Joolai

Evriting weh Jeezas mi seh ahn du shoa how ih Pa tink ahn feel. Dis inklood di miraklz weh Jeezas mi du. (Jan 14:9) Weh wi ku laan fahn Jeezas miraklz? Jehoava ahn Jeezas lov wi wahn lat. Wen Jeezas mi deh pahn ert, hihn shoa humoch ih lov peepl wen ih mi yooz ih powa fi du miraklz fi help peepl weh mi-di sofa. Wahn taim, dehn mi ga too blain man weh mi-di hala owt fi mek Jeezas help dehn. (Mach. 20:​30-34) Di Baibl seh dat Jeezas “mi feel sari fi dehn” ahn den ih mi heel dehn. Di Greek verb weh wi chranslayt az “feel sari fi dehn” shoa dat Jeezas mi feel wahn deep payn eena ih haat wen ih si peepl di sofa. Dis kompashan weh Jeezas mi feel shoa humoch ih lov peepl, ahn dat mi moov ahn fi feed peepl weh mi hongri ahn kyoar wahn man weh mi ga leprosi. (Mach. 15:32; Maak 1:41) Wi ku bee shoar dat Jehoava, di Gaad a “kompashan,” an ih Son lov wi wahn lat, ahn dehn feel wi payn wen wi sofa. (Look 1:78; 1 Peet. 5:7) Dehn kyaahn wayt fi geh rid a aala di prablemz ahn sofarin weh hyoomanz di goh chroo. w23.04 3 ¶4-5

Wi ku chrai wi bes fi noh reed er lisn tu eni rang aidyaaz weh kaman eena Saytan werl. Wen wi reed ahn stodi di Baibl, dis ku help wi fi tink bowt gud ahn kleen tingz. Wi ku aalso protek wi main fahn rang tinkin wen wi goh da meetin ahn tek paat eena di preechin werk. Bot Jehoava pramis dat hihn noh wahn mek di temtayshan weh wi di fays geh soh bad dat wi kyaahn bayr it. (1 Kor. 10:​12, 13) Joorin dehnya laas dayz, wi haftu pray tu Jehoava eevn moa soh dat wi ku stay faytful tu ahn. Jehoava waahn wi ‘poar owt wi haat tu ahn.ʼ (Saa. 62:8) Prayz Jehoava ahn tank ahn fi evriting weh ih du fi yu. Aks Jehoava fi help yu ga korij fi preech. Bayg ahn fi help yu bayr op wen yu di goh chroo eni tof sichuwayshan an aks ahn fi help yu noh giv een tu temtayshan. Noh mek notn ahn nobadi stap yu fahn pray tu Jehoava. w23.05 7 ¶17-18

Wai wi goh da wi kangrigayshan meetin dehn? Di mayn reezn da fi prayz Jehoava. (Saa. 26:12; 111:1) Wi aalso goh fi bil op eech ada wail wi di liv joorin dehnya haad taimz. (1 Tes. 5:11) Wen wi koment da di meetin dehn, wi du dehnya too ting. Bot dehn ga tingz weh ku mek it haad fi mek wi gi wahn koment. Wi mait feel nervos wen da taim fi koment, er wi mait reeli waahn koment bot di bradaz noh aalwayz pik wi wen wi put op wi han. Weh ku help wi deel wid dehnya chalenjiz? Di apasl Paal seh dat wi need fi “inkorij wan anada.” Soh wi mait feel les nervos fi koment if wi kip in main dat dis ku inkorij wi bradaz ahn sistaz. An eevn if dehn noh pik wi, wi ku stil bee hapi bikaaz adaz geh di chaans fi koment.—1 Peet. 3:8. w23.04 20 ¶1-3

Di king mi mek wahn anonksment dat di Jooz, weh da-mi priznaz fi bowt 70 yaaz da Babilan, kuda mi goh bak hoam da Izrel. (Ezra 1:​2-4) Onli Jehoava kuda mi free ih peepl fahn Babilan, bikaaz di king a Babilan neva yoostu rilees ih priznaz. (Isa. 14:​4, 17) Bot wahn nyoo roola mi kanka Babilan, ahn hihn da-mi di wan weh mi tel di Jooz dat dehn kuda mi lef Babilan ahn goh bak hoam da Izrel. Eech Joo, espeshali di hed a wahn famili, mi haftu mek wahn disizhan: eeda dehn stay da Babilan er dehn goh bak hoam da Izrel. Da disizhan da neva wahn eezi wan. Wahn lata dehn mi oal, soh ih mi wahn haad fi mek dehn mek da lang chrip bak hoam da Izrel. Pahn tap a dat, moas a di Jooz mi baan da Babilan, ahn dehn mi seeʼt az dehn hoam. Fi dehn, Izrel da-mi jos wahn plays wehpaat dehn ansestaz kohn fram. Som a di Jooz mi ga wahn gud laif da Babilan, soh dehn mi wahn fain it haad fi lef dehn nais hows er dehn gud bizniz fi goh liv da wahn plays weh dehn noh noa. w23.05 14 ¶1-2

Di Baibl inkorij wi fi kip aan di bayr op, ga kompashan, ahn shoa lov. Look 21:19 seh: “If unu bayr op til di en, unu wahn sayv unu laif.” Koloashanz 3:12 seh: “Unu mos shoa . . . kompashan.” Ahn 1 Tesaloanyanz 4:​9, 10 seh: “Gaad di teech unu how fi shoa lov tu wan anada. . . . Bot wi bayg unu, bradaz, fi kip aan di du dat moa ahn moa.” Dehnya vers geh rait dong fi di disaiplz weh don mi-di bayr op ahn shoa dat dehn ga kompashan ahn lov. Bot dehn mi stil haftu kantinyu werk haad fi shoa dehnya kwalitiz. Soh wee haftu du di saym ting. Tink bowt how di erli Kristyanz mi shoa eech wan a dehndeh kwaliti. Den, yu wahn si how yu ku kapi fi dehn egzampl ahn shoa dat yu redi fi di grayt chribyulayshan. Bai di taim di grayt chribyulayshan staat, yu wahn don noa how fi bayr op, ahn dat wahn help yu mek op yu main fi kantinyu bayr op ahn stay faytful. w23.07 3 ¶4, 8

Weda wi hoap da fi liv da hevn er fi liv pahn ert, aala wi need fi stay pahn “di Way a Hoalinis.” Ih wahn help wi fi wership Jehoava now an eena di fyoocha wen wi ku injai aala di Kingdom blesinz. (Jan 10:16) Sins 1919 C.E., milyanz a peepl don lef Babilan di Grayt, weh stan fi aala faals rilijan, ahn dehn staat chravl pahn dis simbolik road. Jehoava mi mek shoar dat notn stap di Jooz fahn goh bak da Izrel. (Isa. 57:14) Soh how bowt wee tudeh? Weh aal Jehoava du fi klayr op “di Way a Hoalinis”? Bifoa 1919, fi honjridz a yaaz, Jehoava mi yooz sohn man weh mi faytful tu ahn fi help klayr op di way soh dat adaz kuda mi get owt a Babilan di Grayt. (Kompyaa Isaiah 40:3.) Dehn man mi ga lata impoatant werk fi du fi pripyaa di road soh dat peepl weh lov Jehoava kuda mi lef faals rilijan ahn staat wership Jehoava eena di way hihn waahn lang wid fi hihn peepl. w23.05 15-16 ¶8-9

Jehoava waahn mek wi bee wilin ahn hapi fi serv ahn. (2 Kor. 9:7) Yu tink wi shuda kantinyu werk pahn wahn spirichwal goal eevn wen wi noh ga di dizaiya? Tink bowt di apasl Paal egzampl. Hihn mi seh: “Ah ponish mi badi ahn kanchroal it laik wahn slayv.” (1 Kor. 9:​25-27) Paal mi foas ihself fi du weh rait eevn wen ih neva ga di dizaiya fi du it. Jehoava mi hapi wid weh Paal mi du far ahn? Yes! Ahn Hihn mi bles ahn far it. (2 Tim. 4:​7, 8) Saym way soh, Jehoava hapi fi si wen wi di werk haad fi reech wi goal eevn if wi noh reeli feel laik du it. Hihn hapi bikaaz eevn doa wi mait noh lov weh wi di du, hihn noa dat wi di du it owta lov fi hihn. Jehoava wahn bles wi fi aal weh wi du, jos laik how Ih mi bles Paal. (Saa. 126:5) An az wi geh fi si how Jehoava di bles wi, dat mait gi wi di dizaiya weh wi need fi kantinyu werk pahn wi goal. w23.05 29 ¶9-10

Di apasl Paal mi kompyaa dehn wan weh noh wahn servaiv Jehoava day tu sombadi weh di sleep. Wahn persn weh di sleep noh noa weh di hapm rong ahn er humoch taim don paas. Soh, ih noh wahn noa if sohnting impoatant di hapm an ih wahn kyaahn du notn bowt it. Eena wahn spirichwal way, moas peepl tudeh di sleep. (Roam. 11:8) Dehn noh bileev dat wi di liv eena “di laas dayz” ahn dat di grayt chribyulayshan soon kohn eevn doa dehn ga aal di proof. (2 Peet. 3:​3, 4) Bot wee noa dat di apasl Paal kongsl fi stay awayk di geh moa ahn moa seeryos evri day. (1 Tes. 5:6) Soh wi need fi stay kaam ahn sensabl. Wai? Soh dat wi noh tek paat eena palitiks er get involv eena di prablemz a dis werl. An az Jehoava day kohn kloasa, tingz wahn geh moa seeryos an ih wahn bee haada fi noh tek saidz. Bot wi noh haftu wori tu moch bowt weh wi wahn du wen tingz geh haada. Gaad hoali spirit wahn help wi fi bee kaam ahn sensabl soh dat wi ku mek gud disizhanz.—Look 12:​11, 12. w23.06 10 ¶6-7

Weh yoo tink bowt wen yu hyaa di naym Samson? If yu tink bowt wahn man weh mi schrang, den yu karek. Bot dis man mi mek wahn bad disizhan an ih mi sofa sayka dat. Stilyet, Jehoava mi foakos pahn evriting weh Samson mi du fi stay faytful tu hihn. An ih mi put Samson egzampl eena di Baibl soh dat wi ku laan fan it. Jehoava mi yooz Samson fi du wahn lata amayzin tingz fi help di Izrelaits. Di Baibl gat een wahn lis a peepl weh mi ga schrang fayt. Lang afta Samson mi don ded, Jehoava mi yooz di apasl Paal fi rait Samson naym eena da lis. (Heeb. 11:​32-34) Samson mi chros Jehoava eevn wen ih mi-di goh chroo sohn tof sichuwayshan. Samson egzampl ku inkorij wi tudeh. w23.09 2 ¶1-2

If wi pray aal di taim ahn tel Jehoava evriting weh deh pahn wi main, dis wahn help wi fi geh schranga ahn kip aan di bayr op. (1 Tes. 5:17) Eevn if yu noh di fays wahn haad taim rait now, yoo stil pray wen yu feel sad, kanfyooz, er noh noa weh fi du? If yu aalwayz taak tu Gaad an aks ahn fi help yu wid yu smaal prablemz, wen yu fays biga prablemz yu wahn aalwayz memba fi taak tu Jehoava. Yu wahn kanvins dat hihn noa egzakli wen fi help yu ahn how fi help yu. (Saa. 27:​1, 3) If wi laan fi bayr op now, wi wahn servaiv di grayt chribyulayshan. (Roam. 5:3) Wai wi seh dat? Lata bradaz ahn sistaz seh dat evri taim Jehoava help dehn fi indyoar wahn prablem, dehn fayt geh schranga. Dis help dehn fi chros dat Jehoava redi ahn wilin fi help dehn wen wahn nada prablem kom op.—Jay. 1:​2-4. w23.07 3 ¶7-8

Jehoava hombl an ih ga kompashan. Dis moov ahn fi bee reeznabl. Fi egzampl, wen Jehoava mi wahn dischrai di wikid peepl da Sadam, hihn mi shoa dat ih hombl. Jehoava mi sen ih aynjel dehn fi tel Lat fi ron goh da di mongtin dehn. Bot Lat mi frayd fi goh deh. Soh, ih mi beg Jehoava fi mek hihn an ih famili goh da wahn tong weh naym Zoawar. Bot dis da-mi wahn tong weh Jehoava mi don disaid fi dischrai. Soh Jehoava kuda mi foas Lat fi obay Ahn. Stilyet, Jehoava mi alow Lat fi goh hed ahn du weh ih mi waahnt, an Ih neva dischrai Zoawar. (Jen. 19:​18-22) Honjridz a yaaz layta, Jehoava mi shoa kompashan tu di peepl da Niniveh. Hihn mi sen Joana fi tel di wikid peepl dehn dat Niniveh mi wahn geh dischrai. Bot afta di peepl dehn da Niniveh mi ripent, Jehoava mi feel sari fi dehn an ih neva dischrai dehn.—Joan. 3:​1, 10; 4:​10, 11. w23.07 21 ¶5

Weh wi ku laan fahn Jehoawash egzampl? Hihn da-mi laik wahn chree weh di root neva gaahn deep dong, soh ih mi need wahn stik fi sopoat it. Jos laik da stik weh sopoat di chree, Jehoyada mi sopoat Jehoawash. Bot afta Jehoyada mi ded, Jehoawash mi staat lisn tu dehn wan weh mi ton gens Jehoava. Sayka dat, Jehoawash mi stap bee faytful tu Jehoava. Dis teech wi wahn impoatant lesn—if wi waahn stay kloas tu Jehoava, eech wan a wi need fi schrentn wi oan rilayshanship wid Jehoava ahn noh jos obay Jehoava bikaaz wi famili er frenz eena di kangrigayshan di du it. Wi schrentn wi rilayshanship wid Jehoava wen wi pray aal di taim, reed di Baibl, ahn meditayt pan it evri day. (Jer. 17:​7, 8; Kol. 2:​6, 7) Jehoava noh ekspek tu moch fahn wi. Ikleeziyasteez 12:13 tel wi weh hihn ekspek fahn eech wan a wi. Ih seh: “Ga lata rispek fi di chroo Gaad an obay ih komanment dehn. Dat da di moas impoatant ting weh wahn persn fi du eena ih laif.” Wen wi fyaa Gaad, er shoa lata rispek far ahn, wi wahn ku stay faytful tu ahn noh mata weh hapm eena di fyoocha. Notn wahn ku brok wi frenship wid Jehoava. w23.06 19 ¶17-19

Revilayshan 21:5 staat aaf di seh: “Di Wan weh mi-di sidong pahn di chroan seh.” Dat reeli speshal, bikaaz Jehoava onli taak chree taimz eena Revilayshan ahn dis da wan a dehn. Da neva wahn aynjel ner Jeezas seh dis, bot da Jehoava ihself. Dat meenz wi ku reeli chros weh hihn seh afta dat. Wai wi seh dat? Bikaaz Jehoava “kyaahn tel lai.” (Tai. 1:2) Soh wi ku reeli chros dat weh Revilayshan 21:​5, 6 seh wahn kohn chroo. Den Jehoava seh: “Ai di mek evriting nyoo.” Rait ya, Jehoava mi-di taak bowt chaynjiz weh ih wahn mek eena di fyoocha. Bot bikaaz hihn soh shoar dat dehnya pramis wahn kohn chroo, hihn seh it laik if ih don hapm aredi.—Isa. 46:10. w23.11 3-4 ¶7-8

Di apasl Peeta mi-di schrogl wid ih oan weeknis dehn. Fi egzampl, Peeta mi rayl op wid Jeezas wen Jeezas mi seh dat ih mi wahn haftu ded fi mek Baibl prafesi kohn chroo. (Maak 8:​31-33) Ahn moa dan wan taim, Peeta ahn di ada apaslz mi aagyu bowt wich wan a dehn mi moa impoatant dan di ada. (Maak 9:​33, 34) Di nait bifoa Jeezas mi ded, Peeta mi chap aaf wahn man ayz. (Jan 18:10) Da saym nait, Peeta mi dinai Jeezas chree taimz bikaaz ih mi frayd fi weh peepl mi wahn tink bowt ahn. (Maak 14:​66-72) Dat mi mek Peeta baal. Peeta mi geh diskorij, bot Jeezas stil neva giv op pan ahn. Afta Jeezas mi geh rayz op bak, hihn mi giv Peeta di apachooniti fi shoa ahn dat ih stil lov ahn. Jeezas mi aks Peeta fi help ahn tek kayr a ih sheep, ahn hihn mi redi fi du weh Jeezas tel ahn fi du. (Jan 21:​15-17) Hihn mi aalso deh monks di fers set a Kristyanz weh mi geh anointid da Jeroosalem pahn di day a Pentikaas. w23.09 22 ¶6-7

Di apasl Peeta mi beg ih felo eldaz fi bee laik shepadz ahn “tek kayr a di flak weh bilangz tu Gaad.” (1 Peet. 5:​1-4) Wi noa dat unu eldaz lov di bradaz ahn sistaz eena di kangrigayshan an unu waahn tek kayr a dehn, bot sohntaim unu mait feel dat unu soh bizi ahn taiyad dat unu kyaahn du evriting weh unu waahn du. If yu feel laik dat, weh yoo ku du? Poar owt yu haat tu Jehoava ahn tel ahn how yu feel. Peeta mi seh: “If enibadi serv adaz, mek ih pen pahn di schrent a Gaad.” (1 Peet. 4:11) Yu bradaz ahn sistaz mait di fays prablemz weh kyaahn geh fiks til di nyoo werl. Memba dat di “cheef shepad,” Jeezas Krais, ku help dehn moa dan enibadi els. Hihn ku help dehn now an eena di nyoo werl. Aal weh Gaad aks eldaz fi du da fi lov dehn bradaz, shepad dehn, ahn fi bee “wahn egzampl” tu dehn. w23.09 29-30 ¶13-14

Wi haftu chrai avoid di wizdom a di werl. If wee tink laik how di peepl eena dis werl tink, wi wahn staat tu ignoar Jehoava laa dehn. (1 Kor. 3:19) “Di wizdom a dis werl” mek peepl feel laik dehn noh need fi obay Gaad. Sohn Kristyanz weh mi liv da Pergamom ahn Taiyataira mi staat tu bihayv jos laik di peepl weh mi liv rong dehn weh mi wership aidol ahn komit sekshwal imoraliti. Soh Jeezas mi gi di too kangrigayshan schrang kongsl bikaaz dehn mi-di talarayt sekshwal imoraliti. (Rev. 2:​14, 20) Tudeh, peepl chrai presha wi fi aksep fi dehn rang tinkin. Wi famili er frenz mait chrai kanvins wi dat wi di bee tu schrik wid wiself ahn dat ih okay fi brok Gaad laa. Fi egzampl, dehn mait klaym seh dat wi ku du wateva wi waahn ahn wi noh haftu obay di standadz weh deh eena di Baibl bikaaz ih oal fashan. Sohntaim wi mait feel laik di inschrokshan dehn weh wi geh fahn Jehoava noh klayr inof. Soh wi mait feel laik ih noh inof fi jos “fala weh rait dong eena di Skripchaz” ahn dat wi need fi ad aan “moa dan” weh mi geh rait dong eena di Skripchaz fi mek tingz klayr.—1 Kor. 4:6. w23.07 16 ¶10-11

Mayri, Jeezas ma, mi need lata schrent fi du weh Jehoava mi aks ahn fi du. Jos imajin how shee mosi mi feel wen di aynjel Gaybral tel ahn dat shee mi wahn geh pregnant bifoa ih mi eevn marid. Shee neva noa how fi rayz wahn pikni, bot stilyet shee mi wahn haftu tek kayr a di Mesaiya. Pahn tap a dat, how shee mi wahn tel Joazef dat shee mi pregnant if shee neva ga seks wid ahn yet? (Look 1:​26-33) How Mayri mi geh di schrent? Shee mi aks adaz fi help ahn. Fi egzampl, shee mi aks di aynjel Gaybral fi giv ahn moa infamayshan bowt weh ih mi need fi du. (Look 1:34) Lee wail afta dat, Mayri gaahn da wahn siti fi vizit Ilizabet, hoo da-mi ih faamli. Ilizabet mi liv “op eena di mongtin dehn” da wahn siti eena Jooda. Jehoava mi yooz Ilizabet fi komen Mayri ahn tel shee di prafesi bowt di baybi weh ih mi wahn gat. (Look 1:​39-45) Mayri mi seh dat Jehoava du “powaful tingz wid ih han.” (Look 1:​46-51) Jehoava mi yooz di aynjel Gaybral an Ilizabet fi gi Mayri di schrent weh ih mi need. w23.10 14-15 ¶10-12

Onli 144,000 a Jeezas disaiplz geh anointid wid hoali spirit, ahn dehn ga wahn speshal rilayshanship wid Jehoava. Dehn wahn serv az prees da hevn wid Jeezas. (Rev. 14:1) Di Hoali Room reprizent di speshal rilayshanship weh dehn gat wid Gaad bikaaz hihn yooz ih hoali spirit fi adap dehn fi bee ih chiljren wail dehn stil liv pahn ert. (Roam. 8:​15-17) Di Moas Hoali eena di tabernakl reprizent hevn, di plays wehpaat Jehoava liv. “Di kertn” weh separayt di Hoali Room fahn di Moas Hoali Room reprizent Jeezas hyooman badi. Az lang az Jeezas da-mi wahn hyooman, hihn kudn goh da hevn fi serv az di grayt Hai Prees eena Jehoava spirichwal templ. Wen Jeezas giv op ih hyooman laif, hihn mi oapm di way fi mek di 144,000 goh da hevn. Jos laik Jeezas, dehn kudn goh da hevn wid dehn hyooman badi. Dehn haftu ded fers bifoa dehn ku goh da hevn.—Heeb. 10:​19, 20; 1 Kor. 15:50. w23.10 28 ¶13

Gidiyan neva geh beks wen di peepl fahn Eefrayim chraib mi joj ahn. (Joj. 8:​1-3) Hihn neva ansa dehn bak eena wahn bad way. Hihn mi shoa dat ih hombl wen ih mi lisn tu weh dehn mi-di komplayn bowt, ahn wen ih taak tu dehn eena wahn kaam way. Bikaaz a dat, dehn mi kaam dong. Eldaz weh waiz wahn fala Gidiyan egzampl fi lisn gud an ansa eena wahn kaam way wen adaz joj dehn. (Jay. 3:13) Wen dehn du dat, dehn help kip di pees eena di kangrigayshan. Wen adaz mi prayz Gidiyan fi di vikchri oava Midyan, hihn mi mek dehn noa dat Jehoava da di wan weh dizerv di prayz. (Joj. 8:​22, 23) How eldaz ku kapi fi hihn egzampl? Dehn ku gi Jehoava di prayz fi weh dehn du. (1 Kor. 4:​6, 7) Fi egzampl, if adaz komen wahn elda fi di way ih teech, hihn ku help dehn fi si dat da bikaaz a di inschrokshan weh ih geh fahn Gaad Werd, er ih ku seh dat aala wi ku laan fahn di chraynin weh Jehoava aaganaizayshan giv. Ih gud fi mek eldaz tink bowt di way dehn teech, fi si if ih di bring aana tu Jehoava er if dehn jos di chrai impres adaz. w23.06 4 ¶7-8

If wi noh di geh weh wi pray fa, wi mait aks wiself, ‘Ai di pray fi di karek ting?ʼ Lata taim, wi mait tink dat wi noa weh gud fi wi. Bot di tingz weh wi pray fa mait noh bee di bes ting fi wi. If wi di pray bowt wahn prablem, maybi dehn mait ga wahn beta solooshan dan di wan weh wi di pray bowt. Er ih ku bee dat wi aks fi sohnting weh noh goh lang wid Jehoava wil. (1 Jan 5:14) Tink bowt wahn egzampl bowt payrents weh bayg Jehoava fi mek dehn son kantinyu serv Jehoava. Wi mait tink dat notn noh rang wid da pryaa, bot Jehoava noh foas non a wi fi wership ahn. Hihn waahn mek aala wi chooz fi wership ahn, eevn wi chiljren. (Deut. 10:​12, 13; 30:​19, 20) Soh insted, di payrents kuda aks Jehoava fi help dehn reech dehn pikni haat soh dat dehn ku lov Jehoava ahn fi bee fi hihn fren.—Prav. 22:6; Ifee. 6:4. w23.11 21 ¶5; 23 ¶12

Wai ih impoatant fi mek wi komfert wi bradaz ahn sistaz? Kaaz wen wi du dis wi shoa dehn dat wi reeli lov dehn. Akaadn tu wahn Baibl refrens, wen Paal yooz di werd “komfert,” ih akchwali meen fi “stan op saida wahn persn fi inkorij ahn wen ih di sofa sayka wahn seeryos sichuwayshan er prablem.” Soh enitaim wi komfert wahn brada er sista, wi di help dehn fi stay faytful tu Jehoava ahn kip di serv ahn. Dat reeli shoa humoch wi lov dehn, noh chroo? (2 Kor. 7:​6, 7, 13) Wen yu feel kompashan fi sohnbadi weh di sofa, yu wahn waahn komfert dehn ahn du sohnting weh wahn help dehn feel beta. Soh fers, wi feel kompashan fi dehn, den wi komfert dehn. Paal mi eksplayn dat Jehoava komfert peepl bikaaz ih feel kompashan fi dehn. Ahn hihn diskraib Jehoava az di “Faada weh ga lata mersi ahn di Gaad weh aal komfert kohn fram.”—2 Kor. 1:3. w23.11 9-10 ¶8-10

Evribadi weh fala Krais wahn sofa eena sohn kaina way. Mek wi luk pahn di apasl Paal egzampl. Hihn mi rait tu di bradaz da Tesalonaika: “Wen wi mi deh wid unu, wi mi tel unu heda taim dat wi wuda sofa sayka chribyulayshan, ahn dat da egzakli weh hapm.” (1 Tes. 3:4) An ih mi rait tu di Korintyanz: “Wi waahn mek unu noa bowt di chribyulayshan weh wi mi fays . . . Wi neva shoar if wi mi wahn servaiv.” (2 Kor. 1:8; 11:​23-27) Kristyanz tudeh ku ekspek fi fays aal kaina prablemz tu. (2 Tim. 3:12) Bikaaz yu di fala Jeezas, maybi yu famili er frenz ton gens yu bikaaz a yu fayt. Yu eva fays prablemz da werk bikaaz yu di chrai bee aanis aal di taim? (Heeb. 13:18) Di govament eva persikyoot yu bikaaz yu preech tu adaz bowt yu hoap? Noh mata weh kaina prablemz wi fays, Paal seh dat wi shuda stil bee hapi. w23.12 10-11 ¶9-10

Jaykob gaahn chroo lata prablemz. Too a Jaykob son, Simiyan ahn Leevai, mi bring shaym pahn dehn famili ahn pahn Jehoava naym. Pahn tap a dat, Raychel mi ded wail ih mi-di ga ih sekant baybi. Ahn wen Jaykob mi oal, ih mi haftu moov tu Eejip bikaaz a wahn reeli bad famin weh mi afek di lan a Kaynan. (Jen. 35:​16-19; 37:28; 45:​9-11, 28) Eevn wid evriting weh Jaykob gaahn chroo, hihn neva looz ih fayt eena Jehoava an ih pramis dehn. Ahn Jehoava mi shoa Jaykob dat ih mi pleez wid ahn. Fi egzampl, Jehoava mi bles Jaykob wid wahn lata tingz. Jehoava mi aalso mek Jaykob geh fi si ih son Joazef agen. Jos imajin how hapi ahn tankful Jaykob mi feel fi si ih son weh hihn mi tink mi don ded. Jaykob kuda mi bayr op wid di prablemz weh ih mi-di goh chroo bikaaz hihn mi ga wahn kloas frenship wid Jehoava. (Jen. 30:43; 32:​9, 10; 46:​28-30) Jos laik Jaykob, wee ku bayr op wid prablemz weh wi neva ekspek if wi ga wahn kloas frenship wid Jehoava. w23.04 15 ¶6-7

Saam 23 da wahn sang weh shoa dat Dayvid mi reeli bileev eena Jehoava lov ahn kyaa. Eena dis sang, ih taak bowt di schrang rilayshanship weh hihn mi gat wid fi hihn Shepad, Jehoava. Dayvid mi feel sayf wen ih mek Jehoava gaid ahn, an ih mi pen pahn Jehoava fi evriting. Dayvid mi noa dat Jehoava mi wahn shoa hihn lov evri singl day. Bot da how hihn kuda mi bee soh shoar a dat? Bikaaz Jehoava mi aalwayz provaid fi Dayvid, hihn kuda mi feel humoch Jehoava kay bowt ahn. Ahn Dayvid mi noa dat Jehoava mi hapi wid ahn, an dat Hihn da-mi ih fren. Dat da wai hihn mi noa fi shoar dat noh mata weh hapm eena di fyoocha, Jehoava mi wahn kantinyu fi giv ahn evriting weh ih need. Bikaaz Dayvid mi chros dat Jehoava lov ahn wahn lat, dat mi help ahn fi deel wid eni woriz weh hihn mi gat. Dat mi aalso help ahn fi bee hapi ahn kantentid.—Saa. 16:11. w24.01 29 ¶12-13

Sins Werl Waar II, Jehoava peepl ga di freedom fi preech eena lata difrent konchri. Sayka dis, wi si how dis werk di groa aal oava di werl ahn moa ahn moa peepl di laan bowt Jehoava. Tudeh, di bradaz hoo mek op di Govanin Badi dipen pahn Jeezas fi gaid dehn. Dehn du dis soh dat di inschrokshan ahn dairekshan weh dehn gi di bradaz ahn sistaz noh kohn fahn dehn, bot insted, fahn Jehoava ahn Jeezas. Ahn dehn yooz serkit oavaseeyaz an eldaz fi gi dairekshan tu di kangrigayshan dehn. Di Baibl tel wi dat dehnya anointid eldaz deh eena Jeezas “rait han.” (Rev. 2:1) Dehnya eldaz noh perfek ahn dehn mek mistayk, jos laik Moaziz, Jashwa, ahn di apasl dehn. (Num. 20:12; Jash. 9:​14, 15; Roam. 3:23) Bot wi ku stil si dat Jeezas di yooz ahn gaid di faytful slayv ahn dehnya eldaz, an ih wahn kantinyu du dis. Sins di dairekshan weh wi geh fahn dehnya apointid man reeli di kohn fahn Jeezas, wi ku chros it. w24.02 23-24 ¶13-14

Tudeh wee ku mek Jehoava hapi wen wi taak bowt how tankful wi tankful fi di tingz weh hihn du ahn bowt humoch wi lov ahn. Wen wi preech, wi mayn goal da fi help peepl kohn kloas tu Jehoava ahn help dehn si fi wee lovin Pa di way wee si ahn. (Jay. 4:8) Wi hapi fi shoa peepl how di Baibl diskraib Jehoava az wahn Gaad a lov, jostis, wizdom, ahn powa, ahn fi tel dehn bowt ih ada byootiful kwalitiz. Wahn nada way wi prayz Jehoava ahn mek hihn hapi da wen wi chrai wi bes fi bee laik hihn. Wen wi du dat, peepl mait wanda wai wi soh difrent fahn evribadi els eena dis wikid werl. (Mach. 5:​14-16) Ahn sins wi haftu deh rong dehndeh peepl evri day, dis gi wi wahn gud apachooniti fi eksplayn wai wi werk haad fi bee difrent. Dis ku help peepl weh hombl fi waahn geh kloas tu Gaad. Wen wi prayz Jehoava eena dehnya wayz, wi mek fi hihn haat hapi.—1 Tim. 2:​3, 4. w24.02 10 ¶7

Fi bee wahn machoar Kristyan man, yu need fi ga skilz weh ku help yu eena laif. Dehnya skilz wahn help yu fi tek kayr a yu rispansabiliti dehn eena di kangrigayshan, fi kip wahn jab weh wahn sopoat yoo er yu famili, ahn fi ga wahn gud rilayshanship wid adaz. Fi egzampl, laan fi reed ahn rait gud. Di Baibl seh wahn man weh hapi ahn weh du gud eena laif tek di taim fi reed di Baibl evri day ahn tink bowt weh ih reed. (Saa. 1:​1-3) Wen yu reed di Baibl evri day, yu wahn laan fi tink di way Jehoava tink ahn yu wahn laan fi yooz di Skripchaz eena di rait way. (Prav. 1:​3, 4) Wi bradaz ahn sistaz eena di kangrigayshan need help fahn spirichwali machoar bradaz hoo ku teech dehn ahn gi dehn gud advais fahn di Baibl. If yu noa how fi reed ahn rait gud, yu ku pripyaa paats ahn koments weh ku help dehn ahn mek dehn fayt geh schranga. Yu ku aalso yooz dis skil fi tek noats fi help yu schrentn fi yoo fayt an inkorij adaz tu. w23.12 26-27 ¶9-11

Wen yoo feel frayd, tink bowt evriting weh Jehoava wahn du fi yoo eena di fyoocha wen hihn dischrai Saytan. Eena di 2014 reejinal kanvenshan, dehn mi ga wahn demonschrayshan weh shoa wahn pa weh mi-di taak bowt 2 Timoti 3:​1-5 wid ih famili, ahn hihn mi eksplayn dat eena Paradais dehndeh vers wahn seh sohnting difrent fahn weh dehn seh now. Dis da weh dehn wuda seh: “Eena di nyoo werl, wi wahn ga di hapiyis taim a wi laif. Peepl wahn lov wan anada ahn lov spirichwal tingz. Dehn noh wahn boas ahn tink dat dehn beta dan ada peepl. Dehn noh wahn insolt peepl, ahn dehn wahn lisn tu weh dehn ma ahn pa tel dehn fi du. Dehn wahn bee tankful ahn dehn wahn lov Gaad wayz. Dehn wahn shoa kansaan fi ada peepl ahn dehn wahn kain tu evribadi. Dehn wahn aalwayz taak gud bowt wan anada ahn valyu wan anada laif, ahn dehn wahn ku kanchroal dehnself. Dehn wahn bee kaam, ahn dehn wahn lov evriting weh gud. Evribadi wahn ku chros dehn. Dehn wahn bee hombl ahn ga wahn jentl haat. Dehn wahn lov Gaad insteda lov plezha. Dehn wahn alow Gaad fi gaid dehn laif. Dehndeh da di kaina peepl yu fi stik kloas tu.” Yoo ahn yu famili er ada bradaz ahn sistaz eva taak bowt weh laif wahn bee laik eena di nyoo werl? w24.01 6 ¶13-14

Di Baibl seh: “Jehoava hapi wid fi hihn peepl.” (Saa. 149:4) Dat mek wi feel gud, noh chroo? Bot som a wi mait geh diskorij an eevn wanda, ‘Jehoava reeli hapi wid mee?ʼ Eena Baibl taimz, som a Jehoava faytful servants mi haftu fait feelinz laik dat. (1 Sam. 1:​6-10; Joab 29:​2, 4; Saa. 51:11) Di Baibl tel wi dat aldoa wi noh perfek, wi ku mek Jehoava hapi. How dat pasabl? Wi need fi put fayt eena Jeezas ahn geh baptaiz. (Jan 3:16) Ahn dat wahn shoa evribadi dat wi reeli sari fi wi sinz ahn dat wi pramis Jehoava dat wi wahn du weh hihn waahn ahn noh weh wee waahnt. (Aks 2:38; 3:19) Jehoava wahn hapi if wi tek dehnya steps fi ga wahn rilayshanship wid ahn. Az lang az wee kip di du wi bes fi du weh hihn waahn, hihn wahn hapi wid wi. Hihn wahn si wi az ih fren.—Saa. 25:14. w24.03 26 ¶1-2

Wee fala di egzampl a di disaiplz wen wi kantinyu fi preech eevn if di govament chrai stap wi. Wee ku bee shoar dat Jehoava wahn help wi preech. Soh pray tu Jehoava fi gi wi di korij ahn wizdom wi need, an aalso aks Jehoava fi help wi bayr op wen wi ga prablemz. Wahn lata wi mait ga fizikal er imoashanal prablemz, wi mait di fays famili prablemz, di goh chroo persikyooshan, di sofa bikaaz sombadi weh wi lov ded, er eni ada prablemz. Ahn tingz laik pandemik er waar ku mek dehnya prablemz feel eevn haada fi deel wid. Soh poar owt yu haat tu Jehoava. Tel ahn how yu feel jos laik how yu wuda taak tu wahn kloas fren. Yu ku chros dat if yu pen pahn hihn, “ih wahn help yu.” (Saa. 37:​3, 5) If wi pray aal di taim, dat wahn help wi fi “bayr op anda chribyulayshan.” (Roam. 12:12) Jehoava noa weh eech wan a ih servant di goh chroo ahn “hihn hyaa wen dehn krai fi help.”—Saa. 145:​18, 19. w23.05 5-6 ¶12-15

Enitaim wi ga wahn impoatant disizhan fi mek, wi need fi fain owt “wat da Jehoava wil” ahn werk lang wid it. (Ifee. 5: 17) Wen wi luk fi wahn Baibl prinsipl weh ku help wi wid weh wi di fays, wi shoa dat wi waahn Jehoava help wi wid wi prablem. Wen wi yooz Baibl prinsiplz, wi wahn ku mek gud disizhanz. Saytan, “di wikid wan,” waahn kip wi soh bizi wid tingz a dis werl dat wi noh ga no taim fi Jehoava. (1 Jan 5:19) Ih eezi fi mek wi staat foakos moa pahn mateeryal tingz, ejukayshan, ahn wi jab dan fi serv Jehoava. Da chroo dat wi need dehnya tingz, bot dehn noh fi tek fers plays eena wi laif. If dehnya tingz moa impoatant tu wee dan Jehoava, den wi wuda di tink laik peepl eena di werl. w24.03 24 ¶16-17