mame béziñ, nalé a ye volô be na be tu’a jeñe na be yem Éjôé Yéhôva.

18. Amu jé bia yiane tabe ndi a bengaka’a be Yéhôva?

¹⁸ Éyoñ a maneya jibi minju’u mise a nga tôbane mie, Job a nga jô Yéhôva na: “Ma yeme na, ô ne ngule ya bo mam mese, a môt a vo’o kame mam nleme wôé wo tyi’i na, wo ye bo.” (Job 42:2) Job a nga yé’é na jôm éziñe ja vo’o kamane Yéhôva na a tôé nsôñane wé. Nalé a ve bia ngule nyule ya ke ôsu a bo mbane ya jibi minjuk. Bi tame nyoñ éve’an, tame ve’ele simesane na nkôkon minga éziñe wo bili atek amu teke dokita éziñ a kuiya na a saé nye. Ve éyoñ a ke yene mbamba dokita, dokita ate a kate nye ôkon a kon a jam a zu bo asu na a saé nye, été été a beta bi meva’a mé akusa bo a ngenane teke bo mvo’é. Éyoñe di a ne ngule ya jibi ôkon wé amu a bili ndi nleme na a ye beta bo mvo’é. Avale te da da, ndi nleme bi bili na Paradis a ye so ja volô bia na bi bo mbane ya jibi.

19. Mame mevé ma sili bia na bi ke ôsu a bo mbane ya jibi?

¹⁹ Avale bia te mane yen, Yéhôva a volô bia na bi bo mbane ya jibi minju’u bia tôbane mie a zene ya meye’elan, Kalate Zambe, bekristene bevok a ndi nleme bi bili. Nge bi kôme belan a mezene mete mese, Yéhôva a ye volô bia na bi jibi minju’u mise bia tôbane mie émo Satan ji akekui mia ye man.—Philip. 4:13.