SIKÔLÔ 6

Liti’i bôt mfi ya éfus wo te lañ

Jean 10:33-36

ÔBALEBAS: Te bo na, nné ane wo mane lañ éfuse ya Bible, ô taté na wo kobô ajô afe. Taté’é bo na bôte ba vô’ôlô wo be kôme wôk aval avé éfuse wo te lañ é tii a ñye’elan wo ve.

AVAL Ô NE BO JAM ETE:

Ngôné’é bifia bia dañe mfi. Nné ane wo mane lañ éfus éziñ, ngôné’é bifia bia dañe mfi, bi bi tii a nya ajôô wo tôñesane nye. Asu na ô bo de, ô ne ba’alane bifia bite, ô ne fe sili nsili, a jô bôte ba vô’ôlô wo na be yene bifia ya éfus bia yalane nsili ôte.

Nge wo ba’alane bifia bia dañe mfi éfus éte, ô bela’ane bifia bife, sa ke bi bi ne éfus wo te lañ, wo yiane taté yemelane nge bôte ba vô’ôlô wo ba ye yeme na, bifia bi ne éfus wo te lañ bi tii a nya ajôô wo tôñesane nye.
Ngôné’é ñye’elane wo yi na bôte be ba’ale. Ôsusua na wo lañ éfus éziñ, nge wo bo na bôte ba vô’ôlô wo be yem amu jé wo zu lañe je, kate’e fe be aval avé bifia bia dañe mfi été bia su’u nya ajôô wo tôñesane nye.

Nté wo timin éfus, te fete Kalate Zambe wôé. Nalé a volô bôte ba vô’ôlô wo na, be yen aval avé mame wo jô ma suk éfuse wo te lañ.
Timi’in éfus aval é ne tyi’ibi ya wôk. Te jañele éyoñ a mame me nji bo mfi, mam ma su’u ke nya ajôô wo tôñesane nye. Mbôl ô maneya yemelane mame bôte ba vô’ôlô be nga yem a lat a nlô ajô wôé, tobe’e mame wo ye kate be asu ya na, ñye’elane wo ve ô bo tyi’ibi ya wôk.