LIV YU LAIF AZ WAHN KRISTYAN
Jehoava Help Wi Wen Wi Goh Chroo Chraiyalz
Joorin dehnya laas dayz, wi goh chroo lata haad chraiyalz. Sohntaim wi feel laik wi chraiyalz da tu moch fi wi. Bot if wi kantinyu jraa kloas tu Jehoava, hihn wahn help wi fi noh giv op eevn wen wi di goh chroo wi haadis chraiyalz. (Isa 43:2, 4) How wi ku jraa kloas tu Jehoava wen wi goh chroo chraiyalz?
Pryaa. Wen wi poar owt wi haat tu Jehoava, hihn gi wi pees ahn di imoashanal schrent fi noh giv op.—Fil 4:6, 7; 1Tes 5:17.
Meetinz. Now moa dan eva, wi need di spirichwal food ahn gud frenz weh Jehoava gi wi da di meetin dehn. (Hee 10:24, 25) Wi benifit di moas fahn di help weh Jehoava gi wi chroo ih hoali spirit wen wi pripyaa heda taim, aten, ahn tek paat eena wi kangrigayshan meetin dehn.—Re 2:29.
Minischri. Wi wahn fain it eeziya fi foakos pahn pazitiv tingz if wi du aal weh wi kud fi stay bizi eena di minischri. Ahn wi wahn schrentn wi frenship wid Jehoava ahn wid wi bradaz ahn sistaz.—1Ko 3:5-10.
WACH DI VEEDYO WEH NAYM JEHOAVA WAHN NEVA ABANDAN YU, AHN DEN ANSA DEHNYA KWESCHAN:
Weh mi help Malu fi stay kloas tu Jehoava wen shee mi-di goh chroo chraiyalz?
Jos laik Malu, how Psalm 34:18 ku komfert wi wen wi di goh chroo chraiyalz?
How Malu ekspeeryens shoa wi dat Jehoava gi wi di “powa weh hyoomanz noh naamali gat” wen wi di goh chroo chraiyalz?—2Ko 4:7