3 | How Baibl Egzamplz Ku Help Yu

DI BAIBL TAAK BOWT . . . Faytful peepl weh ga “feelinz jos laik wee.”—JAYMZ 5:17.

Weh Dis Meen?

Di Baibl gat een wahn lata reel-laif ekspeeryens a sohn man ahn wuman weh mi gaahn chroo lata difrent feelinz. Wen wi reed bowt dehn, wi mait fain wahn Baibl egzampl weh mi gaahn chroo som a di saym tingz weh wee di goh chroo.

How Dis Ku Help?

Aala wi waahn mek adaz andastan weh wi di feel, espeshali if wi di schrogl wid mental helt prablemz. Wen wi reed di Baibl, wi laan bowt adaz weh mi feel ahn tink di saym way how wee tink ahn feel. Dis help wi fi si dat wi noh deh pahn wi oan wen wi di wori, feel frayd, er feel sad.

Di Baibl tel wi bowt peepl weh mi feel week ahn hoaples. Yoo eva feel laik yu kyaahn tek it nohmoh? Moaziz, Ilaija, ahn Dayvid mi feel da way tu.—Numbers 11:14; 1 Kings 19:4; Psalm 55:4.
Di Baibl taak bowt Hana, weh mi feel “reeli sad ahn kudn tek it nohmoh” bikaaz shee mi kyaahn ga chiljren an ih hozban ada waif mi kip aan di mek shee feel bad bowt it.—1 Samuel 1:6, 10.
Di Baibl tel wi bowt wahn man weh mi naym Joab. Eevn doa hihn mi ga schrang fayt eena Jehoava, hihn mi sofa wahn lat. Ih mi feel soh bad dat wahn taim ih mi seh, “Ai hayt mi laif; Ah noh waahn kantinyu liv.”—Job 7:16.

Wen wi laan bowt how peepl eena di Baibl mi deel wid negitiv tinkin, ih gi wee schrent fi koap wid fi wee prablemz.

How di Baibl Di Help Kevin

How Bipolar Disaada Afek Mi

“Wen Ai mi nayli 50 yaaz oal, di daktaz mi tel mi dat Ah sofa fahn bipolar disaada. Sohntaim Ah feel laik Ah ku handl eniting eena laif, bot sohn ada taimz Ah feel laik Ah noh eevn waahn kantinyu liv.”

How di Baibl Help Mi?

“Wahn Baibl egzampl weh Ah tink bowt da di apasl Peeta. Hihn mi mek lata mistayk weh mi mek ih feel laik hihn noh wert notn. Bot Peeta neva aalwayz feel da way. Insted, hihn mi stay kloas tu frenz weh mi kay bowt ahn. Wen Ah di goh chroo wahn bad day sayka mi bipolar disaada, mi imperfekshan wuda mek Ah feel laik Ah noh wert notn. Jos laik Peeta, Ah chrai stay kloas tu frenz hoo waahn help mi fi kantinyu liv wahn hapi laif.

“Wahn nada Baibl egzampl weh gi mi komfert da King Dayvid. Lata taim hihn mi feel dipres bikaaz a di mistayk dehn weh hihn mi mek. Ah ku andastan how hihn mi feel bikaaz sohntaim Ah wuda seh er du tingz weh Ah wish Ah neva du. Di werdz weh Dayvid mi rait eena Psalm 51 gi mi wahn lata komfert. Eena vers 3, Dayvid seh: ‘Ah noa weh Ah du rang, ahn mi sin dehn aalwayz deh pahn mi main.ʼ Dehnya werdz toch mi haat, espeshali wen Ah feel reeli dipres, kaaz joorin dehnya taimz ih haad fi mek Ah tink gud bowt miself. Ah feel di saym way how Dayvid mi feel eena vers 10, wen ih seh: ‘Put wahn pyoar haat eena mi, Oa Gaad, ahn put wahn nyoo spirit eena mi, wahn laayal wan.ʼ Jos laik Dayvid, Ah wuda aks Jehoava fi help mi soh dat Ah ku feel beta bowt miself. Ahn vers 17 mek Ah noa dat Jehoava reeli lov mi. Ih seh: ‘Oa Gaad, yu noh wahn ton yu bak pahn sombadi weh feel dong er feel laik dehn haat brok.ʼ

“Wen Ah foakos pahn Baibl egzamplz ahn pahn weh Gaad don du fi mi, ih mek mi hoap fi di fyoocha geh schranga. Ah geh fi si di pramis dehn fahn di Baibl az sohnting reel ahn dis help mi fi kantinyu bayr op.”