How fi Yooz Wi Chrak Dehn fi Staat Op Wahn Kanvasayshan

Sins Janiweri 2018, di kova a di Laif ahn Minischri Meetin Werkbuk feecha sohn sampl kanvasayshan. Dehn inkorij wi fi staat op wahn kanvasayshan wid peepl insteda jos di plays lichricha wid dehn. Fi help di poblisha dehn ajos di way dehn taak wid peepl eena di minischri, di sampl kanvasayshan veedyo dehn shoa wayz fi yooz onli di Baibl fi staat op wahn kanvasayshan. Bot yu tink dis meen dat wi kyaahn aafa poblikayshan wen wi di preech fahn hows tu hows? Non ataal. Wen wi yooz wi chrak dehn dis kud bee wahn gud way fi staat wahn kanvasayshan. Wi ku fala dehnya sojeshanz wen wi di yooz eni wan a wi chrak dehn:

1. Aks di set a kweschanz weh deh pahn di front a di chrak.

2. Shoa di ansa fahn di skripcha weh deh da di tap a di sekant payj. If yu ga taim reed ahn diskos som a di infamayshan weh deh eensaida di chrak.

3. Giv di howshoalda wahn kapi a di chrak, inkorij ahn fi finish reed it wen ih ga taim.

4. Bifoa yu goh, shoa ahn di kweschanz eena di sekshan weh seh, “Tink Bowt Dis” ahn den araynj wahn taim weh yu ku ritern fi diskos di ansa fahn di Baibl.

Wen yu goh bak, diskos di ansa ahn den lef wahn nada kweschan weh yu ku ansa di neks taim yu vizit. Yu ku chooz wahn kweschan fahn di websait er fahn di bak payj a di chrak dehn. Wen yu feel da di rait taim, inchrojoos di broashoar Gud Nyooz Fahn Gaad! er wahn ada stodi poblikayshan fahn di Teechin Toolbaks.