Tqakʼuqbʼalaʼ qakʼuʼx pa qamoloj

1. ¿Achkë rma nqayaʼ qa-comentarios pa qamoloj?

¿ACHKË rma röj nqbʼä pa qamoloj? Rma nqajoʼ nqayaʼ ruqʼij Jehová (Sal. 26:12; 111:1). Chpan ri qamoloj chqä nqakʼuqbʼalaʼ qakʼuʼx chqawäch chpan re qʼij reʼ ri kan kʼayewal rubʼanon (1 Tes. 5:11). Rma riʼ taq yeqayaʼ qa-comentarios nqayaʼ ruqʼij Dios y nqakʼuqbʼalaʼ qakʼuʼx.

2. ¿Ajän ütz nqayaʼ qa-comentarios pa qamoloj?

² Ronojel semanas nqkowin nqayaʼ qa-comentarios pa qamoloj. Ri qʼij sábado o domingo nqkowin nqajtobʼaʼ qaqʼaʼ taq najin nqatjoj qiʼ chrij ri qawuj Ri Chajinel. Y chpan ri qamoloj chkikojöl qʼij ütz nqayaʼ qa-comentarios chpan ri peraj «Tqakanuj bʼeyomäl chpan le Biblia», chpan ri Tjonïk chrij le Biblia pa congregación chqä chpan nkʼaj chik peraj ri akuchï nbʼan kʼutunïk chqë.

3. a) ¿Achkë kaʼiʼ kʼayewal nqïl taq yeqayaʼ qa-comentarios? b) ¿Achkë rubʼanik nqrtoʼ Hebreos 10:24, 25?

³ Jontir nqajoʼ nqayaʼ ruqʼij Jehová chqä nqakʼuqbʼaʼ kikʼuʼx qachʼalal kikʼë qa-comentarios. Ye kʼa kʼo jojun kʼayewal yeqïl. Jun chkë riʼ ya riʼ chë kʼo mul nqaxiʼij qiʼ nqaʼän comentar o rkʼë jbʼaʼ kan kʼïy mul nqajtobʼaʼ qaqʼaʼ y ma ronojel ta mul nyaʼöx qa-comentarios. Chpan ri wuj ri xtzʼibʼaj Pablo chkë ri hebreos nqïl jun naʼoj ri kowan xtqrtoʼ. Pablo xuʼij chë ri qamoloj kan kowan kiqʼij, y xkʼüt achoq chrij nkʼatzin nqayaʼ wä qan: «Nkʼatzin nqakʼuqbʼalaʼ qakʼuʼx chqawäch» (taskʼij ruwäch Hebreos 10:24, 25). Taq ma nqamestaj ta chë nqkowin nqakʼuqbʼaʼ kikʼuʼx qachʼalal tapeʼ ma kan ta achkë rubʼanik qa-comentarios yeqayaʼ, ma kan ta xtqaxiʼij chik qiʼ nqajtobʼaʼ qaqʼaʼ. Ye kʼa we ma ronojel ta mul nyaʼöx qa-comentarios, kiʼ qakʼuʼx tqabʼanaʼ kikʼë ri nkʼaj chik ri nyaʼöx chkë (1 Ped. 3:8).

4. ¿Achkë oxiʼ naʼoj xtqatzʼët chpan re tjonïk reʼ?

⁴ Chpan re tjonïk reʼ xtqatzʼët naʼäy achkë rubʼanik nqakʼuqbʼalaʼ qakʼuʼx chqawäch taq ma yoj kʼïy ta pa congregación, rma kan kʼïy comentarios nqkowin yeqayaʼ. Chrij riʼ xtqatzʼët achkë rubʼanik nqaʼän riʼ chpan jun nüm congregación, ri akuchï kan ye kʼïy qachʼalal nqajoʼ nkiyaʼ ki-comentarios. Y, pa rukʼisbʼäl, xtqatzʼët achkë ütz nqaʼij chpan qa-comentarios rchë nqakʼuqbʼaʼ kikʼuʼx ri qachʼalal.

TQAKʼUQBʼALAʼ QAKʼUʼX TAPEʼ MA YOJ KʼÏY TA PA CONGREGACIÓN

5. ¿Achkë ütz nqaʼän we ma yoj kʼïy ta pa qamoloj?

⁵ Taq pa jun congregación ma ye kʼïy ta qachʼalal ye kʼo, ma ye kʼïy ta nkiyaʼ ki-comentarios. Rkʼë jbʼaʼ ri qachʼalal ri najin nqʼaxan ri moloj nkʼatzin nuyoʼej na rchë ri qachʼalal nkijtobʼaʼ kiqʼaʼ. Ya riʼ nuʼän chë kʼo mul xa nikʼo qakʼuʼx pa qamoloj. ¿Achkë ütz nqaʼän we ya riʼ nbʼanatäj pa qa-congregación? Tqayaʼ qaxkïn, rchë ke riʼ xtqkowin xtqayaʼ kʼïy qa-comentarios. We xtqaʼän riʼ, ri nkʼaj chik chqä xtkajoʼ xtkiʼän comentar.

6, 7. ¿Achkë ütz naʼän rchë ma kan ta xtaxiʼij awiʼ xtayaʼ a-comentarios?

⁶ Ye kʼïy qachʼalal kan nkixiʼij kiʼ taq xa xuʼ nkiquʼ chë xtkiyaʼ ki-comentarios pa qamoloj. We ke riʼ nbʼanatäj awkʼë rït, ¿achkë ütz naʼän? Ütz nakanuj jojun naʼoj ri xkaturtoʼ rchë ma xtaxiʼij ta awiʼ, ke riʼ xtakʼuqbʼaʼ más kikʼuʼx qachʼalal taq xtayaʼ a-comentarios.

⁷ Jun chik ri xkaturtoʼ ya riʼ nanukʼuj kij nkʼaj chik naʼoj ri ye lenäq chpan ri qawuj Ri Chajinel.b Jun chkë ri naʼoj riʼ ya riʼ tatjoj äl awiʼ taq yabʼä pa qamoloj (Prov. 21:5). Taq ataman chik achkë xttzʼet pa qamoloj ma kʼayewal ta xtuʼän chawäch xtajtobʼaʼ aqʼaʼ. Jun chik naʼoj ri xkaturtoʼ ya riʼ nayaʼ koköj taq a-comentarios (Prov. 15:23; 17:27). We ma kʼïy ta más xtaʼij, ma kan ta xtaxiʼij awiʼ. Chqä, ri qachʼalal más xtkanaj qa pa kijolon ri naʼoj xtaʼij chwäch ri kan kʼïy natzjoj chpan jun nüm a-comentario. We rït yeʼayaʼ koköj taq comentarios chqä pan awan ntel pä ri naʼij, ri qachʼalal xtkitzʼët chë xatjoj awiʼ chqä chë xqʼax chawäch ri naʼoj najin nkʼut.

8. ¿Achkë nunaʼ Jehová taq nqatäj qaqʼij rchë nqayaʼ qa-comentarios?

⁸ ¿Achkë ütz naʼän we tapeʼ xasmajij yän jojun chkë re naʼoj reʼ xa xuʼ jun o kaʼiʼ mul yakowin nayaʼ a-comentarios? Ma tamestaj ta chë Jehová nuloqʼoqʼej chë rït najin natäj aqʼij rchë naʼän riʼ (Luc. 21:1-4). Ye kʼa Jehová ma nukʼutuj ta chawä ri ma yakowin ta naʼän (Filip. 4:5). Rma riʼ tatzʼetaʼ jaruʼ yakowin naʼän comentar y takʼutuj awchqʼaʼ che rä Jehová. Ri ütz naʼän ya riʼ natjoj äl awiʼ chrij jun koʼöl a-comentario.

TQAKʼUQBʼALAʼ QAKʼUʼX CHPAN JUN NÜM CONGREGACIÓN

9. ¿Achkë rkʼë jbʼaʼ xtbʼanatäj chpan jun nüm congregación?

⁹ We chpan a-congregación kan ye kʼïy publicadores ye kʼo, kʼo chik jun ri naqʼaxaj. Rkʼë jbʼaʼ majun ta jun a-comentario nayaʼ rma kan ye kʼïy qachʼalal nkijtobʼaʼ kiqʼaʼ. Tqaquʼ rij ya Danielle, jun qachʼalal ixöq. Ryä kan nqä chwäch nuyaʼ ru-comentarios pa qamoloj.c Chwäch ryä, ri comentarios kan kowan kiqʼij, rma nunaʼ chë najin nuyaʼ ruqʼij Jehová, najin nukʼuqbʼaʼ kikʼuʼx ri nkʼaj chik chqä najin nuyaʼ qa pa rujolon ri naʼoj ri ye kʼo chpan le Biblia. Ye kʼa taq xqʼax chpan jun nüm congregación, ma kan ta xyaʼöx chik ru-comentarios, y kʼo mul nixta jun. Ryä nuʼij: «Kowan xibʼison. Xinnaʼ chë achiʼel ta xesäx jun nsamaj pa rutinamit Jehová. Taq ma nyaʼöx ta jun a-comentario rkʼë jbʼaʼ naquʼ chë kan chubʼanik najin nbʼan chawä».

10. ¿Achkë ütz naʼän rchë xtyaʼöx jun a-comentario pa qamoloj?

¹⁰ ¿Kʼo komä jmul anaʼon rït achiʼel xnaʼ ya Danielle? We ke riʼ, rkʼë jbʼaʼ xaquʼ chë ri más ütz ya riʼ xa xuʼ nayaʼ axkïn y ma najtobʼaʼ ta aqʼaʼ. Ye kʼa ma tikʼo ta akʼuʼx najtobʼaʼ aqʼaʼ. ¿Achkë ütz naʼän rchë xtyaʼöx jun a-comentario? Ma xa xuʼ ta tatjoj awiʼ chrij jun a-comentario, rchë ke riʼ, we ma xtyaʼöx ta chawä chpan ri naʼäy taq peraj xtyaʼöx chpan ri nkʼaj chik. Taq xtatjoj awiʼ chrij ri qawuj Ri Chajinel, taquʼ achkë rubʼanik rukʼwan riʼ rubʼiʼ ri tjonïk kikʼë ri peraj. Ke riʼ ronojel mul kʼo jun naʼoj xtatzjoj. Jun chik ri ütz naʼän ya riʼ natjoj awiʼ chkij jojun peraj ri kan kʼayewal jbʼaʼ yeʼaqʼalajsaj (1 Cor. 2:10). Rma kan kʼayewal yeʼaqʼalajsaj, ma ye kʼïy ta qachʼalal nkijtobʼaʼ kiqʼaʼ chpan ri peraj riʼ. Ye kʼa ¿achkë ütz naʼän we ma nyaʼöx ta jun a-comentario tapeʼ asmajin chik jojun chkë re naʼoj reʼ? Taq majanä tchapatäj ri moloj ütz yatzjon rkʼë ri qachʼalal ri xtqʼaxan ri tjonïk rchë naʼij che rä akuchï nawajoʼ naʼän comentar.

11. Rkʼë ri nuʼij chpan Filipenses 2:4, ¿achkë ütz nqaʼän?

¹¹ (Taskʼij ruwäch Filipenses 2:4). Rkʼë rutoʼik ri loqʼoläj ruchqʼaʼ Dios, Pablo xuʼij chkë ri cristianos aj Filipos chë tkiquʼ kij ri nkʼaj chik. ¿Achkë rubʼanik nqasmajij re naʼoj reʼ pa qamoloj? Taq nnatäj chqë chë ma xa xuʼ ta röj nqajoʼ nqayaʼ jun qa-comentario.

12. ¿Achkë jun rubʼanik nqtoʼon rchë ri qachʼalal nkiyaʼ ki-comentarios pa qamoloj? (Tatzʼetaʼ chqä ri achbʼäl).

¹² Tqaquʼ rij ya reʼ. ¿Tapeʼ chë taq yatzjon kikʼë awachiʼil ma xa xuʼ ta rït yatzjon, xa kʼa nayaʼ qʼij chkë ryeʼ chqä rchë yetzjon? Ke riʼ chqä jbʼaʼ nbʼanatäj pa qamoloj. Röj nqajoʼ chë jontir qachʼalal nkiyaʼ ki-comentarios. Y jun rubʼanik rchë yeqatoʼ ya riʼ nqayaʼ qʼij chkë rchë nkiʼän riʼ (1 Cor. 10:24). Tqatzʼetaʼ achkë rubʼanik nqtoʼon rchë kan ye kʼïy nkiyaʼ ki-comentarios.

13. ¿Achkë ütz nqaʼän rchë ri nkʼaj chik qachʼalal nkiyaʼ chqä ki-comentarios?

¹³ Jun rubʼanik nqtoʼon, ya riʼ taq yeqayaʼ koköj taq comentarios, rchë ke riʼ ri nkʼaj chik chqä xkekowin xtkiyaʼ ki-comentarios. Ri ukʼwäy taq bʼey chqä ri qachʼalal ri kan kʼïy chik junaʼ kiyaʼon pä ruqʼij Jehová, nkʼatzin nkikʼüt achkë rubʼanik nbʼan riʼ. Jun chik ri ütz nqaʼän ya riʼ ma kʼïy ta naʼoj nqatzjoj chpan jun qa-comentario. We rït natzjoj jontir ri kʼo chpan ri peraj, ri nkʼaj chik ma kan ta achkë xttzjoj chik. Chpan re peraj reʼ kʼo kaʼiʼ naʼoj xqatzʼët. Xqaʼij qa chë nkʼatzin yeqayaʼ koköj taq comentarios chqä ma kan ta kʼïy naʼoj nqatzjoj chpan. Xa ta rït nyaʼöx ri naʼäy comentario chawä rchë re peraj reʼ, ¿achkë rma ma natzjoj ta xa xuʼ jun naʼoj?

14. ¿Achkë nkʼatzin ma nqamestaj ta taq nqaquʼ jaruʼ mul xtqajtobʼaʼ qaqʼaʼ? (Tatzʼetaʼ chqä ri achbʼäl).

¹⁴ Taquʼ kij ri nkʼaj chik taq xtajtobʼaʼ aqʼaʼ rchë nayaʼ jun a-comentario. We ronojel mul nqajtobʼaʼ qaqʼaʼ, rkʼë jbʼaʼ ri qachʼalal ri najin nqʼaxan ri tjonïk xtnaʼ chë chqë röj nkʼatzin nuyaʼ wä, y rkʼë jbʼaʼ ri nkʼaj chik majanä tyaʼöx jun ki-comentario. Chqä, rkʼë jbʼaʼ ryeʼ nkiquʼ chë ma nkʼatzin ta nkijtobʼaʼ kiqʼaʼ (Ecl. 3:7).

15. a) ¿Achkë qanaʼoj nkʼatzin nqakʼüt taq ma nyaʼöx ta jun qa-comentario pa qamoloj? b) ¿Achkë nkʼatzin ma numestaj ta ri qachʼalal ri najin nqʼaxan ri tjonïk? (Tatzʼetaʼ ri recuadro «¿Achkë rubʼanik nakʼwaj bʼey chpan jun peraj ri nbʼan kikʼë kʼutunïk?»).

¹⁵ Taq ye kʼïy qachʼalal nkijtobʼaʼ kiqʼaʼ, rkʼë jbʼaʼ ma kan ta kʼïy comentarios xtyaʼöx chqë. O rkʼë jbʼaʼ nkʼis ri qamoloj y majun ta jun qa-comentario nqayaʼ. Kantzij na wä chë nqbʼison rma riʼ, ye kʼa ma tpë ta qayowal (Ecl. 7:9).

16. ¿Achkë ütz nqaʼän rchë nqakʼuqbʼaʼ kikʼuʼx ri xkiyaʼ jun ki-comentario?

¹⁶ Tapeʼ ma nyaʼöx ta kʼïy a-comentarios, rït ütz nakʼoxaj ki-comentarios ri nkʼaj chik, y taq nkʼis ri moloj naʼij chkë chë kan ütz ri xkiʼän. Rkʼë jbʼaʼ ri xtaʼij chkë kan xtkʼuqbʼaʼ kikʼuʼx qachʼalal achiʼel nawajoʼ naʼän kikʼë a-comentarios (Prov. 10:21). Taq nqaʼij chkë ri nkʼaj chik chë kan ütz xkiʼän che rä ki-comentario, kan nqakʼuqbʼaʼ kikʼuʼx.

NKʼAJ CHIK RUBʼANIK RCHË NQAKʼUQBʼALAʼ QAKʼUʼX

17. a) ¿Achkë ütz nkiʼän ri teʼej tataʼaj? b) Achiʼel xqatzʼët chpan ri video, ¿achkë kajiʼ naʼoj nkʼatzin nqasmajij rchë nqatjoj qiʼ chrij jun comentario? (Tatzʼetaʼ chqä ri nota).

¹⁷ ¿Achkë más nqkowin nqaʼän rchë nqakʼuqbʼalaʼ qakʼuʼx pa qamoloj? We rït ye kʼo koköj taq awalkʼwal, keʼatoʼ rchë nkiyaʼ ki-comentarios (Mat. 21:16). Chpan jojun qamoloj, nnukʼüx kij jojun naʼoj ri rukʼwan riʼ kikʼë ri kʼlan taq winäq chqä ntzjöx achkë rubʼanik nqakʼwaj jun chöj kʼaslemal. Ye kʼa, rkʼë jbʼaʼ kʼo jun o kaʼiʼ peraj ri akuchï ri akʼalaʼ ütz nkiyaʼ ki-comentarios. Chqä ütz niʼij chkë iwalkʼwal achkë rma ma ronojel ta mul xtyaʼöx jun ki-comentario. We naʼij ya riʼ chkë awalkʼwal, ma xkebʼison ta taq xtyaʼöx ki-comentarios ri nkʼaj chik y ryeʼ manä (1 Tim. 6:18).d

18. ¿Achkë ütz nqaʼän rchë ma xa xuʼ ta chqij röj nqtzjon wä chpan jun comentario? (Proverbios 27:2).

¹⁸ Jontir nqkowin yeqayaʼ jaʼäl taq comentarios ri nkiyaʼ ruqʼij Jehová chqä nkikʼuqbʼaʼ kikʼuʼx qachʼalal (Prov. 25:11). Tapeʼ kʼo mul ütz nqatzjoj ri qaqʼaxan röj o kiqʼaxan nkʼaj chik winäq, ma ütz ta nqtzjon más chqij röj (taskʼij ruwäch Proverbios 27:2; 2 Cor. 10:18). Pa rukʼexel riʼ, tqatzjoj jun naʼoj ri nqatamaj qa chrij Jehová, chrij Ruchʼaʼäl o chrij rutinamit (Apoc. 4:11). We ri kʼutunïk rchë jun peraj nuʼij chë tqatzjoj ri nqanaʼ o ri nqatamaj qa chrij ri peraj riʼ, ütz nqaʼän riʼ. Chpan ri jun chik peraj xtqatzʼët achkë rubʼanik nqaʼän riʼ.

19. a) ¿Achkë xtbʼanatäj we nqaquʼ kij ri nkʼaj chik chpan ri qamoloj? (Romanos 1:11, 12). b) ¿Achkë rma nqä chawäch rït nayaʼ a-comentarios pa qamoloj?

¹⁹ Tapeʼ majun ta jun pixaʼ yaʼon chqë chkij ri comentarios yeqayaʼ, jontir nkʼatzin nqatäj qaqʼij rchë nqakʼuqbʼaʼ kikʼuʼx ri nkʼaj chik kikʼë qa-comentarios. Ye kʼo jojun qachʼalal nkʼatzin nkiyaʼ más ki-comentarios. Jojun chik nkʼatzin kiʼ kikʼuʼx nkiʼän rkʼë ki-comentarios yeyaʼöx chqä kikʼë ri nkʼaj chik ri nkijtobʼaʼ kiqʼaʼ. We nqaquʼ kij ri nkʼaj chik chpan ri qamoloj, jontir xtqakʼuqbʼalaʼ qakʼuʼx chqawäch (taskʼij ruwäch Romanos 1:11, 12).