Ida luba wakipuruni wagundan dan le waweiyadun

1, 2. Ida liña larihiniña Heowá íbirigu úaraguatiña ha aweiyadeinabaña? (Sálumu 92:​12-14; ariha humóun giñe iyawaü).

LIDAN fiu fulasu ubouagu arihúati aweiyaduni keisi aban katei wéiriguti. Ani lidan amu burí fulasu adüga hamuti gürigia sun hayaraati lun marihín lan hawagu haweiyaduña lan. Kéiburi dan le harihini láfuachun furumiñeti garuba hábulugu aba háhuluni. Ani mararamunbei láfuachun garuba hábulugugiñe láurügü háhuluni le furumiñeti. Arufuda lumuti hénpulu le hénrengu lan woun wánharun waweiyaduña lan.

² Lau sun lira, ida liña san larihiniña Wáguchi le siélubei íbirigu ha aweiyadeinabaña? (Ari. 16:31). Góubaguagüda lumutiña tuma tídibu wewe to buíduburitu (aliiha huméi Sálumu 92:​12-14). Ani ítara liña, lugundun hilumatu tídibu wewe to barüharuboun saragu irumu ani buin tiña lau burí fuluri le buiti líhemen. Seresu to haponna tuguya aban tídangiñe tídibu wewe to buíduburiboun ani wéirigüda tumutu wanigi, lugundun gayaraati tawinwandun íbini lóugiñe milu irumu. Ítara kei tídibu wewe burí to, buíduburitiña giñe kristiánugu ha derebuguhaña, ligibugiñetima lagu Bungiu. Mámarügüñein garuba lariha Heowá ariha lumuti giñe lubuidun igaburi le hawagubei. Seriwihaña lun lau úaraguni luagu saragu irumu dandu lidan dan buiti kei lidan dan wuribati.

3. Írida huméi ida liña lan meha layusurun Heowá fiu hádangiñe lubúeingu ha derebuguhaña lun lagunfuliruni lugundan.

³ Masaminarunti Heowá mebegihaña lan lun ni kata ladüga derebuguhaña lan.a Lubaragiñe lira, yusu lumutiña lubúeingu ha derebuguhaña lun lagunfuliruni lugundan. Kei hénpulu, derebuguharu meha Sara dan le lariñawagúnbei tun tagaraüdüba lan aban wügüri irahü, luagu láfuriduba lan giñe aban óunwenbu néchani lídangiñe irahü ligía ani tuguyaba lan ladügawagun Mesíasi (Agu. 17:​15-19). Ítarameme, derebuguhali meha Moisesi dan le libihinbalin dasi lun lasagaruniña ísüraelina Ehiptugiñe (Afu. 7:​6, 7). Derebuguhali meha giñe apostolu Huan dan le labürühabarun seingü líburu to tídanboun Bíbülia lau lídehan Bungiu.

4. Según Ariñawagúni 15:​15, ka igaburi íderagubaliña íbirigu ha derebuguhaña lun hagagibudagun luma lénrengunga? (Ariha humóun giñe iyawaü).

⁴ Barüti aweiyaduni saragu lénrengunga. Ariñagatu aban íbiri éhereheina: “Mámatia huraraü aweiyaduni”. Lau sun lira, ugundanib ligía aban lídangiñe igaburi le íderagubaliña íbirigu ha derebuguhaña lun hagagibudagun luma lénrengunga (aliiha huméi Ariñawagúni 15:15). Warihuba lidan aturiahani le ka lan gayaraabei hadügüni íbirigu ha lun meferidirun hamani hagundan. Wakutihabei giñe ka lan gayaraabei hadügüni ha híbiri lílana damuriguaü lun híderaguniña. Furumiñe, ayanuha wamá ka lan uagu hénrengu lubéi lakipurúniwa ugundani lau lásügürün dan.

KA UAGU HÉNRENGU LUBÉI LAKIPURÚNIWA UGUNDANI

5. Ka burí katei gayaraabei ladügün lun heferidiruni gürigia derebuguhaña hagundan dan le haweiyadun?

⁵ Ka burí katei gayaraabei ladügün lun heferidiruni gürigia derebuguhaña hagundan dan le haweiyadun? Háfuga hírudun ladüga siñá lan hadügüni katei burí le meha hadügübei dan le nibureingiña. O háfuga áluga hamá luagu dan ligía luma lubuidun átuadi le meha hawagubei (Apur. 7:10). Ariñagatu aban íbiri gíritu Ruby: “Wéiriti lénrengun nun nasansiragun lugundun hénrenguhaali nun namufurun ani gárigati sun nura. Guenlé hénrenguhaali nun íbini nadaürün aban ban luagu nugudi. Kei le segeli lan núhabu ladüga aban sandi le gíribei artrosis, íbini aban katei le ménrengunti, guenlé güreweihali nun nadügüni”. Ariñagati Harold, le meha eseriwidubei Betelirugu: “Anihein dan aba nagañidun ladüga siñá naali lan katei le meha gayara nubéi adüga. Héretina meha ani hínsiñeti meha nun náhurerun béisbol. Dan meha le wáhureruña lan, súnwandan meha hariñagun nánigu paaná: ‘Sügügüda huméi bali lun Harold, ladüga ligíaba adüga lun wagañeiruni huraraü!’. Ani guentó siñá ni lun nachüürüni bali”.

6. a) Ka burí katei gayaraabei ladügün lun heferidiruni íbirigu derebuguhaña haguraasun? b) Ka burí katei lunbei gabaroun hamani íbirigu ha derebuguhaña lun hasubudiruni anhein mosu lubéi hígiruni habugahan? (Ariha huméi giñe ariñahani le tídanbei garüdia to, le gíribei “Lunti san nígiruni nabugahan?”).

⁶ Gayaraati heferidiruñein lan huguraasun ladüga siñahali lan hadügüni sun katei le meha hadügübei hábugua. Másiñati ladüga lan megei humá ídemuei lun hadügün ítaga katei, adügatiti lira lun megei humá híderawagun o háguyun hábiñoun somu hádangiñe hisaanigu. Háfuga ladüga luriban hátuadi, o heferidiruñein lan harihin ani siñahali habugahan karü o hidin lidoun somu fulasu hábugua. Gayaraati ladügün katei le lun hasandirun íruni. Gama lumoun, líderagubadün haritaguni gebegi humá lun Heowá luma houn amu lau sun siñá lan hadügüni katei hábuguarügü, hawinwandun hábugua o habugahan. Gayaraati hachoururuni gunfuranda lani Heowá sun le hasandirubei. Létima súdinibei lun Heowá, le wasandirubei tidan wanigi luma lueirin ínsiñeni le wasandirubei luagu luma hawagu wábirigu (1 Sam. 16:7).

7. Kaba íderaguaña gürigia derebuguhaña anhein hiru habéi dan le hasaminarun mawinwandunhaña lanme lun harihini lagumuchagüle ubóu le?

⁷ Ábaya katei le gayaraabei lírudagüdüniña gürigia ha derebuguhaña, hasaminarun luagu mabagaridunhaña lan lun harihini lagumuchagüle ubóu le. Anhein sandigua hubéi hungua ítara, líderagubadün hasaminarun luagu larufuduñein lan Heowá luguraasun lubaragiñe lagünrinchaguni ubóu wuribati le (Isa. 30:18). Le lébunabei gaguraasun lan Heowá, lugundun líchuguña lan dan houn míñunu gürigia lun hasubudiruni ani seriwi hagíame lun (2 Fe. 3:9). Ligíati danme le hasandiragun hungua lau íruni, samina humá hawagun sun gürigia —íbini hawagu hiduheñu— ha lúnbaña hasagarun buiti lídangiñe luguraasun Heowá lubaragiñe lagünrinchaguni ubóu le.

8. Ka gayaraabei lasuseredun dan le wuriba lan hasandiragun íbirigu derebuguhaña houngua o dan le anihein lan gáriti hawagu?

⁸ Dan le wuriba lan wasandiragun woungua dandu nibureintiña kei gürigia ha derebuguhaña, másiñati wariñagun o wadügün somu katei le gayaraabei wasakürihan lárigiñe (Apur. 7:7; Sant. 3:2). Ligía meha asuseredubei lun aban wügüri úaraguati le gíribei Hobu. Adügati lasufurirun lun ladimurehan lau “anarimeni” (Hob. 6:​1-3). Luagu le aban oubaü, gayaraati ladügün sandi o árani le wátubei lun wayanuhan lau dimurei burí le mayusurunñaha wamagili o wadügün katei le méchuntiwa adügei. Furanguti moun lumuti lan layusurúniwa aweiyaduni o luriban átuadi lun warofudun o wamuriahan hámagiñe amu lun hadügün lóugiñe le hayaraabei adüga wawagu. Ani anhein rúhadiwa lubéi fe luagu yúsuhadiwa lan dimurei le abuleseihati, lunti wamuriahan ferudun lau lóufudagun (Mat. 5:​23, 24).

KA LUNBEI HADÜGÜNI GÜRIGIA DEREBUGUHAÑA LUN HAKIPURUNI HAGUNDAN

9. Ka uagu buidu lubéi lun hígirun lun híderawagun? (Ariha humóun giñe iyawaü).

⁹ Ígira humá lun híderawagun (Gal. 6:2). Gayaraati hénrengu lan hun hánharun lun ídemuei le ichugúbei hun. Ariñagatu aban íbiri gíritu Gretl: “Anihein dan hénrengu lan nun nánharun lun níderawagun, ladüga mabuseerun nan aban nan ihürügu houn amu. Barüti saragu dan lun nafurendeirun arufuda ǘnabuguni luma lun nánharun luagu megei nan ídemuei”. Lau sun lira, dan le hánharun gürigia derebuguhaña lun híderawagun, híchuguña chansi houn amu lun hasandiruni ugundani le lanügübei gíchigadi (Adü. 20:35). Gúndaabadün giñe danme le harihini weiri lan hínsiñe houn amu ani nidiheri hamá huagu.

10. Ka uagu moun lubéi habulieiduni íbirigu derebuguhaña harufudun geteingiradi hamá? (Ariha humóun giñe iyawaü).

¹⁰ Arufuda humá geteingiradi (Kol. 3:15; 1 Tesa. 5:18). Dan le hadügün amu gürigia katei buiti wawagu, sanditiwa eteingiruni tidan wanigi, íbini anihein lan dan wabulieiduni weteingiruniña ha íderagubaliwa. Láurügü wáhayachun hawagun o wariñagun houn “seremei”, ladügüba le lun hasandirun weiri lan weteingiruniña luagu le hadügübei wawagu. Ariñagatu Leah, to óunigirubaliña íbirigu wéiyaaña Betelirugu: “Anuhoun aban íbiri ígiratu tirahüñü gárada lánina eteingiruni nubá. Lau sun fiúrügüñein lan dimurei tidan, buin tiña lau saragu ínsiñeni. Hínsiñeti katei le nun! Wéiriti nugundan dan le narihini weiri lan lebegi le nadügübei tuagu tun”.

11. Ida luba gayara lan híderaguniña gürigia derebuguhaña amu? (Ariha humóun giñe iyawaü).

¹¹ Íderagua humaña amu. Dan le hayusuruni hidaani luma here lun híderaguniña amu, adügati le lun masaminarun humá saragu luagu hiturobulin. Ariñagati aban abürüdǘni áfürikana, ítara haña lan gürigia ha derebuguhaña kei aban líburu-agei to buinboun lau lichú aau. Lau sun lira, anhoun maliihan hamá gürigia líburu burí to tídanboun líburu-agei mafurendeirunbaña ni kata tídangiñe. Ligíati, ayanuha humá hama nibureintiña ani arufuda humeime le hasubudirubei houn. Adüga humá álügüdahani houn ani aganba humañame. Afuranguagüda huméi houn ka lan uagu mosu lubéi gaganbadi hamá lun Heowá súnwandan lugundun ligíaba anüga ugundani houn. Ani chóuruti gúndaabei lan hasandiragun hungua lau híchugun gurasu luma dǘgüdaguaü houn nibureintiña (Sal. 71:18).

12. Ka füramase lubéi Heowá houn lubúeingu ha derebuguhaña lidan Isaíasi 46:4? (Ariha humóun giñe iyawaü).

¹² Amuriaha humá erei luma Heowá. Lau sun anihein lan dan labuchadun huagu, ánheinti Heowá “mabuchadaditi luagu” (Isa. 40:28). Magumuchaditi lubafu Heowá, yúsuti lídangiñe ubafu ligía lun líchugun erei houn lubúeingu úaraguatiña ha derebuguhaña (Isa. 40:​29-31). Le linarün katei, füramaseti líderagubaña lan (aliiha huméi Isaíasi 46:4). Ani súnwandan lagunfuliruni Heowá le füramase lubéi (Hos. 23:14; Isa. 55:​10, 11). Sagü wasandiruni línsiñehabu luma lídehan lidan wabagari, sanditiwa aban lanarime ugundani.

13. Según le lariñagubei 2 Korintuna 4:​16-18, ka lunbei waritaguni? (Ariha humóun giñe iyawaü).

¹³ Haritagua huméi málühali lan sandi luma aweiyaduni agumucha. Dan le gunfuranda wawani mámabei lan lun súnwandan aban katei wuribati, íderagua lumutiwa lun wawandun. Ani chóurugüda tumuti Bíbülia woun málühali lan sandi luma aweiyaduni agumucha (Hob. 33:25; Isa. 33:24). Ma lueirin wagundan lau wasubudiruni miábingili lan dan le buídutimaabei lidan wabagari, awanhagua agurabahei! (Aliiha huméi 2 Korintuna 4:​16-18). Ida lubati gayara lan híderaguniña lílana damuriguaü íbirigu derebuguhaña?

IDA LUBA WÍDERAGUNIÑA GÜRIGIA DEREBUGUHAÑA?

14. Ka uagu súdini lubéi wagúarun ani bisida wamañame íbirigu ha derebuguhaña?

¹⁴ Gayaraati woudin ebeluha hamoun íbirigu derebuguhaña o wagúarun houn (Ebü. 13:16). Gayaraati hasandiragun íbirigu ha derebuguhaña houngua hábugua. Ariñagati aban íbiri le gíribei Peterc: “Anihein dan nasandirun saragu íruni luma igañi ladüga siñá lan náfuridun múnadagiñe ani míbeti katei le gayaraabei nadügüni”. Dan le woudin ebeluha hamoun íbirigu ha derebuguhaña, arufuda wamuti houn berese wamá hau ani hínsiñe hamá woun. Lau sun lira, másiñati haritagua wamá anihein lan dan wadügün aransehani lun woudin ariha aban íbiri o lun wagúarun lun ani aba wabulieidun wadügüni. Kei le beresegu wabéi sun wagía, kaba íderaguawa lun wetenirun lun katei le súdinitimabei, kei burí woudin ebeluha hamoun íbirigu ha derebuguhaña? (Fili. 1:10). Lun mabulieidun wamani wagúarun houn gayaraati wabürüdüni. Ani dan le busén wamá woudin arihaña, lunti giñe wabürüdüni kaba lan weyu luma kaba lan oura wadügei.

15. Ka burí katei gayaraabei hadügüni nibureintiña úara hama íbirigu ha derebuguhaña?

¹⁵ Anhein nibureingidibu lubéi, másiñati álügüdagua ban bungua ka burí lan katei uágubei gayaraabei lan bayanuhan hama gürigia ha derebuguhaña o ka burí lan katei gayaraabei hadügüni úara. Masaminarabá saragu luagu kaba lan badüga, ábanrügü ban umadaü le buiti (Ari. 17:17). Ayanuhabá hama lubaragiñe luma lárigiñe adamuridaguni. Gayaraati bariñagun houn lun habahüdaguni bun ka lan bérusu tídangiñeti Bíbülia hínsiñetimabei houn, o lun habahüdagun somu sügǘ halületi le hadügübei dan meha le nibureingiña. Gayaraati giñe bagunbirahaniña lun harihini programa lánina JW Broadcasting^® úara buma. Gayaraati giñe bíderaguniña arariragüdóun agumeiraguagüdüni to iseritimagiruboun lidoun hagagamurun o tidoun hani tablet. Ariñagatu aban íbiri gíritu Carol: “Agunbirahabaña íbirigu derebuguhaña adüga katei le hínsiñetimabei bun. Íbini aweiyadeina niña lan, hínsiñegili nun nagundaarun lau ibagari. Hínsiñeti nun nidin agañeiha, eiga, o aríaguei katei buíduburiti le ladügübei Heowá”. Ariñagatu giñe aban íbiri gíritu Maira: “Gamadaguatina tuma aban íbiri 90 irumu tau, wéiyaaru nuéi 57 irumu. Ani masaminaruntina saragu luagun lira lugundun sügütiwa dan úara éheraha luma aríagua pelikula. Danti le wagagibudagun luma turobuli aba wíderagun wámagua”.

16. Ka uagu buidu lubéi wasagarun lídangiñe wadaani lun woudin hama íbirigu ha derebuguhaña ariha surusia?

¹⁶ Woudin hama ariha surusia. Gayaraati woudin hama ariha surusia, redei wagía hama lun wachoururuni buidu lan houserúniwa ani resibi hamani ídemuei le hemegeirubei (Isa. 1:17). Gayaraati giñe wabürühani le lariñagubei surusia houn. Ariñagatu aban íbiri gíritu Ruth: “Dan le nábuguarügü lan nidin, móuserun hamutina surusiagu buidu. Anihein dan hariñagun katei nun kéiburi ‘Lídanrügüñein bichügü sandi le; aweiyaduni buágubei’. Ánheinti dan le gapaaná nan, óusera hamutina buidu. Wéiriti neteingiruniña íbirigu ha asagarubaña lídangiñe hadaani lun houdin numa”.

17. Ka burí amu katei gayaraabei wadügüni lun wíderaguniña íbirigu ha derebuguhaña lun hapurichihan wama?

¹⁷ Wapurichihan úara hama. Anihein dan mere hamá íbirigu ha derebuguhaña lun háfuridun apurichiha tidan burí muna. Saminaadiwa san wagunbirahaniña lun hapurichihan wama lidan guririguaü? Gayaraati wanügün aban haláü houn lun hañuurun. O wagunbirahaniña lun houdin íchiga aturiahani wama, gayaraati giñe wíchuguni aturiahani hábiñe. Gayaraati hadügün wéiyaaña lidan afiñeni aransehani lun hábiñegiñe lan íbirigu derebuguhaña ha ladügǘwa adamuridaguni lun apurichihani lun ménrengun lan houn háfuridun apurichiha. Gúndaabei Heowá lau furumiñeguarügü áfaaguni le wadügübei lun wíderaguniña íbirigu ha derebuguhaña (Ari. 3:27; Rom. 12:10).

18. Kaba wariha lidan leweñegua aturiahani?

¹⁸ Furendeihadiwa lidan aturiahani le luagu weiri lan hebegi íbirigu ha derebuguhaña dandu lun Heowá kei houn lílana damuriguaü. Inarüni barüti lan aweiyaduni lénrengunga, lau sun lira, gayaraati wakipuruni wagundan lau lídehan Heowá (Sal. 37:25). Ma lueirin wagundan lau wasubudiruni machülügili lan dan le buídutimabei lidan wabagari, anitegua dan ligía! Ánheinti wagía lubéi óunigirubalin aban waduhe le derebuguhali, aban wasaani, o aban wamada le sánditi, kaba íderaguawa lun meferidirun wamani wagundan? Warihubei óunabagülei lidan leweñegua aturiahani.