2 | “Di Skripchaz Gi Wi Komfert”

DI BAIBL SEH: “Evriting weh mi geh rait dong fahn way bak mi geh rait dong fi teech wi ahn gi wi hoap, bikaaz di Skripchaz gi wi komfert ahn help wi fi bayr op.”—ROAMANZ 15:4.

Weh Dis Meen?

Di Baibl gat een wahn lata gud advais weh gi wi di schrent weh wi need fi fait gens negitiv tinkin. Ih aalso help wi fi noa dat soon wi noh wahn ga no kaina imoashanal payn.

How Dis Ku Help?

Aala wi goh chroo sohn kaina imoashanal payn evri now ahn den, bot som peepl sofa wid schres, woriz, fyaa, er dipreshan evri day. How di Baibl ku help yu koap?

Wen wi reed di Baibl, ih help wi geh rid a negitiv tinkin ahn tink bowt pazitiv tingz insted. (Filipiyanz 4:8) Ih ku help wi kanchroal wi feelinz ahn help wi tink bowt tingz weh bring wi komfert ahn weh help wi feel kaam.—Psalm 94:18, 19.
Di Baibl ku help wi stap tink dat wi noh wert notn.—Look 12:6, 7.
Di Baibl gat een lata vers weh help wi fi si dat wi noh deh bai wiself ahn dat bikaaz Gaad da wi Kriyayta, hihn andastan egzakli how wi feel ahn weh wi di goh chroo.—Psalm 34:18; 1 Jan 3:19, 20.
Di Baibl pramis dat Gaad wahn geh rid a paynful memriz. (Isaiah 65:17; Revilayshan 21:4) Wen wi di sofa fahn feelinz weh fraitn wi er opset wi, dehnya pramis ku gi wi di schrent fi noh giv op.

How di Baibl Di Help Jessica

How Dipreshan Afek Mi

“Wen Ah mi 25 yaaz oal, Ah gaahn chroo wahn taim wen Ah mi fays lata mental schres, ahn di daktaz seh dat Ah ga bad dipreshan. Ah mi kyaahn kanchroal di terabl memriz bowt tingz weh Ah gaahn chroo eena di paas. Di daktaz mi help mi fi andastan dat di paynful tingz weh Ah gaahn chroo da weh mi-di afek mi. Ah neva onli need medikayshan, bot Ah mi aalso need terapi fi help mi point owt ahn karek eni negitiv tinkin weh Ah mi ga.”

How di Baibl Help Mi?

“Wen Ah mi-di goh chroo di wers paat a mi dipreshan, Ah geh panik ataks, Ah yoostu wori ahn schres owt oava evriting, an Ah kuda haadli sleep. Yoozhwali da nait, Ah wuda kyaahn kanchroal di tingz weh Ah tink bowt. Jos laik weh Psalm 94:19 seh, Gaad ku komfert ahn kaam wi wen wi feel laik wi woriz da tu moch fi mek wi handl. Soh Ah mi kip mi Baibl ahn wahn lee noatbuk wid inkorijin skripchaz kloas tu mi bed. Wen Ah kudn faal asleep, Ah wuda reed sohn skripchaz, ahn da way Ah wuda di alow Gaad fi komfert mi.

“Di Baibl inkorij wi fi chaynj eni tinkin weh goh gens weh wi noa bowt Gaad. Eena di paas, Ah mi kanvins dat Ah neva wert notn ahn dat nobadi kyaahn lov mi. Bot Ah laan dat da kaina tinkin goh gens weh di Baibl seh bowt Gaad, dat hihn da wahn lovin Faada weh ga kompashan ahn weh kay bowt eech wan a wi. Lee bit bai lee bit, Ah kuda mi kanchroal mi tinkin insteda mek mi tinkin kanchroal mee. Ah laan fi si miself di way Gaad si mi. Dis da-mi wahn impoatant step fi help mi stap si miself eena wahn negitiv way.

“Ah kyaahn wayt fi di taim wen aala mi paynful memriz ahn negitiv tinkin noh wahn egzis nohmoh. Ah noa dat eena di fyoocha, wi noh wahn ga no mental prablemz. Dis help mi fi noh giv op ahn fi wayt fi da fyoocha wen Ah noh wahn sofa wid dipreshan nohmoh.”