Gayaraati hibihini le habusenrubei hadügün lidan heseriwidun lun Heowá

1. Ka áfaaguni wadügübei saragu wádangiñe?

SAMINAADÜN san luagu aban katei le habusenrunbei hibihin lidan heseriwidun lun Heowá ani hénrenguti hun hibihini?b Anhein ítara liña lubéi, mámarügüñadün hugía áfaagua lun hibihini le habusenrubei. Kei hénpulu, busenti meha Philip gabügürügua lan lafurieidun lun Heowá luma lun labuiduragüdüni ligaburi lafurieidun, gama lumoun hénrenguti meha lun lun ladarirun chansi lun layanuhan luma Heowá. Busentu meha Erika chülügiñe tan lidoun adamuridaguni le adügǘbei lubá apurichihani. Lau sun lira, liibe-agei dan, dárüti meha burí tachülürün. Ánheinti Tomáš, áfaaguati meha saragu wéiyaasu laliihanu Bíbülia dayarügü. Ariñagati: “Masanditina meha ugundani lau naliihanu Bíbülia. Ǘrüwañein wéiyaasu náfaagun naliihanu, gama lumoun dan le nachülürün tidoun haliburun Fádirigu, aba nararamagun”.

2. Ka uagu moun lumuti lubéi lábürühan warüna anhein mibihin wamagili lubéi le wabusenrubei wadügün lidan weseriwidun lun Heowá?

² Anhein háfaaguña lubéi lun hibihini le habusenrunbei hadügün lidan heseriwidun lun Heowá ani mibihin humagili, mábürühala harüna. Mégeiwati dan luma áfaaguni lun wibihini le wabusenrubei. Arufudati mábürühagili lan harüna luagu gebegi lan humadagua luma Heowá hun saragu, ani busentün híchuguni le buídutimabei húmagiñegua lun. Ariha lumuti Heowá áfaaguni le hadügübei, ani mamuriahanti lóugiñe le hásiñarubei adüga (Sal. 103:14; Mik. 6:8). Ligíati, mosu hachoururuni le lan habusenrubei hibihin lidan heseriwidun lun Heowá ábanbei lan katei le gayara hubéi ibiha. Anhein chouru hubalin gayaraabei lan hibihini le habusenrunbei hadügün lidan heseriwidun lun Heowá, ka gayaraabei hadügüni lun hibihini? Ariha wamá fiu adundehani.

LUNTI BUSÉN HUMÁ HIBIHINI LE HABUSENRUNBEI HADÜGÜN LIDAN HESERIWIDUN LUN HEOWÁ

3. Ka uagu súdini lubéi lun busén humá tídangiñe sun hanigi lun hibihini le habusenrubei hadügün lidan heseriwidun lun Heowá?

³ Súdiniti busén lan gürigia lun libihini le habusenrubei ladügün lidan leseriwidun lun Heowá. Ka uagu? Ladüga anhein busén lubéi aban gürigia lun libihini le labusenrunbei ladügün lidan leseriwidun lun Bungiu, mosu láfaagun saragu. Ítara liña áfaaguni le ladügübei gürigia kei garabali le adügübei lun lawadigimaridun bira. Anhein mararamun láfuhan garabali, gayaraabei tachülürün guríara lidoun fulasu le ñéinhinba lubéi tidin. Ánheinti here lubéi láfuhan garabali, gayaraati chülügiñe tan lidoun fulasu le ñéinhinboun lubéi. Ítarameme, anhein weiri lubéi wáfaagun lun wibihini le wabusenrubei wadügün, gayaraatimabei wibihini. Ariñagati aban íbiri le awinwandubei Salu le gíribei David: “Dan le weiri lan labusenrun aban gürigia libihin aban katei, ábatima láfaagun luagu. Adüga lumuti sun liyaraati lun lagunfuliruni le labusenrubei ladügün”. Ligíati, kaba íderaguaün ibihei le habusenrubei hadügün lidan heseriwidun lun Heowá?

4. Ka gayaraabei wamuriahani luma Heowá? (Filipuna 2:13, ariha humóun giñe iyawaü).

⁴ Amuriaha humá luma Heowá lun líderagunün lun háfaagun luagu le habusenrubei hibihin. Lau lani sífiri, gayaraabei líchuguni Heowá le hemegeirubei hun lun hibihini le habusenrubei hadügün lidan heseriwidun lun (aliiha huméi Filipuna 2:13). Anihein dan, busentiwa waganwoundagüdüni weseriwidun lun Heowá ladüga subudi wamuti lunti lan wadügüni, ani úati ni kata wuribati luagu lira. Gama lumoun, másiñati úa lan tidan wanigi lun wadügüni katei le. Ligía meha asuseredubei tun Norina, aban íbiri ugandana. Busentu meha tíchugun aturiahani tídangiñeti Bíbülia, gama lumoun, hanufudetu meha ladüga samina tan marufudahadi tan. Ka íderagubarun? Ariñagatu: “Gumesetina amuriaha luma Heowá sagü weyu lun líderagunina lun busén nan níchugun aturiahani tídangiñe Bíbülia tun somu gürigia. Ani adüga numuti giñe le yuubei nun, aba náfaagun lun nabuiduragüdüni ligaburi narufudahan. Lárigiñe fiu hati, aba narihin luagu busentimahadina lan níchugun aturiahani tídangiñeti Bíbülia. Lídanmeme irumu ligía, aba nagumeserun íchiga bián aturiahani”.

5. Ka katei uágubei gayara lan wararamagun asaminara lúntima busén wamá wibihini le uágubei wáfaagua lidan weseriwidun lun Heowá?

⁵ Ráramagua humá asaminara luagu le adüga láalibei Heowá huagu (Sal. 143:5). Ráramaguati meha apostolu Pábulu asaminara luagu areini le larufudubei Heowá lun, ani ínchaha lumuti katei le lun leseriwidun lun tau sun lanigi (1 Ko. 15:9, 10; 1 Tim. 1:12-14). Ítarameme, anhaün asaminara luagu le adüga láalibei Heowá huagu, busentimabadün hibihini le habusenrunbei hadügün lidan heseriwidun lun (Sal. 116:12). Ariha huméi ka lan íderagubarun aban íbiri Indura lun prekursora tan. Ariñagatu: “Aba nasaminarun luagu weiri lan nínsiñe lun Heowá. Barǘ lumutina hadoun lumutuniña ani góunigi lumutina. Lau nararamagun asaminara luagu katei le, ábatima línsiñedun Heowá nun, ani ábatima nabusenrun neseriwidun kei prekursora”.

6. Kaba amu katei íderaguawa lun wibihini le wabusenrubei wadügün lidan weseriwidun lun Heowá?

⁶ Teni humá lun abiniruni le lunbei heresibiruni anhaün áfaagua lun hadügüni le habusenrunbei hibihin lidan heseriwidun lun Heowá. Ariha waméi tikesin Erika to iridúboun lidan párafu aban. Ka íderagubarun lun chülügiñe tan lidoun adamuridaguni? Ariñagatu: “Aba níchugun fe, ánhana lan achülüra darü lidoun apurichihani, neferidiruña lan saragu katei buiti. Ánhana chülügiñe, gayaraabei nabusuragun houn íbirigu ani ayanuha nuguyame hama. Lanwoun lira, gayaraati naganbuni adundehani huuti le lunbei líderagunina lúntima nabuiduragüdüni ligaburi napurichihan”. Kei aba lubéi tetenirun Erika lun chülügiñe tan, ibiha tumuti le tabusenrubei tadügün lidan teseriwidun lun Heowá. Ka katei buiti uágubei gayara lan hasaminarun? Anhein taliihóun lubéi Bíbülia luma furíei habusenrunbei hibihin, samina humá ida luba lan lederebudagüdüni katei le humadagua luma Heowá (Sal. 145:18, 19). Anhein habuiduragüdüni lubéi higaburi keisi kristiánu habusenrubei hibihin, samina humá luagun ida luba lan líderagunün katei le lun buídutima lan hanaagun hungua hama amu (Kol. 3:14). Ka amu katei gayaraabei hadügüni? Abürüha huméi sun lébuna busén humá háfaagun lun hibihini katei le, ani kada átiri dan, ariha humóun hilisütan. Ariñagati giñe Tomáš, le buga iridúbei lidan furumiñeti párafu: “Ánhana ariha gibe lan resun numa lun nibihini le nabusenrubei nadügün lidan neseriwidun lun Heowá, hénrengutimabei lábürühan narüna”.

7. Ka ladügübei Julio tuma lani weiriou lun haganwoundagüdüni heseriwidun?

⁷ Óundara humá hama gürigia ha lúnbaña híchahanün lun haganwoundagüdüni heseriwidun (Ari. 13:20). Busenti meha Julio tuma lani weiriou háguyun lidoun aban fulasu le ñein lubéi hemegeirúa apurichihatiña. Ariñaga lumuti ka lan íderagubaliña lun hibihini: “Áluahatiwa umadagu ha gayaraati híderaguniwa ani ayanuhatiwa hama luagu le wabusenrubei wadügün, kei ibiha hamaali lan saragu hádangiñe le habusenrunbei hadügün lidan heseriwidun lun Bungiu, gayaraahali meha híchugun adundehani huuti woun. Ani álügüda hamutiwa meha giñe ida liña lan lidin woun lidan aransehani le wadügübei, ani dan le wemegeiruni, ínchaha hamutiwa lun wabaruaguóun wamá lidan le wabusenrubei wibihin”.

DAN MICHAAHÓUN LAN WOUN LUN WADÜGÜNI

8. Ka gayaraabei lasuseredun ánhawa áfaagua dánrügü le lichaahóun woun lun wadügüni? (Ariha humóun giñe iyawaü).

⁸ Le linarün katei, sun wagía anihein weyu sanditiwa michaahóun lan woun lun wadügüni le lunbei wadügüni. Mini lan san le lunti lan máfaagun wamá lun wibihini le wabusenrubei wadügün? Uá. Haritaguaya waméi hénpulu le buga lani garabali luma bira. Íbini gayara lan lahuudun garabali lun ladügün bira lun téibaagun ugunei, le linarün katei, mama súnwandan here lan láfuhan garabali; ani anihein dan, máfurungubeiti. Mini lan san le siñá lan lawanserun gürigia lidan luéiyasun? Uá, mítaranti. Kei hénpulu, anuhein guríara barütu máhina, ani anuhein amu anihein fágayu tidan. Ligíati, gayaraati layusuruni gürigia katei burí le lun lasigiruni luéiyasun. Ítarameme, ñeinbei weyu lebeluruba lan woun lun wáfaagun lun wadügüni le wabusenrubei wibihin. Ani ñeinbei dan, hénrenbei lan woun áfaagua. Ligíati, ánhawa hamuga áfaagua dánrügü le lichaahóun woun, mibihin wabéi le wabusenrubei wadügün lidan weseriwidun lun Heowá. Ítara kei lawanserun aban gürigia le áfayahabei tidan aban guríara dan le ua lan garabali, gayaraati giñe wasigirun áfaagua lun wibihini le wabusenrubei wadügün íbini michaahóun lan woun. Furanguti megei lan katei le áfaaguni. Gama lumoun, buídubei lidin woun. Lubaragiñe wakutihani kaba lan íderaguawa lidan katei le, wóunabuba aban álügüdahani le hadügübei fiu gürigia hóuniwagua.   

9. Buiti funa san wáfaagun lun wibihini le wabusenrubei wadügün lidan weseriwidun lun Bungiu anhein henren lubéi woun adügei?

⁹ Busenti Heowá weseriwidun lun lau ugundani luma tídangiñe sun wanigi (Sal. 100:2; 2 Ko. 9:7). Ligíati, ka uagu lunti lubéi wáfaagun lun wibihini le wabusenrubei wadügün lidan weseriwidun lun Heowá anhein henren lubéi woun adügei? Samina wamá luagu lani apostolu Pábulu hénpulu. Ariñagati: “Bei numuti núgubu, fosunéi lun laganbunina” (1 Ko. 9:25-27). Fósuguati meha Pábulu lungua dan le ladügüni le lagurabubei Heowá lúmagiñe íbini dan le michaahóun lan lun. Gúndaati meha san Heowá lau leseriwidun apostolu Pábulu lun? Anha, ítara liña. Ani ruti afayeiruahaü lun luagu lubuidun wadagimanu le ladügübei (2 Tim. 4:7, 8).

10. Ka buiti wasagarubei dan le wáfaagun lun wibihini le wabusenrubei wadügün lidan weseriwidun lun Bungiu íbini dan le michaahóun lan woun?

¹⁰ Gúndaati giñe Heowá dan le larihini wáfaagun lun wibihini le wabusenrubei wadügün lidan weseriwidun lun, íbini dan michaahóun lan woun. Ka uagu? Íbini mínsiñe lan dasi ligía woun, adüga wamuti ladüga ínsiñeni le wasandirubei luagu Heowá. Biní lumuti meha Heowá apostolu Pábulu ani labinirubadiwa giñe ánhawa áfaagua (Sal. 126:5). Ani danme warihini labiniruni Heowá áfaaguni le wadügübei, másiñati ladügüba lan katei le lun wagunfulirun lau dasi le lunbei wadügüni. Ariñagatu aban íbiri gíritu Lucyna to awinwanduboun Polonia: “Anihein dan, mabusenruntina nidin apurichiha, dántima le buchá lan nuagu. Lau sun lira, ugundani le nasandirubei dan le nagiribudun núbiñoun, móubati; ítara liña kei aban óunwenbu idewesei”. Ariha waméi guentó ka lan gayaraabei wadügüni dan le michaahóun lan woun lun wadügün somu katei.

11. Ida liña líderaguniwa Heowá lúntima wárügüdagun woungua?

¹¹ Amuriaha humá luma Heowá lun líderagunün árügüdagua hungua. Gürigia ha árügüdagubaña houngua, subudi hamuti ida luba lan habuguruni hasaminan luma le lunbei hadügüni. Mama eredeharügü lumutiwa igaburi le luéi wadügüni le wuribabei. Luagu le aban oubaü, ínchaha lumutiwa igaburi le lun wadügüni le buídubei, dántima le hénrengu lan woun o michaahóun lan woun. Haritagua waméi ragüguaü lan unguaü ábanbei lídangiñe igaburi le líchugubei sífiri. Ligíati, ánhawa amuriaha sífiri sandu luma Heowá, gayaraabei líderagubadiwa lun gagaburi wamani igaburi súdiniti le (Luk. 11:13; Gal. 5:22, 23). David le buga uágubei wayanuha lidan párafu ǘrüwa, aba laranserun lúntima gabügürüguatima lan laturiahan lábugua. Súdiniti furíei lun. Ariñagati: “Amuriahatina luma Heowá lun líderagunina lun nárügüdagun nungua. Íderagua lumutina. Aba nagumeserun aban programa lánina aturiahani, ani anahamémegua agunfulirei”.

12. Ida liña líderaguniwa Apurichihati 11:4 lun wagunfulirun lau le wabusenrubei wibihin lidan weseriwidun lun Heowá?

¹² Magurabaha humá lun buidu lan sun katei. Lidan ubóu le, chóuruti hénrengubei lan. Ánhawa agurabei chagu warüna lun buidu lan sun katei, másiñati mibihin wabéi lan le wabusenrubei wibihin lidan weseriwidun lun Heowá (aliiha huméi Apurichihati 11:4). Ariñagati aban íbiri gíriti Dayniel: “Úati aban dan buiti. Ligíati moun lumuti lubéi wagurabahan aban dan buiti, lunti wagumeserun”. Ariñaga lumuti aban íbiri ugandana gíriti Paul ka lan uagu moun lumuti lan wígirahani le wabusenrubei wadügün lidan weseriwidun lun Heowá lubá amu dan: Dan le bagumeserun áfaagua lun bibihini le babusenrubei badügün íbini badunragun luma lénrengunga, bíchuguña chansi lun Heowá lun líderagunibu” (Mal. 3:10).

13. Ka uagu buidu lubéi lun wagumeserun lau katei ñǘbüriti?

¹³ Gumese humá lau katei ñǘbüriti. Másiñati anihein lan dan michaahóun lan woun lun wáfaagun lun wibihini le wabusenrubei wadügün lidan weseriwidun lun Heowá ladüga genege lan woun wéiriya lan dasi ligía. Anhein ligía lubéi asuseredubei hun, ka uagu máfaagun hubéi lun hibihini murusun murusun? Kei hénpulu, anhein busén hubéi gagaburi humá aban igaburi buiti, ka uagu máfaagun hubéi harufuduni lau burí lirahüñü katei? Anhein háluahaña lubéi lun haliihanu Bíbülia, ka uagu magumeserun hubéi aliihoun murusun murusun? Ánheinti Tomáš, le uágubei wayanuha lidan lagumeseha aturiahani le, güreweiti meha lun lun laliihanu Bíbülia lidan aban irumu. Ariñagati: “Aba níchugun fe hénrengubei lan nun lun naliihanu lidan aban irumu. Ábayati nagumeserun aliihoun, guentó lidan aban igaburi le gayaraabei líderagunina ibiha naliihanu. Aliihatina meha aban fánreinti lidan kapítulu sagü weyu ani ráramaguatina asaminara luagu le nafurendeirubei. Éibutima lásügürün dan, ábatima línsiñedun nun naliihanu”. Keiti hínsiñeeli lubéi meha lun Tomáš laliihanu Bíbülia, ábatima ladireirun dan lun laliihanu. Gumú lumutu aliiha.c

MÁBÜRÜHALA HARÜNA DAN LE HAGAGIBUDAGUN LUMA TUROBULI

14. Ka turobuli úmabei gayara lan wagagibudagun?

¹⁴ Le hírubei, íbini ichaahóua lan woun lun wadügüni katei, gayaraati liabin burí amu turobuli lun leredehani le wabusenrubei wadügün. Kéiburi dan le ladügün “katei le magurabunti” lun madaani wamá lun wadügüni le wabusenrubei wibihin lidan weseriwidun lun Bungiu (Apur. 9:11, TNM). Gayaraabei giñe ñeinbei lan aban turobuli le gayaraabei ladügün lun lábürühan warüna luma lun lagidaruni were wawéi (Ari. 24:10). Gama lumoun, kei chará wabéi, da wamuti wagudi ani adügati burí katei le lun hénrengu lan woun wáfaagun lun wibihini le wabusenrubei wadügün (Rom. 7:23). O másiñati ladüga lan lubucha uagu (Mat. 26:43). Ka gayaraabei líderaguniwa lun wabaruaguóunmeme wamá o lun buidu lan waweyuri?

15. Ka uagu moun lumuti lubéi lábürühan warüna dan le wagagibudagun luma turobuli? (Sálumu 145:14).

¹⁵ Haritagua huméi dan le lan mibihin humani le habusenrubei hadügün úati mini lan lira moun lumuti lan hasigirun áfaagua. Según le tariñagubei Bíbülia, chóuruti wásügürüba lan lídangiñe saragu turobuli. Ariñagatu giñe woun, lau lan lídehan Heowá, gayara lan wasigirun wabaruaguóun luma lun wibihini le wabusenrubei wadügün lidan weseriwidun lun (aliiha huméi Sálumu 145:14). Ariha lumuti Philip, íbiri le buga uágubei wayanuha lidan furumiñeti párafu, katei le ítara ani ariñagati: “Le súdinibei nun, mama átiriñein lan wéiyaasu néiguadun, le súdinibei, átiriñein lan wéiyaasu niñuragun lídangiñe lun nasigirun nubaruaguóun”. Giribuya wamá lumoun le ladügübei David. Ariñagati: “Dan le lénrengudun katei nun o wuriba lan nuéyuri, marihin numuti sügǘ burí le kei aban turobuli. Barǘ numuti kei aban chansi lun nariñagun lun Heowá hínsiñe lan nun”. Ítara liña, dan le wasigirun wabaruaguóun íbini laganagua turobuli, warufuduñein lun Heowá busén wamá wagundaaraguagüdüni. Saminatün san luagu óunwenbu ugundani le luágubei Heowá lau larihiniwa awanha lan áfaagua lun wadügüni le wabusenrubei wadügün lidan weseriwidun lun?

16. Ka gayaraabei wafurendeiruni lídangiñe turobuli le gayaraabei wagagibudagun luma?

¹⁶ Ariha huméi turobuli kei aban chansi lun hafurendeirun. Akutiha huméi sügǘ ani álügüdagua humá hungua: “Ka gayaraabei nadügüni lun mararamun lánina ni aban turobuli?” (Ari. 27:12). Luagu le aban oubaü, anhein siñá lubéi wibihini le wabusenrubei wadügün lidan weseriwidun lun Bungiu íbini áfaaguaadiwa lan saragu, ma buítimati wasansiruni le wabusenrubei wibihin? Lun hasubudiruni anhein ligía lubéi asuseredubei hun, samina humá anhein ligíatima lubéi habusenrubei hibihin.d Masaminarunbei Heowá charaadün lan anhein mibihin humá le habusenrubei hadügün lidan heseriwidun lun (2 Ko. 8:12).

17. Ka uagu lunti lubéi gabaroun wamani le ibiha wamaalibei?

¹⁷ Mabulieida huméi le ibiha humaalibei. Ariñagatu Bíbülia: “Lugundun richaguati Bungiu, ani mabulieidun lubéi le adüga humaalibei” (Ebü. 6:10). Ligíati mabulieida huméi giñe. Samina humá luagu le ibiha humaalibei, kei burí hapurichihan, habadiseirun luma gamadaguaadün lan luma Heowá. Le ibiha humaalibei lidan heseriwidun lun Heowá lidan dan le sügühalibei, arufudati gayara lan hubaruaguóunmeme humá awansera luma lun hibihini le habusenrubei hibihin (Fili. 3:16).

18. Ka lunbei hadügüni sun aünha lan áfaagua lun hibihini le habusenrubei hadügün lidan heseriwidun lun Bungiu? (Ariha humóun giñe iyawaü)

¹⁸ Lau lídehan Heowá, gayaraati hibihini le habusenrubei hibihin lidan heseriwidun lun, ítara kei lachülürün aban gürigia le áfayahabei tidan aban guríara lidoun fulasu le ñéinhinbei lubéi ani aba lagundaarun. Ani ítara kei añahein lan saragu gürigia ha gúndaatiña lau haweiyasun dan le háfayahan baranaha, gayaraati giñe hagundaarun sun awansereina humá lidan hibihini le habusenrunbei lidan heseriwidun lun Heowá, anhaün etenira lun ida liña lan líderagunün luma labinirunün Heowá lidan héibuguniwagu (2 Ko. 4:7). Anhein mábürühan harüna, hibihuba abiniruni le wéinamutimati (Gal. 6:9).