Jeezas Laas Eevnin Meel

Di Jooz mi selibrayt di Paasoava evri yaa pahn di 14th day a di mont a Naisan. Dis da-mi fi rimain dehn how Jehoava mi free dehn fahn slayvri da Eejip ahn kehr dehn tu di Pramis Lan. Eena di yaa 33 C.E., Jeezas an ih apasl dehn mi selibrayt di Paasoava eena wahn opstayz room da Jeroosalem. Wen dehn finish eet, Jeezas mi tel dehn: ‘Wan a unu weh deh ya wahn bichray mi.ʼ Di apasl dehn mi sopraiz fi hyaa dat, soh dehn aks Jeezas: ‘Da hoo wahn bichray yu, Laad?ʼ Jeezas mi seh: ‘Da di man weh Ah gi dis pees a bred tu.ʼ Den ih gi di bred tu Joodas Iskariyat. Kwik ting, Joodas get op ahn lef di room.

Jeezas seh wahn pryaa, ih brok wahn bred eena peesiz, an ih shayr it wid di apasl dehn weh mi stay wid ahn. Den ih seh: ‘Eet dis bred. Dis stan fi mai badi, weh Ah wahn giv op fi unu.ʼ Den ih tek di wain, ih seh wahn pryaa, an ih gi som tu ih apasl dehn. Ih seh: ‘Jrink dis wain. Ih stan fi mai blod weh Ah wahn giv op soh dat unu ku geh fergivnis fi unu sinz. Ai pramis dat unu wahn bee kingz wid mee da hevn. Du dis evri yaa fi memba mi.ʼ Jeezas falowaz stil meet tugeda pahn da eevnin. Tudeh, wi kaal da meetin Krais Eevnin Meel.

Afta di meel, di apasl dehn mi-di aagyu bowt hoo mi moa impoatant monks dehn. Bot Jeezas mi tel dehn: ‘Di moas impoatant wan monks unu fi si ihself az di yongis er di lees impoatant wan.ʼ

Jeezas mi aalso tel dehn: ‘Unu da mai frenz. Ai tel unu evriting weh mi Faada waahn mek Ah tel unu. Ah soon gwehn da mi Faada da hevn. Bot unu wahn stay rait ya, ahn peepl wahn noa dat unu da mai disaiplz kaaz a di lov weh unu ga fi wan anada. Unu mos lov wan anada jos laik how Ai lov unu.ʼ

Den Jeezas mi pray an aks Jehoava fi protek aala ih disaiplz ahn fi help dehn werk tugeda eena pees. Ih mi aalso pray fi mek Jehoava naym bee hoali. Den Jeezas an ih apasl dehn prayz Jehoava wid sang ahn gaan owtsaid. Da mi soon taim fi mek dehn ares Jeezas.