Jeezas Waak Pahn Waata

Jeezas neva onli heel sik peepl ahn rezorek di ded, ih kuda mi aalso kanchroal di breez ahn di rayn. Afta Jeezas mi pray pahn wahn mongtin, ih luk dong pahn di See a Gyalilee an ih si wahn staam. Ih apasl dehn mi deh eena di boat di chrai padl gens di schrang breez. Soh Jeezas kohn dong fahn di mongtin ahn staat waak pahn di waata tuwaadz dehn boat. Wen di apasl dehn si sohnbadi di waak pahn di waata, dehn geh fraitn. Bot Jeezas tel dehn: ‘Da mee. Noh geh fraitn.ʼ

Peeta seh: ‘Laad, if da yoo fi chroo, mek Ah waak tuwaadz yu pahn tap a di waata.ʼ Jeezas tel Peeta: ‘Kohn ya.ʼ Soh midl a di staam, Peeta get owta di boat ahn staat waak tuwaadz Jeezas pahn di waata. Bot az ih geh kloasa tu Jeezas, Peeta luk pahn di staam an ih staat tu feel frayd. Den ih staat tu sink. Peeta hala owt: ‘Laad, pleez sayv mi!ʼ Jeezas grab ih han, an ih tel ahn: ‘Wai yu staat tu dowt? Da weh yu fayt deh?ʼ

Jeezas ahn Peeta klaim eena di boat, ahn rait away di staam stap. Yoo ku imajin how di apasl dehn mi feel? Dehn seh: “Yoo da Gaad son fi chroo.”

Dis da neva di onli taim Jeezas mi kanchroal di weda. Dehn mi ga wahn nada taim wen Jeezas an ih apasl dehn mi-di kraas tu di ada said a di see ahn hihn mi-di sleep bak a di boat. Wail ih mi-di sleep, wahn bad staam mi staat. Di wayv dehn lash op gens di boat, an ih staat tu geh ful op wid waata. Di apasl dehn wayk op Jeezas, di hala: ‘Teecha, wi wahn ded! Help wi!ʼ Jeezas get op ahn tel di see: “Bee kwaiyet!” Rait away, di breez ahn di see kaam dong. Den Jeezas aks di apasl dehn: ‘Wehpaat unu fayt deh?ʼ Dehn tel wan anda: “Eevn di breez ahn di see obay ahn.” Di apasl dehn mi laan if dehn reeli chros Jeezas, dehn noh haftu frayd fi notn.