Freedom Eena di Fyoocha —Tanks tu Gaad ahn Krais

Wat da sohn tingz weh yoo schrogl wid evriday? Yoo da wahn famili hed weh di chrai tek kayr a lata rispansabiliti? Yoo da wahn singl payrent weh di werk haad fi sopoat yu famili? Yoo da wahn yong persn weh di goh da skool an ada yong peepl di buli yu? Yoo di sofa wid helt prablemz er oal ayj? Evribadi ga prablemz. Wahn lata Kristyanz di deel wid lata prablemz at di saym taim. Bot wi noa dat soon Jehoava wahn free wi fahn dehnya prablemz.—2Ko 4:16-18.

Til da taim kohn, ih komfert wi fi noa dat Jehoava andastan weh wi di goh chroo. Hihn aalso apreeshiayt dat wi laayal tu ahn an dat wi di bayr op anda dehnya chraiyalz. Hihn wahn gi wi wahn lata blesin eena di fyoocha. (Jer 29:11, 12) Jeezas aalso inchrestid eena wi. Az wi kantinyu serv Jehoava, wi ku bee kanfident dat Jeezas wahn deh wid wi. (Ma 28:20) Wen wi meditayt pahn how Gaad Kingdom wahn mek wi bee free eena di fyoocha, ih schrentn wi hoap an ih mek wi du aal weh wi ku du now fi bayr op anda wi chraiyalz.—Ro 8:19-21.

WACH DI VEEDYO AZ DI EN GEH KLOAS, KIP YU FOAKOS PAHN JEEZAS!—BLESINZ FAHN DI KINGDOM A GAAD, AHN DEN ANSA DEHNYA KWESCHAN:

• How hyoomanz mi jrif weh fahn Gaad, ahn weh hapm sayka dat?

• Weh dehn wan weh stay faytful tu Jehoava wahn injai eena di fyoocha?

• How dis wandaful fyoocha pasabl?

• Wat da sohn blesin weh yoo di luk faawod tu eena di nyoo werl?