Le mini lubéi liri Heowá lun Hesusu

1, 2. a) Ka ladügübei Hesusu guñoun lubaragiñebei lounwen? b) Kaba álügüdahani wóunaba lidan aturiahani le?

ABAN weyu luagu-gádürü guñoun. Sun liña lagumeserun weyu 14 lidan nisán, irumu 33 lidan furumiñeti sígulu. Chülümémeeli meha oura lun laluguruniwa Hesusu, haguseragüdüni, hasiadiruni, hasufuriragüdüni luma lun háfaruni hilagubei. Óundaraguti guñoun ligía hama lani apostolugu lidan aban rumu lidan libiaman fuló. Lárigiñebei lagumuchuni Hesusu adineruni espechaliti le, aba layanuhan hamá lani apostolugu luagu lagumuhóun wéiyaasu lau líchugun gurasu luma dǘgüdaguaü houn. Lubaragiñebei háfuridun sun hagía ñéingiñe, aba ladügün Hesusu aban furíei hawagu lani disipulugu le áfuridubei tídangiñe sun lanigi. Bürǘ lumuti apostolu Huan furíei ligía, ani darí wamuti lidan kapítulu 17.

² Wafurendeiruba lidan aturiahani le luagu furíei le ladügübei Hesusu dan ligía, ka lan katei adiheridagüdübalin weyu ligía, lúmati luagu le súdinibei lun dan meha le ya lubéi Ubouagu.

“SUBUDIGÜDA NAALI BIRI HOUN”

3. Ka lariñagubei Hesusu luagu liri Heowá, ani ka labusenrunbei lariñagun? (Huan 17:​6, 26, TNM).

³ Lidan furíei le ladügübei Hesusu lun Heowá, ariñagati lun: “Subudigüda naali biri houn”. Furanguti súdini lan meha katei le lun Hesusu, lugundun bianñei wéiyaasu lariñaguni dimurei le (aliiha huméi Huan 17:​6, 26,a). Mini lan san le larufudahaña lan meha houn lani disipulugu Heowá lan líribei Bungiu? Uá. Lugundun subudi hamuti meha lani Hesusu disipulugu Heowá lan líribei Bungiu, ladüga huríu meha hagía ani fuati liri Bungiu saragu wéiyaasu lidan Abürüdǘni Ebüréu. Lau lariñagun Hesusu subudigüda laali lan liri Bungiu houn, le meha labusenrunbei lariñagun, arufudaha laali lan ka lan Heowabei, ka lan labusenrunbei ladügün, ka lan ligaburibei luma le adüga laalibei. Úati ni aban asubudiruti Heowá buidu buidu kei Hesusu, ligíati úati ni aban arufudahati saragu katei luagu Heowá, luéidügü Hesusu.

4, 5. a) Ida luba espechali lan liri aban gürigia woun? Afuranguagüda huméi lau aban sügǘ. b) Ida liña espechali lan le mini lubéi liri Heowá houn apostolugu?

⁴ Samina humá luagu anihein lan hamuga aban wéiyaali lidan afiñeni lidan damuriguaü le ñein hubéi ani surusia ligía. Másiñati lüha lan luéigiñe hasubudiruni. Luagu aban weyu, ábati hasandirun sódini ani aba hanügüniwa háspitalirugu lau lóufudagun, ani ñein lawadigimarida íbiri ligía tidan háspitali tuguya. Ábati letenirun hun ani aba lesefuruni hibagari. Ma hínsiñetimahali íbiri le hun saragu lárigiñe le adüga laalibei huagu, adián? Ságüti haganbuni liri aba hasaminarun luagu le ladügübei lun lesefuruni hibagari. Mámarügaali aban wéiyaali lidan afiñeni íbiri le hun, ábanhali giñe gürigia le esefurubalin hibagari. Lidan amu dimurei gebegitimahali íbiri le hun.

⁵ Ítarameme íbini subudi hamani lani Hesusu disipulugu liri Heowá, íderagua lumutiña Hesusu lun hasubudiruni ka lan anügübalin iri le. Ítara liñati espechali lubéi iri le houn. Ida? Seremei lani Hesusu ministeriu. Arufuda lumuti ligaburi Lúguchi buidu buidu lau sun le ladügübei luma le lariñagubei. Lau harihini apostolugu larufudahan Hesusu luma ligaburi lóuseruniña gürigia, aba hasubudiruni Heowá buidu buidu (Huan 14:9; 17:3).

“LUAGU BIRI LE BICHUGUBEI NUN”

6. Ka labusenrunbei Hesusu lariñagun dan le lariñagubei ru laali lan Heowá liri lun? (Huan 17:​11, 12).

⁶ Dan le lafurieidunbei Hesusu hawagu lani disipulugu lun Heowá aba lariñagun: “Góunigibaña ha bíchugubaña nun luagu biri le bíchugubei nun” (aliiha huméi Huan 17:​11, 12,b) Mini lan san lira lúmagiñe lan dan ligía lun lubaruaguóun gayaraahali lan lagúahoun lun Hesusu Heowá? Úa, mítaranti. Ariha humá san, dan le lafurieidunbei Hesusu lun Heowá aba lariñagun “ladüga biri”. Ligíati masansirun lumuti Hesusu liri, maguahounti lun Hesusu “Heowá”. Kati labusenrunbei Hesusu lariñagun dan le lariñawagúnbei ru laali lan Heowá liri lun? Luagu aban aubaü, óunaha lumuti Heowá Hesusu lun layanuhan luagu, ñǘbuinti Hesusu lidan liri Lúguchi ani adügati milaguru lidan liri Lúguchi (Huan 5:43; 10:25). Luagu le ábanya aubaü, “Heowá Asalbarunibei” mini lubéi liri Hesusu. Kei le aubei warihei, lidan le mini lubéi liri Hesusu anihein liri Heowá.

7. Afuranguagüda huméi lau aban hénpulu ka lan uagu gayara lubéi layanuhan Hesusu lidan liri Heowá.

⁷ Samina wamá luagu hénpulu le, lun gunfuranda wamani ka lan uagu gayara lubéi layanuhan Hesusu lidan liri Heowá. Gayaraati lóunahan aban urúei aban gürigia lun layanuhan houn amu lidan liri urúei le óunahabalin. Ani gabafuti le lariñagubei le óunahoubei kei gabafu lan le óunahabalin. Ítarameme ruti Heowá ubafu lun Hesusu lun layanuhan Hesusu lidan liri Heowá (Mat. 21:9; Luk. 13:35).

8. Lubaragiñe liabin Hesusu Ubouagu, ka uagu lariñaga Heowá luagu Hesusu lidan niri ladügei le ladügübei? (Áfuriduni 23:​20, 21).

⁸ Ariñagatu Bíbülia Hesusu lan Dimureibei ladüga yusu lumuti Heowá lun líchugun ariñahani luma adundehani houn ánheligu luma houn gürigia (Huan 1:​1-3). Másiñati Hesusu lan ánheli le lóunahabei Heowá lun ladundehaniña ísüraelina ani góunigi laaña sun añaha lan éibuga lidan fulasu mageirawati. Kati uagu mosu lubéi gaganbadiwa lan lun ánheli ligía? Ariñaga lumuti Heowá ka lan uagu, lau lariñagun: “Ladüga lidan niri ladügei le ladügübei” (aliiha huméi Áfuriduni 23:​20, 21).c Furanguti warihini Heowá lan óunahabalin Hesusu ayanuha lidan liri; lun larufuduni buidu lan sun le ladügübei Heowá.

“NÚGUCHI, RUBA UÉIRIGUNI LUN BIRI”

9. Ida liña wasubudiruni súdini lan meha liri Heowá lun Hesusu?

⁹ Kei le aubei warihei, íbini lubaragiñe liabin Hesusu Ubouagu súdiniti meha liri Heowá lun. Ligiaméme giñe ariñawagúbei dan meha le ya lubéi Ubouagu. Arufuda lumuti lidan sun le ladügübei súdinigili lan liri Heowá lun. Dan le agumucheina liña lan lani ministeriu aba lamuriahan luma Heowá: “‘Núguchi, ruba uéiriguni lun biri’. Ábati laganbúniwa lariñagun aban umalali siélugiñe: ‘Rúhadina uéiriguni lun niri ani níchigayaba uéiriguni lun niri’” (Huan 12:​28, TNM).

10, 11. a) Ida liña líchugun Hesusu uéiriguni lun liri Heowá? (Ariha huméi giñe dibuhu). b) Ka uagu mosu lubéi inebewa lan liri Heowá ani arumadahóuwa ligíame?

¹⁰ Ruti meha Hesusu uéiriguni lun liri Lúguchi. Ida liña ladügüni? Lau layanuhan houn amu luagu lubuidun ligaburi Heowá luma luagu katei buidu buriti le ladügünbei. Mámarügüñein le ladüga Hesusu lun lichugún uéiriguni lun liri Heowá. Subuditi meha giñe lun mosu lan inebewa lan liri Heowá luma lun larumadahouniwa lídangiñe sun iyeeni le ariñawagúbei luagu.d Arufudahati Hesusu súdini lan katei le lun, dan le larufudahabei afurieiduni houn lani disipulugu. Ariñagati: “Wáguchi Bungiu le siélubei, inebewalá biri” (Mat. 6:9).

¹¹ Ka uagu mosu lubéi inebewa lan ani arumadahoua ligíame liri Heowá? Lugundun lidan fuluri-agei Edén ariñagati Satanási yee lan Heowá ani mígirun lan lun libihin Adán tuma Ewa katei buiti (Agu. 3: 1-5). Lau meha ladügüni Mafia katei le lariñaguña meha wuriba lan ligaburi ladügüni Heowá katei. Kei le aba lubéi leyeeha Mafia luagu Heowá ábati harihini gürigia Heowá kei aban Bungiu wuribati. Lidan lidaani Hobu, ariñagati Satanási sun lan ha eseriwidubaña lun Heowá hadügünbalin lan lun hibihin somu katei buiti lúmagiñe. Ariñagati giñe yeeti le, anhein lan agagibudagua gürigia luma somu lénrengunga lígirubei lan leseriwidun lun Heowá (Hob. 1:​9-11; 2:4). Mégeiwati meha dan lun larufuduniwa ka lan ariñagubalin inarüni anhein Heowá lubéi odi Satanási lan.

“NÍCHUGUNI NIBAGARI”

12. Ka ladügübei Hesusu lun larufuduni ínsiñeni le lasandirubei luagu liri Heowá?

¹² Wéiriti línsiñe Heowá lun Hesusu darí lun ladügüni sun liyaraati lun inebewa lan iri le luma lun larumadahóun. Aranseñu liña meha Hesusu lun lounwen lun larufuduni sandu lan liri Heowá ani súnwandan lan ladügüni Heowá le buídubei (Huan 10:​17, 18).e Adán tuma Ewa bián meha furumiñetiña gürigia mafigountiña aba híchuguni hanagan luagu Heowá aba houdin luéigiñe lóubadina Satanási. Gama lumoun, aranseñu liña meha Hesusu lun liabin Ubouagu lun larufuduni ínsiñeni le lasandirubei luagu Heowá lau gaganbadi lan lun lidan sun libagari (Ebü. 4:15; 5:​7-10). Úaraguati meha Hesusu sunsuinagubei darí lounwen (Ebü. 12:2). Ítara liña larufuduni ínsiñeni le lasandirubei luagu Heowá luma luagu iri le.

13. Ka uagu Hesusu lubéi buídutimabei lun larufuduni Satanási lan yeebei? (Ariha huméi dibuhu).

¹³ Lidan sun le ladügübei Hesusu lidan libagari arufuda lumuti Satanási lan yeebei, mama Heowá (Huan 8:44). Úati ni aban subudihabúti lun Heowá buidu buidu lueidügün Hesusu. Lidan hamuga ñein lan íbini murusun inarüni lidan le lariñagubei Satanási luagu Heowá, lasubudiruñein hamuga Hesusu. Súnwandan aranseñu liña lan meha Hesusu lun layanuhan luéigiñe liri Heowá, mini lan le larumadahani liri Lúguchi. Íbini genege lan meha ígira laali lan Heowá Hesusu dan le luagu lubéi wagabu, himei lumuti meha Hesusu lounwen sügǘ lau líchuguni lanagan luagu Lúguchi le hínsiñehabubei (Mat. 27:46).f

“GUMÚ NAN GIÑE LE UÁGUBEI BÓUNAHANA”

14. Ka afayeiruahaü líchugubei Heowá lun Hesusu ladüga úaragua lan?

¹⁴ Aba lariñagun Hesusu lun Heowá lidan furíei le ladügübei lubaragiñebei lounwen: “Gumú nan giñe le uágubei bóunahana”. Afiñeti meha Hesusu líchuguba lan Heowá lafayeiruaha ladüga úaragua lan (Huan 17:​4, 5). Ani mabulieidagunti Hesusu. Mígirunti meha Heowá lun lerederun Hesusu lidan umúahaü (Adü. 2: 23, 24). Aba láguyuguagüdüni ani aba líchugun aban ubaraü íñutimati lun sielu (Fili. 2:​8, 9). Saragu san irumu lárigiñe, aba lagumeserun Hesusu arúeiha lidan Larúeihan Bungiu. Kaba ladüga Arúeihani le? Afuranguagüda lumuti Hesusu dan le larufudahabei lun wamuriahan luma Heowá lidan furíei, lau lariñagun: “Ñǘbuinla barúeihan; adügüwalá bugundan ya ubouagu kei ladügüniwa sielu” (Mat. 6:10).

15. Kaba ámuya katei ladüga Hesusu?

¹⁵ Yarafa madise lageindaguba Hesusu hama láganigu Bungiu ani lagünrinchagubaña salufuritiña lidan Arümahedón (Aruf. 16:​14, 16; 19:​11-16). Lárigiñe ábame lagurún Satanási lidoun “fusu le mébehabei”, le ñeinba lubéi ladaürǘwa (Aruf. 20: 1-3). Lárigiñe, ábame lagumeserun Hesusu Arúeiha luagu Milu Irumu, ani lanügüba darangilaü Ubouagu ani líderagubaña gürigia lun mafigoun hamá. Láguyuguagüdübaña hilaaña, ani ladügüba lun Paraísu lan Ubóu. Chülüdügame dan lun lagunfulirun le labusenrunbei Heowá ladügün! (Aruf. 21:​1-4).

16. Ida luba ibagari danme le lagumuchun Arúeihani le lánina Milu Irumu?

¹⁶ Ida luba ibagari danme le lagumuchun Arúeihani le lánina Milu Irumu? Úaalime figóu, memegeirun waalime lun ferudunawa lan hafigoun gürigia ladüga mafigounhañame, memegeirualime ni lebegi esefuruni. Ni giñe aban ayanuhati waweigiñe ni fádirigu lun wayarafadun lun Heowá. Úaalime “óunweni” lugundun lagünrinchawaguba. Háguyuguba hilaaña. Sun ha lúnbaña hawinwandun Ubouagu mafigounhañame (1 Ko. 15:​25, 26).

17, 18. a) Kaba asusereda danme lagumuchun Arueihani le lánina Milu Irumu? b) Kaba ladüga Hesusu danme le lagumuchun larúeihan? (1 Korintuna 15:​24, 28; ariha huméi giñe dibuhu).

¹⁷ Kaba amu katei asusereda lárigiñe lagumuchun Arúeihani le lánina Milu Irumu? Lasusereduba aban katei espechaliti: masigenerualime aban lan Bungiu richati Heowá ani sandu ligía. Lidan fuluri-agei Edén ariñagati Satanási aban lan Bungiu yeeti Heowá ani marueihadin lan, ani mínsiñe hamá gürigia lun. Lúmagiñe dan ligía lun lubaruaguóun arufuda hamaali lubúeingu Heowá luagu buidu lan larúeihan. Danme le lagumuchun 1,000 irumu arumadahoualime liri Heowá. Furanguti arufuda laali lan Wáguchi Bungiu le siélubei hínsiñe wamá lun le tímatimaati.

¹⁸ Ligíati, subudi hamaalime gürigia sun lan le lariñagubei Satanási luagu Heowá iyeeni lan. Kaba ladüga Hesusu danme lagumuchun larúeihan? Lagarabaguba funa san Hesusu luagu Heowá kei ladügüni Satanási? Ua, maweiyasunti Hesusu adügei lira! (aliiha huméi 1 Korintuna 15:​24, 28). Le lunbei ladügüni Hesusu lederegeruni Arúeihani lun Lúguchi ani ábame lerederun lábugiñe lubafu Lúguchi. Ladügübei ladüga línsiñe Lúguchi lun.

19. Ka mini lubéi liri Heowá lun Hesusu?

¹⁹ Ligía lubeiti líchugunbalin Heowá liri luagu lisaani lun layanuhan lidan liri. Ani gúnfuliti Hesusu lau dasi le buidu buidu. Ligíati, ka mini lubéi liri Heowá lun Hesusu? Wéiriti lisudinin iri le lun Hesusu. Ligía aranseñu liña lubéi meha lun lounwen luagu iri le ani aranseñu luba giñe lun lagiribudagüdüni sun katei lun Heowá danme le lagumuchun Arúeihani le lani Milu Irumu. Ida luba wáyeihani Hesusu? Wóunabubei álügüdahani le lidan leweñegua aturiahani.