Yu Ku Bee Shoar Jehoava Wahn Komfert Yoo

1. How laif mi stan fi di Jooz da Babilan?

FI YAAZ di Jooz mi kip aan di disobay Jehoava. Bikaaz a dat, hihn mi mek di Babiloanyan dehn dischrai di plays weh dehn liv ahn kehr dehn da Babilan. How laif mi stan fi dehn da Babilan? (2 Chron. 36:​15, 16, 20, 21) Dehn kuda mi liv wahn naamal laif. (Jer. 29:​4-7) Bot stil, laif neva eezi fi dehn ahn dehn neva mi-di liv wehpaat dehn mi waahn liv. How yoo tink dehn mi feel? Dis da weh wan a dehn mi seh: “Wi mi sidong bai di riva dehn da Babilan. Wi baal ahn baal wen wi tink bowt Zaiyan.” (Saa. 137:1) Di Jooz mi need sohnbadi fi komfert dehn, bot hoo mi wahn help dehn?

2-3. (a) Weh Jehoava mi du fi di Jooz weh mi deh da Babilan? (b) Weh wi wahn taak bowt eena dis aatikl?

² Jehoava da “di Gaad weh aal komfert kohn fram.” (2 Kor. 1:3) Jehoava lov ih servant dehn ahn hihn waahn komfert dehn. Hihn mi noa dat wen di Jooz mi deh da Babilan, som a dehn mi wahn feel sari fi weh dehn mi du, aksep karekshan, ahn staat serv Jehoava eena di rait way agen. (Aiz. 59:20) Soh oava wahn honjrid yaaz bifoa di Jooz mi en op da Babilan, Jehoava mi giv Aizaiya wahn mesij fi dehn. Aizaiya tel dehn: “Unu Gaad seh: ‘Komfert mi peepl, komfert dehn.ʼ” (Aiz. 40:1) Eena di buk a Aizaiya, Jehoava gi di Jooz di komfert weh dehn mi need wen dehn mi deh da Babilan.

³ Laik di Jooz weh mi deh da Babilan, wee need komfert tu. Eena dis aatikl, wi wahn diskos chree wayz how Jehoava mi komfert di Jooz: (1) Ih mi pramis fi fergiv dehn wan weh ripent fahn dehn sinz, (2) ih giv ih peepl hoap fi di fyoocha, ahn (3) ih help dehn fi noh bee frayd. Wi wahn si how Jehoava komfert wee eena di saym way.

JEHOAVA FERGIV WI

4. How Jehoava shoa dat hihn ga lata mersi? (Aizaiya 55:7)

⁴ Jehoava da “di Faada weh ga lata mersi.” (2 Kor. 1:3) Hihn mi shoa mersi tu di Jooz wen ih mi pramis fi fergiv dehn wan weh mi ripent. (Reed Aizaiya 55:7.) Jehoava mi seh: “Bikaaz mi laayal lov laas fareva, Ah wahn shoa yu mersi.” (Aiz. 54:8) How Jehoava shoa dat ih ga mersi? Eevn doa di Jooz wuda sofa bikaaz a di tingz weh dehn mi du, Jehoava pramis dat dehn neva mi wahn stay da Babilan fareva. Dehn onli mi wahn haftu liv deh fi wahn lee wail. (Aiz. 40:2) Dat mosi mi reeli komfert di Jooz weh mi ripent fahn dehn sinz!

5. Wai wi ku bee shoar dat Jehoava wahn fergiv wi?

⁵ Weh wi laan? Jehoava wilin fi fergiv peepl weh serv ahn. Di Jooz mi bileev dat, bot wee ku bee eevn moa shoar dat Jehoava wahn fergiv wi. Wai wi ku seh dat? Bikaaz wi noa weh aal Jehoava du fi fergiv wi sinz. Honjridz a yaaz afta Aizaiya mi taak bowt Jehoava fergivnis, Jehoava mi sen ih Son az wahn ransom sakrifais soh dat ih ku fergiv wi sinz. Az lang az wi ripent, wi ku bee shoar dat Jehoava wahn kompleetli waip weh wi sinz. (Aiz. 1:18; Aks 3:19; Ifee. 1:7) Jehoava ful a mersi fi chroo!

6. How wi benifit wen wi foakos pahn Jehoava mersi? (Koment pahn di picha.)

⁶ Sohntaim, eevn afta wi don ripent, wi mait stil feel gilti fi sohnting weh wi du eena di paas. Wi mait kantinyu fi feel gilti if wi stil di sofa fahn di mistayk weh wi mi mek. Bot weh Jehoava seh da Aizaiya 55:7 ku komfert wi. If wi kanfes wi sinz ahn stap du weh rang, wi ku bee shoar dat Jehoava wahn fergiv wi. Ahn wen Jehoava tel wi dat hihn fergiv wi, ih meenz dat ih noh wahn memba wi sinz nohmoh. (Kompyaa Jeremiah 31:34.) If Jehoava noh kip di tink bowt di sinz weh wi komit eena di paas, den wee shudn tink bowt dehn needa. Di mistayk dehn weh wi mek eena di paas da noh weh impoatant tu Jehoava. Da weh wi di du rait now da weh impoatant tu hihn. (Ezek. 33:​14-16) Wi mait di sofa chroo difrent prablemz weh kom op sayka mistayks weh wi mek eena di paas, bot soon Jehoava wahn geh rid a dehn ahn wi noh wahn haftu sofa nohmoh.

7. Weh wahn help wi fi goh tu di eldaz if wi komit wahn seeryos sin?

⁷ Wat if wi feel gilti bikaaz wi komit wahn seeryos sin eena di paas ahn wi di chrai haid it? Di Baibl inkorij wi fi taak tu di eldaz an aks dehn fi help. (Jay. 5:​14, 15) Ih mait noh bee eezi fi kanfes wi sinz tu di eldaz. Weh wahn help wi fi du dat? Memba dat Jehoava da di wan weh put di eldaz deh fi help wi, ahn dehn wahn shoa lov ahn mersi laik Jehoava. If wi memba dat, an if wi reeli sari fi weh wi du, ih wahn bee eeziya fi taak tu di eldaz. Mek wi si how Jehoava mi shoa mersi tu wahn brada weh naym Arthur.a Arthur kanshans mi-di bada ahn. Hihn seh, “Fi bowt wahn yaa, Ah mi wach poarnografi. Bot afta Ah mi hyaa wahn taak bowt di kanshans, Ah mi tel mi waif an Ah mi taak tu di eldaz. Afta dat, Ah mi feel beta, bot mi kanshans stil mi-di bada mi bikaaz a weh Ah mi du. Di eldaz mi rimain mi dat Jehoava mi stil waahn bee mi fren. Jehoava disiplin wi bikaaz ih lov wi. Fi dehn kain werdz mi toch mi haat ahn help mi fi andastan dat Jehoava reeli fergiv mi.” Tudeh, Arthur di serv az wahn painyaa ahn wahn ministeeryal servant. Ih komfertin fi noa dat Jehoava shoa wi mersi if wi ripent.

JEHOAVA GI WI HOAP

8. (a) Weh hoap Jehoava mi gi di Jooz? (b) Akaadn tu Aizaiya 40:​29-31, how di Jooz weh ripent mi wahn benifit fahn da hoap?

⁸ Wen di peepl fahn Babilan mi kyapcha priznaz, dehn neva yoostu let dehn goh. Sayka dat, di Jooz mi praabli feel laik dehn mi wahn neva free fi goh bak hoam. (Aiz. 14:17) Bot Jehoava mi giv ih peepl hoap. Hihn mi pramis dat hihn mi wahn set dehn free, ahn notn ku stap hihn. (Aiz. 44:26; 55:12) Di Babiloanyan dehn da-mi notn tu Jehoava. Tu hihn dehn da-mi laik dos. (Aiz. 40:15) Tink bowt how eezi ih eezi fi bloa dos aafa sohnting. Dat da how eezi ih wuda bee fi mek Jehoava free ih peepl fahn Babilan. How di hoap weh Jehoava mi gi di Jooz mi wahn mek dehn feel? Ih wuda komfert dehn. Bot ih wuda du moa dan dat. Aizaiya mi seh: “Di wan dehn weh di hoap eena Jehoava wahn get bak dehn schrent.” (Reed Aizaiya 40:​29-31.) Yes, da hoap wuda schrentn dehn. Ih wuda mek dehn feel laik dehn di “flai laik eegl.”

9. Wai di Jooz kuda mi bee shoar dat Jehoava mi wahn set dehn free fahn Babilan?

⁹ Jehoava mi pramis di Jooz dat ih mi wahn set dehn free fahn Babilan, an ih gi dehn gud reezn wai dehn ku chros eena da pramis. Tink, fi egzampl, bowt di prafesi dehn weh mi don kohn chroo aredi. Dehn mi noa dat di Asiriyan dehn mi don tek oava di naadan kingdom a Izrel ahn kehr di peepl ahn foas dehn fi liv sohnweh els. (Aiz. 8:4) Dehn mi si di Babiloanyan dehn dischrai Jeroosalem ahn kehr di peepl da Babilan. (Aiz. 39:​5-7) Dehn mi aalso noa dat di king a Babilan mi blain King Zedikaiya ahn kehr ahn da Babilan. (Jer. 39:7; Ezek. 12:​12, 13) Evriting weh Jehoava seh mi kohn chroo. (Aiz. 42:9; 46:10) Aala dis mosi mi reeli schrentn dehn fayt dat Jehoava pramis mi wahn kohn chroo!

10. Weh ku help wi fi kip wi hoap schrang joorin dehnya laas dayz?

¹⁰ Weh wi laan? Wen wi feel sad, di hoap weh Jehoava gi wi fi di fyoocha ku inkorij wi ahn gi wi schrent. Tingz eena di werl di geh wers ahn wers, ahn wi di fays moa ahn moa persikyooshan. Bot wi noh waahn geh tu diskorij. Jehoava pramis wi dat wi wahn ku ga evalastin laif ahn liv eena wahn Paradais wehpaat wi wahn bee sayf ahn liv eena pees. Wi haftu foakos pahn da hoap. Weh ku help wi fi du dat? Wi need fi spen taim di imajin how gud wi laif wahn bee eena Paradais. Wi ku reed difrent aatikl, wach difrent veedyo, ahn lisn tu difrent sangz weh taak bowt wi hoap. Ahn wen wi pray tu Jehoava, wi ku tel ahn bowt aala di tingz weh wi di luk faawod tu eena Paradais.

11. Weh mi help wahn sista weh ga seeryos helt prablemz fi get bak ih schrent?

¹¹ Mek wi kansida how hoap mi schrentn wahn sista weh naym Joy, hoo mi ga wahn seeryos helt prablem. Shee seh: “Wen Ah feel laik mi prablemz da tu moch, Ah pray tu Jehoava ahn poar owt mi haat tu ahn bikaaz Ah noa dat hihn andastan mi. Den Jehoava gi mi ‘powa weh hyoomanz noh naamali gat.ʼ” (2 Kor. 4:7) Joy aalso imajin ihself eena Paradais, wehpaat “nobadi wahn seh: ‘Ah sik.ʼ” (Aiz. 33:24) If wee tel Jehoava how wi di feel ahn foakos pahn di hoap weh wi gat, den wi wahn ku geh da saym powa.

12. Weh reezn wi ga fi chros eena Jehoava pramis dehn? (Koment pahn di picha.)

¹² Jehoava mi gi di Jooz eena Babilan wahn lata reezn fi chros ih pramis dehn. Hihn du di saym ting fi wee tudeh. Tink bowt di prafesi dehn weh wi si di kohn chroo rait now rong wi. Fi egzampl, wen di Baibl taak bowt di werl powa weh wahn rool joorin di taim a di en, ih seh dat “paat wahn bee schrang ahn paat wahn bee week,” ahn wee si dat tudeh. (Dan. 2:​42, 43) Wi aalso hyaa bowt “ertkwayk eena wahn lata plays,” ahn wi di preech tu “aala di nayshan dehn.” (Mach. 24:​7, 14) Bikaaz wi si dehnya prafesi di kohn chroo, wi shoar dat evriting els weh Jehoava pramis wahn kohn chroo tu.

JEHOAVA HELP WI FI NOH WORI ER BEE FRAYD

13. (a) Weh prablemz di Jooz mi fays wen dehn mi kom owta Babilan? (b) Laik weh Aizaiya 41:​10-13 seh, how Jehoava mi komfert di Jooz weh mi kom owta Babilan?

¹³ Jehoava mi gi di Jooz weh mi-di liv eena Babilan wahn wandaful hoap dat dehn mi wahn geh set free. Bot az di taim geh kloasa fi mek dat hapm, tingz mi wahn geh bad fi dehn. Hihn mi tel dehn dat wahn powaful king mi wahn atak di nayshan dehn rong Babilan ahn tek kanchroal a dehn, ahn den da saym king mi wahn atak Babilan tu. (Aiz. 41:​2-5) Yu tink di Jooz mi need fi wori? No. Bikaaz Jehoava mi don komfert dehn ahn tel dehn: “Noh bee frayd, kaaz Ai deh wid yu. Noh wori, kaaz Ai da yu Gaad.” (Reed Aizaiya 41:​10-13.) Weh ih meen wen ih seh “Ai da yu Gaad”? Hihn neva di rimain di Jooz dat dehn mi haftu wership ahn, bikaaz dehn mi noa dat aredi. Insted, hihn mi-di rimain dehn dat hihn wahn aalwayz dehdeh fi help dehn.—Saa. 118:6.

14. Wat els Jehoava mi du fi help di Jooz fi noh bee frayd?

¹⁴ Jehoava mi mek di Jooz feel kaam wen ih tel dehn dat ih ga lata powa ahn nalij. Hihn mi aks di Jooz fi luk op pahn di staarz, an ih tel dehn dat hihn neva jos mek di staarz bot hihn noa eech wan bai naym. (Aiz. 40:​25-28) If hihn ku du dat, yu noh tink hihn ku noa aal ih servant dehn naym? If Jehoava ga soh moch powa fi mek aal di staarz, den fi shoar hihn ga di powa fi help aala ih peepl. Di Jooz weh mi deh da Babilan neva need fi wori er bee frayd.

15. Weh Jehoava mi tel di Jooz fi du fi pripyaa dehnself fi weh mi wahn hapm da Babilan?

¹⁵ Jehoava mi tel di Jooz weh fi du wen di taim kohn fi mek dehn geh free fahn Babilan. Hihn mi tel dehn: “Unu goh haid eena unu room ahn kloaz unu doa. Haid unuself fi wahn lee wail til Gaad anga paas.” (Aiz. 26:20) Di Jooz mi praabli fala dis inschrokshan wen King Sairos mi gaahn atak Babilan. Wahn man weh stodi Greek hischri mi seh dat wen Sairos mi invayd Babilan, “ih mi tel ih soalja dehn fi kil enibadi weh dehn mi fain pahn di schreet.” Imajin how fraitnin dat wuda mi bee fi di peepl weh mi liv da Babilan! Bot di Jooz weh liv da Babilan mi praabli geh sayv bikaaz dehn obay di inschrokshanz weh Jehoava mi gi dehn.

16. Wai wi noh haftu frayd fi weh wahn hapm joorin di grayt chribyulayshan? (Koment pahn di picha.)

¹⁶ Weh wi laan? Soon di grayt chribyulayshan wahn staat an ih wahn bee di wers taim eva eena hyooman hischri. Wi noa dat Jehoava da fi wee Gaad. Wi ku bee kanfident, ahn wi wahn noa dat “di taim fi mek Gaad sayv [wi] deh kloas.” (Look 21:28) Eevn wen wahn groop a nayshanz atak wi, wee wahn kantinyu fi chros eena Jehoava. Jehoava wahn yooz di aynjelz fi protek wi, an ih wahn gi wi inschrokshanz weh wahn sayv wi laif. How hihn wahn gi wi dehnya inschrokshanz? Wi noh noa yet; wi wahn jos haftu wayt ahn si. Bot, moa dan laikli, wi wahn geh dehnya inschrokshanz chroo di kangrigayshan. Di kangrigayshan da laik wi lee room weh wi ku bee sayf eena. How wi ku pripyaa fi aala dis? Wi need fi ga wahn kloasa rilayshanship wid wi bradaz ahn sistaz, wi need fi obay inschrokshanz fahn Jehoava aaganaizayshan, ahn wi need fi bee shoar dat da Jehoava di leed di aaganaizayshan.—Heeb. 10:​24, 25; 13:17.

17. How wi ku geh komfert fahn Jehoava?

¹⁷ Eevn doa laif da Babilan neva eezi fi di Jooz, Jehoava mi stil gi dehn di komfert weh dehn mi need. Jehoava wahn du di saym fi wee tudeh. Soh noh mata weh hapm eena di fyoocha, wi ku kantinyu geh komfert fahn Jehoava. Yu ku chros dat hihn fergiv ih faytful servants ahn dat hihn kay bowt dehn. Kip yu hoap schrang. Memba dat Jehoava da yu Gaad. Yu noh ga notn fi frayd fa.