Mbamba foé Luc a nga tili

18 Ane a nga nyoñe be éve’ane mfa’a ya liti be na ba yiane ye’elan éyoñ ése teke tek, 2 a jô’ô na: “Ntyi’i mejô a mbe tison éziñ a teke ko Zambe woñ, a teke ke semene môt éziñ. 3 Nkuse minga ô mbe fe tison éte, ô mbe ô kele’e nye yen éyoñ ése ô jô’ô na, ‘Bo’o na be tyi’i ma ajô zôsô zañe môte bia nye bi bili ajô nda mejô.’ 4 É ne été na, a nga ju’u ben, ve mvuse ya valé a nga jô émiene na, ‘Akusa bo me nji ko Zambe woñ, nge semene môt éziñ, 5 amu nkuse minga wu wo ke ôsu a dibe ma melo, ma ye bo na be tyi’i nye ajô zôsô, ndemben a ye ke bo mbane ya zu ndeñele ma a ajô dé, a va’a ma nlô mintaé.’”* 6 Nde Tate a nga jô na: “Akusa bo ntyi’i mejô nyi a ne ékotekot, vô’ôla’ané jam a nga jô! 7 Ajô te, ye Zambe a ye ke bo na mintobane mié mia yône nye mise môse ba alu mi tyi’ibane mejô zôsô nté a jibi mie? 8 Ma kate mia na, a ye bo na be tyi’i be mejô zôsô avôl avôl. Ve éyoñe Mona môt a ye so, ye a ye fo’o koone kane mbunan éte* si va?”

9 A nga beta nyoñ éve’ane ji asu bôte béziñe be mbe be simesa’ane na be ne zôsô, be yene’e ke bôte bevo’o na be ne zezé: 10 “Befame bebaé be nga bet a ke Temple na ba ke ye’elan, wua a too mone pharisien, nyu mbo’o ke nyoñe toya. 11 Mone pharisien a nga tebe tetele a taté na a ye’elane nleme wé été a jô’ô na: ‘A Zambe ma ve wo akiba amu me nji bo ane bôte bevo’o bese ba: miñwuwup, bikotekot, bebo mejian, nge ke aval ane nyoñe toya nyi. 12 Ma tyi bidi biyoñe bibaé sondô, ma ve ngap awômô ya biôme biame bise.’ 13 Ve nyoñe toya, a mbe a tele ôyabe teke kômbô bete mise yôp, ve a nga ke ôsu a bibi émien e tôé, a jô’ô na, ‘A Zambe, mvama’ane ma, mbo minsem.’ 14 Ma kate mia na, môte nyi, éyoñ a nga sis a bulane nda jé, a nga liti na a ne zôsô a dañe mone pharisien. Amu nyu ase a bete émiene yôp a ye silibane si, ve nyu a sili émiene si a ye betebane yôp.”

15 Bôte be nga zuu fe nye bone bap na a nambe be, ve éyoñe beyé’é be nga yene jam éte, be nga taté na ba komekane be. 16 Ve Yésus a nga loone bongô na be zu be nye a jô’ô na: “Jôka’ané bone be bongô be zu be ma, te jeñané na mi kamane be na be zu be ma. Amu Éjôé Zambe é ne asu avale bôte dap. 17 Ma kate fo’o mia na, mia yiane kañese Éjôé Zambe, aval ane mone mongô, nge mia bo te bo nalé, mi yeme’e na, mia ye ke nyiin été a zen éziñ.”

18 Évete bejuif é nga sili nye nsili é jô’ô na: “A mbamba Ñye’ele, jé ma yiane bo na me bi ényiñe ya nnôm éto?” 19 Yésus a nga jô nye na: “Amu jé wo loone ma na, mbamba? Susu’a môt é ne mbamba môt é ne fo’o ve Zambe. 20 Wo yeme metiñ: ‘Te bo mejian, te wôé môt, te wup, te bôte môt ajô, semé’é éso ba nyua.’” 21 Nde a nga jô na: “Metiñe mete mese ma tôñe me aso mongô.” 22 Éyoñ a maneya wô’ô mame mete, Yésus a nga jô nye na: “Jame da étam é ngenan é jemba’ane wo: Kele’e ku’ane biôme bise ô bili a kabe minzôzoé moné ate, a wo ye bi akum e yôp été; a za’a bo ñyé’é wom.” 23 Éyoñ a nga wô’ô jam éte, ane a nga bo mbia éyôé amu a mbe a bili abui akum.

24 Yésus a nga fombô nye a jô na: “Ngo’o aval ayaé jame na bôte be bili abui moné be nyiin Éjôé Zambe! 25 Yaa, é ne fo’o tyi’ibi na chameau a tulan abé ndôndo ba loé nye biyé a lôte na, nkukume môt ô nyiin Éjôé Zambe.” 26 Ba be nga wô’ô de, be nga sili na: “Za fo’o a ne bi bi ényiñ?” 27 A nga yalane na: “Mame me vo’o bobane mfa’a bôt, me ne bobane mfa’a Zambe.” 28 Ve Pierre a nga jô na: “Tame yen! Bi maneya li’i biôme biangan a tôñe wo.” 29 A nga jô be na: “Ma kate fo’o mia na, teke môt éziñ a nga li’i nda, nge minga nge bobenyañ, nge bebiaé nge bon amu Éjôé Zambe 30 a ye bo te nyoñe mame mete abui éyoñe ji ébien a ényiñe ya nnôm éto émo* ja zu.”

31 Ane a nga loone minlôman Awôm a mibaé fefel a jô mie na: “Tama yenan! Bia ke Jérusalem, a mame mese bekulu mejô be nga tili mfa’a Mona môte ma ye tôéban.* 32 Éve’an é ne na, ba ye ve nye mo me bôte ya meyoñ a ba ye kpwe’ele nye a ta* nye a tui nye menden. 33 Éyoñe be maneya bôme* nye ba ye wôé nye, ve môse lale a ye wômô.” 34 Ve be nji wôk atinane ya jame da ya mame mete, amu mejô mete me mbe be nsolan, a be nji wôk atinane ya mame me nga jôban.

35 A nga bo na, Yésus a ntoo bebé Jéricho, ndindime môt ô mbe ô too fefele njoñ ô jaké’é bôte biôm. 36 Amu ô nga wô’ô nsamba bôt ô lôte’e, nde ô nga taté na wo sili jame da lôtan. 37 Be nga kate wô na: “Yésus ya Nazareth nnye a lôte le!” 38 Ane ô nga yôtane na: “A Yésus, Mone David, mvama’ane ma!” 39 A bôte be mbe be tele ôsu be nga taté na ba komekane wô be jô’ô wô na ô dip anyu, ve ô nga tu’a bete tyiñ a jô na: “A Mone David, mvama’ane ma!” 40 Ane Yésus a nga tebe a jô na be zuu môt ate be nye. Éyoñ a nga kui nye bebé, Yésus a nga sili nye na: 41 “Jé wo yi na me bo wo?” A nga yalane na: “A Tate, bo’o na me beta yen.” 42 Ane Yésus a nga jô nye na: “Beta’a yen, mbunane wôé ô saéya wo.” 43 A été été a nga taté na a yen, a taté na a tôñe nye a va’a Zambe duma. Nde fe bôte bese be nga yene jam éte be nga ve Zambe duma.