Wahn Templ fi Jehoava

Afta Salaman mi ton king a Izrel, Jehoava mi aks ahn: ‘Weh yu wuda waahn Ah gi yu?ʼ Salaman tel ahn: ‘Ah yong, an Ah noh noa weh Ah di du. Pleez gi mi di wizdom weh Ah need fi tek kayr a yu peepl.ʼ Jehoava ansa ahn: ‘Bikaaz yu aks mi fi wizdom, Ah wahn mek yu bee di waizis man pahn ert. Ah wahn aalso mek yu bee rich. An if yu obay mi, yu wahn liv wahn lang laif.ʼ

Salaman mi staat tu bil di templ. Hihn mi yooz di bes goal, silva, wud, ahn stoan. Towznz a man ahn wuman weh ga lata skil mi werk pahn di templ. Afta sevn yaaz di templ mi finish. Ih mi redi fi mek dehn dedikayt it tu Jehoava, soh dehn put sohn aafrin pahn di alta. Salaman mi neel dong fronta di alta ahn staat tu pray: ‘Oa Jehoava, dis templ noh big er byootiful inof fi yoo, bot pleez aksep wi wership ahn lisn tu wi pryaaz.ʼ Weh Jehoava mi tink bowt di templ ahn Salaman pryaa? Az soon az Salaman mi finish pray, faiya kohn dong fahn hevn ahn bon op di aafrin pahn di alta. Dat da how Jehoava mi shoa dat ih hapi wid di templ. Ahn wen di Izrelaits mi si dat, dehn mi rijais.

Aal oava Izrel an eevn da sohn faar plays dehn mi noa dat King Salaman da-mi wahn waiz man. Wen peepl mi need help wid dehn prablemz, dehn wuda goh tu Salaman. Eevn di kween a Sheeba gaahn tes ahn wid sohn haad kweschanz. Wen shee mi hyaa how ih rispan, shee tel ahn: ‘Ai neva bileev notn weh peepl mi tel mi bowt yu, bot now Ah si dat yu eevn waiza dan weh Ah hyaa. Yu Gaad, Jehoava, di bles yu.ʼ Laif mi soh gud fi di nayshan a Izrel, ahn di peepl mi hapi. Bot tingz mi wahn soon chaynj.