MWBR21 03 Laif ahn Minischri Meetin Werkbuk Risaach Infamayshan
MAACH 1-7
CHREZHAZ FAHN DI WERD A GAAD | NUMBERS 7-8
“Weh Wi Ku Laan Fahn di Kyamp a Izrel”
it-1 497 ¶3
Kangrigayshan
Sohn rispansabl man eena di nayshan a Izrel mi reprizent di peepl eena difrent wayz. (Ezr 10:14) Fi egzampl, di “cheef dehn a di chraib dehn” mi reprizent di peepl ahn prizent wahn aafrin wen dehn mi finish set op di tabernakl. (Nu 7:1-11) Aalso, di prees dehn, di Leevait dehn, ahn di man dehn weh mi leed di chraib dehn mi put dehn seel pahn di agreement weh di peepl mi mek eena di taim a Nehimaiya. Dehndeh man mi reprizent di nayshan a Izrel. (Ne 9:38–10:27) Wail di nayshan a Izrel mi-di chravl chroo di wildanes, dehn mi ga sohn cheef a di asembli, sohn man weh gaahn da di meetin, ahn sohn ada man weh lata peepl mi noa. 250 a dehn mi jain Koara, Daytan, Abairam, an On wen dehn mi ton gens Moaziz an Ayron. (Nu 16:1-3) Jehoava mi tel Moaziz fi pik 70 man fi help ahn tek kayr a di peepl bikaaz ih kudn du it bai ihself. Wen hihn mi du dat, hihn mi shoa dat ih di fala Jehoava inschrokshanz. (Nu 11:16, 17, 24, 25) Leviticus 4:15 menshan “di oalda man dehn a di asembli.” Ih luk laik dehndeh oalda man mi reprizent di peepl eena difrent wayz. Fi egzampl, dehn mi tek di leed, dehn mi serv az joj, ahn dehn mi serv az difrent ofishal fi di nayshan a Izrel.—Nu 1:4, 16; Jos 23:2; 24:1.
it-2 796 ¶1
Rooben
Eena di kyamp a Izrel, di Roobenait dehn, lang wid di disendant dehn a Simiyan ahn Gad, mi deh da di sowt said a di tabernakl. Wen dehn mi-di moov, di chree chraib weh Rooben mi-di leed mi fala di chree chraib a Jooda, Isakar, ahn Zebyulon. (Nu 2:10-16; 10:14-20) Dis da-mi aalso di saym aada how di chraib dehn mi aafa op dehn aafrin pahn di day wen dehn mi fers set op di alta.—Nu 7:1, 2, 10-47.
w04 8/1 25 ¶1
Sohn Mayn Points Fahn di Buk a Numbers
8:25, 26. Di Leevait dehn mi haftu du dehn werk eena di bes way dehn kud. Soh wen dehn mi geh oal, Jehoava mi seh dat dehn mi haftu stap tek kayr a di rispansabiliti dehn weh wahn Leevait fi tek kayr a. Bot dehn kuda mi stil valantyaa fi help owt di ada Leevait dehn. Soh eevn doa wi noh ga dis laa weh stap wi fahn preech wen wi geh oal, di prinsipl bihain dis laa ku teech wi wahn veri impoatant lesn. If wahn Kristyan geh oal an ih kyaahn tek kayr a som a ih rispansabiliti eena di kangrigayshan nohmoh, hihn ku stil help owt wid sohn ada rispansabiliti if ih ku du it.
Spirichwal Chrezhaz
it-1 835
Fersbaan, Fersfroot
Eena wahn Izrelait famili, wen di hed a di famili mi ded, di fersbaan son mi fi tek di leed eena di famili. Jos laik dat, di fersbaan son eena eech Izrelait famili mi reprizent di hoal nayshan. Jehoava mi kaal di nayshan a Izrel fi hihn fersbaan bikaaz, eena wahn sens, dehn da-mi laik fi hihn “fersbaan” sayka di kovenant weh hihn mi mek wid Aybraham. (Ex 4:22) Bikaaz Jehoava mi sayv di nayshan a Izrel, evri fersbaan mayl fahn di nayshan a Izrel mi hoali tu hihn. Di fersbaan mayl fahn eeda wahn hyooman er wahn animal mi bilangz tu hihn, an ih mi hoali tu hihn. (Ex 13:2) Soh dis shoa wi dat di fersbaan son dehn fahn di nayshan a Izrel mi bilangz tu Gaad.
MAACH 8-14
CHREZHAZ FAHN DI WERD A GAAD | NUMBERS 9-10
“How Jehoava Leed Ih Peepl”
it-1 398 ¶3
Kyamp
Di kyamp a Izrel mi moov fahn wan plays tu di neks (Moaziz mi rait eena di buk a Numbers, chapta 33, dat di Izrelait dehn mi set op dehn kyamp eena bowt 40 difrent plays). Dis mi shoa dat Jehoava mi aaganaiz dehn eena wahn gud way. Az lang az di klowd weh mi deh oava di tabernakl mi stay eena wan plays, di kyamp a Izrel mi fi stay eena wan plays tu. Wen di klowd mi moov, di kyamp mi moov tu. “Wen Jehoava mi seh fi mek di nayshan a Izrel set op dehn kyamp, dehn mi set op dehn kyamp, ahn wen Jehoava mi seh fi mek dehn moov, dehn mi moov.” (Nu 9:15-23) Wen dehn mi bloa too chrompit weh mi mek owta silva, di Izrel dehn mi noa dat Jehoava mi-di koman dehn fi moov. (Nu 10:2, 5, 6) Di man dehn a Izrel mi bloa di chrompit dehn eena wahn speshal way, ahn dis mi mek di kyamp a Izrel noa wich groop a peepl mi fi moov fers. Di fers taim dis mi hapm da-mi eena “di sekant yaa [1512 B.C.E.], eena di sekant mont, pahn di twentiet day a di mont.” Wen di Izrelait dehn mi moov fahn wan plays tu di neks, di aak a di kovenant mi deh da front. Di chraib weh Jooda mi leed mi deh bihain di aak, den di chraib a Isakar ahn di chraib a Zebyulon mi fala bihain. Afta dat di Gershonait dehn ahn di Merayrait dehn mi fala bihain, ahn dehn mi kehr di difrent paat a di tabernakl weh dehn mi rispansabl fi kehr. Di neks chree chraib weh Rooben mi leed mi deh bihain dehn, den Simiyan ahn Gad mi deh bihain dehn. Di Koahatait dehn weh mi di kehr di tabernakl mi deh afta dehn, den di ada chree chraib a Ifrayim, den Manaaseh ahn Benjamin mi-di fala bihain dehn. Fainali di laas chree chraib da-mi di wan weh Dan mi-di leed, den di chraib a Asher ahn di chraib a Naftalai mi fala bihain. Soh wan a di too chraib dehn weh mi big ahn powaful mi deh way da front, ahn di ada wan mi deh way da bak.—Nu 10:11-28.
w11 4/15 4-5
Yoo Ku Si How Gaad di Gaid Yu?
How wi ku shoa Gaad dat wi apreeshiayt wen hihn gaid wi laif? Di apasl Paal mi seh: “Obay di wan dehn weh di tek di leed monks unu, ahn bee wilin fi deh anda dehn atariti.” (Hee. 13:17) Ih noh aalwayz eezi fi du dis. Fi egzampl, imajin dat yu di liv az wahn Izrelait eena di taim a Moaziz. Afta yu waak fi wahn wail, di pila a klowd weh deh tap a di tabernakl stap moov. How lang yu tink ih wahn stay deh fa? Fi wahn day? Fi wahn week? Fi monts? Yu mait tink tu yuself, ‘Ih mek sens fi tek evriting owta mi bag weh Ah don pak?ʼ Fers, yu mait onli tek owt di tingz weh yu need. Bot afta wahn fyoo dayz, yu wuda staat tu feel foschraytid di saach chroo yu bag fi fain ada tingz weh yu need, soh yu wuda staat tu tek owt evriting. Bot afta yu don tek owt evriting, yu si di pila a klowd luk laik ih redi fi moov. Now yu haftu staat pak op evriting agen! Dat praabli noh mi wahn bee di rait taim fi yoo, an ih noh mi wahn eezi eeda. Bot di Izrelait dehn mi stil haftu moov weneva di klowd mi moov.—Num. 9:17-22.
Soh wat da wi atichood wen wi geh dairekshan fahn Jehoava? Wee du wi bes fi fala inschrokshanz rait away? Er wi kantinyu du tingz di way wi yoostu du dehn? Wee du wi bes fi kip op-tu-dayt wid nyoo dairekshanz pahn how fi kandok Baibl stodiz, fi preech tu peepl weh taak wahn nada langwij, fi kip op wid wi famili wership, fi werk lang wid di HLC, ahn how fi bihayv da wi kanvenshan dehn? Wen wi aksep kongsl fahn adaz, wi shoa Gaad dat wi apreeshiayt wen hihn gaid wi laif. Wen wi mek impoatant disizhan weh afek adaz, wi noh pen pahn wi oan tinkin, bot wi pen pahn Jehoava an ih aaganaizayshan fi gaid wi. Soh jos laik how wahn pikni goh da ih ma ahn pa fi protekshan fahn wahn staam, Jehoava aaganaizayshan protek wi wen di prablem dehn fahn di werl atak wi laik wahn tonda staam.
Spirichwal Chrezhaz
it-1 199 ¶3
Asembli
Wai Ih Impoatant fi Mek Wi Meet Tugeda? Di Paasoava, weh di Izrelait dehn yoostu selibrayt evri yaa, help wi fi andastan dat ih impoatant fi mek wi meet tugeda. If dehn mi du dis, ih mi wahn benifit dehn eena wahn spirichwal way. Soh if wahn man mi kleen, an ih neva di chravl, an ih mi disaid dat ih noh wahn selibrayt di Paasoava, dehn mi fi kil ahn. (Nu 9:9-14) Wen King Hezikaiya mi kaal di peepl weh liv da Jooda an Izrel fi goh da Jeroosalem fi selibrayt di Paasoava, hihn mi seh dis eena ih leta: “Peepl a Izrel, kohn bak tu Jehoava . . . Now unu noh fi bee stoban laik unu ansestaz. Obay Jehoava ahn kohn da ih hoali templ weh hihn mek fi bee hoali fareva, ahn serv Jehoava yu Gaad, soh dat fi hihn anga ku ton weh fahn unu. . . . Jehoava da wahn Gaad weh shoa mersi ahn kompashan, ahn hihn noh wahn ton ih fays fahn unu if unu kohn bak tu ahn.” (2Ch 30:6-9) If dehn mi rifyooz fi goh, dehn mi wahn shoa dat dehn di abandan Jehoava. Eevn doa Kristyanz tudeh noh selibrayt di Paasoava, Paal inkorij wi fi aalwayz meet tugeda. Hihn mi seh: “Ahn mek wi tink bowt wan anada soh dat wi ku inkorij wan anada fi shoa lov ahn du gud werks. Bradaz, som a wi ga di kostom fi niglek wi meetin dehn, bot noh mek wi du dat. Insteda dat, mek wi gi moa inkorijment tu wan anada, ahn du aala dehnya tingz moa ahn moa sins wi noa dat di day di jraa kloasa.”—Hee 10:24, 25; Si CONGREGATION.
MAACH 15-21
CHREZHAZ FAHN DI WERD A GAAD | NUMBERS 11-12
“Wai Wi Noh fi Komplayn?”
w01 6/15 17 ¶20
Noh Bee Laik Peepl Weh Ferget Weh Dehn Hyaa
20 Moas Kristyanz tudeh noh giv een tu di temtayshan fi komit sekshwal imoraliti. Bot wi need fi bee kyaaful dat wi noh alow wiself fi staat tu komplayn, bikaaz Jehoava noh wahn pleez wid wi. Paal inkorij wi: “Ahn wi noh fi tes Jehoava laik how som a [di Izrelait dehn] mi tes ahn. Sayka dat, dehn mi ded fahn snayk bait. Ahn wi noh fi grombl needa, laik how som a dehn mi grombl. Sayka dat, Gaad aynjel mi kil dehn.” (1 Korintyanz 10:9, 10) Ih luk laik di Izrelait dehn mi-di komplayn gens Moaziz an Ayron, bot reeli dehn mi-di komplayn gens Jehoava. Dehn mi komplayn bowt di mana weh hihn mi provaid fi dehn. (Numbers 16:41; 21:5) Yu tink di Izrelait dehn mi hert Jehoava moa wen dehn mi komit sekshwal imoraliti? Er yu tink dehn mi hert ahn moa wen dehn staat tu komplayn? Di akonk eena di Baibl shoa wi dat snayk mi kil wahn lata peepl weh mi komplayn. (Numbers 21:6) Ahn bifoa dat, Jehoava mi dischrai moa dan 14,700 Izrelait weh neva obay ahn. (Numbers 16:49) Soh wi mosn chreet di tingz weh Jehoava provaid fi wi eena wahn way weh noh shoa rispek, bikaaz wi wahn di tes ih payshens.
w06 7/15 15 ¶7
Noh Komplayn
7 Di atichood a di nayshan a Izrel mi chaynj wahn lat! At fers di nayshan a Izrel mi tankful dat Jehoava mi sayv dehn fahn di lan a Eejip ahn kehr dehn chroo di Red See. Dehn mi soh hapi dat dehn mi sing tu Jehoava fi bring prayz tu ahn. (Exodus 15:1-21) Bot sayka di nayshan a Izrel neva feel komfatabl eena di wildanes ahn bikaaz dehn mi frayd fi di Kaynanait dehn, dehn mi staat tu komplayn tu Jehoava. Dat da-mi bikaaz dehn neva tankful fi aal weh hihn mi du fi dehn. Soh insteda tank Jehoava fi di freedom weh hihn gi dehn, dehn staat tu blaym ahn fi di tingz weh dehn tink dehn neva gat. Wen di Izrelait dehn mi komplayn gens Jehoava, dat mi shoa dat dehn neva apreeshiayt di tingz weh hihn mi provaid fi dehn. No wanda Jehoava mi seh: “How lang dehnya wikid peepl wahn kantinyu fi komplayn gens mee? Ai don hyaa how di Izrelait dehn di komplayn gens mee.”—Numbers 14:27; 21:5.
it-2 719 ¶4
kwaaril
Di Izrelait Dehn Mi Komplayn Wahn Lat. Wen sombadi komplayn dat ku diskorij adaz. Wahn lee wail afta di Izrelait dehn mi lef Eejip, dehn mi staat tu komplayn gens Jehoava, ahn dehn staat tu kritisaiz di way how Moaziz an Ayron mi-di leed dehn. (Ex 16:2, 7) Bikaaz dehn mi-di komplayn soh moch, Moaziz mi geh schres owt tu di point dat hihn mi waahn ded. (Nu 11:13-15) Ih ku bee daynjaros fi sombadi weh komplayn, bikaaz da persn ku looz ih laif. Wen di Izrelait dehn mi komplayn gens Moaziz, dehn akchwali mi-di komplayn gens Jehoava ahn di way how Hihn leed dehn. (Nu 14:26-30) Bikaaz di Izrelait dehn mi-di komplayn gens Moaziz an Ayron, wahn lata dehn mi en op di looz dehn laif.
Spirichwal Chrezhaz
it-2 309
Mana
Wat da mana? Mana mi luk laik sohn smaal seed weh wait. Ih mi aalso luk laik sap fahn wahn chree. Yu kuda mi si rait chroo it bikaaz ih mi luk laik waks, an ih mi aalso ga wahn rong shayp. Ih mi tays laik bred weh dehn mek wid honi, er sweet bred weh dehn mek wid ail. Afta dehn mi grain di mana, dehn mi bail it ahn yooz it fi mek kayk.—Ex 16:23, 31; Nu 11:7, 8.
MAACH 22-28
CHREZHAZ FAHN DI WERD A GAAD | NUMBERS 13-14
“How Fayt Ku Mek Wi Ga Korij”
w06 10/1 16-17 ¶5-6
Fayt ahn Deep Rispek fi Jehoava Ku Mek Wi Ga Korij
5 Bot Jashwa ahn Kayleb da-mi di too spai weh mi eega fi enta di Pramis Lan. Dehn mi seh dat dehn kuda mi kanka di Kaynanait dehn. Dehn mi seh: “Dehn noh ga no protekshan, bot Jehoava deh wid wi. Noh frayd fi dehn.” (Numbers 14:9) Yu tink Jashwa ahn Kayleb mi ga wahn reezn fi bee kanfident? Af koars! Jashwa ahn Kayleb, lang wid di res a di Izrelait dehn, mi si how Jehoava mi shaym Eejip an ih gaad dehn wen ih mi sen di Ten Playg. Den dehn mi si how Jehoava mi jrongdid Fayro an ih aami eena di Red See. (Psalm 136:15) Ih klyaa fi si dat di too spai mi kanfident dat Jehoava mi deh wid dehn. Di ada spai dehn mi frayd bikaaz dehn neva ga fayt, ahn dehn mi mek wahn lata peepl geh frayd tu. Bot dehn neva ga no reezn fi bee frayd. Dis mi hert Jehoava, ahn soh hihn mi seh, “Ah don du wahn lata mirakl fronta dehnya peepl. Da wen dehn wahn staat tu rispek mi? Ahn da wen dehn wahn staat tu put fayt eena mi?”—Numbers 14:11.
6 Jehoava mi noa egzakli wat da-mi di prablem. Di peepl dehn neva ga fayt. Yes, if yu ga fayt den yu wahn ga korij tu. Dat da wai wen di apasl Jan mi kansaan bowt di spirichwaliti a di kangrigayshan, hihn mi seh: “Wi fayt da weh help wi kanka di werl.” (1 Jan 5:4) Tudeh, lata Kristyan shoa dat dehn ga fayt jos laik Jashwa ahn Kayleb, dat da wai oava siks milyan a dehn, weda dehn yong er oal, schrang er week, ku preech di gud nyooz a Gaad Kingdom aal rong di werl. Non a Jehoava enimi ku put wahn stap tu dis big aami weh ga lata fayt ahn korij.—Roamanz 8:31.
Spirichwal Chrezhaz
it-1 740
Di Lan Weh Gaad Mi Gi Tu Izrel
DI LAN weh Gaad mi gi tu Izrel mi gud fi chroo. Wen Moaziz mi sen di spai dehn fi chek owt di lan ahn fi geh som a di froot dehn, dehn mi bring bak sohn fig, sohn pomegranayt, ahn wahn bonch a grayps weh mi soh big dat too man mi haftu kehr it pahn wahn stik! Eevn doa som a di man dehn neva waahn goh eena di lan sayka dehn mi frayd ahn dehn neva ga fayt, dehn mi stil en op di seh: “Di lan di floa wid milk ahn honi fi chroo.”—Nu 13:23, 27.
MAACH 29–AYPRIL 4
CHREZHAZ FAHN DI WERD A GAAD | NUMBERS 15-16
“Bee Kyaaful Dat Yu Noh Geh Prowd an Oava Kanfident”
w11 9/15 27 ¶12
Yu Tink Jehoava Noa Yoo?
12 Bot wail di nayshan a Izrel mi deh pahn dehn way tu di Pramis Lan, Koara mi staat tu fain faalt wid Ayron, Ayron son dehn, an adaz hoo Gaad mi apoint fi tek di leed. Den 250 ada man weh mi help leed di nayshan a Izrel mi jain Koara ahn dehn mi chrai chaynj op Jehoava araynjment. Koara ahn di ada man dehn mosi mi feel laik dehn mi ga wahn gud rilayshanship wid Jehoava. Dehn mi tel Moaziz: “Wi geh inof a unu, bikaaz di hoal asembli bilangz tu Gaad, ahn Jehoava deh wid dehn.” (Num. 16:1-3) Dehn mi prowd an oava kanfident! Moaziz mi tel dehn: “Jehoava wahn mek aala wi noa hoo aal bilangz tu ahn.” (Reed Numbers 16:5.) Bai di en a di neks day, Koara an aal dehn wan weh mi-di sopoat ahn mi ded bikaaz dehn gaahn gens Jehoava.—Num. 16:31-35.
w11 9/15 27 ¶11
Yu Tink Jehoava Noa Yoo?
11 Dehn ga wahn big difrens bitween di way how Moaziz ahn Koara mi shoa dehn rispek fi Jehoava araynjment ahn di disizhanz weh Hihn mek. Jehoava mi noa hoo rispek ahn bays pahn di way how dehn mi bihayv. Koara da-mi wahn Leevait fahn di famili a Koahat, ahn hihn mi injai lata privilij. Som a di privilij weh hihn mi ga da-mi fi si how Jehoava mi sayv di nayshan a Izrel ahn leed dehn chroo di Red See, fi sopoat Jehoava jojment gens di Izrelait dehn da Mongt Sainai, ahn fi help kehr di aak a di kovenant. (Ex. 32:26-29; Num. 3:30, 31) Soh ih klyaa fi si dat Koara mi laayal tu Jehoava fi wahn lata yaaz ahn lata peepl fahn di kyamp a Izrel mi luk op tu ahn tu.
Spirichwal Chrezhaz
w98 9/1 20 ¶1-2
Mek Shoar Yu Put Impoatant Tingz Fers!
Jehoava mi tek dis sichuwayshan moa seeryos. Di Baibl seh: “Aftawodz, Jehoava tel Moaziz, ‘Fi shoar yu fi kil dis man.ʼ” (Numbers 15:35) Wai Jehoava mi feel dis way bowt weh da man mi du?
Di peepl mi ga siks dayz fi gyada wud ahn fi du evriting els weh dehn mi need fi du rong di hows, ahn dehn mi fi yooz di sevent day fi wership Jehoava. Eevn doa ih neva rang fi mek dehn gyada wud, ih mi rang fi yooz di taim fi wership Jehoava fi du sohnting els. Eevn doa Kristyanz noh deh anda di Laa weh Gaad mi gi Moaziz, wi ku laan wahn impoatant lesn fi put impoatant tingz fers.—Filipiyanz 1:10.
APRIL 5-11
CHREZHAZ FAHN DI WERD A GAAD | NUMBERS 17-19
“Ai Da . . . Yu Inheritans”
w11 9/15 13 ¶9
Yoo di Mek Jehoava Bee Yu Inheritans?
9 Tink bowt di Leevait dehn. Dehn neva inherit wahn pees a lan. Pyoar wership da-mi di moas impoatant ting fi dehn, ahn dehn mi haftu pen pahn Jehoava fi geh weh dehn need. Jehoava mi tel dehn: “Ai da yu inheritans.” (Num. 18:20) Eevn doa wi noh serv da wahn templ laik how di prees ahn Leevait dehn mi du, wi ku kapi dehn gud egzampl ahn ga kanfidens dat Jehoava wahn gi wi weh wi need. Soh ih eevn moa impoatant now fi mek wi chros dat Jehoava ku provaid weh wi need, espeshali sins wi di geh kloasa ahn kloasa tu di en a di laas dayz.—Rev. 13:17.
w11 9/15 7 ¶4
Jehoava Da Mai Inheritans
4 Weh di asainment weh Jehoava gi di Leevait dehn mi meen fi dehn? Jehoava mi seh dat hihn mi wahn bee fi dehn inheritans. Di Leevait dehn neva inherit wahn pees a lan, bot dehn mi ga di privilij fi serv Jehoava. Soh wen dehn mi serv az prees, dat da-mi dehn inheritans fahn Jehoava. (Josh. 18:7) Di akonk eena Numbers 18:20 shoa wi dat Jehoava noh mi wahn lef dehn wid notn. (Reed Numbers 18:19, 21, 24.) Bikaaz di Leevait dehn mi-di serv Jehoava, dehn mi geh ten persent a weh di lan ahn di animal dehn mi projoos as wahn inheritans. Di Izrelait dehn mi gi di Leevait dehn ten persent fahn dehn froot ahn fahn di domestik animal dehn. Den di Leevait dehn mi fi gi ten persent a di kanchribyooshan fi sopoat di araynjment a di prees. Dehn kanchribyooshan mi fi bee dehn bes. (Num. 18:25-29) Dehn mi aalso geh wahn hoali kanchribyooshan weh di Izrelait dehn mi bring tu Jehoava da ih plays a wership. Di prees dehn mi ga gud reezn fi bileev dat Jehoava mi wahn provaid fi dehn.
Spirichwal Chrezhaz
g02 6/8 14 ¶2
Saalt Mi Impoatant tu di Izrelait Dehn
Di Izrelait dehn mi yooz saalt fi shoa dat sohnting mi staybl ahn fi shoa dat ih mi wahn laas fareva. Soh eena di Baibl wahn nada naym fi wahn kovenant weh laas fareva da “wahn kovenant a saalt.” Di peepl weh mi mek dis kovenant mi haftu put saalt pahn dehn food an eet it tugeda. Dis mi shoa dat dehn agree pahn di kovenant weh dehn mi mek. (Numbers 18:19) Anda di Laa weh Gaad mi gi Moaziz, di Izrelait dehn mi put saalt pahn dehn sakrifais pahn tap a di alta. Dis mi shoa dat di aafrin weh dehn mi mek tu Jehoava neva spail ahn dat ih neva ratn.
AYPRIL 12-18
CHREZHAZ FAHN DI WERD A GAAD | NUMBERS 20-21
“Stay Hombl Wen Yu Deh Anda Presha”
Bee Hombl ahn Pleez Jehoava
19 If wi hombl, wi wahn mek les mistayk. Memba Moaziz mi stay hombl fi yaaz an ih mi pleez Jehoava. Den, wan taim, tuwaadz di en a di 40-yaa jerni chroo di wildanes, Moaziz neva shoa hyoomiliti. Fi hihn sista, praabli di sayhn wan weh mi help sayv ih laif da Eejip, mi jos ded ahn dehn mi beri ahn da Kaydesh. Ahn now di Izrelait dehn mi-di komplayn agen. Dis taim dehn mi-di “kwaaril wid Moaziz” kaaz dehn neva ga waata. Di peepl mi komplayn eevn afta aala di mirakl dehn weh Jehoava mi du chroo Moaziz, hoo mi-di leed dehn ahn tek gud kayr a dehn aal di wail. Dehn neva jos komplayn kaaz dehn neva ga waata, bot dehn mi komplayn gens Moaziz laik if da mi fi hihn faalt dat dehn mi tersti.—Num. 20:1-5, 9-11.
Bee Hombl ahn Pleez Jehoava
20 Wen Moaziz mi si how di Izrelait dehn mi-di goh aan, hihn mi geh beks bad an ih neva jentl wid di peepl ataal. Insteda ga fayt eena Gaad ahn taak tu di rak, laik how Jehoava mi koman ahn fi du, hihn mi rayl op wid di peepl ahn tek di kredit fi di mirakl weh ih mi wahn du. Den ih mi schraik di rak too taim ahn lata waata mi poar owt. Praid an anga mi kaaz ahn fi mek dis seeryos mistayk. (Ps. 106:32, 33) Sayka weh Moaziz mi looz ih hyoomiliti, hihn neva geh di privilij fi goh eena di Pramis Lan.—Num. 20:12.
21 Wi ku laan wahn lat fahn dis egzampl. Fos, wi need fi kip di chrai haad fi bee hombl, adawaiz wi ku geh prowd ahn staat tu seh ahn du foolish tingz. Sekant, wen wi deh anda lata schres er presha, wi haftu werk eevn haada fi stay hombl.
w09 9/1 19 ¶5
Wahn Joj Weh Aalwayz Du di Rait Ting
Fers, Gaad neva tel Moaziz fi taak tu di peepl, an ih wers neva tel ahn fi kaal dehn reblz. Sekant, Moaziz an Ayron neva gi Gaad di gloari weh hihn mi dizerv. Gaad mi seh: “Unu neva . . gi mee di aana weh Ai dizerv.” (Vers 12) Wen Moaziz mi seh “wee wahn bring owt waata,” hihn mi mek ih luk laik da hihn an Ayron mi wahn provaid di waata fi di Izrelait dehn. Hihn neva seh dat da Gaad mi wahn provaid di waata. Terd, wat Moaziz mi seh mi song laik wahn jojment weh Jehoava mi don giv eena di paas. Gaad neva alow di rebl dehn fi enta di lan a Kaynan, ahn hihn neva alow Moaziz an Ayron fi enta di Pramis Lan needa. (Numbers 14:22, 23) Foat, Moaziz an Ayron mi-di leed di nayshan a Izrel. Soh tudeh, sombadi weh ga lata rispansabiliti haftu mek shoar dat dehn du dehn jab eena di rait way bikaaz dehn wahn haftu ansa tu Gaad.—Look 12:48.
Spirichwal Chrezhaz
w14 6/15 26 ¶12
Yoo Vyoo di Mistayk Dehn Weh Peepl Mek Laik Jehoava?
12 Eena eech wan a dehnya sichuwayshan, Jehoava kuda mi ponish Ayron pahn di spat. Bot Hihn mi noa dat Ayron da neva wahn bad persn ahn dat weh mi hapm da neva Ayron faalt. Ih luk laik Ayron mi alow adaz fi presha ahn fi du tingz weh bad. Bot wen Jehoava mi tel Ayron bowt ih mistayk dehn, hihn mi admit dat ih mi mek dehndeh mistayk, ahn hihn mi sopoat di jojment weh Jehoava mek. (Ex. 32:26; Num. 12:11; 20:23-27) Ayron mi ga fayt ahn hihn mi sari fi weh ih du, ahn dehndeh kwalitiz da weh Jehoava mi foakos pan. Honjridz a yaaz layta, Jehoava mi stil vyoo Ayron an aala ih disendant dehn az peepl weh mi ga deep rispek far ahn.—Ps. 115:10-12; 135:19, 20.
AYPRIL 19-25
CHREZHAZ FAHN DI WERD A GAAD | NUMBERS 22-24
“Jehoava Ton Wahn Kers Intu Wahn Blesin”
bt 53 ¶5
Preech “di Gud Nyooz Bowt Jeezas”
5 Jos laik eena di fers senchri, persikyooshan noh stap Gaad peepl fahn preech di gud nyooz tudeh. Oava an oava agen, weneva Jehoava Witnisiz haftu moov fahn wan plays tu di neks, eeda bikaaz dehn goh da jayl er bikaaz dehn haftu moov tu wahn nada konchri, dehn preech tu moa peepl bowt di Kingdom mesij eena di nyoo ayrya wehpaat dehn liv. Fi egzampl, joorin Werl Waar II, Jehoava Witnisiz mi gi wahn gud witnis wen dehn mi deh eena di Nazi kansenchrayshan kyamp. Wahn Joo weh mi meet Jehoava Witnisiz da wahn kansenchrayshan kyamp seh: “Di prizna dehn weh da-mi Jehoava Witnisiz mi shoa wahn lata korij ahn dat mi kanvins mee dat dehn fayt mi bays pahn weh di Baibl teech. Sayka dat, Ai mi kohn fi bee wan a Jehoava Witnisiz tu.”
it-2 291
Foolishnis
Sohnting Foolish Weh Goh Gens Jehoava. Di prafit Baylam mi foolish. Hihn mi prafesai gens di nayshan a Izrel bikaaz ih mi waahn geh moni fahn King Baylak, di king a di Moawabait dehn, bot Jehoava mi stap dat fahn hapm. Di apasl Peeta mi rait dis bowt Baylam: “Wahn dongki staat tu taak tu ahn, an chrai stap ahn fahn du di foolish ting weh ih mi wahn du, eevn doa no animal ku taak.” Di apasl Paal mi yooz di Greek werd pa·ra·phro·niʹa fi diskraib di foolish ting weh Baylam mi du. Da werd ku aalso meen dat sombadi krayzi.—2Pe 2:15, 16; Nu 22:26-31.
Spirichwal Chrezhaz
w04 8/1 27 ¶2
Sohn Lesn Weh Wi Ku Laan Fahn di Buk a Numbers
22:20-22—Wai Jehoava mi beks bad wid Baylam? Jehoava mi tel di prafit Baylam dat ih noh fi kers di Izrelait dehn. (Numbers 22:12) Bot Baylam stil gaahn wid Baylak soalja dehn fi kers di nayshan a Izrel. Hihn mi waahn pleez di Moawabait king soh dat hihn kuda mi geh wahn riwaad fan ahn. (2 Peeta 2:15, 16; Jood 11) Eevn wen Jehoava mi tel Baylam fi bles di nayshan a Izrel, Baylam mi stil chrai pleez di king. Hihn mi inkorij di king fi mek di uman dehn weh wership Bayl temp di Izrelait man dehn fi komit sekshwal imoraliti wid dehn. (Numbers 31:15, 16) Soh Jehoava mi geh beks bad wid Baylam bikaaz hihn neva aanis an ih mi greedi.
AYPRIL 26–MAY 2
CHREZHAZ FAHN DI WERD A GAAD | NUMBERS 25-26
“Yu Tink Wan Persn Ku Mek Wahn Difrens?”
“Ron Fahn Eni Kaina Sin Weh Ga fi Du Wid Seks”
IMAJIN wahn fishaman gwehn fishin. Fos, ih fain di rait spat weh ih ku kech di kaina fish weh ih waahn. Den, ih put di bayt pahn di huk ahn chroa ih lain da waata. Ih wayt payshent-wan til di fish tek di bayt, den ih jerk di huk til ih kech gud eena di fish mowt ahn den ih haal ahn een.
2 Da jos laik dat Saytan kech peepl. Fi egzampl, di Izrelait dehn mi nayli get da di Pramis Lan wen dehn mi set op kyamp da Moawab. Di king a Moawab mi pramis fi gi wahn man weh mi naym Baylam wahn lata moni if ih mi put wahn kers pahn di Izrelait dehn. Fainali, Baylam mi did fain wahn way, bot da di Izrelait dehn mi en op di bring wahn kers pahn dehnself. Baylam mi tek ih taim ahn chooz di bayt. Ih mi sen som a di yong uman dehn fahn Moawab eena di Izrelait kyamp fi temp di man dehn.—Numbers 22:1-7; 31:15, 16; Revilayshan 2:14.
“Ron Fahn Eni Kaina Sin Weh Ga fi Du Wid Seks”
4 Wai soh moch Izrelait mi giv een tu Baylam plan? Dehn onli mi-di tink bowt pleez dehnself, ahn dehn mi faget aal weh Jehoava mi du fi dehn. Di Izrelait dehn mi ga lata reezn fi bee laayal tu Gaad. Ih mi free dehn fahn slayvri da Eejip, ih mi feed dehn eena di wildanes, an ih mi mek shoar dehn mi reech di boada a di Pramis Lan. (Heebrooz 3:12) Ahn stilyet, dehn mi komit sekshwal imoraliti. Di apasl Paal mi seh: “Wi noh fi get intu loos livin, laik weh som a dehn du.”—1 Korintyanz 10:8.
Spirichwal Chrezhaz
it-1 359 ¶1-2
Boada
Ih luk laik dehn mi shayr owt di lan monks di chraib dehn bays pahn too tingz: di lats weh dehn mi chroa ahn di saiz a di chraib dehn. Wen dehn mi chroa lats, dat mi shoa wehpaat eech wan a di chraib mi wahn liv, weda da mi tu di Naat, Sowt, Ees, er Wes, lang di koas, er eena di mongtin dehn. Da disizhan mi kohn fahn Jehoava. Soh dat mi help di Izrelait dehn noh fi bee jelos ahn noh fi kwaaril wid wan anada. (Pr 16:33) Bikaaz a dis, Gaad mi gaid tingz soh dat eech chraib mi goh lang wid di prafesi weh Jaykop mi mek jos bifoa ih ded. Wi ku reed bowt da prafesi da Genesis 49:1-33.
Afta dehn mi chroa lats fi si wehpaat eech chraib mi wahn liv, dehn mi aalso haftu disaid di saiz a di lan weh eech chraib mi wahn geh. Di saiz a di lan mi dipen pahn di saiz a di chraib. Jehoava mi seh: “Yooz di ting weh luk laik wahn dais fi shayr owt di lan tu eech chraib ahn famili az sohnting weh bilangz tu dehn. Di big famili dehn fi geh wahn biga pees a lan, ahn di smaal famili dehn fi geh wahn smaala pees a lan. Di lan weh evribadi wahn get wahn bays pahn wehpaat di lee dais jrap. Evribadi wahn geh fi dehn pees a lan akaadn tu di chraib weh dehn bilangz tu.” (Nu 33:54) Soh if Jehoava mi put wahn chraib fi liv da wahn sertn ayrya da deh da chraib mi wahn stay. Bot bays pahn di saiz a di chraib dehn, dehn kuda mi stil ajos di saiz a di lan wehpaat eech chraib mi liv. Fi egzampl, di lan wehpaat di chraib a Jooda mi liv mi tu big fi dehn, soh Jehoava mi en op di gi pees a fi dehn lan tu di chraib a Simiyan.—Jos 19:9.