A ye’ele Nicodème alu été

Nté Yésus a ne Jérusalem asu Pentecôte ya mbu 30 É.J., a bo mesimba. Amu nalé, abui bôte da buni nye. Nicodème, mone Pharisien, ébua jia ya beta nda mejô Bejuif ba loene na Sanhédrin, a ne fe’e ne vema. Nde, mbôl a kômbô tu’a yeme mam a yen, a ke jome Yésus alu été amu a ko woñe na, Bejuif be ne betebe ôsu bevok, be za yene nye a bolé nye éyôlé.

Nde Nicodème a jô na: “A Rabbi, bi ayeme na ô ne ñye’ele bôt ô nga so be Zambe; amu te ke môt a ne ngule ya bo beta be mam ane wo abo, ve Zambe a to be nye.” Ane Yésus a jô Nicodème na, asu na môt a nyiin Éjôé Zambe, môt ate a yiane “beta bialé.”​—Jean 3:2, 3.

Ane Nicodème a sili nye na: “Môt a nto nnôm a ne ngule ya beta bialé aya? Ye a ye beta bulan abume nyia, a bialé?”​—Jean 3:4.

Ba’ale na, sa ke nne e beta bialé a tinane nalé. Yésus a timine na: “Nge môte teke bialé a mendim a nsisim, a se ngule ya nyiin Ejôé Zambe.” (Jean 3:5, Mfefé Nkôñelan) Éyoñ Yésus a nga duban a na mbamba nsisim a nga sise be nye, éyoñ éte nje a nga bialé “a mendim a nsisim.” Nde tyiñ é nga so yôp été é jô’ô na: “Nyina a ne Mone wom me anye’e, me lô nye mvaé.” (Matthieu 3:16, 17) Zambe a nga liti a zen éte na, Yésus a nto mone wé mfa’a ya nsisim, a na a nto ngule ya nyiin Ejôé ya yôp. E Pentecôte ya mbu 33 É.J., bôte bevok be ne nduan ba ye nyoñe mbamba nsisim, a ba ye beta bialé mfa’a ya nsisim a bo bone be Zambe.​—Mam Minlôman 2:1-4.

E nji bo tyi’ibi na Nicodème a wô’ô jame Yésus a kômbô ye’ele nye a lat a Éjôé. Nde Yésus a liti nye mam mefe me ne volô nye na, a yeme beta ésaé a bili si va, ane Mone Zambe. Yésus a jô na: “Ane Moïse a nga bete nyo [mvot akôn] fé été, nalé fe Mone Môt a yiane betebane yôp; ajô te nde bôte bese môt a buni nye a ye tabe ényiñ ya melu mese.”​—Jean 3:14, 15.

Melu mvus, bone b’Israël bese nyo é nga lôp be mbe be yiane fombô nyo mvot asu ya na be bo teke wu. (Nlañane Bôt 21:9) Avale da, môta binam ase a yiane futi mbunane wé be Mone Zambe asu ya na a kôtéban abé a awu, a bi ényiñe ya melu mese. Asu na a liti Nicodème beta nye’ane Yéhôva a bili mfa’a ôte, a kate nye na: “Amu beta nye’an Zambe a nga nye’e bôte ya si nyô, a nga lôm atyi’i Mone dé, ajô te bôte bese môt a buni nye, a ye jañ, ve tabe ényiñ ya melu mese.” (Jean 3:16) Nde mvuse ngon ésaman éyoñe Yésus a tatéya ésaé jé e Jérusalem, a liti na nnye a ne zene ya ényiñ asu môta binam.

Yésus a jô Nicodème na: “Zambe a nji lôme Mon wé si nyô amu na a tyi’i si nyô mejô.” Nalé a tinane na, a nji lôme nye na a zu tyi’i si nyô mejô a tyi’i na, bôte bese ba yian awu. Ve ane Yésus a jô, be nga lôme nye “ve na si ndôn é bi ényiñ amu Mon.”​—Jean 3:17, Mfefé Nkôñelan.

Amu Nicodème a te fo’o ko woñ, nde a te zu yene Yésus e dibi été. Nde, é ne mfi ya yeme na, Yésus a mane minlañe be bili a mejô ma: “Ajô te e ne na, éfufup [ji Yésus a né a zene ya ényiñe jé a ñye’elane wé] é nga zu si nyô, ane bôt be nga nye’e dibi, te nye’e éfufup: amu mam be nga bo me mbe abé. Amu môt ase a bo abé a vini éfufup, te zu vôm éfufup é né, mam a nga bo me za ve nye mekua. Ve môt a bo benya mame, nnye a zu vôm éfufup é né, amu a kômbô bôt be yeme na, mam a nga bo, a nga bo me a ngule Zambe.”​—Jean 3:19-21.

Nicodème, beta ñye’ele y’ayoñ Israël a Pharisien, nnye a yiane ñhe fas éyoñe ji, mam mese Yésus a te kate nye me fombô ésaé a yiane bo a lat a nsôñane Zambe a bili.