Wai Peepl Noh Ga Rispek fi Famili Nohmoh?

WAI IH IMPOATANT FI MEK FAMILI MEMBAZ RISPEK EECH ADA?

• Di buk weh naym The Seven Principles for Making Marriage Work seh dat wen wahn hozban ahn waif rispek eech ada, dehn shoa afekshan fi eech ada evri day “noh jos eena big wayz bot eena smaal wayz tu.”

• Risaach shoa dat chiljren weh laan fi rispek adaz feel beta bowt dehnself, dehn ga wahn gud rilayshanship wid dehn payrents, ahn ga les imoashanal ahn mental prablemz.

HOW WI KU SHOA RISPEK FI ADAZ EENA WI FAMILI?

Mek wahn plan wid yu famili. Fers, az di payrent, mek shoar dat evribadi eena yu famili andastan weh ih meen fi shoa rispek. Neks, rait dong spesifik tingz weh yu waahn yu famili du ahn tingz weh yu noh waahn dehn du. Den, diskos di plan az wahn famili soh dat evribadi noa weh dehn ku du fi shoa rispek.

Bee wahn gud egzampl. Tink bowt how yoo bihayv. Yu laik kritisaiz yu famili membaz wen dehn du sohnting rang? Yu laik mek fon a dehn wen dehn vais dehn opinyan, er noh pay dehn main er intarop dehn wen dehn di taak tu yu?

Tip: Aalwayz shoa rispek tu yu marij mayt ahn yu chiljren, noh mek dehn feel laik dehn haftu werk haad far it.

Shoa rispek eevn wen yu noh agree wid di ada persn. Wen yu di ekspres yuself, chrai noh kritisaiz ahn seh tingz laik “yoo aalwayz” er “yoo neva.” Wen yu seh tingz laik dat, yu ku hert an ofen yu famili memba an ih ku mek mataz wers.

HOW JEHOAVA WITNISIZ SHOA RISPEK FI FAMILI?

Jehoava Witnisiz inkorij famili membaz fi chreet wan anada wid rispek. Moas a di taim di aatikl, buk, broashoar, ahn veedyo dehn weh wi poblish ahn weh avaylabl fi free taak bowt rispek fi di famili.

FI MARID KOPLZ: Di aatikl seeriz weh naym Help fi di Famili ku help hozban ahn waif fi . . .

• ga payshens

• mek taim fi eech ada

• kanchroal dehn anga

(Saach “Help fi di Famili” pahn jw.org)

FI PAYRENTS: Di aatikl seeriz weh naym How fi Rayz Pikni ku help payrents chrayn dehn chiljren fi . . .

• bee hombl

• ga gud moaral standadz

• bee rispansabl

(Saach “How fi Rayz Pikni” ahn “How fi Rayz Yu Teenayja” pahn jw.org)

Reed aalso di Awayk! No. 2, 2019 weh naym “Siks Lesn Weh Chiljren Need fi Laan” ahn payj 8-11 a di Awayk! No. 2, 2018 weh naym “12 Advais Weh Ku Mek Yu Famili Hapi.” (Saach fi dehndeh magazeen pahn jw.org)

FI YONG PEEPL: Di Yoots sekshan pahn jw.org ga aatikl ahn veedyo weh ku help yong peepl fi . . .

• get lang wid dehn breda ahn sista

• taak tu dehn ma ahn pa

• get dehn ma ahn pa fi chros dehn

(Saach “Yoots” pahn jw.org)

Yoo ku yooz di jw.org websait fi free. Yu noh need fi bee wahn memba, yu noh haftu pay fi eniting, ahn wi noh aks yu fi yu persnal infamayshan.