Jeezas Feed Wahn Lata Peepl

Jos bifoa di Pasoava a di yaa 32 C.E., di apasl dehn mi kohn bak fahn di difrent plays wehpaat dehn mi gaahn preech. Dehn mi taiyad, soh Jeezas kehr dehn pahn wahn boat tu Betsayda, wehpaat dehn kuda mi res. Bot wen di boat mi reech kloas tu di shoar, Jeezas mi si dat towznz a peepl mi fala dehn. Eevn doa Jeezas mi waahn deh bai ihself wid ih apasl dehn, ih gi di peepl wahn waam welkom. Ih kyoar di sik wan dehn an ih staat tu teech dehn. Aal day lang, Jeezas mi teech dehn bowt Gaad Kingdom. Wen eevnin kom, ih apasl dehn kohn tu ahn an tel ahn: ‘Di peepl mosi hongri. Sen dehn weh soh dat dehn ku goh geh sohnting fi eet.ʼ

Jeezas seh: ‘Dehn noh haftu goh. Gi dehn sohnting fi eet.ʼ Di apasl dehn aks: ‘Yoo wuda waahn wi goh bai bred fi dehn?ʼ Wan a di apasl dehn weh naym Filip, mi seh: ‘Eevn if wi mi ga lata moni, ih noh wahn bee inof fi bai bred fi aala dehnya peepl.ʼ

Jeezas aks: ‘Humoch food wi gat?ʼ Anjru tel ahn: ‘Wi ga faiv bred ahn too lee fish. Bot dat noh inof.ʼ Jeezas seh: ‘Bring di bred ahn fish fi mi.ʼ Ih tel di peepl fi sidong pahn di graas eena groops a 50 ahn 100. Jeezas mi tek di bred ahn di fish, den ih luk op da hevn ahn pray. Den ih gi di food tu ih apasl dehn, ahn dehn shayr it owt tu di peepl. Di 5,000 man, wuman ahn chiljren mi eet til dehn ful. Afta dat, di apasl dehn mi kalek weh mi lefoava fi mek dehn neva ways notn. Dehn mi ful op 12 baaskit! Dat da-mi wahn amayzin mirakl, noh chroo?

Di peepl mi soh impres dat dehn mi waahn Jeezas bee dehn king. Bot Jehoava taim neva kohn yet fi mek Jeezas bee king, ahn Jeezas mi noa dat. Soh hihn mi sen weh di peepl ahn tel di apasl dehn mek dehn goh pahn di ada said a di See a Gyalilee. Soh dehn get eena di boat, ahn Jeezas gaan op tu di mongtin bai ihself. Wai? Bikaaz hihn mi waahn pray tu ih Pa. Noh mata how bizi Jeezas mi bizi, hihn mi aalwayz mek taim fi pray.