NLÔ AJÔ 46
Amu jé wo yiane ve womien ngumba be Yéhôva a duban?
Wo ve womien ngumba be Yéhôva éyoñe wo ka’ale nye meye’elan été na wé kañe ve nnye étam, a na nkômbane wé ñwô wé telé ôsu ényiñe jôé. (Besam 40:8) Mvuse ya valé nje wo duban. Wo liti bôte bevo’o a zen éte na ô veya womiene ngumba be Yéhôva. Ntyi’an ôte ô ne wu wo dañe mfi ényiñe jôé ése. Jé é ne ve wo nkômbane ya nyoñ avale beta ntyi’an ete?
1. Jé ja ve môt nkômbane ya ve émien ngumba be Yéhôva?
Bia ve biabebiene ngumba be Yéhôva amu bia nye’e nye. (1 Jean 4:10, 19) Kalate Zambe a jô na: “Nyeke’e Éso Zambe wôé a nleme wôé ôse, a nsisime wôé ôse, a nlô wôé ôse, a ngule jôé ése.” (Marc 12:30) Bia liti na bia nye’e Yéhôva sa ke ve a mam bia jô, bia bo fe de a mimboone miangan. Fam ba minga ba nyoñe ntyi’an ya lu’an éyoñe ba nye’esan, avale te fe, nye’ane bia nye’e Yéhôva ñwô wo tindi bia na bi ve biabebiene ngumba be nye, a na bi duban.
2. Bibotane bivé Yéhôva a ve bebo bisaé bé be dubaneya?
Éyoñ wo duban, wo bo ébu’a ya nda bôte Yéhôva. Nalé a bo na ô bu’ubane nye’ane wé abui mezen, a na ô tu’a nye subu bebé. (Lañe’e Malachie 3:16-18.) Ane ô vaa na Yéhôva é bo Ésaa wôé, wé bi fe beta nda bôte ya nsisim a too njalan a bobejañ a besita ya si se meku’u menyin ba nye’e nye a ba nye’e fe wo. (Lañe’e Marc 10:29, 30.) Ve ôsusua na wo baptizôban, wo yiane bo mam méziñ. Wo yiane yé’é mam a lat a Yéhôva, a jeñe na ô nye’e nye. Wo yiane fe liti na wo buni Mone wé. Mvuse ya valé, wo yiane ve womien ngumba be Yéhôva. Nge ô bo mam mete mese, éyoñe te fe wo duban, wo ye wulu zene ja kee wo ényiñe ya melu mese. Kalate Zambe a jô na: “Mbaptizô . . . [wo] nyii mia éyoñe ji.”—1 Pierre 3:21.
TUKA’A FAK
Yene’ amu jé é ne mfi asu dôé na ô ve womien ngumba be Yéhôva, a duban.
3. Bia bese bia yiane tobe za nnye bia ye kañ
Bone b’Israël béziñ be mbe be buni’i na be ne kañe Yéhôva be kañe’e fe évuse zambe Baal. Ve Yéhôva a nga lôme nkulu mejô Élie na a ke sôan ôsimesan ôte. Lañe’e 1 Bejô bôt 18:21, mvuse ya valé, yala’ane nsili wu:
Ntyi’an ôvé bone b’Israël be mbe be yiane nyoñ?
Aval ane bone b’Israël, wo fe wo yiane tobe za wé kañ. Lañe’e Luc 16:13, mvuse ya valé, yala’ane minsili mi:
Amu jé bi vo’o kañe Yéhôva bi kañe’e fe môte mfe nge ke jôm éfe?
Aval avé bi ne liti Yéhôva na nnye bia te tobe na bia kañ?
4. Bindi’i nye’ane Yéhôva a nga liti wo
Yéhôva a nga ve bia bese das meval abui. Jé bi bi ne ve nye? Futi’i VIDÉO.
Mam mevé Yéhôva a nga bo asu na a liti na a nye’e wo? Lañe’e Besam 104:14, 15 a 1 Jean 4:9, 10, mvuse ya valé, yala’ane minsili mi:
Mam Yéhôva a nga ve wo, mevé wo dañe nye’e?
Mam mete ma bo na ô yene Yéhôva aya?
Éyoñ môt a ve wo das wo nye’e abui, nga ô wô’ô bi nkômbane ya ve nye akiba? Lañe’e Deutéronome 16:17, mvuse ya valé, yala’ane nsili wu:
Éyoñ wo yene mam mese Yéhôva a nga bo asu dôé, jé wo kômbô bo asu dé?
5. Éyoñe wo ve womien ngumba be Yéhôva, wo bi abui bibotan
Abui bôte da buni na akum, mbamba asu ésaé, nge ke abui moné mbie bia soo mevak. Ve ye nalé a ne été? Futi’i VIDÉO, mvuse ya valé, yala’ane minsili mi:
Akusa bo môt ate a mbe a nyeke’e nléan ébuma, amu jé a nga kandan a ésaé éte?
A nga tyi’i na a ve émien ngumba be Yéhôva, sa ke nléan ébuma. Ye wo simesane na a nga nyoñe mbamba ntyi’an? Amu jé?
Ôsusu’a na nlômane Paul wo bo Kristen, a mbe a yi na a bo beta môt. Beta ñye’ele ya ñyebe Bejuif nnye a nga ye’ele nye metiñe map. Ve Paul a nga li’i mam mete mese mvus asu na a bo Kristen. Ye a nga jôbane ntyi’an ôte? Lañe’e Bephilippien 3:8, mvuse ya valé, yala’ane minsili mi:
Amu jé Paul a nga jô na mam mese a nga bo ôsusua na a bo Kristen me ne “biôme ya wua fé”?
Bibotan bivé a nga bi?
Ye wo simesane na ényiñe jôé jé tu’a bo mvaé nge wo tyi’i na wo kañe Yéhôva? Amu jé?
Éyoñ Paul a nga bo Kristen, a nga bi abui bibotan a lôte mam a nga li’i mvus
BÔTE BÉZIÑ BA JÔ NA: “E ve Zambe ényiñe jôé a nji bo mbamba ntyi’an.”
Ye wo simesane na môt a ve émiene ngumba be Yéhôva a nyoñe mbia ntyi’an? Amu jé?
ÔBALEBAS
Bia ve biabebien ngumba be Yéhôva a duban amu bia nye’e nye.
Ô ne yalan aya?
Amu jé bia yiane nye’e Yéhôva a kañ ve nnye étam?
Aval avé Yéhôva a botan bebo bisaé bé be dubaneya?
Ye wo kômbô ve womien ngumba be Yéhôva?
MAM MEFE ME NE VOLÔ WO
Yene’ amu jé mbôm mezik a nlé ébuma be nga nyoñe ntyi’an na ba ve bebien ngumba be Yéhôva.
Minsili bisoé bia sili bebien—Ma ye bo ényiñe jam aya?—Éyoñe ma fombô mvus (6:54)
Yene’e mam mefe me ne ve wo nkômban ya ve womiene ngumba be Yéhôva.
“Pourquoi se vouer à Jéhovah ?” (Nkume mmombô a bete ya Ngon ôsu é too melu 15, mbu 2010)
Jia éte ja liti meva’a befam a binga ba ve bebiene ngumba be Yéhôva ba bi.
Asu na ô yem jam e nga tindi minga éziñ na a tyendé minsôñane mié, lañe’e nlô ajô, “Pendant des années, je me suis demandé pourquoi on existe.”
“La Bible transforme des vies” (Nkume mmombô a bete ya Ngon awôm a jia é too alu da, mbu 2012)