Ô ne tabe ne mieññ éyoñ bibubua bia kui a éyoñe wo tôban étibila’a

1. Jé é ne “mvo’é Zambe,” a bibotane bivé bia bi éyoñ bi bili je? (Bephilippien 4:6, 7)

ÉMO ji é nji bi avale mvo’é éziñ. Mvo’é éte é ne “mvo’é Zambe,” mvo’é bi bili amu bi bili mbamba élat a Ésaa wongane ya yôp été. Éyoñe bi bili mvo’é Zambe, bia ko ke jôm éziñe woñ. (Lañe’e Bephilippien 4:6, 7.) Bi bili mbamba élat a bôte bevok ba nye’e Nye. Bi bili fe mbamba élat a “Zambe ya mvo’é.” (1 Bet. 5:23) Éyoñ bia yem Ésaa wongan, éyoñ bi too nye ndi, a éyoñ bia bo nye mewôk, mvo’é Zambe é ne ba’ale minleme miangan éyoñ bi tele mbia été.

2. Amu jé bi ne tabe ndi na bi ne bi mvo’é Zambe?

² Ye bi ne fo’o kôme bi mvo’é Zambe éyoñ bia tôbane minjuk aval ane bibubua bi akon, bibubua bia kui atemetem, éyoñe bôte ba bo ézezam nge ke éyoñe bia tôban étibila’a? Minju’u mite mise mi ne bo na bi ko woñ. Ve Yésus a nga lebe beyé’é bé na: “Te wô’an abé minlem mienan, nalé fe te koane woñ.” (Jean 14:27) Mbamba jam a ne na, bobejañ a besita be nga tôñe melebe me Yésus mete. A mvolane Yéhôva, be nga kui na be tabe ne mieññ nté be mbe be dañe’ beta minjuk.

Ô NE TABE NE MIEÑÑ ÉYOÑ BIBUBUA BI AKON BIA KUI

3. Aval avé beta b’akon a bibubua bi ne bo na bi jañele mvo’é jangan?

³ Beta b’akon nge ki bibubua bi akon bi ne tyendé abui mam ényiñ jangan. Bi tame zu yen aval avé COVID-19 a nga nambe abui bôt. Éyoñe be nga sili bôte minsili, abui bôt e nga jô na ébubua ôkon éte é nga bo na be jañele ôyo wop. É nga bo fe na bôt be tyelé minleme yôp abui, be kon dépression, be nyu meyok a nyoñ bedrogue aval e nji yian, nalé a nga bo fe na mendum me bôlé menda me bôt, a bôt béziñ be nga kômbô wôé bebien. Nge ébubua ja kui vôm ô too, jé é ne volô wo na ô bo teke tyelé nlem yôp a lôte nné a ba’ale mvo’é Zambe?

4. Amu jé nlem ô ne bômbô bia si éyoñ bia yem nkulan ajô Yésus a nga bo a lat a melu ma su’ulan?

⁴ Yésus a nga jô na melu ma su’ulan bibubua bi akon bia ye bo “mimfa’ abui.” (Luc 21:11) Aval avé mejô me Yésus mete ma volô bia na bi tabe ne mieññ? Bi nji ku avem éyoñ bia tem ébubua ôkon é nga taté. Bia yene fo’o ve na mam ma boban avale Yésus a nga jô. Bi bili mbamba amu ya tôñe melebe Yésus a nga ve bôte ba nyiñ melu ya asu’ulan éyoñ a nga jô na: “Te koane woñ.”​—Mt. 24:6.

5. (a) Avale Bephilippien 4:8, 9 a jô, jé bi ne sili meye’elan nté bia tôbane bibubua bi akon? (b) Mfi ôvé ô ne bi éyoñe wo vô’ôlô be enrégistrement audio ya Bible?

⁵ Ébubua ôkon é ne bo na bi ko woñ a tyelé minlem yôp tyi’ibi. Jam ete e nga kui sita Desi.b Éyoñ monyañ ésaa, ntôle mone monyañ mvendé ésaa, a dokita wé be nga wu COVID-19, a mbe a ko woñe ya be’e ôkon ôte a kôé wô nnôm nyia. Ôkon ôte ô nga ye fe bo na a jañele ésaé jé, nde a mbe a sili’ émien aval avé é bo asu na a kus bidi a ya’ane nda. Mam mete me nga bo na a taté na a bi biyebe nlem aval e ne na a kate ke ôyo alu. Ve Desi a nga su’ulane tabe ne mieññ. Jé é nga volô nye? A nga ye’elane Yéhôva na a volô nye na a tabe ne mieññ a na a volô nye na a bi mbamba b’asimesan. (Lañe’e Bephilippien 4:8, 9.) A nga wô’ô ane Yéhôva a “kobô” nye a zene ya benrégistrement audio ya Bible. A jô na, “Bôte be mbe be lañe’e’ be mbe be kobô’ô évôvoé été, nalé a nga volô ma na me bo teke beta tyelé nlem yôp a na me simesane na Yéhôva a nyoñe ngab a ma.”​—Bs. 94:19.

6. Aval avé ayé’é étam dôé a bisulane bi ne volô wo?

⁶ Éyoñ ébubua ôkon é ne, é nji bo tyi’ibi asu dangane na bi bo mam mese bi wô’ô jaé zu bia bo, ve te kañese na é bo wo na ô jô’é ayé’é étam dôé a ntaban bisulan. Minkañete mi bobejañ a besita bia koone mie bekalate a bevidéo bangan, mia liti na bobejañ ba ke ôsu a bo Yéhôva ésaé akusa bo ba tôban avale minju’u bia fe bia tôbane de. (1 P. 5:9) Bisulane bii volô wo na ô jalé ôsimesane wé a mbamba miñye’elane ya Kalate Zambe. Bii ve fe wo ngule nyul a fane ya ve bôte bevo’o ngule nyul. (Bero. 1:11, 12) Éyoñe wo nyoñ éyoñe ya simesan aval avé Yéhôva a nga su’u bebo bisaé bé éyoñe be mbe be konô’ô, éyoñe be mbe be ko woñ, nge ki éyoñe be mbe be wô’ôtane na be ne étam, mbunane wôé wo ye tu’a bo ngul a wo ye tabe ndi na Yéhôva é su’u fe wo biyoñe ya minjuk.

7. Mbamba éve’ela mbé nlômane Jean a liti bia?

⁷ Subu’u bobejañ a besita bebé. É ne été na ébubua ôkon é ne bo na bi bo teke subu bôte bevo’o bebé to’o éyoñe bi ne a Bekristen bevok. Jam ete e ne bo na ô wô’ôtan ane nlômane Jean. A mbe a kômbô’ô yene mvôé jé Gaïus a mis. (3 Jean 13, 14) Ve Jean a mbe a yeme’e na a vo’o yene Gaïus éyoñ éte. Nde jam a mbe ngule ya bo e mbe na a tili Gaïus kalate. Nge wo kate ke jome bobejañ a besita menda map éyoñ ése, ô ne jeñe na ô loone be téléfôn, ô bo beappel vidéo nge ke na ô tili be bekalate. Éyoñe wo laane mban a Bekristen bevok, nlem wé bômbô wo si ne mieññ a wé wô’ôtane na ô nji bo étam. Nge nlem ô tyele wo yôp loone bemvendé a kate be aval wo wô’ôtan, mvuse ya valé kañese’e mvolane bé ve wo.​—És. 32:1, 2.

Ô NE TABE NE MIEÑÑ ÉYOÑ ÉBUBUA JA KUI ATEMETEM

8. Aval avé ébubua ja kui bia atemetem é ne bo na bi tyelé nleme yôp a lôt nné?

⁸ Nge ô tôbaneya minjuk miziñ ényiñ aval ane ndôn mendim, mfô’ôsane si nge na biôm bi nga mane wo di’i nduan, ô ne lôt ayap éyoñ nlem ô tyele wo yôp. Nge ô nga jañele bôte wo nye’e nge ke biôm bi mo biôé, ô nga yiane wô’ô nlem angôndô ya mintaé. Ô nga yiane fe wô’ô womien angôndô ya éngôngol a simesane na ô ne zezé. Nalé a nji tinane na ô ne ôzañ akum nge ki na ô jañeleya mbunan. Nya ajôô a ne na wo ke dañe ngule meve’ele a nge bôt béziñ ba yen ô too éyôé, bé yeme wôk wo. (Job 1:11) Ve akusa bo mbia biyoñ bite bise, ô ne ngule ya tabe ne mieññ. Aval avé?

9. Aval avé Yésus a nga kômesane bia asu bibubua?

⁹ Te vuane jam Yésus a nga jô. Bôte béziñe ya émo ji ba simesane na bibubua bi vo’o kui be môs éziñ, ve bi bia yeme na bibubua bi mam bii tu’a bo abui a bibubua biziñ bi ne nambe bia. Yésus a nga kate beyé’é bé na ‘mimfô’ôsane mi si’ a bibubua bife bia ye boban ôsusua na asu’ulane da so. (Luc 21:11) A nga jô fe be na “mbia be mam ba ye bo abui,” jôm ete nje bia yen ane évô, mewôé me bôt a njet bi ne njalan émo ji den. (Mt. 24:12) Yésus a nji ve’ele jô môs éziñe na bôte ba bo ki Yéhôva ésaé étam mbe bé tôbane mam mete, abui bebo bisaé be Yéhôva fe e nga tôbane bibubua bite. (És. 57:1; 2 Bec. 11:25) Yéhôva a bo ki asimba éziñ asu na a kamane bebo bisaé bé éyoñ ébubua ja kui, ve a ve bia jam ése da sili asu na bi ke ôsu a tabe ne mieññ a ba’ale mvo’é jangan.

10. Aval avé bia liti na bi bili mbunan éyoñe bia kômesan asu bibubua? (Minkana 22:3)

¹⁰ Nge bia nyoñ éyoñe ya kômesan ôsusua na ébubua éziñ ja kui, é ne bo tyi’ibi asu dangane na bi tabe ne mieññ. Ve éyoñ bia nyoñ éyoñe ya kômesan asu ébubua éziñ, ye nalé a liti na bi nji tabe Yéhôva mebun? Momo. Éyoñe bia kômesan ôsusua na ébubua ja kui, nalé a liti na bi too ndi na Yéhôva a ne ngule ya nyoñe ngab a bia. Amu jé bia jô nalé? Kalate Zambe a jô bia na bi kômesan asu bibubua bi ne kui. (Lañe’e Minkana 22:3.) A zene ya bekalete mefoé, bisulan a mefoé, ékôane Yéhôva ja jaé ba’alane bia na bi kômesan asu bibubua bi ne kui.c Ye bi to Yéhôva ndi? Nge é ne nalé bia yiane tôñe melebe ba ve bia éyoñe ji​—ôsusua na bibubua bia kui.

11. Jé nkañete Margaret wo ye’ele bia?

¹¹ Bi tame zu yene jam e nga kui sita Margaret. Éyoñ afane ya vôm a mbe a too é nga kalane nduan, bijôé bi nga jô nye na a kôlô nda jé. Mbôle abui bôt e nga jeñe na e kôlô vôm ate éyoñe jia, minjoñe mi nga yem a bemetua a teke môt éziñ a mbe ve ke ôyap. Beta évindi ôtita a nga mane jaé vôm ase, a Margaret a nji be ngule ya kôlô metua wé été. Ve nge Margaret a nji wu, a ne amu a nga nyoñ éyoñe ya kômesan. Épwaé jé été, a mbe a ba’ale carte a mbe ve fombô asu na a yem njoñ a ne ke asu na a kôlô vôm ate. A nga taté fe dutu metua njoñ ôte asu na a bo ngule ya wulu été tyi’ibi éyoñ ébubua jé kui. Margaret a nga bo teke wu ébubua éte amu a nga nyoñ éyoñe ya kômesan.

12. Amu jé bia yiane tôñe melebe ba ve bia?

¹² Asu na bijôé bi ba’ale bia a véé mise na mam me wulu mvo’é, bi ne jô bia na bi bo teke kui nseñ mewolo méziñ, bi kôlô vôme bi too nge ke na bi tôñe mebendé mefe. Bôte béziñ be ne teke tôñe mebendé mete tyi’ibi amu be nji kômbô li’i biôm bi mo biap. Ve Bekristene ki ba yiane bo aya? Kalate Zambe a jô bia na: “Mi bo’an njoan ôse ya bôt mewô’ô amu Tate: ja’ana njô bôt, ane nyô ya ôsu; nge begouverneur, ane ba ba lômbane be nye.” (1 P. 2:13, 14) Ékôane Yéhôva ja ve fe bia meleb asu na bi bo teke tyelé nleme yôp. Ja jaé jô bia na bi ve bemvendé nombo nkole bia belane je, ndembene be ne ji’a loone bia éyoñ ébubua ja kui atemetem. Ye ô boya de? Be ne fe bia ve meleb a lat a vôme bia yiane kôlô, vôme bia yiane ke tabe, avale bi ne bi biôm bia sili nge ke meleb a lat a aval a éyoñe bi ne ke volô bôte bevok. Nge bi bo melo, bi ne telé binyiñe biangan a binyiñ bemvendé mbia été. Te vuane na bemvendé bete ba nyoñe ngab a bia. (Beh. 13:17) Margaret a nga jô na, “Me too ndi a nleme wom ôse na nge me ngenane me vee den a ne amu me nga tôñe melebe bemvendé a ékôane Zambe be nga ve ma.”

13. Jé é nga volô abui Bekristen e nga li’i menda map na be ba’ale avak dap a tabe ne mieññ?

¹³ Abui bobejañ a besita e nga li’i menda map amu bibubua, bita nge ke ézezam. Be nga ve ngul ése na be yemban a mfefé été wop a ve ngul na be bo abim ése be mbe ngule ya bo asu na be ke ôsu a bo Yéhôva ésaé. Aval ane Bekristene ya ntete mimbu ôsu be nga mane tyamelan amu étibila’a, ba ke ôsu “a kate bôt mejô me Zambe.” (Mam. 8:4) Ésaé nkañete ja volô be na be bem ôsimesane wop Éjôé Zambe sake minju’u ba tôbane mie. Jam ete da volô be na be tabe ne mieññ a ba’ale ava’a dap.

Ô NE TABE NE MIEÑÑ ÉYOÑE WO TÔBAN ÉTIBILA’A

14. Aval avé étibila’a é ne ndeñele mvo’é jangan?

¹⁴ Étibila’a é ne bo na bi bo teke beta bi mam ma volô bia na bi tabe ne mieññ. Bi ne mevak éyoñ bi bili fili ya tabe bisulan, éyoñe bia kañete teke éndeñela a éyoñe bia bo mam bi wô’ô bo môs ôse teke ko woñe na bé bi bia. Nge bi jañele fili ya bo mam mete, minleme mi ne bia tyebe yôp a bi ne taté na bia ko woñ asu mam mé bobane melu ma zu. Asimesan ete e nji bo abé, ve bia yiane tabe ntyel. Yésus a nga jô na étibila’a é ne bo na beyé’é bé be kolé ôbak. (Jean 16:1, 2) Nde aval avé bi ne tabe ne mieññ éyoñe bia tôban étibila’a?

15. Amu jé bi nji yiane ko étibila’a woñ? (Jean 15:20; 16:33)

¹⁵ Kalate Zambe a jô bia na: “Bôte bese ba kômbô tabe aval ntabane ya be Zambe be Krist Yésus ba ye jibi ékpwe’ele.” (2 Tim. 3:12) Mojañ éziñ a too jôé na Andrei a nga yen ayaé ya kañese jam ete éyoñe bijôé bi nga tyili ésaé jangan si jé. A nga jô na: ‘Bengaa be Yéhôva be ne angôndô ya abui vôma nyi, aval avé bijôé bii bo asu na bi mane bi bia bese?’ Ve nalé a nji bôône nye nleme si, ôsimesan ôte ô nga tu’a nye tyelé nleme yôp. Bobejañ bevo’o ki be nga jô’é mam mese mo me Yéhôva, a be nji ve’ele simesane na be vo’o be bi môs éziñ. Be mbe be yeme na e ne kui na be bi be, ve be nji be be tyelé’é minleme yôp ane Andrei. Andrei a nga su’ulane tyi’i na a zu futi ndi jé ése be Yéhôva ane be. Éyoñe di nlem ô bôô nye si ne mieññ a kui fe na a ba’ale ava’a dé akusa bo a ngenan a tôban abui minjuk. Jam ete e ne fe bia kui. Éyoñe Yésus a nga jô na bii tôban étibila’a, a nga jô fe na bi bo ngule ya ba’ale élat jangan a Yéhôva.​—Lañe’e Jean 15:20; 16:33.

16. Miñye’elane mivé bia yiane tôñ éyoñe bia tôban étibila’a?

¹⁶ Éyoñe bijôé bia tyili ésaé jangan, Béthel a bemvendé be ne bia ve mebendé méziñ. Ba bo de asu na be ba’ale bia, be yemelane nge bia ke ôsu a bi bidi ya nsisim abim da yian, a volô bia na bi ke ôsu a kañete abime bi ne ngule ya bo. Va’a ngule jôé ése na ô tôñe miñye’elane ba ve wo, to’o wo kôme ki wôk amu jé ba ve wo mie. (Jc. 3:17) Nde fe te ve’ele kobô mam ma fombô bobejañ a besita ya akônda nge mam ma boban akônda be bôte be nji yiane yeme me.​—Éc. 3:7.

17. Aval ane minlômane ya ntete mimbu ôsu, bia yiane nyoñe ntyi’ane ya bo jé?

¹⁷ Jam ôsu da tindi Satan na a wosane bebo bisaé be Zambe e ne na, ba kañete bôt ajô Yésus. (Nli. 12:17) Te ve’ele kañese na Satan a émo jé be bo wo na ô ko woñ. Éyoñe bia kañete a ye’ele bôte mejô me Zambe akusa bo mewosan nalé a so bia mvo’é. Ntete mimbu ôsu éyoñ bijôé Bejuif bi nga jô minlômane na mi telé ésaé nkañete, bitôtôlô Bekristene bite bi nga tobe na bia bo Zambe mewôk. Be nga ke ôsu a kañete a esaé éte é nga soo be abui mevak. (Mam. 5:27-29, 41, 42) É ne été na éyoñ bijôé bia tyili ésaé nkañete jangan, bia yiane bo ntyele éyoñe bia kañete. (Mt. 10:16) Ve nge bi bo abim bi ne ngule ya bo, bia ye tabe ne mieññ amu bia bo nkômbane Yéhôva a amu bia kañete foé ja nyii bôt.

“ZAMBE YA MVO’É A YE TABE BE [WO]”

18. Za étam a ne ve bia mvo’é ja sili bia?

¹⁸ Tabe ndi na ô ne tabe ne mieññ to’o éyoñe wo tôbane meve’ele. Avale biyoñ bite te vuane na mvo’é ja sili wo é ne mvo’é Zambe, nje é ne mvo’é Yéhôva étam a ne ve bia. Tabe’e nye mebun éyoñe wo tôbane bibubua bi akon, bibubua bia kui atemetem, nge ke étibila’a. Tabe’e ékôane jé bebé. Simesane mbamba be mam ba yange wo melu ma zu. Nté wo bo de, “Zambe ya mvo’é a ye tabe be [wo].” (Beph. 4:9) Ayé’é da zu, bi yen aval avé bi ne volô Bekristen bevok ba tôban étibila’a na be bi mvo’é Zambe.