Joon

Jehoava bles di Kristyanz eena di fers senchri az dehn mi-di adap tu di sichuwayshan. Dehn mi fays lata persikyooshan, sohntaim wen dehn neva ekspek it. Mek wi luk pahn weh hapm tu Baarnabas ahn di apasl Paal wail dehn mi-di preech da Lischra. At fers, di peepl mi welkom dehn ahn lisn. Bot laytaraan, di Jooz weh neva waahn lisn tu dehn mi “kanvins di krowd” fi ton gens Paal. An afta dat, som a dehn saym peepl weh mi welkom Paal mi stoan ahn an lef ahn fi ded. (Aks 14:19) Bot dat neva stap Paal ahn Baarnabas fahn preech. Insted, dehn gaahn da wahn neks siti. Wat da-mi di rizolt? Dehn mi mek wahn “lata nyoo disaiplz.” Fi dehn egzampl ahn di tingz weh dehn seh mi aalso schrentn dehn bradaz ahn sistaz. (Aks 14:​21, 22) Wahn lata Kristyanz mi benifit fahn Paal ahn Baarnabas egzampl bikaaz dehn neva stap preech eevn doa dehn mi-di fays persikyooshan. Jehoava wahn bles wi az lang az wi noh giv op eena di werk weh hihn aks wi fi du. w23.04 16-17 ¶13-14

King Dayvid mi fays lata daynjaros enimiz eena fi hihn laif, ahn hihn mi aalwayz pray ahn aks Jehoava fi help. Dayvid mi shoar dat Jehoava mi hyaa an ansa ih pryaaz. Yoo tu ku bee shoar dat Jehoava wahn hyaa an ansa yu pryaaz. Di Baibl tel wi dat Jehoava wahn gi wi di wizdom ahn di powa weh wi need fi bayr op. Tudeh, Jehoava mait yooz wi bradaz ahn sistaz an ih mait eevn yooz peepl weh noh wership ahn fi help wi. Eevn doa Jehoava mait noh ansa wi pryaaz di way how wi ekspek, wi noa fi shoar dat hihn wahn ansa dehn. Hihn wahn gi wi egzakli weh wi need rait wen wi need it. Soh ga fayt ahn kantinyu pray. Yu ku bee shoar dat Jehoava wahn tek kayr a yu now an eena di fyoocha wen ih ‘gi yu evriting weh yu waahn.ʼ—Saa. 145:16. w23.05 8 ¶4; 13 ¶17-18

Ih gud fi foakos pahn di blesinz yu get wen yu reech yu goal. Weh blesinz yoo ku foakos pan? If yu goal da fi du beta eena yu Baibl reedin er eena yu pryaaz, tink bowt how yu frenship wid Jehoava wahn geh schranga. (Saa. 145:​18, 19) If yu goal da fi werk pahn wahn Kristyan kwaliti, foakos pahn how ih wahn mek yu rilayshanship wid adaz beta. (Kol. 3:14) Maybi yu ku chrai mek wahn lis a aala di wayz yu ku benifit if yu reech yu goal. Ahn goh bak tu da lis fahn taim tu taim. Yu ku spen taim wid peepl weh wahn inkorij yu fi reech yu goal. (Prav. 13:20) Dehn ga dayz wen wi mait noh ga di dizaiya fi du eniting. Yu tink dat meen dat wi jos kyaahn reech wi goal? No. Wee ku kantinyu werk pahn wi goalz eevn if wi noh ga di dizaiya. Fi du dat, yu mait haftu werk reeli haad, bot yu wahn bee hapi wen yu reech yu goal. w23.05 27-28 ¶5-8

Wen wi noa dat wi need fi tek rispansabiliti fi wi akshan, dat moov wi fi kanfes wi sin, karek wi mistayk, ahn chrai noh du it agen. Onli if wi du dehnya tingz wi wahn ku stay eena di rays fi laif. If yu mi mek wahn bad disizhan weh yu kyaahn chaynj, yu haftu aksep di nyoo sichuwayshan. Noh ways yu taim an enerji di chrai proov wai yu mi rait er di chrai blaym ada peepl. Aksep yu mistayk ahn chrai du di bes weh yu kud eena yu sichuwayshan now. If yu feel gilti bowt wahn bad disizhan weh yu mek, bee hombl ahn pray tu Jehoava, admit yu mistayk, an aks ahn fi fergiv yu. (Saa. 25:11; 51:​3, 4) If yu mi hert enibadi, tel dehn dat yu sari. An if yu stil need help, aks di eldaz fi help yu. (Jay. 5:​14, 15) Laan fahn yu mistayk ahn chrai noh du it agen. Wen yu du dat, yu ku bee shoar dat Jehoava wahn fergiv yu ahn gi yu di help weh yu need.—Saa. 103:​8-13. w23.08 28-29 ¶8-9

Jehoyada mi help King Jehoawash fi bee wahn gud persn. Soh wen di king mi yong, hihn mi waahn obay Jehoava. Bot afta Jehoyada mi ded, King Jehoawash mi staat lisn tu sohn leeda weh mi ton gens Jehoava. (2 Chron. 24:​4, 17, 18) Jehoava mi feel hert, bot stilyet “hihn mi kip di sen ih prafit dehn monks dehn fi bring dehn bak . . . , bot dehn rifyooz fi lisn.” Dehn neva eevn waahn lisn tu Jehoyada son, Zakaraiya. Zakaraiya da neva onli Jehoava prafit ahn prees, bot ih da-mi Jehoawash kozn tu. King Jehoawash mi mek dehn kil Zakaraiya. (2 Chron. 22:11; 24:​19-22) Sins Jehoawash mi looz ih rispek fi Jehoava, Jehoava mi seh: “Ah wahn hayt enibadi weh hayt mee.” (1 Sam. 2:30) Eevn doa Jehoawash mi ga “wahn big aami,” wahn smaal aami fahn Siriya mi en op di win wahn waar gens ahn. Ahn joorin da waar, Jehoawash mi geh hert bad. (2 Chron. 24:​24, 25) Jehoawash oan servant dehn mi kil ahn bikaaz a weh hihn mi kil Zakaraiya. w23.06 18-19 ¶16-17

Di apasl Paal mi spen wahn lata taim da Efisos di preech ahn teech deh. (Aks 19:​1, 8-10; 20:​20, 21) Hihn mi reeli lov di bradaz ahn sistaz wahn lat, an ih mi waahn help dehn fi kip faytful tu Jehoava. Di bradaz da Efisos yoostu fala paygan teechinz ahn bileev eena majik. Di peepl da Efisos mi imoaral ahn goh aan brayzn. How wi noa? Joorin di difrent shoa dehn da di tayta er dehn rilijos selibrayshanz, evriting da-mi bowt seks. (Ifee. 5:3) Ahn lata peepl da Efisos neva feel “no shaym bowt weh dehn du.” Dis frayz kohn fahn wahn Greek werd weh meen dehn “noh feel nohmoh payn” eena dehn haat wen dehn du sohnting rang. (Ifee. 4:​17-19) Di tingz weh dehn yoostu du bifoa dehn mi laan bowt Jehoava neva bada dehn kanshans. Dats wai Paal mi seh dat “dehn main deh eena daaknis ahn dehn stay separayt fahn di laif weh bilangz tu Gaad.” Som a di peepl da Efisos mi kom owta da daaknis. w24.03 20 ¶2, 4; 21 ¶5-6

Gidiyan mi haftu werk haad fi serv az wahn joj. Wen di Midyanait dehn mi-di ron weh fahn di waar joorin di nait, Gidiyan mi chays afta dehn fahn Jezriyel Vali way tu di Jaadn Riva. (Joj. 7:22) Yu tink Gidiyan mi stap chays dehn wen ih mi reech di Jaadn Riva? No! Eevn doa dehn mi taiyad, hihn ahn di 300 man dehn mi kraas oava di Jaadn ahn dehn mi kantinyu chays afta dehn. Fainali, dehn mi kech op wid di Midyanait dehn ahn dehn mi win di waar. (Joj. 8:​4-12) Gidiyan mi chros dat Jehoava mi wahn giv ahn di schrent weh ih need, ahn Jehoava neva let ahn dong. (Joj. 6:​14, 34) Wahn taim, Gidiyan an ih aami mi haftu ron fi chays dong too Midyanait king weh praabli mi-di raid pahn kyamil. (Joj. 8:​12, 21) Bot Gaad mi help di Izrelaits fi kyapcha di Midyanait king dehn ahn win di waar. Eldaz ku pen pahn Jehoava tu, bikaaz hihn “noh geh taiyad ner giv op.” Hihn wahn gi dehn di schrent wen dehn need it.—Isa. 40:​28, 29. w23.06 6 ¶14, 16

Wee ku ga wahn faytful haat noh mata weh kaina chraiyal kom op eena laif. Soh chros eena Jehoava. Bayrak mi ga sokses bikaaz ih mi chros di inschrokshan dehn weh Jehoava mi giv ahn. Di Izrelait dehn neva ga no wepan fi fait eena waar. Bot stilyet, Jehoava mi tel Bayrak fi goh fait gens di Kaynanait Cheef Sisera an ih aami, weh mi ga lata wepan fi fait. (Joj. 5:8) Debora, hoo da-mi wahn prafit, mi tel Bayrak fi goh dong da wahn flat ayrya fi fait gens Sisera ahn fi hihn 900 waar chariyat. Bikaaz di lan mi flat, ih mi luk laik ih mi wahn eeziya fi mek Sisera ahn fi hihn waar chariyat dehn win dis batl. Bot stilyet, Bayrak mi lisn tu weh Debora mi tel ahn. Az di Izrelait soaljaz mi-di kohn dong fahn Mongt Taybor, Jehoava mi sen wahn haad rayn. Dis mi mek ih geh soh modi dat aala Sisera waar chariyat mi geh stok eena di mod, ahn soh Jehoava mi mek Bayrak win di batl. (Joj. 4:​1-7, 10, 13-16) Saym way soh, Jehoava wahn mek wi win di batl if wi chros eena hihn ahn fala di inschrokshan dehn weh ih gi wi chroo fi hihn aaganaizayshan. w23.07 19 ¶17-18

If wi waahn geh evalastin laif wi need fi bee payshent. Jos laik Jehoava faytful servants eena di paas, wi need fi ga payshens ahn wayt fi mek Gaad pramis dehn kohn chroo. (Heeb. 6:​11, 12) Di Baibl seh dat wi deh eena di saym sichuwayshan laik wahn faama. (Jay. 5:​7, 8) Wahn faama werk haad fi tek kayr a ih plaants, bot hihn noh noa di egzak taim wen ih wahn groa. Soh di faama bayr payshens ahn chros dat ih wahn ku haavis weh ih plaant. Jos laik da faama, wi werk haad fi kapi Jeezas egzampl eevn doa wi “noh noa pahn wich day [wi] Laad wahn kom.” (Mach. 24:42) Wi wayt wid payshens ahn kanfidens fi di taim wen aala Jehoava pramis dehn kohn chroo. If wi noh ga payshens, wi ku geh taiyad a wayt ahn lee bit bai lee bit wi ku staat lef Jehoava. Wi mait eevn staat goh afta tingz weh wahn onli mek wi hapi fi wahn lee wail. Bot if wi payshent, wi wahn bayr op til di en ahn wi wahn geh sayv.—Mic. 7:7. w23.08 22 ¶7

Wen wi kompyaa di prafesi da Daniel 2:​41-43 wid ada prafesi eena di buk a Daniel ahn Revilayshan, wi ku seh dat di fut reprizent di United States ahn Britain. Dehnya too konchri werk tugeda ahn dehn da di moas powaful govament eena fi wee taim. Danyel mi taak bowt dehn laik if dehn da-mi wan “kingdom,” an ih mi seh dat “paat wahn bee schrang ahn paat wahn bee week.” Wai paat a da kingdom wahn bee week? Bikaaz di saaf klay eena dis prafesi stan fi di kaman peepl, ahn di aiyan stan fi di govament. Ahn sayka di peepl, di govament dehn kyaahn aalwayz ak schrang laik aiyan ahn du aal weh dehn wuda waahn. Wi laan sohn impoatant Baibl teechinz fahn di stachu weh Danyel mi diskraib. Fers, di United States ahn Britain shoa dat dehn ga powa. Fi egzampl, di United States ahn Britain mi deh monks di nayshan dehn weh mi win Werl Waar I ahn Werl Waar II. Bot dis werl powa wahn geh weeka ahn weeka bikaaz di peepl eena dehndeh konchri di fait gens eech ada ahn gens di govament. Sekant, di United States ahn Britain wahn bee di laas werl powa fi rool bifoa Gaad Kingdom geh rid a aal hyooman govament. w23.08 10-11 ¶12-13

Sohntaim, Dayvid mi feel soh schres owt sayka aala di prablemz ahn chraiyalz weh hihn mi-di goh chroo. (Saa. 18:​4, 5) Bot eevn soh, di waam lov ahn kyaa weh Jehoava mi shoa ahn mi rifresh ahn. Jehoava mi kehr ih taiyad lee fren tu sohn “green green paascha” ahn tu “wahn schreem a waata fi mek [ih] res.” Ahn bikaaz a dat, Dayvid mi geh bak ih schrent, ih neva giv op, an ih mi kantinyu fi serv Jehoava wid jai. (Saa. 18:​28-32; 23:2) Saym way, eevn wen wi goh chroo prablemz ahn chraiyalz, “da sayka Jehoava laayal lov wee stil deh ya.” (Lam. 3:22; Kol. 1:11) Dayvid mi aalwayz deh eena daynja, ahn hihn mi ga lata powaful enimiz. Bot Jehoava lov mi mek hihn feel sayf. Dayvid kuda mi feel dat Jehoava mi deh wid ahn eena evri sichuwayshan, ahn dat mi schrentn ih fayt eena Jehoava. Dat da wai hihn kuda mi sing: “[Jehoava] reskyu mi fahn aala mi chrobl.” (Saa. 34:4) Eevn doa Dayvid mi feel frayd, hihn kuda mi get oava ih fyaa bikaaz hihn mi noa dat Jehoava lov ahn. w24.01 30 ¶15-17

Laan fahn Jehoawash bad egzampl. Afta Hai Prees Jehoyada mi ded, Jehoawash mi chooz frenz weh neva inkorij ahn fi du gud tingz. (2 Chron. 24:​17, 18) Jehoawash mi lisn tu di hai ofishal dehn a Jooda weh neva lov Jehoava. Hihn shuda mi stay faar fahn dehn, noh chroo? Bot insted, ih mi lisn tu fi dehn bad advais. Jehoawash mi eevn kil ih kozn Zakaraiya weh mi-di chrai karek ahn. (2 Chron. 24:​20, 21; Mach. 23:35) Weh hihn mi du mi terabl ahn foolish! Jehoawash mi staat owt gud az wahn faytful king, bot den ih mi en op di merda ahn bee wahn apastayt. Ahn laytaraan ih oan servant dehn kil ahn. (2 Chron. 24:​22-25) If onli Jehoawash mi kantinyu lisn tu Jehoava ahn tu peepl weh mi lov Ahn, ih laif mi wahn bee difrent. w23.09 9 ¶6

Jeezas mi noa dat Peeta kuda stay faytful, soh ih tel ahn fi “noh bee frayd.” Peeta laif mi chaynj bikaaz Jeezas mi shoa dat ih chros ahn. Peeta an ih breda Anjru mi lef dehn fishin bizniz ahn dehn mi jain Jeezas eena ih minischri. Ahn dehn mi en op di geh wahn lata blesinz bikaaz a da disizhan. (Maak 1:​16-18) Peeta mi ga wahn lata wandaful ekspeeryens wail hihn da-mi wan a Jeezas disaipl. Hihn mi geh fi si Jeezas heel sik peepl, bring peepl bak tu laif, ahn jraiv deemonz owta peepl. (Mach. 8:​14-17; Maak 5:​37, 41, 42) Hihn mi eevn si wahn vizhan a Jeezas az di King a Gaad Kingdom. Peeta neva ferget da vizhan. (Maak 9:​1-8; 2 Peet. 1:​16-18) Peeta mi si tingz weh ih neva wuda mi si if hihn da neva wan a Jeezas disaipl. Hihn mosi mi reeli hapi dat ih neva alow ih negitiv feelinz fi mek ih giv op ahn mis owt pahn dehnya blesinz! w23.09 21 ¶4-5

Eena di apasl Peeta fers leta, ih mi seh wi fi “lov wan anada fahn [wi] haat.” Dis kaina lov noh wahn limit humoch taim wi fergiv adaz. Insted, wi fi “aalwayz wilin fi fergiv adaz.” (1 Peet. 4:8) Maybi Peeta mi-di tink bowt di lesn weh Jeezas mi teech bowt fergivnis sohn yaaz erliya. Da taim deh, Peeta mi tink dat ih mi-di bee jenaros wen ih tel Jeezas dat ih mi wilin fi fergiv sohnbadi “op tu sevn taimz.” Bot Jeezas mi help ahn fi si dat no limit deh pahn humoch taimz wi fi fergiv adaz wen ih tel Peeta “noh jos op tu sevn taimz, bot op tu 77 taimz.” (Mach. 18:21) Noh feel diskorij if yu fain it haad fi du weh Jeezas seh. Non a wi noh perfek, soh ih noh eezi fi mek wi fergiv adaz. Di impoatant ting da fi du evriting wi kud fi fergiv wi bradaz ahn mek pees wid dehn. w23.09 29 ¶12

Wen Joana mi deh eena di big fish beli, ih mi sari fi weh ih du an ih mi noa dat Jehoava mi wahn lisn wen ih pray an ih mi noa fi shoar dat Jehoava mi wahn help ahn. Afta dat, di big fish mi vamit owt Joana, ahn hihn mi redi fi du di asainment weh Jehoava mi giv ahn fi du. (Joan. 2:10–3:4). Yu eva gaahn chroo wahn prablem weh mek yu soh angshos dat yu kyaahn pray ahn tel Jehoava how yu reeli feel? Er yu feel dat yu soh week dat yu kyaahn eevn stodi? Memba dat Jehoava andastan egzakli weh yu di goh chroo. Soh eevn if yu onli ku seh wahn simpl lee pryaa, yu ku bee shoar dat Jehoava wahn gi yu di help weh yu need. (Ifee. 3:20) If yu di fain it haad fi reed ahn stodi bikaaz yu sik, week, er eevn di wori, maybi yu ku lisn tu sohn rikaadn a di Baibl er wan a wi poblikayshan dehn weh bays pahn di Baibl. Yu ku eevn lisn tu som a di sang dehn er wach wahn veedyo pahn jw.org. Jehoava waahn help wi, ahn hihn wahn du dat wen wi pray tu ahn an yooz di Baibl an evriting els weh hihn gi wi fi fain di ansa tu wi pryaaz. Wen wi du dat da laik wi di invait Jehoava fi help wi. w23.10 13 ¶6; 14 ¶9

Eensaida di tabernakl dehn mi ga too room wid wahn kertn bitween dehn fi separayt wan fahn di neks. Di fers room da-mi “di Hoali Plays,” ahn di neks wan da-mi “di Moas Hoali.” Di templ weh Jehoava peepl mi bil da Jeroosalem mi set op di saym way. (Heeb. 9:​2-5; Eks. 26:​31-33) Di Hoali Room mi gat een wahn goal lampstan, wahn alta fi bon insens pan, ahn di taybl weh ga di hoali bred. Onli di prees dehn, weh dehn “mi poar ail pan,” mi ga permishan fi goh eena di Hoali Room fi du di werk weh dehn fi du az prees. (Num. 3:​3, 7, 10) Di Moas Hoali Room mi gat een di aak a di kovenant weh mi kova wid goal. Wen di hai prees wuda goh fronta di aak a di kovenant, da laik ih mi-di goh fronta Jehoava ihself. (Eks. 25:21; 22; Lev. 16:​2, 17) Hihn wuda goh eena di Moas Hoali Room wid sohn animal blod fi aafa op fi ih oan sin dehn, ahn di sin dehn a di nayshan. Laytaraan, Jehoava help wi fi andastan weh dehndeh difrent tingz eena di tabernakl mi reprizent.—Heeb. 9:​6, 7. w23.10 27 ¶12

Di Baibl koman wi oava ahn oava fi “lov wan anada.” (Jan 15:12; Roam. 13:8; 1 Tes. 4:9; 1 Peet. 1:22; 1 Jan 4:11) Bot lov da wahn feelin eena wi haat ahn nobadi ku seeʼt. Soh how wi ku shoa wi bradaz ahn sistaz dat wi lov dehn? Wi shoa dehn bai di tingz weh wi du ahn seh. Wi ga lata wayz how wi ku shoa lov fi wi bradaz ahn sistaz. Mek wi luk pahn sohn egzampl: “Taak di chroot wid wan anada.” (Zech. 8:16) “Kip pees wid wan anada.” (Maak 9:50) “Unu fi bee wilin fi shoa aana tu wan anada.” (Roam. 12:10) “Unu fi welkom wan anada.” (Roam. 15:7) “Kantinyu fi . . . fergiv wan anada.” (Kol. 3:13) “Kip aan di bak wan anada hevi berdn.” (Gal. 6:2) “Kantinyu fi komfert wan anada.” (1 Tes. 4:18) “Kip aan di . . . bil op wan anada.” (1 Tes. 5:11) “Pray fi wan anada.”—Jay. 5:16. w23.11 9 ¶7-8

Wi need fi ga schrang fayt bikaaz wi haftu mek disizhanz evri day. Fi egzampl, wi mek disizhanz bowt entataynment, ejukayshan, marij, chiljren, ahn di kaina werk wi chooz. Wi ku aks wiself: ‘Di disizhanz Ai mek shoa dat Ai shoar dat dis sistem noh wahn laas lang ahn dat Gaad wahn soon mek di ert intu wahn paradais? Er Ai bihayv di saym way how adaz bihayv weh noh bileev dat dehn ku liv fareva?ʼ (Mach. 6:​19, 20; Look 12:​16-21) If wi schrentn wi fayt dat di Paradais weh Gaad pramis soon kohn, wi fayt wahn help wi fi mek beta disizhanz. Wi need schrang fayt wen wi fays chraiyalz. Wi mait fays persikyooshan, wahn seeryos helt prablem, er ada tingz weh mait mek wi feel diskorij. Wen wi goh chroo chraiyalz laik dehndeh, eena di biginin wi mait feel laik wi ku bayr op. Bot fi chraiyalz laik dat yu haftu bayr op fi wahn lang taim, soh yu need schrang fayt fi bayr op ahn fi kip di serv Jehoava wid jai.—1 Peet. 1:​6, 7. w23.04 27 ¶4-5

Jehoava waahn wi du wi paat afta wi don pray. Fi egzampl, wahn brada mait aks Jehoava fi help ahn geh taim aaf fahn werk soh dat ih ku goh da wahn reejinal kanvenshan. How Jehoava mait ansa da pryaa? Wel, hihn mait gi di brada di korij ih need fi aks fi di taim aaf. Bot di brada need fi du ih paat fi goh da ih baas an aks fi di taim aaf. Hihn mait need fi aks oava ahn oava agen. Er ih mait aafa fi chaynj ih shif wid wan a ih koa-werka dehn er aafa fi geh di taim aaf widowt pay. Jehoava waahn wi pray oava ahn oava bowt wi woriz. Jeezas help wi fi andastan dat wi noh wahn geh di tingz weh wi aks fa rait away. (Look 11:9) Soh noh giv op! Pray fahn yu haat ahn pray wahn lat. (Look 18:​1-7) Wen wi du dis, wi shoa Jehoava dat weh wi pray bowt reeli impoatant tu wi. Ahn wi aalso shoa dat wi ga fayt dat Jehoava ku help wi. w23.11 22 ¶10-11

Aybraham mi 100 yaaz oal an ih waif Saara mi 90 yaaz oal ahn dehn stil neva ga no pikni. Bot Jehoava mi pramis ih fren Aybraham dat hihn mi wahn ga wahn son, ahn chroo da son aala di nayshanz mi wahn geh bles. (Jen. 15:5; 22:18) Aybraham mi ga lata fayt eena Gaad, soh hihn mi chros dat Jehoava pramis mi wahn kohn chroo. Dat da wai di Baibl seh dat “Aybraham mi kanvins dat hihn wuda mi bee di faada a lata nayshanz. . . . Hihn mi bileev di pramis.” (Roam. 4:18) Da pramis mi did kohn chroo. Aybraham mi en op di ga di son weh ih mi-di hoap fa, Aizak. Bot weh mi mek Aybraham soh shoar dat Jehoava mi wahn kip ih pramis? Aybraham mi ga wahn kloas frenship wid Jehoava, ahn dis mi mek hihn “chros dat Gaad ku du weh ih mi pramis fi du.” (Roam. 4:21) Bikaaz Aybraham mi ga fayt eena Jehoava, Hihn mi aksep ahn az wahn raichos man.—Jay. 2:23. w23.12 8 ¶1-2

Wahn yong man weh peepl ku chros wahn mek shoar ih tek kayr a aala ih rispansabiliti dehn. Mek wi luk pahn di perfek egzampl weh Jeezas mi set. Jeezas da-mi sohnbadi weh aalwayz tek kayr a ih asainment dehn, ahn hihn mi rispansabl. Hihn mi aalso du aal weh Jehoava mi aks ahn fi du, eevn wen dat mi haad far ahn. Hihn mi lov peepl, espeshali ih disaipl dehn, an ih mi wilin fi ded fi dehn. (Jan 13:1) Jos laik Jeezas, werk haad pahn eni asainment weh yu get. If yu noh noa how fi du sohnting, bee hombl an aks machoar bradaz fi help. Wen yu geh wahn asainment, noh chrai du az lee bit az pasabl, bot bee wilin fi du moa dan weh dehn aks yu fi du. (Roam. 12:11) Du yu asainment laik yu di du it “fi Jehoava ahn noh fi peepl,” soh werk haad fi du yu bes ahn finish yu asainment. (Kol. 3:23) Af koars, yu noh perfek, soh bee hombl an admit eni mistayk weh yu mek.—Prav. 11:2. w23.12 26 ¶8

Wee soh hapi fi geh baptaiz ahn bee paat a Jehoava famili. Enibadi weh don geh baptaiz agree wid weh Dayvid mi tel Jehoava: “Di persn weh yu pik an invait fi kohn kloas tu yoo fi liv eena yu koatyaad wahn bee hapi.” (Saa. 65:4) Hoo Jehoava invait fi goh eena ih koatyaad er fi bee paat a ih famili? Yu haftu shoa dat yu waahn ga wahn kloas rilayshanship wid Jehoava, ahn den hihn wahn jraa kloas tu yoo. (Jay. 4:8) Afta yu disaid fi dedikayt yu laif tu Jehoava ahn geh baptaiz, yu ku bee shoar dat Jehoava wahn “poar owt pahn yu wahn blesin tu nohmoh nohmoh.” (Mal. 3:10; Jer. 17:8) Baptizm da jos di biginin a yu servis tu Jehoava. Yu need fi du yu bes fi liv op tu da pramis noh mata wat, espeshali wen yu goh chroo wahn tof sichuwayshan er wen yu fays temtayshan. (Ikl. 5:​4, 5) Now dat yu da wan a Jeezas falowaz, yu waahn du yu bes fi fala fi hihn egzampl an obay ih komanment dehn.—Mach. 28:​19, 20; 1 Peet. 2:21. w24.03 8 ¶1-3

Wat if yoo ahn yu marij mayt noh laik spen taim tugeda? Weh unu ku du? Tink bowt wahn faiya. Ih noh staat blayz op az soon az ih staat tu bon. Ih wuda need fi mek sohnbadi put moa ahn moa faiyawud pan it fi mek ih ku akchwali blayz op. Jos laik dat, unu tink unu kuda staat tu spen wahn lee bit a taim tugeda evri day? Chrai du sohnting weh too a unu laik du. (Jay. 3:18) If unu du dat, unu ku mek unu lov fi eech ada groa agen. Rispek veri impoatant eena wahn marij. Da laik di ayaa weh mek wahn faiya kip di bon. Widowt ayaa, wahn faiya ku owt faas. Saym way soh, widowt rispek, wahn kopl wahn noatis dat dehn lov wahn kool aaf faas tu. Pahn di ada han, wahn hozban ahn waif weh werk haad fi shoa rispek fi eech ada di du dehn bes fi kip dehn lov schrang. Memba, da noh if yoo tink yu di shoa rispek, bot da if yu marij mayt feel dat yu di rispek ahn. w23.05 22 ¶9; 24 ¶14-15

Eena di Baibl, wi laan bowt wahn lata Jehoava faytful servants hoo mi feel schres owt ahn frayd sayka dehn enimiz er ada prablemz. (Saa. 18:4; 55:​1, 5) Jos laik dat, wi mait di fays prablemz da skool, da werk, fahn wi famili, er fahn di govament. Wi mait feel frayd bikaaz wi ga wahn bad siknis weh ku kil wi. Joorin dehndeh taimz, wi mait feel laik wahn lee pikni weh kyaahn du notn fi ihself. How Jehoava wahn help wi wen wi feel laik dat? Hihn pramis fi komfert wi ahn mek wi feel kaam. Soh wi need fi spen taim wid Jehoava. How wi du dat? Wen wi pray ahn reed di Baibl. (Saa. 77:​1, 12-14) Soh weneva wi feel schres owt, di fers ting wi waahn du da aks Jehoava fi help. Tel ahn bowt weh yu di goh chroo ahn weh yu frayd fa. Wen yu reed sohnting eena di Baibl weh komfert yu, da laik Jehoava di taak tu yu.—Saa. 119:28. w24.01 24-25 ¶14-16

Ih impoatant fi ga wahn schrang dizaiya fi reech yu goalz. Sohnbadi weh reeli waahn reech wahn goal wahn werk reeli haad fi reech da goal. Wi ku reech wi goalz faasa if wi ga wahn schrang dizaiya fi werk pahn dehn. Soh, weh yu ku du fi mek yu dizaiya moa schranga? Pray fi wahn schrang dizaiya fi du moa. Jehoava ku yooz ih hoali spirit fi help yu ga da schrang dizaiya fi reech yu goal. Sohntaim wi set wahn goal bikaaz wi noa dat ih gud fi wi. Bot wi mait noh ga di schrang dizaiya fi reech da goal. Tink bowt weh aal Jehoava don du fi yu. (Saa. 143:5) Di apasl Paal mi tink bowt di grayt kainis weh Jehoava mi shoa ahn, an dis mi help ahn fi du moa fi Jehoava. (1 Kor. 15:​9, 10; 1 Tim. 1:​12-14) Saym way soh, if yu kip aan di tink bowt weh aal Jehoava don du fi yu, yu dizaiya fi reech yu goal wahn bee schranga.—Saa. 116:12. w23.05 27 ¶3-5

Wi mek Jehoava feel hapi wen wi prayz ih naym. (Saa. 119:108) Yu tink dis meen Jehoava need wee fi prayz ahn fi mek ih feel gud bowt ihself? No! Wen wi prayz wi Pa, Jehoava, wi help proov dat weh Saytan seh bowt wi da wahn lai. Saytan seh dat non a wi wahn stay laayal tu Jehoava ahn difen Jehoava naym. Hihn seh dat wi noh wahn stay faytful wen wi deh anda presha ahn dat wi wahn ton wi bak pahn Jehoava. (Joab 1:​9-11; 2:4) Bot Joab mi proov dat Saytan laiyad bad, bikaaz hihn mi stay faytful tu Jehoava. How bowt yoo? Aala wi ga di privilij fi difen Jehoava naym ahn mek hihn hapi wen wi stay faytful tu ahn. (Prav. 27:11) Dat da wahn aana, noh chroo? w24.02 8-9 ¶3-5

Afta di taim a Moaziz ahn Jashwa, Jehoava mi apoint sohn joj fi gaid ih peepl. Laytaraan, wen kingz mi-di rool oava di nayshan, hihn mi yooz lata difrent prafit fi kantinyu gaid ih peepl. Di king dehn weh mi faytful tu Jehoava lisn tu di advais fahn dehnya prafit. Wen King Dayvid mi need kongsl ahn dairekshan, hihn mi lisn tu di prafit Naytan. (2 Sam. 12:​7, 13; 1 Chron. 17:​3, 4) King Jehoshafat mi fala di advais fahn di prafit Jahazaiyel, an ih mi inkorij di peepl fi “ga fayt eena [Gaad] prafit dehn.” (2 Chron. 20:​14, 15) Wen dehn mi eena daynja, King Hezikaiya mi ton tu di prafit Aizaiya fi help. (Isa. 37:​1-6) Evri taim di king dehn mi lisn tu Jehoava, hihn mi bles dehn ahn protek ih peepl. (2 Chron. 20:​29, 30; 32:22) Soh ih mi klyaa fi si dat Jehoava mi-di yooz di prafit dehn fi gaid ih peepl. w24.02 21 ¶8

Saytan waahn wi kip rong peepl weh noh fala Jehoava hai standadz, kaaz dis wuda mek it haad fi mek wi fala dehndeh standadz. Wi haftu memba dat wi noh onli spen taim wid peepl wen wi deh fays-tu-fays wid dehn. Wi spen taim wid dehn pahn di Intanet tu, fi egzampl, pahn soashal meedya. Wi waahn kantinyu fait gens di way di werl tink bowt Jehoava hai standadz bikaaz wi noa dat dehn rang. (Ifee. 4:​19, 20) Ih impoatant fi aks wiself: ‘Ai spen tu moch taim wid peepl da werk, peepl da skool, er enibadi els weh noh rispek Jehoava standadz? Ai stan op fi weh rait eevn doa peepl noh laik mi sayka weh Ai bileev eena?ʼ Laik weh 2 Timoti 2:​20-22 seh, eevn eena di kangrigayshan wi need fi bee kyaaful hoo wi chooz fi bee wi frenz. Wai? Bikaaz som a dehn mait noh help wi fi waahn kantinyu serv Jehoava. w24.03 22-23 ¶11-12

Yoo eva chrai imajin weh Jehoava luk laik er weh kaina persn hihn? Eevn doa wi kyaahn si Jehoava, di Baibl diskraib ahn eena lata difrent wayz. Fi egzampl, ih seh dat Jehoava da laik “di son weh shain pahn wi ahn laik wahn sheel weh protek wi” ahn laik “wahn faiya weh dischrai evriting.” (Saa. 84:11; Heeb. 12:29) Izeekyel mi si Jehoava eena wahn vizhan, an ih seh dat da laik if hihn shain laik metal, dat ih sidong pahn wahn safaiya chroan, an aal rong ahn mi brait laik wahn raynboa. (Ezek. 1:​26-28) Sins wi kyaahn si Jehoava, wi mait fain it haad fi bileev dat ih lov wi. Er som peepl tink dat Jehoava kuda neva lov dehn bikaaz a di tingz weh dehn gaahn chroo eena dehn laif. Jehoava andastan dehndeh feelinz, an ih noa how dehn afek wi. Soh fi help wi, Jehoava yooz fi hihn Werd fi mek wi noa weh kaina persn hihn. Lov da di bes werd fi diskraib Jehoava. Di Baibl seh dat “Gaad da lov.” (1 Jan 4:8) Hihn du evriting bikaaz a lov. Gaad lov soh deep ahn soh schrang dat ih lov eevn peepl weh noh lov hihn.—Mach. 5:​44, 45. w24.01 26 ¶1-3

Moaziz da-mi di wan weh Jehoava mi chooz fi leed ih peepl owta Eejip, ahn Hihn mi gaid dehn wid wahn klowd, ahn joorin di nait Hihn mi gaid dehn wid faiya fi gi dehn lait. (Eks. 13:21) Moaziz mi fala dis klowd weh mi kehr dehn da di Red See. Bot di peepl mi geh fraitn bikaaz di Eejipshan aami mi-di chays afta dehn, ahn dehn neva ga no way els fi goh. Bot Jehoava neva mek no mistayk. Hihn mi gi Moaziz spesifik inschrokshanz fi kehr di Izrelaits da di Red See. (Eks. 14:2) Hihn mi yooz ih powa fi sayv dehn eena wahn amayzin way. (Eks. 14:​26-28) Moaziz mi kantinyu fi chros dat Jehoava mi-di yooz dis klowd fi gaid ih peepl. Fi 40 yaaz hihn mi fala dis klowd fi gaid dehn chroo di wildanes. (Eks. 33:​7, 9, 10) Jehoava mi taak tu Moaziz chroo di klowd, ahn Moaziz mi tel di peepl weh Jehoava seh. Soh di Izrelaits mi ga moa dan inof proof dat Jehoava mi-di yooz Moaziz fi gaid dehn. w24.02 21 ¶4-5