TÍTULU LE LUÁGUBEI TIDÁÜ | KA ASUSEREDUBEI LÁRIGIÑE ÓUNWENI?
Ka asuseredubei dan le lounwen gürigia?
“Saminatina meha ǘrüwañein lan fulasu le ídounti houdin gürigia dan le hounwen: sielun, máfiougatin o lidoun aban fulasu gíriti purgatorio.a Mafiñentina meha weiri lan nubuidun lun nidin sielun, maweirin ligía nuriban lun nidin máfiougatin. Ánheinti purgatorio machourun numuti meha káteitimañein lan. Maliihanñaha nágili meha le tariñagubei Bíbülia; lérügüñein meha hariñagubei gürigia nasubudira.” (Lionel)
“Arufudahóuaali meha nun sielun lan houdin sun gürigia ani machourun numuti meha anhein inarüni lubéi. Afiñetina meha óunweni lan lagumuchagülebei sun katei.” (Fernando)
Álügüdaguañahaadün san hungua ka lan asuseredubei dan le hounwen gürigia? Hasufuriruña funa san waduheñu ha hilaguaañabaña lidan somu fulasu? Warihayabaña san? Ida luba wachoururuni anhein warihayabaña lubéi? Lun wasubudiruni óunabagülei, akutiha waméi le tarufudahabei Bíbülia. Furumiñe, wakutihabei le tariñagubei libügürü óunweni, lárigiñe, ábame wakutihani lóunabagüle le líbiri ǘrüwa álügüdahani.
Ka asuseredubei houn hilaaña?
ÓUNABAGÜLEI LE TÍCHUGUBEI BÍBÜLIA: “Ha [...] wínwangiñabaña subudi hamuti luagu hóunweguba lan, ánhaña ha hilaañabaña ibidiñeti ni kata houn, magañeirun hagía ni kata, lugundun rúaña lidoun bulíeiguaü. Sun le gayaraabei badügüni, adügabéi lau sun biyaraati; lugundun lidan umúahaü,b le lunbei ñéinhinba lan badagara, madügǘnti ni kata ñein maritawagún ni kata, úati subudi ni lichú aau ñein.” (Apurichihati 9:5, 10.)
Umúahaü fulasu le ídounbei hadagara gürigia dan le hóunwegun; yúsuati dimurei le lun layanuhóun luagu fulasu le ídanbei ibidiñe lan ni kata houn hilaaña, madügǘn ligía ni kata ñein. Samina humá luagu le gunfuranda lubéi wügüri úaraguati Hobu luagu umúahaü. Féridi lumutiña sun lisaanigu luma sun lúmati lidan ábanrügü weyu. Lárigiñe, aba labuinchun lúgubu lau guméi gáriburiti. Ábati layumuragun lun Bungiu: “Gúndaatina hamuga lun baramudunina lidan umúahaü [“máfiougati”, según La Sagrada Biblia, to lani Guillermo Jünemann] darí lásügürün bigañi” (Hobu 1:13-19; 2:7; 14:13). Marihin lumuti meha Hobu umúahaü, o máfiougati, kei aban fulasu lauti watu gemeti le ídanba lubéi lasufurira, ariharügü lumuti meha kei aban fulasu le ñeinba lubéi ladarira awalidaguni lídangiñe lasufurirun, emeraagua ligíame.
Waliihani abahüdaguni le tídanbei Bíbülia hawagu gürigia ha meha águyugubaña, ligía amu katei le gayaraabei wadügüni lun wasubudiruni ka lan gádanbaliña hilaaña (ariha huméi rekuáduru “Widü águyuguni le uágubei tabahüdagua Bíbülia”).
Úati ni aban hádangiñe gürigia ha ariñaguti ñüdün lan lidoun somu fulasu le lánina ugundani le gumuti o lidoun aban fulasu le lánina asufuriruni. Lun hamuga ítara liña lan, ma hariñaguñein hamuga? Ma lariñawagúña hamuga tidan Bíbülia halíñoun lan houdin? Gama lumoun, mariñaguntu Lererun Bungiu ni kata luagu lira. Mabahüdaguntiña gürigia hagía ni kata, ladüga ua lan kaba lan habahüdagua. Ibidiñeti meha ni kata houn kamá hamuga harumuguña aban idabagu huliliti. Le linarün katei, anihein dan tayusuruni Bíbülia dimurei “arumuguni” lun tadimurehan luagu óunweni. Kéiburi dan le tabahüdagun luagu tounwen liráü Hairu luma luagu lounwen Lásaru, aba tariñagun “arumuga” lan (Lúkasi 8:52, 53; Huan 11:11, 13).
Anihein lubeiti emenigini houn hilaaña? Gayaraati san hagagudún lídangiñe arumuguni le?
a Yúsuati dimurei purgatorio lun afiñeni le hawagubei gürigia libügürü ñüdün hamá hilaaña lidoun aban fulasu le ídanbei hasufuriragüdǘwa luagu fiu dan lun lachibúniwa hafigoun lubaragiñe higirúniwa lun hebelurun sielun.
b Sügügüdawati dimurei ebüréu Seol luma dimurei güriegu Hades lidoun amu iñeñein kei “umúahaü”. Anuhein Bíbülia to ídantu lásügüragüdüwa bián dimurei le kei “máfiougati”, lau sun madimurehangubei tan luagu aban fulasu le ídanti hasufuriragüdüwa gürigia lidan watu gemeti.