Luk Faawod fi di Siti Weh Wahn Laas Fareva

1. Weh Jeezas mi seh wahn hapm tu Jeroosalem?

WAHN fyoo dayz bifoa Jeezas mi ded, hihn mi tel ih falowaz weh mi wahn hapm eena di fyoocha. Ih mi seh dat wan day soaljaz wuda kyamp rong Jeroosalem. (Look 21:20) Di fers taim da prafesi kohn chroo da-mi wen di Roaman soaljaz mi kyamp rong Jeroosalem ahn den laytaraan dehn dischrai di siti ahn di templ. Jeezas mi tel ih falowaz dat az soon az dehn si di soaljaz di kyamp rong Jeroosalem, dehn fi lef rait away.—Look 21:​21, 22.

2. Weh kongsl Paal mi gi di Kristyanz weh mi liv da Jeroosalem ahn Judeeya?

² Wahn fyoo yaaz bifoa di Roaman soaljaz mi kyamp rong Jeroosalem, di apasl Paal mi rait wahn leta tu di Kristyanz da Jeroosalem an eena di res a Judeeya Dischrik fi gi dehn kongsl fi help dehn geh redi fi di haad taimz weh mi wahn kohn. Da leta da weh wee noa az di buk a di Heebrooz. Da leta mi impoatant bikaaz Jeroosalem mi wahn geh dischrai. If dehn mi wahn mek it chroo dehndeh haad taimz, dehn mi wahn haftu bee redi lef evriting, inkloodin dehn hows ahn dehn bizniz. Soh wen Paal mi-di taak bowt Jeroosalem, ih seh: “Wee noh ga wahn siti weh ku laas fareva.” Den ih seh: “Bot wi di luk faawod fi di siti weh wahn kom.”—Heeb. 13:14.

3. Wat da “di siti weh ga reel fongdayshan,” ahn wai wi di luk faawod tu it?

³ Wen di Kristyanz mi disaid fi lef Jeroosalem ahn Judeeya, di peepl mi praabli mek fon a dehn. Tudeh, peepl mek fon a wi bikaaz wi noh chros eena moni er pen pahn hyoomanz fi solv di prablemz eena di werl. Soh da wai wi mek da disizhan? Wi noa dat dis sistem noh ga lang fi goh. Wee di luk faawod fi Gaad Kingdom, weh da “di siti weh ga reel fongdayshan,” er “di siti weh wahn kom.”a (Heeb. 11:10; Mach. 6:33) Eech sobhedin eena dis aatikl wahn taak bowt how Paal kongsl mi help di Kristyanz eena di fers senchri fi “luk faawod fi di siti weh wahn kom,” how Paal mi help dehn geh redi fi weh mi wahn hapm eena di fyoocha, ahn how fi hihn kongsl ku help wee.

CHROS JEHOAVA BIKAAZ HIHN WAHN NEVA LEF YU

4. Wai Jeroosalem mi impoatant tu di Kristyanz?

⁴ Jeroosalem da-mi wahn impoatant siti fi Kristyanz. Dat da wehpaat di fers Kristyan kangrigayshan mi staat eena 33 C.E., ahn dat da wehpaat di govanin badi mi deh. Lata Kristyanz mi oan hows an ada tingz eena da siti. Bot Jeezas mi waan dehn dat dehn mi wahn haftu get owt fahn Jeroosalem ahn fahn Judeeya Dischrik.—Mach. 24:16.

5. How Paal mi pripyaa di Kristyanz fi weh mi wahn hapm da Jeroosalem?

⁵ Fi help pripyaa di Kristyanz fi weh mi wahn hapm, Paal mi help dehn fi si how Jehoava mi feel bowt da siti. Ih mi rimain dehn dat Jehoava mi don rijek di prees ahn di sakrifais weh dehn mek eena di templ, ahn sayka dat peepl neva haftu goh da Jeroosalem fi wership Jehoava nohmoh. (Look 13:​34, 35; Heeb. 8:13) Ahn moas a di peepl weh liv deh neva aksep di Mesaiya. Pahn tap a dat, Jeroosalem ahn di templ mi wahn geh dischrai.

6. Wai di Kristyanz mi need da rimainda weh Paal mi gi dehn da Heebrooz 13:​5, 6?

⁶ Wen Paal mi rait tu di Heebrooz, Jeroosalem da-mi wahn bizi siti. Eena datdeh taim, wahn Roaman raita mi kaal Jeroosalem “di moas faymos siti eena da paat a di werl.” Evri yaa, di Jooz weh mi liv eena difrent konchriz yoostu goh da Jeroosalem fi selibrayt aala dehn festival. Dehn wuda mi spen wahn lata moni eena di siti, ahn sayka dat wahn lata Kristyanz mi praabli mek wahn lata moni tu. Maybi dat da wai Paal mi tel dehn: “Unu noh fi lov moni, rada unu fi bee kantentid wid weh unu gat.” Den hihn koat wahn skripcha weh ga wahn schrang pramis fahn Jehoava tu eech wan a ih servant dehn. Ih seh: “Ai wahn neva lef unu, an Ai wahn neva stap help unu.” (Reed Heebrooz 13:​5, 6; Deut. 31:6; Saa. 118:6) Wahn lee wail afta dehndeh Kristyanz geh Paal leta, dehn mi wahn haftu lef dehn hows, bizniz, ahn moas a dehn bilanginz ahn staat wahn nyoo laif sohnweh els. Soh dehn mi wahn need da pramis fahn Jehoava.

7. Wai wi need fi laan fi chros Jehoava eena evriting fahn now?

⁷ Di lesn: Weh wahn soon hapm? Di “grayt chribyulayshan” wahn staat ahn dis wikid werl wahn geh dischrai. (Mach. 24:21) Wi need fi du evriting wi kud fi stay faytful now ahn bee redi fi weh wahn hapm eena di fyoocha, jos laik di fers-senchri Kristyanz. (Look 21:​34-36) Joorin di grayt chribyulayshan wi mait haftu lef tingz bihain ahn chros dat Jehoava noh wahn lef ih peepl. Wi ku shoa humoch wi chros Jehoava eevn bifoa di grayt chribyulayshan staat. Aks yuself, ‘Di disizhanz weh Ah mek ahn mi planz fi di fyoocha shoa dat Ah chros Jehoava, er dehn shoa dat Ah lov moni?ʼ (1 Tim. 6:17) Wi ku laan wahn lat fahn di egzampl a di faytful Kristyanz bak den weh ku help wi fi stay faytful joorin di grayt chribyulayshan. Bot di grayt chribyulayshan wahn bee wers dan weh dehn mi haftu gaahn chroo. Soh how wi wahn noa weh fi du wen di grayt chribyulayshan staat?

OBAY DI WAN DEHN WEH DI TEK DI LEED

8. Weh Jeezas mi tel ih disaiplz fi du?

⁸ Wahn fyoo yaaz afta di bradaz geh Paal leta, dehn si di Roaman aami sorong Jeroosalem. Dat tel dehn dat da mi taim fi goh, bikaaz Jeroosalem mi wahn geh dischrai. (Mach. 24:3; Look 21:​20, 24) Bot wehpaat dehn mi gwehn? Aal weh Jeezas mi tel dehn da dat “dehn wan weh deh eena Judeeya fi staat ron tu di mongtin dehn.” (Look 21:21) Dehn mi ga lata mongtin wehpaat dehn kuda mi goh. Soh wich way dehn wuda goh?

9. Wai di Kristyanz kuda mi wanda wich mongtin fi ron tu? (Luk pahn di map.)

⁹ Di Kristyan dehn kuda mi ron da di mongtin dehn da Samayrya, di mongtin dehn da Gyalilee, Mongt Hermon er wahn nada mongtin da Lebanon, er di mongtin dehn pahn di ada said a di Jaadn Riva. (Yu ku si dehn pahn di map.) Som a di siti eena dehndeh ayrya mi luk sayf. Fi egzampl, Gamla da-mi wahn siti pahn wahn hai mongtin an ih mi haad fi reech deh. Som a di Jooz mi tink da siti da-mi wahn sayf plays fi liv. Bot di Roamanz mi atak Gamla ahn dischrai it, ahn lata di peepl weh mi liv deh mi ded.b

10-11. (a) How Jehoava mi praabli gaid di Kristyanz? (Heebrooz 13:​7, 17) (b) How di Kristyanz mi benifit wen dehn mi obay di bradaz weh mi-di tek di leed? (Koment pahn di picha.)

¹⁰ Jehoava mi yooz dehn wan weh mi-di tek di leed fi gaid di Kristyanz eena di kangrigayshan. Eusebius, weh stodi hischri, mi rait weh mi hapm joorin da taim. Hihn seh dat Gaad mi mek som a di bradaz da Jeroosalem noa dat di Kristyanz mi fi lef Jeroosalem ahn goh da Pella, wahn siti weh deh eena Pereeya Dischrik. Pella mi luk laik wahn gud plays fi mek di Kristyanz dehn goh. Ih neva deh faar fahn Jeroosalem, soh ih wuda bee eezi fi chravl deh. Moas a di peepl weh mi liv da Pella da neva Joo, soh dehn neva mi-di chrai fait gens di Roaman dehn.—Si di map.

¹¹ Di Kristyanz weh mi ron da di mongtin dehn mi fala Paal kongsl fi “obay di wan dehn weh di tek di leed” eena di kangrigayshan. (Reed Heebrooz 13:​7, 17.) Bikaaz dehn mi obay, dehn mi en op di servaiv. Gaad neva abandan dehn wan weh “mi-di wayt fi di siti weh ga reel fongdayshan”—Gaad Kingdom.—Heeb. 11:10.

12-13. How Jehoava gaid ih peepl joorin haad taimz?

¹² Di lesn: Jehoava yooz faytful bradaz fi tek di leed ahn giv ih peepl di dairekshan weh dehn need. Wi ga lata egzampl eena di Baibl weh shoa how Jehoava yooz sohn faytful man fi gaid ih peepl joorin haad taimz. (Deut. 31:23; Saa. 77:20) Ahn wi stil di si how Jehoava di yooz faytful bradaz fi tek di leed ahn gaid ih peepl.

¹³ Fi egzampl, wen di COVID-19 pandemik mi staat, “di wan dehn weh di tek di leed” mi gi wi di dairekshan weh wi need. Dehn mi tel di eldaz how fi kantinyu du di meetinz ahn how fi inkorij di kangrigayshan fi kantinyu serv Jehoava. Jos wahn fyoo monts afta di pandemik mi staat, wi mi ga wahn kanvenshan eena 500 langwij. Di bradaz ahn sistaz kuda mi wach di proagram oava di Intanet er pahn TV, er dehn kuda mi lisn tu it pahn di rayjo. Dat da-mi di fers taim wi mi ga wahn kanvenshan laik dat. Soh wi mi stil geh di spirichwal food wi need, ahn sayka dat wi mi stay yoonaitid. Wi ku bee shoar dat noh mata weh hapm eena di fyoocha, Jehoava wahn stil yooz di bradaz weh di tek di leed fi help wi mek waiz disizhanz. Soh ih impoatant fi chros Jehoava an obay di dairekshan weh hihn gi wi chroo ih aaganaizayshan. Bot wat els wahn help wi fi bee redi fi di grayt chribyulayshan ahn fi mek waiz disizhanz joorin da taim?

KANTINYU FI SHOA LOV AHN BEE KAIN TU WAN ANADA

14. Akaadn tu Heebrooz 13:​1-3, weh kwalitiz di Kristyanz mi need fi shoa wen Jeroosalem mi wahn geh dischrai?

¹⁴ Wen di grayt chribyulayshan staat, wi wahn need fi shoa lata lov fi wan anda laik neva bifoa. Joorin da taim, wi wahn need fi fala di egzampl a di Kristyanz weh mi-di liv da Jeroosalem ahn Judeeya. Dehn mi aalwayz shoa lov fi wan anada. (Heeb. 10:​32-34) Bot wen Jeroosalem mi wahn geh dischrai, di Kristyanz mi need fi “shoa kainis” ahn “kantinyu fi lov wan anada” eevn moa.c (Reed Heebrooz 13:​1-3.) Wee tu wahn need fi shoa lov ahn kainis fi wan anada joorin di grayt chribyulayshan.

15. Wai di Heebroo Kristyanz mi need fi shoa lov ahn kainis tu wan anada afta dehn mi ron weh fahn Jeroosalem?

¹⁵ Fers, di Roaman aami mi sorong Jeroosalem, bot den dehn lef. Soh di Kristyanz kuda mi lef Jeroosalem, bot dehn kuda mi onli kehr lee bit a tingz wid dehn. (Mach. 24:​17, 18) Dehn mi haftu pen pahn wan anada wen dehn mi-di chravl ahn wen dehn reech da Pella. Lata di bradaz ahn sistaz mi need food, kloaz, ahn wahn plays fi stay, soh di Kristyanz mi ga plenti chaans fi shoa lata lov ahn kainis fi wan anada.—Tai. 3:14.

16. How wee ku shoa lov tu wi bradaz ahn sistaz weh need wi help? (Koment pahn di picha.)

¹⁶ Di lesn: Wi lov wi bradaz ahn sistaz, soh wi help dehn wen dehn need it. Lata wi bradaz ahn sistaz hapi fi help adaz weh da refyujee bikaaz a waar ahn nachral dizaasta. Dehn mek shoar dehn bradaz ahn sistaz ga weh dehn need fi liv, ahn dehn inkorij dehn fi kantinyu serv Jehoava. Wahn sista fahn Ukraine weh mi haftu lef ih hows seh: “Wi si how Jehoava yooz di bradaz fi help tek kayr a wi. Dehn shoa wi kainis ahn help wi owt da Ukraine, Hungary, ahn now Germany.” Wi werk lang wid Jehoava wen wi shoa kainis tu wi bradaz ahn sistaz ahn help tek kayr a dehn.—Prav. 19:17; 2 Kor. 1:​3, 4.

17. Wai wi need fi laan fi shoa lov ahn kainis now?

¹⁷ Joorin di grayt chribyulayshan, wi wahn need fi help wan anada moa dan weh wi di du rait now. (Hab. 3:​16-18) Soh Jehoava di teech wi fahn now fi shoa lov ahn kainis tu wan anada. Dehndeh kwalitiz wahn bee soh impoatant joorin da taim.

WEH WAHN HAPM EENA DI FYOOCHA

18. How wee ku kapi di Kristyanz weh mi liv da Jeroosalem?

¹⁸ Di Kristyanz weh mi obay ahn lef Jeroosalem ahn ron weh tu di mongtin dehn mi servaiv wen Jeroosalem mi geh dischrai. Dehn mi lef di siti, bot Jehoava neva lef dehn. How bowt wee? Wee noh noa weh wahn hapm eena di fyoocha. Aal wee noa, Jeezas seh wi haftu bee redi. (Look 12:40) Wi ga di waanin weh Paal mi giv di Kristyanz da Jeroosalem weh jos az impoatant tu wee. Ahn wi ga Jehoava pramis, dat ih wahn neva lef wi an ih wahn neva stap help wi. (Heeb. 13:​5, 6) Mek wi kantinyu luk faawod fi di siti weh wahn laas fareva—Gaad Kingdom—ahn den wi wahn ku injai di blesinz weh ih wahn bring.—Mach. 25:34.