Ri ángel Gabriel nbʼerchʼaʼej María

María jun qʼopoj aj Nazaret, jun tinamït ri kʼo Galilea. Ryä rfamiliar wä Elisabet y xtkʼleʼ wä rkʼë José, jun carpintero. Taq Elisabet kʼo wä 6 ikʼ pa yabʼil, ri ángel Gabriel xkʼüt riʼ chwäch María y xuʼij reʼ che rä: «Xbʼä qʼij María, Jehová kʼo ütz xtyaʼ pä pan awiʼ». Ryä ma xqʼax ta chwäch ri xuʼij Gabriel. Rma riʼ ri ángel xuʼij: «Xkakanaj pa yabʼil y xtjeʼ jun awal, y kʼo chë Jesús rbʼiʼ xtayaʼ. Ryä xtbʼeʼok rey, y Rqʼatbʼäl Tzij majun bʼëy xtkʼis ta».

María xuʼij: «Rïn ma yïn warnäq ta rkʼë jun achï. ¿Achkë ta rma njeʼ jun wal?». Gabriel xuʼij: «Jehová jontir nkowin nuʼän. Ryä xtyaʼ pä ri loqʼoläj rchqʼaʼ pan awiʼ rchë xtbʼejeʼ jun awal. Elisabet, ri afamiliar, kʼo chik chqä pa yabʼil». Rma riʼ María xuʼij: «Yïn rsamajel Jehová. Tbʼanatäj kʼa wkʼë ri xaʼij qa».

María xbʼertzʼetaʼ Elisabet chpan jun tinamït ri kʼo pa taq jyuʼ. Taq xapon chqä xchʼö apü, Elisabet xnaʼ chë rneʼy xslon. Dios xyaʼ pä ri loqʼoläj rchqʼaʼ pa rwiʼ Elisabet rma riʼ xuʼij: «María, Jehová kʼïy ütz ryaʼon pä pan awiʼ. Kowan rqʼij chi nwäch rïn chë rït, ri rteʼ Wajaw, yapë chë ntzʼetik». María xuʼij: «Nyaʼ rqʼij Jehová rkʼë ronojel wan». Ryä oxiʼ ikʼ xkanaj qa rkʼë Elisabet. Chrij riʼ, xtzolin chrachoch.

Taq José xtamaj chë María kʼo chik pa yabʼil, ma xrajoʼ ta chik xkʼleʼ rkʼë. Pero jun ángel xuʼij reʼ che rä chpan jun achïkʼ: «Ma taxiʼij ta awiʼ yakʼleʼ rkʼë María, rma majun ta jun mak rbʼanon». Rma riʼ José xkʼleʼ rkʼë María chqä xkʼwaj äl chrachoch.