Ye Yéhôva a ye fo’o yalane meye’elane mam?

1-2. Jé é ne bo na bi simesane na Yéhôva a yalane ki meye’elane mangan?

“YENE’E fe mvaé jôé be Yéhôva. A nnye a ye ve wo mame nleme wôé wo kômbô.” (Bsa. 37:4) Angôndô ya mbamba ngaka’a fo’o! Ve ye bia yiane yange na Yéhôva a ve bia mame mese bia sili nye été été? Amu jé é ne mfi na bi sili biabebiene nsili ôte? Bi tame nyoñe bive’ane bi: Nkoé sita wo ye’elane asu na ô ke Sikôlô bekañete mbamba foé ya Éjôé. Ve abui mimbu da lôte be teke wô bañete. Ésoé mojañe ja ye’elane Yéhôva na a volô nye na a yet mbia ôkon a ndeñele nye, asu na é kôme bo Yéhôva ésaé ékôane bekristene jé. Ve ôkone wé ô ne ve ke ôsu. Bebiaé ba ye’elan asu na mone wop a ke ôsu a wulu benya mejô. Ve mone wop a tyi’i na a lume Yéhôva mvus.

² Éko éziñe wo fe ô siliya Yéhôva jam éziñe ve teke je bi. Ô nga yiane jô womiene na Yéhôva a yalane fo’o ve meye’elane me bôte befe, sake meye’elane môé. Éko éziñ ô nga simesane fe na ô nga yiane bo mbia jam éziñ. Sita éziñe ba loone na Janiceb a nga wô’ôtane nalé. Ba nnôme be nga ye’elane Yéhôva na ba kômbô ke saé Béthel. Sita a jô na: “Me mbe me too ndi na ba ye ji’a loone bia.” Ve abui bengon a abui mimbu é nga lôte be teke loone be Béthel. Janice a jô na: “Me mbe éyôé, teke yem ane me bo. Me mbe me sili mamiene na jé fe me boya Yéhôva. Ane me nga jaé ye’elane nye na ma kômbô ke saé Béthel, amu jé Yéhôva a yalane ki meye’elane mam?”

3. Jé bia zu yen ayé’é di?

³ Biyoñe biziñe bi ne sili’i biabebiene nge Yéhôva a wô’ô meye’elane mangan. To’o biwôlô bebo bisaé be Yéhôva biziñe ya melu mvuse fe bi nga sili bebiene nsili ôte. (Job 30:20; Bsa. 22:2; Habak. 1:2) Jé é ne yemete ndi nleme jôé na Yéhôva a ye yalane meye’elane môé? (Bsa. 65:2) Asu na bi yalane nsili ôte bia zu taté jeñe biyalane ya minsili mi: (1) Jé Yéhôva a ye bo? (2) Jé Yéhôvah a yi na bi bo? (3) Amu jé é ne mfi biyoñe biziñe na bi tyendé mame bia sili Yéhôva meye’elan?

JÉ YÉHÔVA A YE BO?

4. Kalate Jérémie 29:12 a liti na jé Yéhôva a ka’ale na a ye bo?

⁴ Yéhôva a ka’ale na a ye vô’ôlô meye’elane mangan. (Lañe’e Jérémie 29:12.) Zambe wongan a nye’e bia amu bia wulu ba’aba’a a nye, ajô te a ye kôme baé alo éyoñ ése bia ye ye’elane nye. (Bsa. 10:17; 37:28) Ve nalé a nji tinane na a ye ve bia jôm ése bia sili nye. Bia ye bi biôme biziñe bia sili Yéhôva dene fo’o ve mfefé émo.

5. Jé Yéhôva a yange nté a vô’ôlô meye’elane mangan? Timi’in.

⁵ Yéhôva a yi na meye’elane mangane me wô’an a nsôñane wé. (Ésa. 55:8, 9) Ngabe jia ya nsôñane wé é ne na si nyi é jaé a befam a binga ba suk éto njôane jé a nleme wop ôse be too nlatan. Ve Satan a jô na bôte be ne dañe bo meva’a nge ba bo mam avale bebiene ba yi. (Mett. 3:1-5) Asu na Yéhôva a liti na Satan a ne nlaa minsos, a nga jô’é na môta binam a jôé émien. Ve njôane môta binam ô nga soo minju’u mise bia tôbane mie den. (Eccl. 8:9) Bia yeme na Yéhôva a ye mane kôme mame mete mese éyoñe ji. Nge a bo de, bôte béziñe be ne simesane na éjôé mona môte ja wulu nya abeñe, a na é ne ngule ya vaa minju’u mise bia tôbane mie.

6. Amu jé bia yiane tabe ndi na Yéhôva a ye bo kom ése jam é ne abeñ a zôsô?

⁶ Abui bôt é ne sili Yéhôva jame da meye’elan, ve a teke yalane be avale da. Éve’an é ne na éyoñe Njô bôt Ézéchias a nga fame mbia ôkon, a nga ye’elane Yéhôva na a volô nye na a bo mvo’é. Yéhôva a nga yalane meye’elane mé a bo na a bo mvo’é. (2 Bb. 20:1-6) Ve éyoñe Paul a nga ye’elane Yéhôva na a vaa nye “éyo . . . minsôn été,” éko éziñ éyo éte é mbe ôkon éziñ ô mbe ô ndeñele nye, ve Yéhôva a nji saé nye ôkon ôte. (2 Cor. 12:7-9) Bi tame ke kobô ajô nlômane Jacques ba nlômane Pierre. Njô bôte Hérode a nga yi na a wôé bese bebaane. Ékôane bekristen é nga ye’elan asu Pierre éko éziñ é nga ye’elane fe asu Jacques. Be nga wôé Jacques, ve Yéhôva a nga bo asimba asu na a nyii Pierre. (Mame mi. 12:1-11) Bi ne sili biabebiene na, ‘Amu jé Yéhôva a nga nyii Pierre ve teke nyi Jacques?’ Kalate Zambe a ve ki éyalane ya nsili ôte.c Ve jame bia yiane tabe de ndi é ne na mezene me Yéhôva me ne kom ése “zôsô.” (Bsa. 33:5) Ve bia yeme na Yéhôva a mbe a nye’e Pierre ba Jacques bese bebaane. (Nlitan 21:14) Biyoñe biziñ é ne kui na Yéhôva a yalane meye’elane mangan avale bi nji bunan. Ve mbôle bia yeme na Yéhôva a bo mame mé éyoñ ése a nye’an a zôsô, bia tatane ki a aval a te tyi’i na a yalane meye’elane mangan.—Job 33:13.

7. Jé bia jeñe na bi sa’ale, a amu jé?

⁷ Bia ve ngule ya bo te vek été jangan a ji bôte bevok. Éve’an é ne na, bi ne sili Yéhôva na a volô bia a zen éziñ, ve teke bi jame bia te sili nye. Mvuse ya valé bi nga wô’ô na môte mfe a nga sili Yéhôva jame bi nga sili nye, ve da yené ve ane a nga ve nye de. Sita a ne jôé na Anna a nga tebe aval été éte. Nnôme wé Matthieu a mbe a konô’ô cancer, ane a nga ye’elane Yéhôva na a volô nye na a bo mvo’é. Éyoñ éte ébien, minnôme besita mibaé ya ékôane bekristene fe mi mbe mi konô’ô cancer. Anna a nga de’ele Yéhôva mo na a volô Matthieu a besita bete bebaé. Besita bete be nga bo mvo’e, ve Matthieu a nga wu. Anna a nga taté na a sili émiene nge Yéhôva nnye a nga bo na besita ba bebaé be yet. Nde fe nge nnye a nga bo de, amu jé a nji bo na nnôme wé fe a bo mvo’é? É ne été na bi nji yem amu jé besita ba bebaé be nga bo mvo’é. Jame bia yem é ne na Yéhôva a ne ngule ya mane vaa minju’u mise bia tôbane mie, a na a bili nkômbane ya wômôlô bemvôé bé bese be maneya wu.—Job 14:15.

8. (a) Avale kalate Ésaie 43:2 a liti, aval avé Yéhôva a su’u bia? (b) Aval avé meye’elane me ne volô bia éyoñe bi tele minjuk été? (Fombô’ô vidéo a ne nlô ajô na Meye’elan ma volô bia na bi jibi minjuk.)

⁸ Yéhôva a ye su’u bia éyoñ ése. Mbôle Yéhôva a ne Ésa wongane ya nye’an, a nye’e ki éyoñe bia tôbane minjuk. (Ésa. 63:9) Ve a vo’o bo éyoñ ése na minju’u mi ne ane ôsôé a nduane mi bo te bia kui. (Lañe’e Ésaïe 43:2.) Ve a ka’ale bia na a ye volô bia na bi dañe mie. To’o bia tôban avale nju’u avé, a ye ve bia ngule ya ke ôsu a kañe nye. Yéhôva a ve fe bia mfufube nsisime wé asu na a volô bia na bi jibi. (Luc 11:13; Philip. 4:13) Nde ñhe bi ne tabe ndi na bia ye bi fo’o ve abime ngule da sili asu na bi jibi a ke ôsu a wulu ba’aba’a a Yéhôva.d

JÉ YÉHÔVA A YI NA BI BO?

9. Avale kalate Jacques 1:6, 7 a liti, amu jé bi yiane tabe ndi na Yéhôva a ye volô bia?

⁹ Yéhôva a yi na bi tabe nye ndi. (Héb. 11:6) Biyoñe biziñe bi ne yene na minju’u miangan mia lôte bia nkôñ. Bi ne taté na bia bi biyebe nlem a sili biabebiene nge Yéhôva é volô fo’o bia. Ve Kalate Zambe a ka’ale bia na, a mvolane Zambe, bi ne ngule ya “yôô aka’a meko’o yôp.” (Bsa. 18:29) Ajô te, bi nji yiane jô’é na biyebe bi jaé bia nlem, ve bia yiane ye’elane Yéhôva bi bili ngule mbunan, bi too ndi na a ye yalane meye’elane mangan.—Lañe’e Jacques 1:6, 7.

10. Va’a éve’ane ja liti aval avé bi ne bo mame ma wô’an a meye’elane mangan.

¹⁰ Yéhôva a yange na mame bia bo me lu’an a mame bia sili nye meye’elan. Éve’an é ne na mojañ a ne ye’elane Yéhôva na a volô na bemasa bé be kañese na a ke tabe beta étôkan. Aval avé Yéhôva a ne yalane meye’elane mete? A ne ve mojañ ayo’o ya ke laan a masa wé. Ve mojañ émiene nnye a yiane ke yene masa wé. É ne sili na a ke nye yen abui biyoñ. A ne fe sili môte ba nye ba saé nge a ne kañese na be tyendane mimôse mi ésaé. A nge nalé a sili, a ne jô masa wé na a ve nye mone awo’one to’o ba ya’ane ki nye mimôse mi awo’one mite.

11. Amu jé bia yiane ye’elane Yéhôva mbane asu mame ma tyelé bia nleme yôp?

¹¹ Yéhôva a yi na bi ye’elane nye mban a kate nye mame ma tyelé bia minleme yôp. (1 Thes. 5:17) Yésus a nga kôme liti na Yéhôva a ye ke ve bia mame méziñe bia sili été été. (Luc 11:9) Ajô te, te sili mo si! Ye’elane mban a nlem ôse. (Luc 18:1-7) Éyoñe bia ke ôsu a sili Yéhôva jam éziñ, bia liti nye na jam éte é ne bia mfi. Bia liti fe nye na bi too ndi na a ne volô bia.

AMU JÉ É NE MFI NA BI TYENDÉ MAME MÉZIÑE BIA SILI YÉHÔVA?

12. (a) Nsili ôvé bi ne bôône biabebien éyoñe bia sili mame méziñe meye’elane mangan, a amu jé? (b) Aval avé bi ne tabe ndi na bia semé Yéhôva éyoñe bia ye’elane nye? (Fombô’ô nka’ale ô ne na “Ye mame ma sili Yéhôva ma liti na ma semé nye?”)

¹² Nge bi nji bi jame bia te sili Yéhôva meye’elan, bi ne sili biabebiene minsili milale mi. Nsili ôsu, ‘Ye jame ma sili Yéhôva é ne ma mfi éyoñe ji?’ Biyoñe biziñe bi wô’ô simesane na bia yeme jame da dañe mfi asu dangan. Ve mame bia sili Yéhôva me ne bo mame me nji dañe mfi asu dangan. Nge bia ye’elane Yéhôva asu nju’u éziñe wo ndeñele bia, é ne kui na aval a ye yalane bia nde é dañe mvo’é a dañ avale bi mbe bi simesa’an. Nde fe bi ne sili mame méziñe me nji lu’an a nkômbane Yéhôva. (1 Jean 5:14) Bi ne nyoñ éve’ane bebiaé bia te jô be yôp. Be nga jô Yéhôva na a volô mone wop na a ke ôsu a wulu benya mejôô été. Jame ba sili Yéhôva é nji fo’o bo abé. Ve Yéhôva a vo’o yemete môt éziñe ya be bia na a kañe nye. A yi na bia bese, to’o bone bangan, bi nyoñe ntyi’ane ya kañe nye. (Deut. 10:12, 13; 30:19, 20) Nde bebiaé ba yiane ye’elane Yéhôva na a volô be na be nambe minleme mi bone bap asu na be nye’e Yéhôva a bo bemvôé bé.—Mink. 22:6; Éphé. 6:4.

13. Avale kalate Behébreu 4:16 a liti, éyoñ évé nje Yéhôva a ye volô bia? Timi’in.

¹³ Nsili baa ô ne na, Ye éyoñe Yéhôva a yiane yalane meye’elane mame ji?’ Biyoñe biziñe bi ne simesan na da sili fo’o na bi bi éyalane ya meye’elane mangan été été. Ve nya ajôô a ne na Yéhôva nnye a yeme mbamba éyoñ a ne volô bia. (Lañe’e Behébreu 4:16.) Éyoñe Yéhôva a nji yalane bia été été bi ne simesane na a te yalane bia na, ‘Momo.’ A too ke na Yéhôva a ke yiane yalane bia na, ‘Sake éyoñe ji.’ Bi tame beta zu kobô ajô ésoé mojañ é nga ye’elane Yéhôva na a volô nye na a bo mvo’é. Nge Yéhôva a nga ye bo asimba asu na mojañ ate a yet, Satan a nga ye ke ôsu a jô’ô na mojañ ate a kañe Yéhôva fo’o ve amu Yéhôva a nga bo na a yet. (Job 1:9-11; 2:4) Nde fe Yéhôva a teléya ngum éyoñ a ye zu mane saé aval akon ése. (Ésa. 33:24; Nlitan 21:3, 4) Ajô te, mojañ a nga yiane sili Yéhôva na a ve nye ngul a mvo’é ya nlem asu na a jibi ôkone wé, a ke ôsu a kañe Yéhôva a ngule jé ése.—Bsa. 29:11.

14. Jé nkañete Janice wo ye’ele bia?

¹⁴ Bi tame beta kobô ajô Janice a nga ye’elane na a kômbô ke saé Béthel. É nga sili na mimbu mitane mi lôt asu na a yen avale Yéhôva a nga yalane meye’elane mé. A jô na: “Yéhôva a nga belan éyoñ éte asu na a ye’ele ma abui mam a volô ma na me tu’a bo éwôlô kristen. Nalé a nga volô ma na me tu’a tabe nye mebun. Me mbe fe me yiane nyoñ éyoñe ya kôme yé’é Kalate Zambe étam, a é mbe fe é sili na me kôme wô’ô na me ne kañe Yéhôva vôm ase me ne a meva’a mese.” Mvuse ya valé, be nga jô Janice ba nnôme na be ke bo ésaé njomane bikôane bekristen. Éyoñe Janice a fombô ényiñe jé a jô na: “Yéhôva a nga yalane meye’elane mam, ve sake avale me mbe me simesa’an. É nga sili ma ayap éyoñ asu na me yemelane na Yéhôva a nga yeme yalane meye’elane mam. Ma ve Yéhôva akiba amu a nga volô ma na me wô’ôtane nye’ane wé a mvame jé.”

15. Amu jé é ne mfi biyoñe biziñe na bi sili Yéhôva mame mefe meye’elan été? (Fombô’ô fe befôtô.)

¹⁵ Nsili lale ô ne na, ‘Ye ma yiane sili Yéhôva jam afe?’ É ne mvo’é na bi kôme kate Yéhôva jame bia yi éyoñe bia ye’elane nye. Ve biyoñe biziñ é ne dañe mvo’é na bi bo teke dane ngôné jam bia yi meye’elane mangan asu na bi yemelane jame Yéhôva a yi na bi bo. Bi tame beta kobô ajô nkoé sita ô nga ye’elan asu na ô ke tabe Sikôlô bekañete mbamba foé ya Éjôé. A kômbô ke tabe sikôlô ate asu na a ke su’u ésaé nkañete vôme bekañete mbamba foé ba jemban. Ajô te, nté a mbe a kele’e ôsu a ye’elan asu na be bañete nye sikôlô ate, a nga yiane fe sili Yéhôva na a volô nye na a yemelane mezene mefe a ne nene ésaé nkañete jé. (Mame mi. 16:9, 10) Mvuse meye’elane mete a mbe fe ve sili njome bikôane bekristene wé na a kate nye bikôane bekristene bekpwa’a mefane ba jemban. A mbe fe ve tili wofise wo tebele ésaé, a sili wô bevôme bekañete mbamba foé ba jemban.e

16. Jam avé bi ne tabe de ndi?

¹⁶ Avale bia te yen, bi ne tabe ndi na Yéhôva a ye liti fulu nye’an a zôsô éyoñ a ye yalane meye’elane mangan. (Bsa. 4:3; Ésa. 30:18) Biyoñe biziñ a ne yalane bia avale bi nji be bi buna’an. Ve Yéhôva a ne étyi teke dibe melo meye’elane mangan. A nye’e bia angôndô ya abui. A ye ke ve’ele suu bia étame môs éziñ. (Bsa. 9:10) Ajô te kele’e ôsu a “tabe nye mebun biyoñe bise,” yoé nye nleme wé meye’elan été.—Bsa. 62:8.