Sekant Kingz
12 Eena di sevent yaa wen Jeehoo mi-di rool, Jehoawash staat tu rool az king, ahn hihn mi rool eena Jeroosalem fi 40 yaaz. Fi hihn ma da-mi Zibiya fahn Beeyer-sheeba. 2 Jehoawash kantinyu fi du weh rait eena Jehoava sait fi di hoal taim weh Jehoyada di prees mi-di gaid ahn. 3 Bot di hoali hai plays dehn mi stil dehdeh, ahn di peepl stil mi-di aafa sakrifais pahn di hoali hai plays ahn mek di smoak fahn di sakrifais goh op tu dehn gaadz.
4 Jehoawash tel di prees dehn: “Kalek aala di moni weh peepl giv az kanchribyooshan tu Jehoava templ, weh da di moni weh peepl pay az taks, di moni fahn peepl weh mek wahn vow, an aala di moni weh peepl wilin fi gi tu Jehoava templ. 5 Di prees dehn wahn bee di wan dehn weh tek di moni fahn di peepl weh bring it, ahn dehn wahn yooz it fi fiks eni paat a di templ weh damij.”
6 Afta King Jehoawash mi-di rool fi 23 yaaz, di prees dehn stil neva fiks di damij pahn di templ. 7 Soh Jehoawash hayl Jehoyada di prees ahn di res a prees dehn, an ih seh: “Wai unu noh di fiks di templ? If unu noh wahn yooz di moni fi fiks di templ, den noh tek nohmoh moni fahn di peepl.” 8 Soh di prees dehn agree dat dehn noh wahn tek nohmoh moni fahn di peepl ahn dat dehn noh wahn bee rispansabl fi fiks di templ needa.
9 Den Jehoyada di prees tek wahn baks, an ih boar wahn hoal tap a it ahn put it bisaid di alta. Di baks mi deh pahn di rait han said wen wahn persn goh eena Jehoava templ. Dat da wehpaat di prees dehn weh main di gayt wuda put aala di moni weh peepl bring eena Jehoava templ. 10 Enitaim dehn si dat wahn gud amonk a moni deh eena di baks, di king sekiteri ahn di hai prees wuda kohn kalek* ahn konk di moni weh peepl mi bring eena Jehoava templ. 11 Dehn wuda gi di moni weh dehn konk tu dehn wan weh di soopavaiz di werk weh di hapm pahn Jehoava templ. Ahn den di soopavaiza dehn wuda pay di kyaapenta dehn ahn di bilda dehn weh di du di werk pahn Jehoava templ. 12 Ahn dehn pay di man dehn weh lay stoan ahn di wan dehn weh kot stoan. Dehn mi aalso bai timba ahn stoan weh dehn kot tu saiz fi fiks di damij pahn Jehoava templ, ahn dehn yooz di moni fi eniting weh dehn need fi fiks di templ.
13 Bot non a di moni weh peepl mi bring da Jehoava templ da-mi fi mek silva baysn, toolz fi kot di wik, bowl, chrompit, ner eniting weh mek owta goal er silva fi Jehoava templ. 14 Aala di moni gaahn tu di wan weh du di werk, ahn di wan dehn weh di werk wuda onli yooz it fi fiks Jehoava templ. 15 Ahn dehn mi chros di man dehn weh mi rispansabl fi gi di moni tu di werkaz, soh dehn neva haftu chek how dehn mi-di spen di moni. 16 Bot dehn neva bring di moni fi di gilt aafrin dehn ahn di sin aafrin dehn tu Jehoava templ; dat mi bilangz tu di prees dehn.
17 Den Hazayel, di king a Siriya, gaahn fait gens Gat, an ih kanka it. Afta dat ih disaid fi atak Jeroosalem. 18 Ahn bikaaz a dat, King Jehoawash tek aala di hoali aafrin weh Jehoshafat, Jehoaram, an Ayhazaiya mi aafa op; dehn da-mi fi hihn ansestaz weh yoostu bee king oava Jooda. Pahn tap a dat, ih tek fi hihn oan hoali aafrin dehn, an aala di goal weh dehn fain eena di chrezhri dehn fahn Jehoava templ ahn di king palis, an ih sen aala dat tu Hazayel, di king a Siriya. Soh Hazayel neva atak Jeroosalem.
19 Ahn di res a Jehoawash hischri, evriting weh hihn mi du, deh rait dong eena di hischri buk a Jooda king dehn. 20 Bot ih ofishal dehn jain op wid eech ada ahn mek planz fi goh gens Jehoawash. Ahn dehn mi kil ahn da di hows da Bet-milo,* weh deh pahn di way dong tu Sila. 21 Shimiyat son Joazakar ahn Shoamer son Jehozabad da-mi di ofishal dehn weh kil Jehoawash. Dehn beri ahn eena Dayvid Siti, an ih son Amazaiya staat tu rool az king afta ahn.