Di Chroot Bowt di Fyoocha
Yoo eva wanda weh wahn hapm eena di fyoocha? Di Baibl tel wi bowt sohn impoatant tingz weh wahn soon hapm weh wahn afek evribadi pahn ert.
Jeezas mi eksplayn how wi ku noa “dat di taim soon kohn fi Gaad set op ih kingdom.” (Look 21:31) Hihn mi prafesai dat wahn lata waar ahn big ertkwayk wahn deh, peepl wahn di staav, ahn lata dizeez wahn deh, jos laik weh wi si di hapm tudeh.—Look 21:10-17.
Di Baibl aalso tel wi dat wan a di tingz weh wahn hapm joorin di “laas dayz” a hyooman roolaship da dat peepl wahn ak terabl. Yu ku reed bowt it da 2 Timoti 3:1-5. No dowt, wen yu si peepl tudeh di bihayv laik how da skripcha eksplayn, yu haftu agree dat dis Baibl prafesi mach wid weh wi si di hapm rong wi.
Weh dis meen? Dis meenz dat di taim deh kloas fi mek Gaad Kingdom tek oava ahn mek sohn big chaynjiz weh wahn afek laif pahn ert big taim. Ih wahn akchwali mek laif beta. (Look 21:36) Eena di Baibl, Gaad pramis gud tingz fi di ert ahn fi di peepl weh wahn liv pan it. Mek wi luk pahn wahn fyoo egzampl.
GUD ROOLASHIP
“An ih [Jeezas] mi geh roolaship, aana, ahn wahn kingdom, soh dat di peepl dehn, di nayshan dehn, ahn di langwij groop dehn wahn serv ahn. Ih [Jeezas] roolaship wahn laas fareva, ih noh wahn en, an ih kingdom noh wahn geh dischrai.”—DANIEL 7:14.
Weh ih meen? Yu ku injai laif anda wahn faar beta govament weh Gaad set op wid fi hihn Son az King.
EVRIBADI WAHN GA GUD HELT
“Ahn nobadi wahn seh: ‘Ah sik.ʼ”—ISAIAH 33:24.
Weh ih meen? Yu wahn neva geh sik er bee kripl; yu wahn ku liv fareva ahn neva ded.
EVRIBADI WAHN LIV EENA PEES
“Hihn wahn put wahn en tu aala di waar dehn eena di hoal ert.”—PSALM 46:9.
Weh ih meen? Nohmoh waar wahn deh ner di sofarin weh ih kaaz.
DI ERT WAHN FUL OP WID GUD PEEPL
“Di wikid wan dehn wahn geh dischrai . . . Bot di hombl wan dehn wahn liv pahn di ert.”—PSALM 37:10, 11.
Weh ih meen? Dehn noh wahn ga nohmoh wikid peepl pahn di ert, onli peepl weh eega fi obay Gaad.
DI HOAL ERT WAHN BEE WAHN PARADAIS
“Dehn wahn bil hows ahn dehn saym wan wahn liv een deh; ahn dehn wahn plaant aachad ahn eet fahn di froot weh ih giv.”—ISAIAH 65:21, 22.
Weh ih meen? Di hoal ert wahn bee byootiful. Gaad wahn ansa wi pryaa dat fi hihn wil geh don “pahn ert.”—Machyu 6:10.