Barüti saragu buiti woun wayarafadun lun Bungiu

1, 2. a) Ka lunbei wadügüni lun buidu lan wamadagua luma aban gürigia? b) Kaba wariha lidan aturiahani le?

SAMINA humá luagu aban humada. Ka adügübei lun buidu lan humadagua? Chóuruti sügǘ humá dan luma ani subudi humuti le winwan láalibei, subudi humuti giñe le hínsiñebei lun lumoun le mínsiñebei lun. Lanwoun lira, arihatün anihein lan igaburi buiti luagu ani busén humá háyeihani igaburi ligía. Lau lásügürün dan, aba línsiñedun hun.

² Lun gamadagua wamá luma aban gürigia ítara, mégeiwati dan luma áfaaguni, ligiaméme giñe asuseredubei woun lidan wamadagua luma Bungiu. Lidan aturiahani le, warihiba ida luba lan wayarafaduntima lun Heowá, le besi wamada. Furumiñe, warihaali ka lan uagu buidu lubéi lun wayarafadun lun.

3. Ka uagu lunti lubéi wararamagun asaminara luagu buiti le lanügübei wayarafadun lun Heowá? Ru humá aban hénpulu.

³ Súdiniti lun wararamagun asaminara luagu sun katei le adügübei lun wayarafadun lun Heowá (Sal. 63:​6-8). Ka uagu? Ru wamá aban hénpulu le lunbei líderaguniwa lun gunfuranda wamani katei le. Subuditi houn gürigia buidu lan lun leigin gürigia buidu, latun duna nófuti luma lun lánhingichuni lúgubu luma lun giñe lemeraagun buidu. Íbini ítara, saragu gürigia metenitiña lun katei le, ábati lagadeirun hátuadi. Gama lumoun, eibu wasaminarun lanügüba lan katei le saragu buiti woun línchahabadiwa lun wadügüni. Ítarameme, lanügüba saragu buiti woun wayarafadun lun Heowá. Lau wararamagun asaminara luagu buiti le lunbei wibihini anhein wadüga, línchahabadiwa lúntima wayarafadun lun (Sal. 119:​27-30).

4. Ka lariñagubei abürühati Sálumu lidan Sálumu 73:28?

⁴ (Aliiha huméi Sálumu 73:28). Hádangiñeti meha lani Lewí türibu le abürühabalin Sálumu 73 ani eremuhati meha ténpulurugu. Másiñati barǘ haali lan meha saragu irumu eseriwida lau úaraguni lun Heowá, ábati líchugun fe layarafadúniwa lan lun Heowá ligía lan katei buídubei lun. Ani busenti meha lun giñe harihini amu buiti le lanügübei gamadagua lan gürigia luma Heowá. Akutiha wamá fiu lídangiñe buiti le lanügübei gamadagua lan gürigia luma Heowá.

EIBU YARAFATIMA WAMÁ LUN HEOWÁ GÚNDAATIMABADIWA

5. a) Ka uagu gúndaatima wabéi dan le wayarafadun lun Heowá? b) Ida liña líderaguniwa Heowá ani góunigi lawa lichú aau le ñǘbuinbei lúmagiñe? (Ariñawagúni 2:​6-16).

⁵ Eibu wayarafadun lun Heowá gúndaatimabadiwa (Sal. 65:4). Ka uagu wariñagei le? Lugundun dan le wasigiruni lubuidun adundehani le líchugubei woun tídangiñe Bíbülia to Lererun, buiti lidin woun. Góunigi lumutiwa lichú lau luéi wuribani le yaabei ubouagu ani íderagua lumutiwa lun madügün wamá figóu le wéiriti (aliiha huméi Ariñawagúni 2:​6-16). Ligíati tariñagubei Bíbülia: “Fuleseiwatiña gürigia ha adarirubaña lichú aau, ha ibihubaña lualin ichügü” (Ari. 3:13).

6. Ka uagu leferidirei abürühati Sálumu lugundan?

⁶ Úati mini lan le mírudagunbaña lan lumadagu Heowá. Féridi lumuti meha abürühati Sálumu 73 lugundan dan le lararamagunbei asaminara luagu katei le genegebei lun maricha lan. Wuribati lasandiragun lungua ladüga lasaminarun buidu lan lidin houn gürigia ha meberesenbaña lau Bungiu ni lau lilurudun, ani gimugati houn. Gama lumoun, charati saminaü le, lugundun aba lasaminarun masufurirun hamá gürigia ha wuribabaña ni ha pántabaña lugundun ariha lani súnwandan lan risi hamá ani buidu ligía hátuadi (Sal. 73:​3-7, 12). Hanarimeti igañi luagu darí lun lagumeserun álügüdagua lungua anhein buidu lubéi ladüga lau leseriwidun lun Heowá. Híruti meha lasandiragun lungua darí lun lariñagun: “Málati haruma tan nanigi, ani haruma ligía núhabu lídangiñe sun wuribani!” (Sal. 73:13).

7. Ida luba gayara lan wibihini ugundani dan le wásügürün lídangiñe íruni? (Ariha huméi dibuhu).

⁷ Meredeti abürühati Sálumu chagu larüna; adügati somu katei lun gayaraabei lan labuguni íruni luáriua. Ka ladügübei? Ariñagati: “Láuhali nebelurun lúbiñoun Bungiu, ligíaali gunfurandanani” le anügübei fulasu, ábati líderaguni Heowá asansirei ligaburi lisaminan (Sal. 73:​17-19). Kei Heowá lubéi besibei wamada, subudi lumuti dan le hiru wamá. Ligíati mosu lubéi wamuriahan luma lun ladundehaniwa lúmati lun wánharun lun ídemuei le líchugubei woun tídangiñe Bíbülia luma lídangiñe damuriguaü. Ítara luba wárügüdün erei lun wasigirun wabaruaguóun íbini hiru wamá. Íbini dan le buin wamá lau idiheri, líchuguba Heowá gurasu woun luma darangilaü (Sal. 94:19).a

RUTI WAYARAFADUN LUN BUNGIU ABAN IBAGARI BUITI WOUN LUMA EMENIGINI

8. Ida liña buidu lan wabagari dan le wayarafadun lun Heowá?

⁸ Barüti wayarafadun lun Bungiu bián katei buiti ani súdiniti lidoun wabagari. Furumiñe, gayaraati buidu lan wabagari anhein buidu lubéi wamadagua luma Heowá. Libiaman, ruti aban emenigini woun lubá ámuñegü ani lagunfulirubei (Her. 29:11). Akutiha waméi bián katei le aban lárigiñe aban.

9. Ka uéigiñe gasuuni lubéi wabagari dan le wayarafadun lun Heowá?

⁹ Dan le wayarafadun lun Heowá, gasuuniti wabagari. Ariñagatiña saragu gürigia uguñe weyu luagu ua lan Bungiu. Ligíati masuuni lubéi habagari. Ani afiñetiña lachülürüba lan dan lun hagumuchagun gürigia ubouagugiñe. Gama lumoun, seremei le wafurendeirubei tídangiñe Lererun Bungiu, chouru wamuti “anihein lan ani líchuguba lan hafayeiruáha ha áluahabalin” (Ebü. 11:6). Adüga lumutiwa Wáguchi Bungiu Heowá lun wáhuduragun lun. Ligíati, kei le weseriwiduña lan lun, gúndaatiwa lidan wabagari sunsuinagubei (2 Lur. 10:​12, 13).

10. Según Sálumu 37:​29, ka hagurabahabei ha afiñebaña luagu Heowá?

¹⁰ Saragu gürigia memenigintiña le inarüniti. Le habagaribei, hawadigimaridun, hagüriahaniña hasaanigu luma lun hareidahan seinsu lubá dan le mawadigimaridunhaña. Úati Bungiu lidan habagari. Ánheinti lubúeingu Heowá, hemenigitiña luagu (Sal. 25:​3-5; 1 Tim. 6:17). Afiñetiwa luagu Wabungiute ani Wamada, ani subudi wamuti lagunfulirubei lan sun le füramase lubéi. Lagurabahañadiwa saragu katei buiti lubá ámuñegü, aban lídangiñe, wáhuduragun lun Heowá lidan Paraísu lun súnwandan (aliiha huméi Sálumu 37:29).

11. Ka buiti wasagarubei dan le wayarafadun lun Bungiu ani ida liña wasandiragun woungua dan le wadügüni?

¹¹ Barüti wayarafadun lun Heowá saragu buiti woun lidan amu burí igaburi. Kei hénpulu, füramaseti Heowá woun feruduna lubéi lan wafigoun ánhawa asaküriha (Isa. 1:18). Mini lan lira, meredetiwa lan asandiragua woungua wuriba ladüga charati le meha wadügübei (Sal. 32:​1-5). Lanwoun lira, gúndaagüda wamutu lanigi Heowá ani ruti lira saragu ugundani woun (Ari. 23:15). Chóuruti barǘ lan gamadagua wamá luma Heowá saragu amu abiniruni woun. Ligíati, ka gayaraabei wadügüni lúntima wayarafadun lun?

KABA WADÜGA LÚNTIMA WAYARAFADUN LUN BUNGIU?

12. Ka lunbei hadügüni lúntima hayarafadun lun Bungiu?

¹² Anhein aban hubéi gefenti luagu Heowá badiseihali, mini lan lira furendeihadün lan saragu luagu Heowá luma luagu Hesukrístu ani asakürihaadün lan lídangiñe hifigoun, arufuda humaali afiñe humá luagu Bungiu ani áfaaguaadün lun gaganbadi humá lun lugumadin. Ligía gayara lubéi hariñagun yarafaadün lan lun Heowá. Gama lumoun, lúntima hayarafadun lun, mosu hasigirun adügei sun le (Kol. 2:6).

13. Ka ǘrüwa katei gayaraabei líderaguniwa lúntima wayarafadun lun Heowá?

¹³ Kaba íderaguawa lúntima wayarafadun lun Heowá? 1) Lunti wasigirun aliihoun luma aturiahoun Bíbülia. Moun lumuti gufuruma wamá lau wafurendeirun katei ménrengunti luagu Bungiu. Mosu giñe gunfuranda wamani ka lan labusenrubei woun luma lun wawinwandun según adundehani le wadarirubei tidan Lererun (Efe. 5:​15-17). 2) Lunti wederebudagüdüni wafiñen lau wararamagun asaminara luagu sun katei le arufudubalin ínsiñeni le lasandirubei Heowá wawagu. 3) Lunti iyereegu lan katei le iyereegubei lun Heowá woun luma lun mamadagua wamá hama gürigia ha adügübaña katei wuribati (Sal. 1:1; 101:3).

14. Ka gayaraabei wadügüni sagü weyu lun wagundaaragüdüni Heowá? (1 Korintuna 10:31; ariha humóun giñe iyawaü).

¹⁴ (Aliiha huméi 1 Korintuna 10:31). Súdiniti lun wáfaagun lun wadügüni katei le aubei wasubudira lagundaaragüdübei lan Heowá. Úati buídurügü lan wapurichihan o woudin adamuridagua. Sun le wadügübei sagü weyu lunti lagundaaragüdüni Heowá. Kei hénpulu, subudi wamuti hínsiñe lan lun Heowá lun haruma wamá lidan sun katei luma lun gíchigadi wamá lídangiñe le wámabei (2 Ko. 8:21; 9:7). Agurabati giñe lun warufuduni weiri lan lebegi ibagari le líchugubei woun. Ligíati, yarafatimatiwa lun dan le maweirin lan weigin ani maweirin ligía wátadi ani góunigi waméi wátuadi. Sun áfaaguni le wadügübei lun wagundaaragüdüni Heowá íbini lidan katei le ñǘbüriti, ídehati lun hínsiñetima wamá lun (Luk. 16:10).

15. Ida liña lagurabun Heowá wóuseruniña amu?

¹⁵ Óusera lumutiña Heowá dandu ha richabaña kei ha marichabaña lau areini (Mat. 5:45). Agurabati lun giñe wadügüni ligiaméme houn amu. Kei hénpulu, busenti Heowá lun “madimurehan hamá [lubúeingu] wuriba luagu ni aban, lun dilí lan hóuserun” ani “lun ǘnabugu hamá lidan hóuseruniña sun gürigia” (Titu 3:2). Ligía manaagun wabéi woungua uéirigu hawéi ha mámabaña Gefentiña (2 Tim. 2:​23-25). Ánhawa óuseraña amu lau areini súnwandan, wayarafadatimaba lun Heowá.

GAYARAATI GIÑE WAYARAFADUN LUN BUNGIU DAN LE DÉBILI WAMÁ

16. Ida liña san lasandiragun abürühati Sálumu 73 lungua lidan somu dan lidan libagari?

¹⁶ Ánheinti anihein lubéi dan sandigua wamá woungua dise luéi Heowá, samina wamá luagu le asuseredubei lun le abürühabalin Sálumu 73. Ariñagati lau íruni: “Ánheinti au murusunrügaali yebe lun néiguadun; ítagaraü yebe liriraagun nugudi” (Sal. 73:2). Ariñagati giñe: “Buin niña buga lau íruni sandí au igarigu tidan nanigi”, “úati yebe gunfuranda nan; ítara niña buga bigibugiñe kei aban animaalugu!” (Sal. 73:​21, 22). Saminati san le abürühabalin Sálumu 73 ladüga lan lichara luma lifigoun máraninaali lan ani madüna lani línsiñehabu Heowá?

17. a) Ka ladügübei abürühati sálumu dántima le wuriba lan lasandiragun lungua? b) Ka wafurendeirubei lídangiñe le asuseredubei lun? (Ariha humóun giñe iyawaü).

¹⁷ Anhein samina lubéi abürühati Sálumu luagu chagá laali lan Heowá, madurati saminaü ligía luagu. Dan le wuribatima lan lasandiragun lungua aba líchugun fe mosu lan layarafadun lun Heowá. Ida liña wasubudiruni? Ladüga ariñaga lan: “Lau sun lira, búmañadina súnwandan. Ragǘ baali núhabu le nóunwenren, alidiha báadina lau barufudahan nun, lídanme lagumuhóun, beresibirubadina lau burí ubuiduni” (Sal. 73:​23, 24). Dan le débili wamá o maguraasun wamá, lunti giñe wárügüdün luagu Heowá, le Waramudaguagüle, lun gayaraabei lan wárügüdagun woungua (Sal. 73:26; 94:18). Ánheinti adireira wagudi luéi üma le buídubei, ka lunbei wadügüni? Gayaraati wagiribudun lúhaburugun Heowá lau ichouruni lugundun ariñagati abürühati sálumu luagu: “Ladüga, buguya Nabureme, buítibu ani gíchigadi buguya ferudun” (Sal. 86:5). Dántima le wuriba lan wasandiragun woungua ligíatima lunti lan wayarafadun lun Wabungiute (Sal. 103:​13, 14).

YARAFA WAMÁ LUN BUNGIU LUN SÚNWANDAN

18. Ka uagu mébeha lubéi le gayaraabei wafurendeiruni luagu Heowá?

¹⁸ Súnwandan wafurendeiruba lan katei iseri luagu Heowá le lunbei líderaguniwa ayarafada lun lun súnwandan. Ariñagatu Bíbülia siñá lan gunfuranda wamani lisaminan Heowá, lichú lau ni lémeri (Rom. 11:33).

19. Ka ichouruni líchugubei Sálumu burí le woun?

¹⁹ Ariñagati Sálumu 79:13: “Wagíameti ha bánigu, wagía ha bilügüniña mudún, seremei wabadibu súnwandan; weremuhaba bun gumugua dan”. Anhaün asigira ayarafada lun Heowá, gayaraati hachoururuni labinirubadün lan lun súnwandan. Gayaraabei hariñaguni dimurei le: “Bungiu, ligía nalagantebei le magumuchaditi ligía ágüdahabarun nanigi” (Sal. 73:26).