Noawa Bil Wahn Aak

Afta lata yaaz, wahn lata peepl mi-di liv pahn di ert. Moas a dehn mi bad. Eevn som a di aynjelz mi chooz fi bee bad. Dehn lef dehn hoam da hevn ahn kohn dong pahn ert fi liv az hyoomanz. Yu noa wai dehn du dat? Soh dat dehn ku geh marid tu sohn laydi rait ya pahn ert.

Di aynjelz ahn di laydi dehn mi ga chiljren. Dehndeh chiljren mi groa op fi bee schrang ahn dehn wuda hert op peepl. Jehoava kuda neva alow dehndeh kaina ting fi kip di hapm. Soh hihn mek op ih main fi dischrai bad peepl eena wahn flod.

Bot dehn mi ga wahn man weh mi difrent kaaz hihn mi lov Jehoava. Fi hihn naym da-mi Noawa. Hihn mi ga wahn waif ahn chree son, Shem, Ham, ahn Jayfet. Eech wan a ih son mi ga wahn waif. Jehoava mi waahn Noawa an ih famili fi servaiv di Flod. Soh hihn mi tel Noawa fi bil wahn big aak, weh da-mi wahn big baks weh mek owta wud ahn weh ku float. Jehoava mi aalso tel Noawa fi kehr lata difrent animal eena di aak soh dat dehn ku servaiv tu.

Noawa neva ways no taim, hihn hori staat bil di aak. Jehoava mi tel Noawa an ih famili how fi bil it, ahn dehn du egzakli weh hihn tel dehn fi du. Ih mi tek dehn bowt 50 yaaz fi bil it. Joorin da taim, Noawa mi waan di peepl bowt di Flod. Bot nobadi lisn tu ahn.

Di taim fainali kohn fi mek dehn goh eena di aak. Yu waahn noa weh hapm afta dat? Mek wi si.