Beyé’é ba yiane wume bibuma a bo bemvôé be Yésus

Yésus a maneya bo beta nkañete a te volô na a nambe beyé’é bé minlem. Alu é ntoo abui, éko éziñe na zañ alu. Éyoñe ji, Yésus a ve éve’ane ja ve ngule nyul.

A taté a jô’ô na: “Ma me ne nya ndik, Ésaa wom ki nye a bo ésaé ya été.” (Jean 15:1, Mfefé Nkôñelan) Nkana wé wo funane jam be nga jô den a nga ke mintet mimbu a lat a ayoñ Israël be mbe be loone na, ndi’i woone Yéhôva. (Jérémie 2:21; Osée 10:1, 2) Ve da, Yéhôva a mbeme zu lum ayoñ ete mvus. (Matthieu 23:37, 38) Nde Yésus a liti mfefé jam: nnye a ne ndi’i woon Ésa wé a bé nté ane a nga wo’o nye mbon a zene ya mbamba nsisim e mbu 29 É.J. Ve a liti na ndi’i wo fombô fe jam afe éyoñ a jô na:

“Éfa’alé ése é tii be ma te wum bibuma, [Ésa wom] a tyi’i je, a e ji ése ki ja wum bibuma a seb je na é wum bibuma abui. . . . Aval éfa’alé é se ngule ya wum bibuma étam, nge é nji timbi be nyia ndik, avale te fe mia nge mi nji tabe be ma. Ma me ne nyia ndik woon, mi ki bifa’alé.”​—Jean 15:2-5, Mfefé Nkôñelan.

Yésus a nga ka’ale beyé’é bé ba wulu ba’aba’a a nye na, mvus nkeane wé, a ye lôme be mvolô, nnye a ne mbamba nsisim. Mvuse melu mewôme metan a alu da, éyoñe minlôman a bôte bevo’o be nga bi mbamba nsisim ate, be nga bo fo’o bifa’alé ya ndi’i woon ôte. A “bifa’alé” bise bia yiane bo jôme jia a Yésus. Asu na be bo jé?

Yésus a jô na: “Môt a tabe be ma, me fe be nye, nnye ate a wum bibuma abui amu nge me ne momo, mi se ngule ya bo jam.” “Bifa’alé” nge na, beyé’é ba wulu ba’aba’a a nye, bia yiane wum abui bibuma mfa’a ya vu mefulu mé a zene ya kañete mbamba foé ya Éjôé Zambe a éva’a ése, asu na be bo beyé’é befe. Jé ja ye kui be môt a ye ke ôsu a bo jôme jia a Yésus a te wume bibuma? Yésus a jô na: “Nge môt a bo te tabe be ma, wôna be aye wua nye fé.” Ajô te a beta jô na: “Nge mi atabe be ma, a mejô mam me atabe be mia, wôna jaka’ane jam mi anye’e, mi aye yene de.”​—Jean 15:5-7.

Éyoñe ji, Yésus a beta jô jam a jôya biyoñe bibaé, mfa’a ya ba’ale metiñe mé. (Jean 14:15, 21) A liti beyé’é bé zene ja ye bo na, be yeme na ba bo de a jô’ô na: “Nge mi aba’ale metiñe mam, mi aye tabe ane me anye’e; aval ane me nga ba’ale metiñe me Tate, a tabe ane a nye’e.” Ve da, be nji yiane su’u ve na ba nye’e Yéhôva ba Mone wé. Yésus a jô na: “Me a tiñeti mia atiñe dina, miabebien nye’esa’ane, aval ane me nga nye’e mia. Nye’an bôt be anye’e ô nji dañ ajô di na, môt a ve ényiñe jé amu bemvôé bé. Mi ne bemvôé bam, nge mi abo mam ma jô mia.”​—Jean 15:10-14.

Bone mewolo ma zu tôñe valé, Yésus a zu liti nye’ane wé éyoñ a zu ve ényiñe jé asu bôte bese ba buni nye. Éve’ela jé ja yiane tindi beyé’é bé na be’ fe be liti avale nye’an ete be be. Nye’an ôte wo ye bo na be tu’a yeme beza be ne fo’o beyé’é be Yésus aval a tatéya de jô mvus: “Zene nyô bôte bese be aye yeme na mi ne beyé’é bam, nge mi anye’esan.”​—Jean 13:35.

Minlôman mia yiane ba’ale na Yésus a loone be na “bemvôé bam.” A liti be amu jé a loone be nalé a jô’ô na: “Me maneya loone mia bemô; amu mam mese me nga wô’ô be [Ésa] wom, me maneya kate mia me.” Avale beta mvome di! E bo bemvôé be Yésus, a yeme mam Ésa wé a nga kate nye! Ve jame da, asu na be bu’uban a amvôé te, ba yiane ke ôsu a “wume bibuma.” Nge ba bo nalé, Yésus a jô na: “Mam mese jam mi aye ja’é [Ésa] a jôé dam, a ye ve mia de.”​—Jean 15:15, 16.

Nye’an beyé’é bé, “bifa’alé,” bia ye bi e zañe jap, wo ye volô be na be jibi meve’ele ba ye tôban ôsu. Ja’a a liti be na émo ja ye feme be, Yésus a ve fe be ngule nyul a jô’ô na: “Nge bôte ya si nyô be avini mia, mi ayeme na, a ma a mia, ma be nga taté vini. Nge mi nga to bôte ya si nyô, ve bôte ya si nyô be nga nye’e bôte bap: ve amu mi nji bo bôte ya si nyô, . . . ajô te bôte ya si nyô be avini mia.”​—Jean 15:18, 19.

A beta liti amu jé émo ja ye vini be, Yésus a jô fe na: “Ve mam ma mese be aye bo mia amu jôé dam, amu be nji yeme môt a nga lôme ma.” Yésus a liti na mesimba mé ma bo na bôte ba vini nye be bi mekua: “Nge me nji bo mam môt mfe a nji bo vôm be nga to, ve be nji bo abé: ve éyoñe ji be maneya yen, a vini bia Ésa wom.” Évini jap ja tôé nkulan ajô.​—Jean 15:21, 24, 25; Besam 35:19; 69:4.

Yésus a beta jô na a ye lôme mvolô, mbamba nsisim. Beyé’é bé bese be ne ngule ya bi beta ngul ate, a mbamba nsisim a ne volô be na be wum bibuma, nge na e ‘kañete ajô Yésus.’​—Jean 15:27.