Jé ma yiane bo asu na me bo Ngaa Yéhôva?

E kalate Matthieu 28:19, 20, Yésus émien a nga kate mame môt a yiane bo asu na a bo Ngaa Yéhôva. Bifuse bite bia kate bia mame môt a yiane bo nge a kômbô bo ñyé’é Krist. A yiane kobô, nge ke kañete Mejô me Yéhôva.

Jam 1: Ô yé’é jame Bible a ye’ele. Yésus a nga jô beyé’é bé na, be ‘bo bôte beyé’é . . . , a ye’ele be.’ (Matthieu 28:19, 20) Bôte ba jô na, “ñyé’é” a ne “môt a yé’é.” Ve Kalate Zambe, e dañedañe miñye’elane mi Yésus Krist bia koone mie Bible été, mia kate wo aval ô ne nyiñe mevak été, a avale ô ne bi mbamba ényiñ. (2 Timothée 3:​16, 17) Bi ne meva’a ya volô wo na, ô yeme miñye’elane ya Bible a zene ya ayé’é Kalate Zambe e zezé.​—Matthieu 10:​7, 8; 1 Bethessalonicien 2:​13.

Jame 2: Ô tôñe mame wo yé’é. Yésus a nga jô na, bôte ba wôk ba yiane fe “ba’ale (e bo) mam mese [a] nga bendé.” (Matthieu 28:20) Nalé a tinane na, ô nji yiane yé’é Kalate Zambe ve amu wo kômbô bi ñyeman, mame wo yé’é ma yiane tindi wo na, ô tyendé mfasane wôé a mefulu môé. (Mam minlôman 10:42; Beéphésien 4:​22-​29; Behébreu 10:24, 25) Bôte ba tôñe mebendé me Yésus ba bi nkômbane ya nyoñe ntyi’ane ya ve bebiene ngumba be Yéhôva Zambe.​—Matthieu 16:24.

Jame 3: Ô duban. (Matthieu 28:19) Kalate Zambe a ve’e mbaptizô a éyoñe ba jame môt. (Ve’e ôsimesan ôte a Beromain 6:​2-4.) Mbaptizô ô ne ane môt a wu mfa’a ya mbia ényiñe wé ya melu mvus, éyoñ éte a beta taté mfefé ényiñ. Éyoñe môt a duban, a liti bôt été na a boya mame mebaé m’ôsu Yésus a nga jôô me, éyoñe ji, a nga sili Yéhôva na a fubu mone môte ya nleme wé.​—Behébreu 9:​14; 1 Pierre 3:​21.

Aval avé me ne yem nge me nto ngule ya duban?

Kele’e laan a bemvendé ya akônda. Ba ye laan a wo asu na be yem nge ô nga kôme wô’ô mfi ya mbaptizô, nge ô nga tôñe mame wo yé’é, a nge ô veya womien ngumba be Yéhôva.​—Mam Minlôman 20:28; 1 Pierre 5:​1-3.

Ye mame mete ma fombô fe bone Bengaa be Yéhôva?

Ôwé. Bia yale bone bangan “meleb a e ñye’elan” Yéhôva été avale Kalate Zambe a jô bia na bi bo. (Beéphésien 6:4) Ve, nté ba yaé, bebien ba yiane nyoñe ntyi’ane ya yé’é, ntyi’ane ya kañese, a ntyi’ane ya tôñe miñye’elane ya Bible ôsusua na ba duban. (Beromain 12:2) Môt ase a ne fo’o fili ya tobe na a bo Ngaa Yéhôva nge momo.​—Beromain 14:12; Begalate 6:5.