Sekant Kingz
11 Wen Ayhazaiya ma, Atalaiya, mi fain owt dat ih son ded, ih chrai fi kil owt evribadi fahn di raiyal famili lain. 2 Bot Jehoshiba tek Ayhazaiya son Jehoawash ahn bak ahn weh eena seekrit. Jehoshiba da King Jehoaram daata an Ayhazaiya sista. Shee kehr Jehoawash fahn monks di res a di king son dehn weh dehn mi wahn kil, ahn shee haid hihn an ih ners eena wahn bejroom. An Atalaiya kudn fain ahn, soh dehn neva kil ahn. 3 Ahn Jehoawash haid da Jehoava templ wid di ners* fi siks yaaz, wail Atalaiya mi-di rool oava di lan.
4 Eena di sevent yaa, Jehoyada sen fi di aami cheef dehn weh in chaaj a honjridz a soaljaz. Dehn mi in chaaj a di soalja dehn weh gyaad di king* ahn di gyaad dehn fahn di palis,* an ih mek dehn kohn tu hihn da Jehoava templ. Ih mek wahn kovenant* wid dehn da Jehoava templ an ih mek dehn swayr dat dehn wahn kip it. Afta dat, ih shoa dehn di king son. 5 Ih tek wan groop ahn split dehn op intu chree smaala groop, an ih gi dehn dis aada: “Dis da weh unu wahn du: Wan groop a unu wahn di werk pahn di Sabat fi kip wahn kloas aiy pahn di king palis, 6 wahn neks groop a unu wahn deh da di Fongdayshan Gayt, ahn wahn nada groop a unu wahn deh da di gayt weh deh bihain di gyaad dehn fahn di palis. An unu wahn tek tern fi gyaad di palis. 7 Di too groop weh noh sopoas tu werk pahn di Sabat fi kip wahn kloas aiy pahn Jehoava templ fi protek di king. 8 Unu fi sorong di king pahn evri said wid unu wepan. An if enibadi chrai get paas unu, unu fi kil dehn. Unu stay wid di king, an eniway wehpaat hihn goh, unu fi goh.”
9 Di aami cheef dehn weh in chaaj a honjridz a soaljaz mi du weh Jehoyada di prees mi koman dehn fi du. Soh eech a dehn tek dehn soalja dehn weh mi-di werk pahn di Sabat lang wid di wan dehn weh neva mi-di werk pahn di Sabat, ahn dehn gaahn wehpaat Jehoyada di prees mi deh. 10 Di prees gi di aami cheef dehn weh in chaaj a honjridz a soaljaz aala di spyaa ahn rong sheel dehn weh deh da Jehoava templ ahn weh mi bilangz tu King Dayvid. 11 Ahn di gyaad dehn fahn di palis mi tek dehn pozishan wid dehn wepan eena dehn han. Dehn lain op fronta di templ fahn di rait said a di templ tu di lef said a di templ. Som a dehn mi deh kloas tu di alta, ahn som a dehn mi deh kloas tu di templ, ahn dehn mi sorong di king. 12 Den Jehoyada bring owt di king son ahn put di krong pan ih hed, an ih giv ahn di skroal weh gat een Gaad Laa,* ahn dehn anoint ahn az king. Ahn dehn staat tu klap ahn seh: “Mi king, Ah hoap yu liv fareva!”
13 Wen Atalaiya mi hyaa peepl di ron ahn di showt, rait away shee gaahn da Jehoava templ wehpaat di peepl mi deh. 14 Den ih si di king di stan op bai di kolom, laik weh da-mi di kostom fi mek di king dehn du. Di aami cheef dehn ahn di peepl weh bloa di chrompit mi deh bai di king, an aala di peepl mi-di rijais ahn di bloa di chrompit dehn. Soh den Atalaiya tayr ih kloaz an ih hala owt: “Unu bichray mi! Aala unu da loan chraytaz!” 15 Bot Jehoyada di prees mi seh: “Noh kil ahn eena Jehoava templ.” Soh ih gi wahn koman tu di aami cheef dehn weh mi in chaaj a honjridz a soaljaz, an ih seh: “Kehr ahn fahn monks di soalja dehn an if enibadi chrai difen ahn, kil dehn.” 16 Soh dehn grab ahn, an wen dehn reech di plays wehpaat di haas dehn enta di king palis, dehn kil ahn deh.
17 Den Jehoyada mek wahn kovenant bitween Jehoava ahn di king lang wid di peepl, soh dat dehn ku kantinyu fi bee Jehoava peepl. Pahn tap a dat, ih mek wahn nada kovenant bitween di king ahn di peepl. 18 Afta dat, aala di peepl gaahn da Bayal templ, ahn dehn brok dong ih alta dehn, dischrai aala ih aidol, ahn kil Bayal prees weh naym Matan fronta di alta dehn.
Den di prees pik sohn oavaseeya fi bee in chaaj a di werk weh dehn du eena Jehoava templ. 19 Afta dat, hihn gyada di aami cheef dehn weh in chaaj a honjridz a soaljaz, di soalja dehn weh gyaad di king,* di gyaad dehn fahn di palis, an aala di peepl, ahn dehn kehr di king wid dehn fahn Jehoava templ. Dehn gaahn da di king palis chroo di gayt weh di palis gyaad dehn yooz, ahn di king sidong pahn di chroan weh bilangz tu di king dehn. 20 Soh aala di peepl dehn mi-di rijais ahn di siti mi ga pees, bikaaz dehn mi kil Atalaiya wid di soad fronta di king palis.
21 Jehoawash mi sevn yaaz oal wen ih staat tu rool az king.