“Anúadaha humá uguñe kaba lan un heseriwida”

1. Lun gunda wamá le tímatimaati, ka lunbei wadügüni, ani ka uagu? (Isaíasi 48:​17, 18).

WÉIRITI wínsiñe lun Wáguchi Bungiu le siélubei ani busenti lun gunda lan wabagari dandu guentó keime ámuñegü (Apur. 3:​12, 13). Adüga lumutiwa Heowá lun ñein lan saragu iyaraani wawagu le wéirigüda lumutu anigi. Lau sun lira madügün lumutiwa lau iyaraani lun wagumadiragun woungua ni lun wanúadiruni ka lan buídubei lumoun ka lan wuribabei (Apur. 8:9; Her. 10:​23, TNM). Subudi lumuti Heowá lun lan gunda wamá lunti lan gaganbadi wamá lun ani seriwi wagíame lun (aliiha huméi Isaíasi 48:​17, 18).

2. Ka labusenrunbei Mafia lun wafiñerun, ani ida liña lóunabun Heowá lun lanarime iyeeni le?

² Busenti Mafia lun wafiñerun gayara lan gunda lan wabagari luma wagumadiragun woungua sin Heowá (Agu. 3:​4, 5). Lun gayara lan lounabúniwa lanarime iyeeni le, aba lígirun Heowá lun harúeiragun gürigia houngua luagu fiu dan. Ariha wamaali lau wagu guánarügü siñagua hamá gürigia houngua lun harúeiragun houngua. Luagu le aban oubaü, daritiwa saragu hénpulu hawagu gürigia ha gúndaabaña lau heseriwidun lun Heowá dandu wügüriña kei würiña. Létima gúndaatimabei hádangiñe súngubei, Hesukrístu. Furumiñe, wariha ka lan lébunabei leseriwidun Hesusu lun Heowá. Lárigiñe, ábame wakutihani ka lan uagu yu lubéi lun láhudurawaguniwa lun Heowá Wáguchi Bungiu le siélubei. Lagumuhóun, ábame warihini ka lan lébubei wanúadirun wáhuduragun lun Heowá.

KA UAGU LESERIWIDA HESUSU LUN HEOWÁ

3. Ka larufudubei Mafia lun Hesusu, ani ka ladügübei Hesusu?

³ Dan le meha ya lubéi Hesusu Ubouagu, mosu meha lanúadirun kaba lan un leseriwida. Murusun dan lárigiñe labadiseirun Hesusu aba larufuduni Mafia sun arúeihani le ubouagubei lun, ariñageina lun líchugubei lan sun arúeihani le ubouagubei lun anhein áhuduragua lun. Aba lariñagun Hesusu lun: “Disebá nuéi, Mafia! Ladüga tariñahare Lererun Bungiu: ‘Lúnrügüba Babureme Bungiu báhuduragua, lúnrügüba giñe beseriwida’” (Mat. 4:​8-10). Ka uagu maha lubéi Hesusu láhuduragun lun Mafia? Ariha wamá ka lan uagu.

4, 5. Ka katei adügübei lun leseriwidun Hesusu lun Heowá?

⁴ Létima lébubei leseriwidunbei Hesusu lun Heowá, le Lúguchi, ladüga hínsiñe lan lun tídangiñe sun lanigi magurabahanga ni kata lúmagiñe (Huan 14:31). Lanwoun lira, leseriwidunbei Hesusu lun Heowá ladüga subudi lumuti ligía lan buídubei (Huan 8:​28, 29; Aruf. 4:11). Subudi lumuti Hesusu Heowá lan íchugubalin wabagari woun, ani gíchigaditi giñe ani gayaraati wafiñerun luagu (Sal. 33:4; 36:9; Sant. 1:17). Súnwandan lariñaguni Heowá inarüni lun Hesusu, ani sun katei le lúmabei Hesusu, Heowá le Lúguchi íchugubalin lun (Huan 1:14). Ánheinti Satanási óunweni lanügübei houn gürigia ani yeeti ani buin liña lau gimugaü luma igaaduaü (Huan 8:44). Subudi lumuti giñe Hesusu Heowá buidu buidu ani subudi lumuti giñe ligaburi Satanási, ligíati masaminarungubeiti Hesusu lun láyeihani Satanási ni lun lebedaagun lun Heowá (Fili. 2:​5-8).

⁵ Ábanya katei le adügübei lun leseriwidun Hesusu lun Heowá ladüga gabaroun lani sun katei le gayaraabei libihin anhein úaragua lun (Ebü. 12:2). Subudi lumuti meha Hesusu anhein lan úaragua lun Heowá, ladügüba lan lun inebewa lan liri Lúguchi ani ladügüba lan lun lagumuchúniwa lau sun asufuriruni le lanügübei Mafia houn gürigia.

KA UAGU GADÜNA LUBÉI HEOWÁ LUN WÁHUDURAGUN LUN

6, 7. Ka uagu añahein lubéi saragu gürigia meseriwiduntiña lun Heowá? Ani, ka uagu gadüna lubéi Heowá lun wáhuduragun lun?

⁶ Uguñe weyu, meseriwiduntiña saragu gürigia lun Heowá ladüga ibidiñe lan houn. Mafurendeirungiña luagu lubuidun ligaburi luma sun le adüga láalibei hawagu. Ítarahaña meha gürigia ha únbaña lapurichiha Pábulu Atenasi (Adü. 17:​19, 20, 30, 34).

⁷ Ayanuhati Pábulu houn luagu Bungiu inarüniti, “ligía guánarügü [lan] íchugubei ibagari luma garabali, luma sun katei woun, sun wagía”. Ariñagati houn: “Ladüga lídangiñeti Bungiu awanhein lubéi, gabagari wagía, éibuga wagía ligibuagu ubóu le”. Afuranguagüda lumuti giñe houn “lídangiñe [lan] ábanrügü wügüri ladügaña sun néchanigu”. Ligíati, kei Bungiu lan Adügübaliwa, ligíarügüñein gadüna lun wáhuduragun lun (Adü. 17:​25, 26, 28).

8. Ka katei maweiyasunbei Heowá adügei?

⁸ Kei Heowá lan Adügübaliwa ani ligía Urúeibei ligibuagun sun ubóu, lun hamuga busén lan, gayaraati hamuga lafosuruniña sun gürigia lun heseriwidun lun. Gama lumoun, maweiyasunti Heowá adügei katei le! Le labusenrunbei lun hiibe-agei lan gürigia lun gamadagua hamá luma lun súnwandan (1 Tim. 2:​3, 4). Ligíati, ígiraali saragu katei lun wachoururuni wagía woungua luagu anihein lan ani hínsiñe wamá lun. Ligía larufudahanbei woun lun warufudahani houn amu gürigia katei buiti le lunbei ladügüni hawagu lúmati ida luba lan hibihini (Mat. 10:​11-13; 28:​19, 20). Lanwoun lira, arufudahati woun lidan damuriguaü ani adügati aransehani lun hounigirúniwa wéiyaaña lidan afiñeni lau ínsiñeni (Adü. 20:28).

9. Ida liña larufuduni Heowá línsiñehabu?

⁹ Arufuda lumuti Heowá óunwenbu ínsiñeni le lasandirubei lau ligaburi lóuseruniña gürigia ha mabusenrunbaña hafiñerun luagu anihein lan. Lidan sun dan le sügühalibei anúadiraaña saragu gürigia hawinwandun kei le aubei habusenra. Gama lumoun, kei le buidu lubéi ligaburi Heowá, ru laali sun le hemegeirubei gürigia houn lun hawinwandun luma lun gunda hamá (Mat. 5:​44, 45; Adü. 14:​16, 17). Seremei lun Heowá gayara lubéi gaduheñu hamá, gasaanigu hamá, gamadagu hamá luma lun harihini buiti le lanügübei hawadigimari (Sal. 127:3; Apur. 2:24). Chóuruti hínsiñe hamá sun gürigia lun Wáguchi Bungiu (Afu. 34:6). Guentó ariha wamá fiu lébuna ka lan uagu wanúadira weseriwidun lun Heowá luma ida luba lan labiniruniwa.

KA UAGU BUSÉN WABÉI WESERIWIDUN LUN HEOWÁ

10. a) Kátima lébunabei weseriwidunbei lun Heowá? (Matéu 22:37). b) Ida liña líderagunün luguraasun Heowá? (Sálumu 103:​13, 14).

¹⁰ Ítara kei Hesusu, lébubei weseriwidun lun Bungiu ladüga hínsiñe lan woun tídangiñe sun wanigi (aliiha huméi Matéu 22:37). Eibu wasubudiruni Heowá, eibu lachawahaniwa lubuidun ligaburi. Kei hénpulu, gaguraasunti wabá. Dan le meha maganbadi habéi ísüraelina lun Heowá aba layumuragun houn, lariñaga: “Ígira huméi luriban üma” (Her. 18:11). Subudi lumuti Heowá múa lan wabuñabei (aliiha huméi Sálumu 103:​13, 14). Dan le hararamagun asaminara luagu luguraasun Heowá luma amu burí lubuidun ligaburi, ma ínchaha lumutün katei le lun heseriwidun lun lun súnwandan?

11. Kátima lébunabei busén wamá weseriwidun lun Wáguchi Bungiu le siélubei?

¹¹ Ábaya katei le ínchahabaliwa lun weseriwidun lun Heowá ladüga subudi wamani ligía lan buídutimabei lun wadügüni (Mat. 4:10). Lanwoun lira, subudi wamuti barǘ lan úaragua wamá lun Bungiu saragu buiti woun: ídehatiwa lun lichugúniwa uéiriguni lun liri Heowá, luma lun warufuduni ye lan Mafia ani gúndaagüda wamutu lanigi Wáguchi Bungiu. Ánhawati anúadira weseriwidun lun Heowá guentó, hemenigibadiwa weseriwidun lun lun súnwandan (Huan 17:3).

12, 13. Ka wafurendeirubei túmagiñe Jane tabu Pam?

¹² Lúmagiñe wañüraü gayaraati wasandirun aban ínsiñeni móubati luagu Heowá, aban ínsiñeni le magumuchadibei lau lásügürün dan. Ariha waméi hakesin bián gamulenuguátiña ha gíribaña Jane tuma Pam.a Dan meha le hagumeserunbei aturiahoun Bíbülia unsu meha irumu tau aban ani to aban diisi. Íbini maturiahan hamanu hagübürigu Bíbülia rútiña meha üma houn lun gamadagua hamá hama gefentiña luagu Heowá ñǘdünrügaña ligía biángubei hagía hama hagübürigu sagü dimaasu ligilisirugu. Ariñagatu Jane: “Íderagua lumutina le harufudahabei gefentiña luagu Heowá tídangiñe Bíbülia lun nawanduni hadügüdarun nupaanágu nuagu, lun méiguadun nan lidoun layusurún düroga ni lidoun magíaguni”.

¹³ Dan le aweinamudeina hamá, aba hagumeserun biángubei hagía apurichiha. Fiu irumu lárigiñe aba prekursora hamá ani añaha meha óunigiraña hagübürigu, ani dan meha ligía derebuguhaña meha hagübürigu. Lau tasaminarun Jane luagu le winwan táalibei, aba tariñagun: “Furendeihadina númagiñegua machaga lániña Heowá lumadagu, góunigirügü lumutiña, kei lariñawagún lidan 2 Timotéu 2:19: ‘Subudi lumutiña Wabureme Bungiu lánigu’”. Góunigi lumutiña Heowá ha asandirubaña ínsiñeni luagu ani seriwi hagía lun.

14. Ida luba wayanuhan luéigiñe liri Heowá? (Ariha humóun giñe iyawaü).

¹⁴ Busentiwa wídehan lun larumadahóun liri Heowá sunsuinagubei. Samina humá anihein lan aban humada buiti ligaburi, mánginti huéi ani gudemehabuti. Aban weyu, aba haganbun labahüdawagún luagu furunde lan humada ani ye lan. Kaba hamuga san hadüga? Ma hariñaguña hamuga luagu mítaran lan le abahüdawagúbei luagu ladüga subudi humani buidu buidu? Ítarameme, dan le waganbun hariñagun gürigia iyeeni luagu Heowá, lau lóufudagun aba wariñagun mítaran lan, kei subudi wabalin aba wariñaguni inarüni luagu lau ganigi (Sal. 34:1; Isa. 43:10). Arufuda wamuti lau le wariñagubei luma lau le wadügübei busén wamá weseriwidun lun Heowá tídangiñe sun wanigi.

15. Ka abiniruni libihinbei apostolu Pábulu lárigiñe lasansiruni le labusenrunbei libihin lidan libagari? (Filipuna 3:​7, 8).

¹⁵ Aranseñu waña lau sun wagundan lun wasansiruni le wabusenrubei wibihin lidan wabagari lun wagundaaragüdüni Heowá lúmati lun waganwoundagüdüni weseriwidun lun. Aban hénpulu lánina lira, apostolu Pábulu, lugundun aba lamahadun lun lanügǘn kei aban wügüri wéiriguti hadan lílana lageira lun gayara lan lasigiruni lémeri Kristu luma lun leseriwidun lun Heowá (Gal. 1:14). Seremei ladügüni sánsiguaü ligía gúndaati meha libagari ani guentó larúeihaña luma Kristu sielu. Masakürihanti meha Pábulu lau lanúadirun leseriwidun lun Heowá, ani wagía masakürihanbadiwa giñe (aliiha huméi Filipuna 3:​7, 8).

16. Ka larufudahabei tani Julia hénpulu woun? (Ariha humóun giñe iyawaü).

¹⁶ Ánhawa etenira lun weseriwidun lun Heowá gayaraabei labuinchun wabagari lau abiniruni dandu guentó kei ámuñegü. Ariha waméi tani aban íbiri gíritu Julia hénpulu. Dan meha le ñǘgiru eremuhatu meha hadan ha eremuhabaña ligilisirugu. Keiti le geremuhadi tubéi Julia aba letenirun aban gürigia le eremuhabei opera lun teremuhadi ani aba lariñagun tun larufudahaba lan opera tun. Málüti lárigiñe aba tasubudirúniwa kei geremuheitu ani aba teremuhan burí lidan fulasu le ñein lubéi heremuhan geremuheitiña. Dan le anuhán lan tidan aban leskuela to lánina uremu, aba layanuhan aban tupaaná tun luagu Bungiu ani aba lafuranguagüdüni tun Heowá lan líribei Bungiu. Murusun dan lárigiñe, aba tagumeserun Julia aturiahoun Bíbülia bián wéiyaasu luagu dimaasu. Lau lásügürün dan aba tígiruni eremuhani ani aba teseriwidun lun Heowá. Hénrenguti meha katei le tun. Ariñagatu: “Ariñagatiña meha saragu gürigia nun nabuleiraguñein lan iyaraani le nuágubei, le meha nabusenrubei nayusuruni nibagari lun neseriwidun lun Heowá”. Ka tasaminarubei Julia luagu le tanúadirubei lóugiñe darandi irumu guentó? Ariñagatu: “Gúndaatina ani chouru numuti lagunfulirubei lan Heowá sun le tayumahabei nanigi ámuñegü” (Sal. 145:16).

ÍTARAMEME WAMÁ ESERIWIDA LUN HEOWÁ

17. Ka mini lubéi houn lubúeingu Bungiu lawinwandúniwa lidan lagumuhóun dan? Ani, ka mini lubéi houn ha mámabaña lubúeingu Bungiu?

¹⁷ Yarafamémediwa lun lagumuchagüle ubóu le. Lariñaga apostolu Pábulu: “‘Málühali’ anhein ñübuin ‘le lunbei liabin; madarasarunbei saragu dan’” (Ebü. 10:37). Ka mini lubéi le? Luagu aban oubaü, lagumuchuña dan lun hanúadirun gürigia lun heseriwidun lun Heowá (1 Ko. 7:29). Ánheinti weseriwiduña lubéi lun, subudi wamuti mosu lan wagagibudagun luma fiu lénrengunga luágurügü fiu dan.

18. Ka labusenrunbei Heowá luma Hesusu lun wadügüni?

¹⁸ Ínchaha lumutiña Hesusu gürigia lun lani hamá disipulugu luma lun hafalaruni (Mat. 16:24). Ligíati, anhein barühadiwa lubéi saragu irumu eseriwida lun Heowá, mábürühala warüna. Inarüni aniheinbei lan burí dan mosu lan wáfaagun lun wasigirun eseriwida lun Heowá, ani mama aban katei ménrengunti lira. Gama lumoun, ma inarüni gayara lan wagundaarun saragu ani resibi wagíame saragu abiniruni lau weseriwidun lun Heowá? (Sal. 35:27).

19. Ka wafurendeirubei lídangiñe lani Gene hénpulu?

¹⁹ Añahein asaminarutiña ánhaña lan eseriwida lun Heowá magundanbei lan habagari. Anhein nibureingidibu lubéi, genegeti san bun beferidiruba lan somu katei ánhabu eseriwida lun? Ariñagati aban nibureinti gíriti Gene: “Saminatina yebe gibe lan katei le siñabei wadügüni wagía le gefentiña luagu Heowá. Genegeti meha nun buidu lan lidin houn saragu nibureintiña ha niseisin, ladüga ñǘdüntiña lidan burí fedu, gadariburitiña o áhureratiña huraraü mabuidunti lidan bidéu le lánina huraraü, anhein méhati au mosu meha nidin adamuridagua luma apurichiha”. Ka asuseredubei lun Gene lau lasaminarun ítara? Ariñagati: “Aba nagumeserun adüga katei wuribati le meha hadügübei amu nibureintiña. Le linarün aban katei, madügünti le nadügübei lun gunda nan. Ligía nagumeserúnbei aritaguei inarüni le tídanbei Bíbülia le meha nafurendeirubei ani ráramagua au asaminara luagu buiti le lanügübei nafalaruni adundehani burí le. Ligíati, aba lubéi neseriwidun lun Heowá tídangiñe sun nanigi. Lúmagiñe dan ligía lun lubaruaguóun sanditina óunaba lani Heowá sun nafurieidun”.

20. Ka aranseñu wabéi lun wadügün?

²⁰ Ariñagati aban abürühati sálumu lidan leremun: “Fuleseiwatiña gürigia ha banúadirubaña aba banügüniña aganóua bubadu, tidan burí rumu to búbiñeboun” (Sal. 65:4). Ítara kei Hosué ariñaga wamá lau ichouruni: “Ánheinti au hau tílana nuban lunba Wabureme weseriwida” (Hos. 24:15).