¿Kantzij komä chë ye cristianos jontir ri nkiʼij chë ye cristianos?
¿ATAMAN rït jaruʼ winäq ri ye kʼo chwäch jontir le Ruwachʼlew nkiʼij chë ye cristianos? Ri Atlas of Global Christianity nuʼij chë pa junaʼ 2010 ye kʼo wä jun ye 2,300 millones, ri kijachon kiʼ chkipan más 41,000 religiones ri jalajöj nkiʼän chqä ri nkinmaj. Ye kʼa, rma kan kʼïy kiwäch religiones ye kʼo ri nkiʼij chë ye cristianos, ye kʼïy winäq xa nsach chkiwäch y ma kitaman ta achkë nkiʼän. Rkʼë jbʼaʼ nkiquʼ reʼ: «¿Kan ye cristianos komä jontir ri yebʼin chë ye cristianos?».
Tqayaʼ jun tzʼetbʼäl ri xtqrtoʼ rchë nqʼax más ya reʼ pa qajolon. We rït nawajoʼ yatok chpan jun chik tinamït, ¿achkë rubʼanik nakʼüt achkë atinamit? ¿Xkanmäx komä xa xuʼ rkʼë ri xtaʼij? Manä, rït xtkʼatzin xtakʼüt jun wuj ri akuchï nqʼalajin achkë atinamit. Ke riʼ chqä nbʼanatäj kikʼë ri cristianos. Rchë yatok jun kantzij cristiano ma xa xuʼ ta nkʼatzin naʼij chë nanmaj chrij Cristo, xa kan nkʼatzin nqʼalajin chawij chë kan ke riʼ. Tqatzʼetaʼ achkë rubʼanik nqʼalajin chrij jun winäq chë kantzij chë cristiano.
Ri tzij cristiano xchap pä ruksaxik taq qʼaxnäq chik jun 10 junaʼ kamnäq Jesús. Lucas, jun ri xtzʼibʼan jun peraj che rä le Biblia, xtzʼibʼaj reʼ: «Chlaʼ Antioquía, Dios xuʼän chë pa naʼäy mul xbʼix cristianos chkë rutzeqelbʼëy Jesús» (Hechos 11:26). Ye kʼa, ¿achkë ntel chë tzij yatok rutzeqelbʼëy Jesucristo? Ri Diccionario Teológico del Nuevo Testamento nuʼij: «Ri yatok rutzeqelbʼëy Cristo ntel chë tzij naksaj akʼaslemal rchë naʼän ri xuʼij qa ryä». Achiʼel nqatzʼët, jun kantzij cristiano ma nukʼewaj ta nusmajij jontir ri rubʼin chqä rukʼutun qa Jesús.
¿Ye kʼo komä ri nkiʼän riʼ chkikojöl ri winäq ri nkiʼij chë ye cristianos? ¿Achkë xuʼij Jesús chë xtkʼutü ye achkë riʼ ri kantzij rutzeqelbʼëy? Rchë natamaj achkë nuʼij le Biblia chrij riʼ, taskʼij kiwäch ri cinco artículos chik. Jojun chkë re artículos reʼ nunukʼuj rij jun naʼoj ri xuʼij qa Jesús ri xtkʼüt ye achkë riʼ ri kantzij rutzeqelbʼëy. Chqä xtqatzʼët achkë xkiʼän ri cristianos pa naʼäy siglo, y chrij riʼ xtqatzʼët achkë chë cristianos ri ye kʼo pa qaqʼij komä nkiʼän chqä ya riʼ.