NLÔ AJÔ 47
Ye ô nto nkômesan ya duban?
Ô yé’éya abui mam a lat a Yéhôva nté ane ô nga taté na wo yé’é Kalate Zambe. Éko éziñ ô boya mintyendan miziñ asu na ô tôñ mam ô nga yé’é. Ve ye jam éziñ e nga’an e kama’ane wo na ô ve womien ngumba be Yéhôva a baptizôban? Ayé’é di dé liti minju’u mi nga kamane bôte béziñ na be duban, a aval avé ô ne dañe mie.
1. Abime ñyeman avé wo yiane bi ôsusua na wo duban?
Asu na ô baptizôban, wo yiane “yem benya mejôô.” (1 Timothée 2:4) Nalé a tinane ki na wo yiane yem éyalan ya minsili mise bôt be ne sili wo a lat a Kalate Zambe. To’o Bekristen be dubaneya den a nto abui mimbu be ngenane be kele’ ôsu a yé’é Kalate Zambe. (Becolossien 1:9, 10) Ve da sili na ô yem mintene miñye’elane ya Kalate Zambe. Bemvendé ya akônda dôé bé volô wo na ô yem nge ô mbili abime ñyeman da yian.
2. Mam mevé wo yiane bo ôsusua na wo duban?
Ôsusua na môt a duban, a yiane ‘kôñelane nlem a bulan.’ (Lañe’e Mame minlôman 3:19.) Nalé a tinane na wo jôbane mbia be mam bese ô nga bo melu mvus, a ye’elane Yéhôva na a jamé wo. Wo yiane fe ve ngule ya sa’ale mbia mimboon, a nyoñe ntyi’ane ya nyiñ avale Zambe a wô’ô mvaé. Nde fe, wo yiane taté na wo tabe bisulane mban a bo ésaé nkañete.
3. Amu jé wo yiane ki koo jôm éziñ woñ?
Bôt béziñ ba koo woñe na ba ye ke kui na be tôé ngaka’a be nga bo Yéhôva. E ne fo’o kui na ô bo bikobe biyoñe biziñ, aval ane bebo bisaé be Zambe bevok be nga bo. Ve Yéhôva a yeme na bebo bisaé bé be vo’o bo zôsô ne tiññ. (Lañe’e Besam 103:13, 14.) A wô’ô mvaé éyoñ wo ve ngule jôé ése na ô bo nye ésaé! Nde fe, émien é volô wo. A ka’ale bia na, teke jôm éziñ é ne “bo ngule ya vaa bia mfa’a ya nye’ane [wé].”—Lañe’e Beromain 8:38, 39.
TUKA’A FAK
Yene’ aval avé wo ye kui na ô dañe minju’u mi ne kamane wo na ô duban nge wo tu’a yeme Yéhôva a kañese mvolane wé.
4. Jeñe’e na ô tu’a yeme Yéhôva
Abime mam avé wo yiane yem a lat a Yéhôva ôsusua na wo duban? Abime ñyeman ô bili da yiane wo ve nkômbane ya nye’e nye a ve nye nlem avak. Futi’i VIDÉO asu na ô yen aval avé beyé’é Bible ya si se be nga kui na be bo de. Mvuse ya valé, yala’ane nsili wo tôé valé.
Jé é nga volô bôte béziñ na be kômesan asu mbaptizô?
Lañe’e Mame minlôman 17:11, mvuse ya valé, yala’ane minsili mi:
Ye ô bili bisô nlem a lat a mam Kalate Zambe a ye’ele, nge ke na wo sili womien nge Bengaa be Yéhôva ba ye’ele fo’o benya mejôô?
Nge é ne nalé, jé ô ne bo?
5. Dañe’e minju’u mi ne kamane wo na ô duban
Éyoñ môt a nyoñ ntyi’ane ya ve émien ngumba be Yéhôva a duban, a wô’ô tôbane minjuk. Asu na ô yen éve’an, futi’i VIDÉO, mvuse ya valé, yala’ane minsili mia tôé valé.
Minju’u mivé Narangerel a nga dañ asu na a bo Yéhôva ésaé?
Aval avé nye’an a mbe a nyeke’e Yéhôva ô nga volô nye na a dañe minjuk?
Lañe’e Minkana 29:25 a 2 Timothée 1:7, mvuse ya valé, yala’ane nsili wu:
Jé é ne ve wo ayo’o nlem ya dañ minju’u wo tôbane mie?
6. Tabe’e ndi a mvolane Yéhôva
Yéhôva é volô wo na ô bo nye ésaé. Futi’i VIDÉO, mvuse ya valé, yala’ane minsili mia tôé valé.
Jé é mbe é bo’o na ñyé’é Bible ate a kate duban?
Jé é nga volô nye na a tu’a tabe ndi a Yéhôva?
Lañe’e Ésaïe 41:10, 13, mvuse ya valé, yala’ane nsili wu:
Amu jé ô ne tabe ndi na wé kui na ô tôé ngaka’a ô nga bo Yéhôva éyoñ ô nga ve womien ngumba be nye?
7. Tuka’a wô’ôtan nye’ane Yéhôva
Nge wo simesan éyoñ ése abim avé Yéhôva a nye’e wo, wé tu’a kômbô ve nye akéva, a wé kômbô bo nye ésaé nnôm éto. Lañe’e Besam 40:5, mvuse ya valé, yala’ane nsili wu:
Bibotan bi Yéhôva bivé wo dañe nye’e?
Nkulu mejô Jérémie a mbe a nyeke’e Yéhôva a mejô mé, a mbe fe a nye’e mvome ya be’e éyôlé Yéhôva. A nga jô na: “Mejô môé me nga yené, a me nga di me; a mejô môé me mbe meva’a mfa’a wom, a mefône ya nleme wom, amu ma loban a jôé dôé, a Yéhôva, Zambe ya minsamba mewosan.” (Jérémie 15:16) Yala’ane minsili mi:
Amu jé e bo Ngaa Yéhôva a ne beta mvom?
Ye wo kômbô duban asu na wo fe ô bo Ngaa Yéhôva?
Ye jam éziñ da kamane wo na ô bo de?
Jé wo simesane na wo yiane bo asu na ô duban?
BÔTE BÉZIÑ BA JÔ NA: “Ma buni ki na me ne kui na me bo mam mese bôte ba duban ba yiane bo.”
Ye wo fe wo simesane nalé?
ÔBALEBAS
A mvolane Yéhôva, ô ne kui na ô dañe minju’u mise mi ne kamane wo na ô duban.
Ô ne yalan aya?
Abime ñyeman ya Kalate Zambe avé wo yiane bi ôsusua na wo duban?
Mam mevé wo yiane bo ôsusua na wo duban?
Amu jé wo yiane ki koo woñe ya duban?
MAM MEFE ME NE VOLÔ WO
Yene’e mam ma yiane wo ve nkômbane ya duban.
“Ye ô nto fo’o ngule ya duban?” (Nkume mmombô a bete ya Ngone lale ya mbu 2020)
Yene’ aval ô ne dañe minju’u miziñ mi ne kamane wo na ô duban.
“Jé ja kamane ma na me duban?” (Nkume mmombô a bete ya Ngone lale, mbu 2019)
Yene’ aval môt éziñ a nga kui na a dañe beta minju’u miziñ asu na a duban.
Môt éziñ a too jôé na Ataa a mbe a taté koo woñe ya duban. Yene’e jam e nga volô nye na a su’ulane nyoñe ntyi’ane ya duban.