«We kan xtiʼän ri xinkʼüt chiwäch»
«We kan xtiʼän ri xinkʼüt chiwäch, xtqʼalajin chiwij chë kantzij yïx ntzeqelbʼëy; chqä xtitamaj ri kantzij, y ri kantzij xkixurköl» (JUAN 8:31, 32).
¿Achkë xrajoʼ xuʼij Jesús kikʼë re tzij reʼ? Jesús najin wä ntzjon chkij ri naʼoj ri xkʼüt chkiwäch ri rutzeqelbʼëy. Ye kʼa, xuʼij chqä chë ri naʼoj ri xerukʼüt kan rkʼë wä Dios petenäq wä. Ryä xuʼij: «Yë ri Ntataʼ ri xitaqö pä ri bʼiyon pä chwä achkë kʼo chë nbʼij» (Juan 12:49). Kʼo jmul, taq xchʼö rkʼë Jehová Dios, ri Rutataʼ, Jesús xuʼij reʼ che rä: «Ri achʼaʼäl rït ya riʼ ri kantzij». Rma riʼ, taq xerukʼüt naʼoj, kʼïy mul xnataj ri xuʼij Dios chkë rusamajelaʼ ojer (Juan 17:17; Mateo 4:4, 7, 10). Rma riʼ, ¿achkë rubʼanik nkikʼüt ri kantzij taq cristianos chë najin nkiʼän ri xkʼüt qa ryä? Ryeʼ nkiʼän riʼ taq nkinmaj chë le Biblia ya riʼ Ruchʼaʼäl Dios chqä taq nkismajij ri naʼoj ye kʼo chpan.
Ri xkiʼän ri naʼäy taq cristianos. Achiʼel Jesús, ri apóstol Pablo chqä kan kowan wä ruqʼij Ruchʼaʼäl Dios chwäch. Ryä xuʼij reʼ: «Ronojel ri kʼo chpan ri Loqʼoläj taq Wuj kan rkʼë Dios petenäq wä y nkʼatzin» (2 Timoteo 3:16). Chqä chkë ri achiʼaʼ ri yekikʼüt wä naʼoj chpan ri congregación xbʼix chkë chë «ma kekikʼüt ta naʼoj ri ma rkʼë ta Dios ye petenäq wä» (Tito 1:7, 9). Chqä xbʼix chkë ri cristianos chë tkichajij kiʼ chkiwäch «kichʼobʼonik ri winäq» chqä chwäch «naʼoj ri xa ye tzʼukun chqä majun ta kiqʼij [...]; naʼoj ri xa kikʼwan kiʼ kikʼë ri costumbres yekiʼän ri winäq, ri xa kikʼë ri winäq ye petenäq wä y ma rkʼë ta Cristo» (Colosenses 2:8).
¿Achoq chkiwäch kʼo ruqʼij le Biblia komä? Chpan ri Constitución dogmática sobre la divina revelación —ri ütz xtzʼet rma ri Vaticano pa junaʼ 1965 chqä nksäx chpan ri Catecismo de la Iglesia Católica— nuʼij chë «ri Iglesia ma xa xuʼ ta chpan ri Loqʼoläj Wuj nresaj wä pä jontir ri nunmaj. Rma riʼ, che kaʼiʼ —ri Naʼoj ri kan ojer kʼo pä chqä ri Loqʼoläj Wuj— kʼo chë junan nyaʼöx kiqʼij». Chpan ri revista Maclean’s, jun ixöq ri nekʼwan bʼey chpan ru-religión chlaʼ Toronto (Canadá), xuʼij: «¿Achkë rma kʼo chë nqasmajij ri xuʼij qa jun achï pa más dos mil junaʼ qa? Röj chqä ye kʼo utziläj taq naʼoj qkʼë. Ye kʼa ma kan ta yekʼatzin chik we ronojel mul nkʼatzin nqasmajij ri xuʼij qa Jesús chqä ri nuʼij ri Loqʼoläj Wuj».
Ri New Catholic Encyclopedia nuʼij reʼ chkij ri testigos de Jehová: «Jontir ri nkinmaj ryeʼ chpan le Biblia kesan wä pä, y kan nkismajij ri naʼoj ye kʼo chpan». Majanäj ta, taq jun ixöq testigo de Jehová xchäp tzij rkʼë jun achï chlaʼ Canadá, ri achï chanin xuʼij apü reʼ che rä: «Rïn ntaman chik yïx achkë riʼ rïx». Y taq ri achï xkʼüt apü ru-Biblia ri Testigo, xuʼij reʼ: «Ri wuj ri akʼwan pan aqʼaʼ ya riʼ nkʼutü yïx achkë riʼ rïx».