Ayanuha wamá luagu inarüni le tídanbei Bíbülia lau dimurei buíduburiti

1. Ka lunbei wadügüni lun aban wamá hádangiñe lánigu Heowá?

DAN LE wasubudirun aban íbiri, aban lídangiñe álügüdahani le wadügübei lun: “Ida liña basubudiruni inarüni?”. Ani másiñati lóunabuniwa: “Lidan inarüni naweirida” o lariñagun woun: “Málügili lúmagiñe nafurendeiruni inarüni”. Ariñagatiwa ítara ladüga súdiniti inarüni le tídanbei Bíbülia woun ani adundeha lumuti ligaburi wanügüni wabagari. Ka uagu? Ladüga subudi wamuti lun lan aban wamá hádangiñe lánigu Heowá, mosu warufudun hínsiñe lan inarüni woun winwan wameime, ani aban lídangiñe igaburi le ídanbei warufudei katei le, lau wariñaguni inarüni ani meyeehan wagíame (Sal. 15:​1-3).a

2. a) Ka meha hasaminarubei gürigia luagu Hesusu? b) Ida liña meha hóunabun gürigia lun inarüni le larufudahabei Hesusu houn?

² Súnwandan meha lariñaguni Hesusu inarüni. Íbini láganiñu subudi hamuti meha inarüni lan le lariñagubei lau sun meha magundan hamá gürigia lau le larufudahabei (Mat. 22:16). Ariñagati Hesusu houn lani disipulugu ida luba lan buga hóunabun gürigia lun le larufudahabei. Ariñagati: “Ladügüña niabin lun ñein lan fánreinguaü. Lagaganiraguba isaani luma lúguchi, gáganigua tuguyame isaani tuma túguchu, ídiñu tuma tágürü” (Mat. 10:​35, TNM). Mabusenrunti meha Hesusu lun hóunabun gürigia ítara lun le lapurichihabei úara hama lani disipulugu, lau sun lira, subudi lumuti meha lasusereduba lan ítara (Mat. 23:37). Lau sun inarüni lan le larufudahabei, subudi lumuti meha ámuñegueinarügübei lan ligaburi hóunabun gürigia lun uganu le lapurichihabei: ñéinbaña hádangiñe ha úntiña línsiñeda, hámati ha úntiña mínsiñe lan (2 Tesa. 2:​9-11).

3. Kaba wariha lidan aturiahani le?

³ Ítara kei Hesusu, áfaaguatiwa lun wariñaguni inarüni súnwandan; ariñaga wamuti giñe inarüni dan le wapurichihan luma dan le warufudahani inarüni le tídanbei Bíbülia, íbini anhein magundan habéi amu lau le wariñagubei. Mini lan san lira gayara lan wariñaguni inarüni oura le wabusenrun o kei ladagaragun woun? Uá, mama ligía mini lubéi. Lidan aturiahani le, wagumeseruba ayanuha halíaba lan wadarirei inarüni. Lárigiñe, wakutihaba ka lan uagu wayanuhan luagu inarüni, ida luba lan wayanuhani, luma ídaba lan. Líderagubadiwa wasubudiruni katei le lun wayusurun dimurei buíduburiti dan le wapurichihani inarüni.

HALÍABA WADARIREI INARÜNI

4. Ka uagu wariñaga lúmagiñe lan Heowá liabin inarüni?

⁴ Lúmagiñe Heowá liabin inarüni. Inarüni sun le lariñagubei, kei burí le lariñagubei luagu ka lan buídubei lumoun ka lan wuribabei (Sal. 19:9; 119:​142, 151). Súnwandan lagunfuliruni Heowá le lariñagubei lubá ámuñegü (Isa. 55:​10, 11). Meredeti ni aban lídangiñe dimurei le lariñagubei magunfulirunga (1 Lur. 23:19). Le linarün katei, siñati leyeehan Heowá (Ebü. 6:18). Ligía wawa lubéi lun tidan Bíbülia “Lubungiute inarüni” (Sal. 31:5).

5. Ka uagu wariñaga ménrengun lan lun ladarirúniwa “Lubungiute inarüni”? (Adügaü 17:27).

⁵ Añahein gürigia ariñagutiña hénrengu lan lun lasubudirúniwa luagu Heowá le “Lubungiute inarüni”, lau sun lira, mítaranti. Geyegu waña lau burí katei le arufudubalin anihein lan Heowá luma ida liña lan ligaburi (Rom. 1:20). Dan le Atenasiñein lubéi apostolu Pábulu, lidan layanuhan houn fiu gürieguna subudihabútiña, aba lariñagun houn busén lan Bungiu lun wadariruni ani “madise lan [ . . . ] luéi kada aban wádangiñe” (aliiha huméi Adügaü 17:27). Le linarün katei, achawaha lumutiña Heowá gürigia ǘnabugutiña ha áluahabalin inarüni luouguoun (Huan 6:44).

6. Ka burí inarüni tarufudahabei Bíbülia, ani ka uagu híchiga eteingiruni luagu hasubudiruni inarüni burí le?

⁶ Lani Bungiu sífiri sandu adundehabaliña wügüriña ha abürühabarun Bíbülia (2 Fe. 1:​20, 21). Ligía buidu lubéi lun waturiahanu lugundun ligía aban igaburi buiti lun wasubudiruni Heowá. Ani sun le bürüwañubei tidan, inarüni ani gayaraati wafiñerun luagu. Kei hénpulu, gayaraati wafiñerun luagu le tariñagubei Bíbülia luagu ida liña lan lagumeserun Ubóu luma ibagari ya ubouagu (Agu. 1:​1, 26). Gayaraati giñe wafiñerun luagu ida liña lan tafuranguagüdüni inarüni luagu ka lan uagu gafigoun wabéi, wasufurira ani hilagua wagía (Rom. 5:12; 6:23). Lanwoun lira, gayaraati wachoururuni, kei tariñaguni Bíbülia, layusurubei lan Heowá Lisaani lun laransehani sun damichi le adüga láalibei Satanási, le “lúguchibei iyeeni” (Huan 8:44; Rom. 16:20). Gayaraati giñe wafiñerun luagu füramasei le tídanbei Bíbülia luagu lagünrinchagubaña lan Hesusu gürigia wuribatiña, lásaaragüdübaña hilaaña ani ladügübei Ubóu le ábanme paraísu ani íderagua láwame lun mafigoun wamá (Huan 11:​25, 26; 1 Huan 3:8). Arufudaha laali Heowá inarüni le woun ani rúhali giñe chansi woun lun warufudahani inarüni le houn amu (Mat. 28:​19, 20). Ma lubuidun chansi le wámabei!

KA UAGU LUNTI LUBÉI WARIÑAGUNI INARÜNI

7, 8. Ka ínchahabaliwa lun wariñaguni inarüni? Ru humá aban hénpulu (Márükosu 3:​11, 12; ariha humóun giñe iyawaü).

⁷ Kei buga warihini, mosu wariñaguni inarüni anhein busén wabéi lun hádangiñe wamá lánigu Heowá. Lau sun lira, lun wagundaaragüdüni Heowá úati buídurügü lan wariñaguni inarüni, ariha lumuti giñe ka lan uagu wadügei. Samina wamá luagu le asuseredubei lidan lani Hesusu ministeriu (aliiha huméi Márükosu 3:​11, 12). Dan le lapurichihanbei yarafa lun duna Galiléa, aba hayabin saragu gürigia le ñein lubéi. Haganagua saragu gürigia hagía, ñéinñanu meha fiu gawagutiña sífirigu wuribatiña, aba háhuduragun ligibugiñe ariñageina hagía lun agúaragueina: “Liráü Bungiu buguya!”. Ka uagu hariñagei máfianu ha inarüni le luagu Hesusu? Háfuga busén hamá meha lun hafiñerun gürigia ha ñéinbaña hawagu lúmati lun habihin lun hadisedun gürigia hagía luéi Heowá. Íbini ariñaga hamani inarüni, mama lun katei buiti hadügei. Lau sun lira, meyeedun hamuti Hesusu. Mínsiñegubeiti le hadügübei lun darí lun lariñagun houn lun mayanuhan hamá luagu.

⁸ Ka wafurendeirubei lídangiñe abahüdaguni le? Furendeitiwa súdini lan lun Heowá ka lan lébunabei wariñaguni inarüni. Ligíati lunti lubéi warufudahani inarüni luagu ínsiñeni le wasandirubei luagu Heowá. Ani anhein ichugúa uéiriguni woun luagu inarüni le wapurichihabei, lunti wíchuguni uéiriguni ligía lun Heowá (Mat. 5:16; ariha huméi giñe Adügaü 14:​12-15).

9. Ka katei moun lubéi wadügüni, ani ka uagu?

⁹ Samina wamá luagu sügǘ le ñein lubéi busén wamá híchugun amu uéiriguni woun. Kéiburi dan hamuga labahüdahan somu wéiyaali lidan afiñeni aban katei woun le moun lumuti hasubudiruni amu, ani aba wabahüdahani houn amu. Ánhañati íchiga gürigia ha únbaña wabahüdahei katei le fe luagu inarüni lan le wariñagubei houn, másiñati taweiridun hanigi ani aba hasaminarun anihein lan saragu ariñahani wama le ibidiñebei houn amu. Háfuga ladügüba katei le lun híchugun amu uéiriguni woun, lau sun lira, magundanbei Heowá lau katei le (Ari. 11:13). Ka uagu? Lugundun íbini inarüni lan le wariñagubei, mama woun yu lan wariñaguni ariñahani ligía ani larufuduba lira wuriba lan le wadügübei.

IDA LUBA WARIÑAGUNI INARÜNI

10. Ka labusenrubei apostolu Pábulu lariñagun lidan Kolosana 4:6 dan le lariñagunbei “lunti gúndaawa lan lau hiyanun súnwandan”?

¹⁰ (Aliiha huméi Kolosana 4:6). Haritaguagüda lumutiña apostolu Pábulu kristiánugu kolosana “lunti gúndaawa lan lau hiyanun súnwandan”. Dimurei güriegu le ayusurúbei lidan bérusu le, arufudati woun mosu lan hasagarun gürigia saragu buiti lídangiñe ligaburi wayanuhan ani mosu lan giñe semé lan ani buidu ligíame.

11, 12. Ka uagu lunti lubéi wayanuhan luagu inarüni lau inebesei? Ru humá aban hénpulu (ariha humóun giñe iyawaü).

¹¹ Súdiniti wafalaruni adundehani le líchugubei apostolu Pábulu lau wayusurun dimurei buiti dan le warufudahani inarüni houn gürigia. Ariñagati Ebüréu 4:12 ítara liña lan inarüni le tídanbei Bíbülia kei aban eféin to hamanatu to biánguati tamana, belú tuguya chülǘ tumoun wawani luma wani sífiri, lidan amu dimurei, furangugüda tumuti sun waritagun luma sun le wabusenrubei, arufudatéi ka lan tídanbei wanigi. Lau sun lira, anhoun mayusu wamá Bíbülia buidu, gayaraati ladügün lira lun wuriba lan hasandiragun gürigia houngua o lun busén hamá hasigenehan wama. Ariha wamá aban hénpulu.

¹² Samina wamá wadarirun aban gürigia le haruma tanigi lidan apurichihani le héchubei arisara houn guáriua ani hínsiñeti lun lefeduhani fedu lánina duusu-hati, ñüdün ligía asariñagǘda Semana Sándarugu hama liduheñu. Másiñati wayusurunu Bíbülia lun warufuduni lun gürigia ligía mouni lan lafurieidúniwa houn guáriua ha mabagaribaña ani múaran lan fedu lánina duusu-hati ni le lánina Semana Sanda luma le tariñagubei Bíbülia lugundun mama lúmagiñe Bungiu liabin fedu o échuni burí le (Isa. 44:​14-20; 2 Ko. 6:​14-17). Anhein hamuga wadüga katei le lidan furumiñeti wéiyaasu le ídanbei wayanuhan hama gürigia, wariñaguñein hamuga inarüni, lau sun lira, warufuduña hamuga mama lan wayusuruñoun Bíbülia buidu.

13. Ka lunbei wadügüni lun semé lan dimurei le wariñagubei?

¹³ Ariñagati giñe apostolu Pábulu lunti lan buidu lan dimurei le wariñagubei ítara kei éigini le buiti luguini. Úati mini lan le mosu lan waramuduni inarüni ni lun waranseraguni lúnrügü hasandiragun amu houngua buidu. Le labusenrubei lariñagun mosu lan wíchuguni uganu lánina inarüni lidan aban igaburi le hínsiñeti houn gürigia ha aganbubalin, ítara kei lasandiruni iyumulugu “luguini éigini” (Hob. 12:11). Lau sun lira, gayaraati hénrengubei lan libihíniwa katei le. Ítara kei gibe lan ámuñegueinarügü aganagu lun ábouguni, mama houn sun gürigia línsiñeda ligiaméme aganagu lidan ítaga éigini, mámaba giñe houn sun gürigia hínsiñe lan ligaburi wayanuhan. Kei hénpulu, lidan fiu fulasu héchutiña gürigia ariñagei le hasaminarubei furangu, íbini dan le hayanuhan hama gürigia ha derebuguhaña. Gama lumoun, lidan amu burí ageiraü wuribati larihín échuni le lugundun gayaraati hasaminarun gürigia minebenehabu wamá. Ariñagati apostolu Pábulu: “Lunti giñe hasubudiruni ida luba lan hóunabuniña gürigia”. Ligíati, moun lumuti wayanuhan kei línsiñe woun o según wechun, lunti wayanuhan kei línsiñe houn gürigia ha aganbubaliwa.

ÍDABA WARIÑAGEI INARÜNI

14. Dan meha le ya lubéi Hesusu ubouagu, arufudaha lumuti san sun le lasubudirubei houn lani disipulugu?

¹⁴ Súnwandan meha layanuhan Hesusu hama lani disipulugu lau aban lubuidun igaburi ani arufudahati saragu katei houn lau ínsiñeni (Mar. 6:34). Íbini gibe lan meha katei lunti hafurendeiruni, málugunti Hesusu larufudahani sun katei le lasubudirubei houn lidan aban. Gabaroun lumuti le gayaraabei gunfuranda hamani. Subudi lumuti machülügili lan meha dan lun hafurendeiruni fiu lídangiñe inarüni le tídanbei Bíbülia, ligía lariñagunbei houn hásiñarubei lan inarüni ligía gunfuranda (Huan 16:12). Ka wafurendeirubei lúmagiñe Hesusu?

15. Lunti san warufudahani sun le wasubudirubei tídangiñe Bíbülia houn ha aturiahabaña wama lidan ábanmeme weyu? (Ariñawagúni 25:11; ariha humóun giñe iyawaü).

¹⁵ Arufudati lani Hesusu hénpulu woun íbini lan wasubudirun saragu inarüni tídangiñeti Bíbülia úati mini lan le mosu lan warufudahani sun le wasubudirubei houn gürigia lidan ábanmeme weyu. Ida luba wáyeihani Hesusu? Lau gabaroun wamani le gádanbaliña gürigia. Saminaya wamá luagun gürigia le hínsiñebei lun lefeduhani fedu lánina duusu-hati, ñüdün ligía asariñagǘda Semana Sándarugu hama liduheñu. Subudi wamuti múaran lan échuni burí le luma le tariñagubei Bíbülia ani magundanti Heowá lau. Gama lumoun, samina wamá gumese lan gürigia ligía aturiahoun Bíbülia wama aban o bián dimaasu lubaragiñe fedu lánina duusu-hati. Wayanuhaña hamuga san luagu inarüni lau dimurei buiti ánhawa hamuga arufudei lun gürigia ligía le tariñagubei Bíbülia luagu fedu burí le, ani aguraba wagía lun mefeduhan lani luma lun lafalaruni le tariñagubei Bíbülia lau lóufudagun? Uá, furanguti madügün wabéi lan lira. Lau sun añahein lan hádangiñe aturiahatiña ha afalarubalin le hafurendeirubei tídangiñe Bíbülia lau lóufudagun, añahein amu mégeitiña dan lun hasansiruni ligaburi hasaminan luma hechun. Lun gayara lan wíderaguniña aturiahatiña lun hawanserun, úati buídurügü lan warufudahani inarüni le hemegeirubei haganbun houn, lunti giñe wasubudiruni ídaba lan wariñagei inarüni ligía houn (aliiha huméi Ariñawagúni 25:11).

16. Ida luba gayara lan wíderagun aban aturiahati lun lasigirun abagarida “úaragua luma inarüni”?

¹⁶ Úati saragu katei ubouagu le íchuguti aban óunwenbu ugundani kei warufudahani inarüni luáguti Heowá houn gürigia. Lun wíderaguniña asigira abagarida “úaragua luma inarüni”, súdiniti lun wíchugun aban buiti hénpulu houn, arufuda wameime houn lau ligaburi wabagaridun afiñe wamá luagu füramasei le tídanbei Bíbülia (3 Huan 3, 4). Ani kei le aubei warihei, mosu wayanuhan luagu inarüni lau inebesei, lau dimurei buiti, luma lidan dan le buídutimabei, ani chouru wameime ínsiñeni lan lébunabei inarüni le wayanuhabei. Ani anhein ichugúa furumiñeguarügü uéiriguni woun, lunti wíchuguni uéiriguni ligía lun Heowá. Ítara luba warufuduni weseriwiduña lan lun Heowá, le Lubungiute inarüni.