Òköst

Köplōn tö në ṙô in ngam līpöre Salmai sā ṙô ngam tö vënyu: (1) Tö ngòh tölöök tarik min nö pōyen kanihngen. (2) Tö Yāvē min nö öthō nö öt ṙānyen cha nö in minë kanihngen. Nö sitih inlahen? Lonū anga-aṅ tö hī öi löngö mufē öi i alaha ngam nômö ngaich öthō min anga-aṅ nö öt hayööken hī yěi ngatī inlahen. Kilēḵngôre an tö hī min öi ṙamlōn yěi löklōn ò. Öt tö ngö manah pöri angū-ö tö hī min öi öt hěngö kanihngen. (Isa. 66:14) Lonū ang Yāvē tö hī öi meūkkö öp yamih tövai ṙētak ngam ṙētak hī min öi teungen tö ngam nômö tö örheūheu-aṅ hēk örheūheu inrē min öi ṙamlōn. (2 Kòr. 4:16-18) Hayööken hī pöri anga-aṅ töngamuh hòṅ hī öt heūlngöre öi i linöklōn ò. Asuh öp mihôiṅ haköp hī inlahen yik tö chiplö tarik ngam Tēv Yāvē öi imat ngam Paipöl in në ṙētak hī inrē töngamuh? Tö hī yěn faltöre minë kanihngen nö lakūö hī ngaich mihôiṅ öi ṙatö-ellōnre öi in Yāvē tö ò min nö chumkūöṙen tö hī.—Sal. 55:22. w23.04 pěch 14-15 përa 3-4

Kirööngen haköplö in kò-òren öi in nā Yôsěf nā Mariā, pòrô cha-a nö kihngen sön nöng hang chööngö më mahayöng. (Lūk. 2:1-6.) Möthë ik sā ṙētak Mariā nö machuöhtöre chumngëṅtö nö puyòsö. Kētö chööngö ngam rācha aṅ Rōm ang Òköstus nö tölṙô yik tarik nö kūichhöt minë-enyre nö in nup chūökre nö fötnyu. Tökiröng angū-ö lohten nö kanihngen nā Mariā nā Yôsěf nö hang chööngö më mahayöng. Kūö cha 150 Kilomitör ṙò-òlkūö nö kiröön nö lök kui rôngö nö chuh Pētlihëm möthe angū-ö nö kanihngen Mariā. Pī-a cha-a nö mötlö piṙutka tö öp nyīö tö piruka tö Mariā. Lohten cha-a nö ngölōn ‘sitih inlahen ang min Mariā yěn höng el talöökö nö kayôḵ.’ Pirūkö ngam nyīö ang Mariā ngam tö kaheūkö nö Mesaya. Ngaich hòng öre cha-a nö halôngen chööngö ngam mahayöng kūö cha nö akahalōn tö ngam nyīö nö mesaya? Kirööngen kanihngen nā Yôsěf nā Mariā, sön pöri cha-a nöng hang chööngö ngam mahayöng. Hakòlô ngam katöllö cha ang Yāvē nö hateungtökūö Mariā nö i Pētlihëm ngaich in e anga-aṅ nö kayônyö öp nyīö. Ngatī taneungtökūö ngam tö kilē-ěyö imat Paipöl!—Mai. 5:2. w23.10 pěch 8 përa 9; pěch 9 përa 11-12

Pi-a më-eṅ lohten öm tö vöö öm kētö ansöör el mīting. Sitih inlahen öm min yěm ngatī? Mihôiṅ më-eṅ öm yöölen yěm örheūheu öm halēn minë mīting. (Inch. 21:5) Yē meh min akahakūö tö minë töhakööpö, ngaich lööṙen min më-eṅ öm kētö ansöör. Ngaich ngam tahëng hēk inlēnö, nö hòṅ cheūta nup ansöör hī. (Inch. 15:23; 17:27) Yěn cheūta min nup ansöör meh ngaich öktö in e mikahkūö min yip hol meh tö meh öm vayö inlahen öm halēn minë töhakööpö nö el mīting. Lohten pöri ngaich më-eṅ öm hang minë inlēnö, sön ngenre öm ṙömöng vöö yěm kētö tö hěng hēk nët ansöör. Sitih inlahen öm min yěn ngatī? Mihôiṅ man öm ṙātö-ellōnre tö Yāvē nö ṙamlōn tö minë kahëtö meh ansöör. (Lūk. 21:1-4) Pön öt tölṙô hī anga-aṅ öi kētö nup töt kanô-ò re. (Filip. 4:5) Mihôiṅ më-eṅ öm fēkö nup la-en nup töng kanò-òṅ meh, ngaich vë-ekūötēv öm havëkö hinòlṙenre in Yāvē, hòṅ meh öt pa-ekūö. Mihôiṅ sin öm höng kētö öp töhěng tökun ansöör. w23.04 pěch 21 përa 6-8

Asā tu yin më Kristīön tö Pôl nö in më kumyung, më hamöngöre nö halēnken öp kinyungö. Örheūheu ang ngòh töhěngtak kumyung nö hīnöre töp ṙētak ngam kinyungö. Ngatī ṙēngen in ayī-ö öi hòṅ örheūheu öi höngöre töp yanīhi ngam sakāmö Yāvē öi hayutlöre tö ngam lanak elngòh ngam mikah hēk töm hanangenlōn, ngaich sapīövlöre töm mineūka. Ta-a töi ngëichkö inlahenre öi sitih inlahen öi teūngen tö inyöökenre öi löktö im ṙinatö-ellōn, hanangenlōn hēk mineūka inrē. Laklöre an ngam ellōn ngam kumyung yěn hayutlöre anga-aṅ tö ngam lanak elngòh. Ngatī ṙēngen inrē ayī-ö öi laklö ngam ellōnre yěi aṅhav in tö ngam mikah hēk hanangenlōn, ngaich iṙūöhen min ayī-ö löklōn Yāvē hēk tömköröön Yēsū inrē. Yēḵ hī öi īnu tö ngam ṙinatö-ellōn öi holtö ellōnre chöhö Yāvē, ngaich teūngen min ayī-ö tö inkôlò re. (Hep. 11:6) Yēḵ hī min öi īnu tö ngam ṙinatö-ellōn ngaich haköpngöre min öi in ngam machōkūöre ang Yēsū, pòrô nö pōyen nup kanihngen hī. Sitih inlahen öi mihôiṅ asīöp ngam ṙinatö-ellōnre, hòṅ hī öi la-al nup kanihngenre? Mihôiṅ in öi chumkūöṙen ngëichkö inlahen yip prötör sistör töngamuh, yip tö chiplö nö i linökölōn Yāvē pòrô nö hakihtuṙen hēk urěhlö ngam Pūlngö ò inrē nö i nup tinrīkenre. Ngatī inlahen ayī-ö öi öt fachūrit nup kanôlò. w23.06 pěch 10 përa 8-9

Ngam manah ngam ṙināpöre öi hòṅ lak minë mufē elkuilōnre hēk la-enre inrē. Hòṅ ṙāpöre inrē ayī-ö yěi kēken nup tölöök la-en, möthë yěn kihngen nup la-en hī hēk yěi öt kūyulōn inrē öi kēken u. Köpölōn tö ngam ṙināpöre nö ṙòng ngam töhet fanöinylö, lökten in öi hòṅ havëkūö Yāvē tö ngam kumlēḵ yěi vë-ekūötēv. Hòṅ hī min öi asīöp ngih tinrīken. (Lūk. 11:13; Kal. 5:22, 23) Um ngölōn, yěn vai öp ṙētak chu ngaich möl öich la-evṙen. Pön öt hō lohten nö yih sin nup tövai ṙētak ikūö ngih panam. Yēḵ hī min öi hökken öp tövai ṙētak, ngaich lohten min öi öt teungten öi kēken nup chö-öinyre. Lohten öi kihngen öi teungten kēken nup chö-öinyre hēk öt kūyulōn öi ma-ainyre kēken u. Yěm tö ngatī inlahen, ngaich ötkô hòng më-eṅ vī nup tö rahëichyen chö-öinyre im linöklōn ngam Tēv? Yěm hòṅ asīöp nup tövai tinrīken, ngaich mihôiṅ öm löktö in nup töng rahëichyen inlahenre öm hameukten u. Hēk yěm vī chö-öinyre haköpmat Paipöl, ngaich mihôiṅ öm vī öp ṙētakre öm rahëchhöl vë-ekūö Paipöl. w23.05 pěch 29 përa 11-13

Chumkūöṙen ang Yāvē i ngih manā-aṅ sakāmö hòṅ minë la-en nö örheūheu kinëken nö elngam “Talöökö Hanëtö.” Löktö el ngam söngkötön re tī anga-aṅ nö kētö inlēnö hī nö löktö im ṙô re, hòṅ hī ṙôkhöre iṙūöhöröön lök el ngam talöökö. (Isa. 35:8; 48:17; 60:17) Yē ngòh töhěngtak tarik nö kētöre nö Paipöl istötī ngaich ṙētak ò angū-ö nö lök elngam “Talöökö Hanëtö.” Ōtre yip tarik tö iṙūöhen nö lök el ngih talöökö ngaich ōtre yip töng ṙamāngenre. Ōtre pöri yip tarik tö iṙūöhöröön nö elngam talöökö hanöng saha cha nö öl nö teung nö chuh in öp chahuhu re. Asuh öng rih ngam manā-aṅ chahuhu hī? Yip tarik tö maheūkkuvö nö chuh el halīöngö ngaich lök elngam “Talöökö Hanëtö” cha-a nö chuh el ngam “Peretāis ngam Tēv” el halīöngö. (Inm. 2:7) Ngaich yip tarik pöri tö maheūkkuvö nö ing panam ngaich asöltu min cha-a tö ngam tökiröng talöökö nö söl ip manāngen ngam tö 1,000 samyeūheu ngam hē Yēsū min nö hayöng hē yip taṙòkhöre inrē min tarik nö hët. Yē meh lök el ngih tökiröng talöökö töngamuh ngaich um ngëichkö la-uk re. Hanöng saha meh öl teung chuh in öp chahuhu re öm söl ip tufömngöre panam ngaich iṙūöhöröön öm lök in e. w23.05 pěch 17 përa 15; pěch 19 përa 16-18

Yěm fēkö nup tī Yāvē min nö hayööken meh, öt ansökngen min më-eṅ öm kētö ngam nômöre in Yāvē. (Sal. 116:12-14) Ngöṙô ngam Paipöl, “ṙòkhöre nup tölöök inlōnti, nup töteung inlōnti inrē” nö lömöktö in Yāvē. (Yāk. 1:17) Angū-ö ngih tö kiröng nö inlōnti nö kahëtö Yāvē nö kēngö ngam töng hěng maneuk kūöre nö ṙāi ṙinānyi hī! Fēkö inlahen e man tö meh öm ṙòngnyöre kūö talöökö öm löktö in ngam ṙāi ṙinānyi öm teungten hanôlö Yāvē hēk teūngen inrē tö ngam nômö tö örheūheu aṅ. (1 Yôh. 4:9, 10, 19) Kô-en angū-ö nö töt insā-av nö inmeuktö ngam hangenlōn ò. Yēḵ meh pöri min fēkö minë inkòlô re kahëtö Yāvē, ngaich ṙūöhölre min ngam hanangenlōn meh tö ò hēk lōnu inrē min më-eṅ töre hòṅ kētöre löklōn ò.—Chöö. 16:17; 2 Kòr. 5:15. w24.03 pěch 5 përa 8.

Ngaich ön ngih panam töngamuh nöng kū-ö tö im ötlanöökö, sā inlahen mufē Lòt ayī-ö yěi meuk inlahen cha. ‘Kihngen ellōn anga-aṅ nö meuk në ötlanöökö,’ akahalōn inrē tö Yāvē nö kunyahalōn tö u. (2 Pīt. 2:7, 8) Tö pa-ekūö ök Lòt nö tarik ngam Tēv, hangenlōn inrē tö ò. Lökten ò nö öt asīnkö nuk tinīken yik tötlöök tarik. Havīlöng inrē ayī-ö töngamuh tö yip tarik yip töng lōntöre hēk töt milēḵṙen inrē tö minë töhet chööngö Yāvē. Yēḵ hī pöri hòṅ asīöp ngam tölöng pinhë-eṅkūöre tö ngam Tēv, hangenlōn inrē tö ò, ngaich köp min ngam hanëtö hī, pòrô öi el ṙôngö yip tötlöök tarik. Öthō ön min Yāvē nö öt hayööken hī. Nö sitih inlahen? Pōyen nup tövai inlēnö kahūichhöt ò nö imat ngam līpöre Inchōḵ-oṙô. Hòn ngönlöre ngam lōn hī öi iṙūöhen kēken nup tölöök la-en. Ṙòkhöre in min yöölen yěi hang ngih inlēnö, pòrô öi kikōnyö, kikānö, ṙālö hēk tököiny inrē. w23.06 pěch 20 përa 1-2; pěch 21 përa 5

Lohten më-eṅ min hakihtuṙen tī yip aṅ patī re hēk ṙāngen öp kinmānö inrē më-eṅ tö pōi rineūsö kūö lōn meh hòṅ urěhlö minë la-en ngam Tēv. (Mët. 6:33) Yěn ngatī, ngaich öt vāichngö min Yāvē tö minë inlahen meh harööḵngöre. (Hep. 6:10) Meuk ngam ṙô Yēsū inrē min më-eṅ nö teungtakūö yēḵ meh öm harööḵngen re. Ngam tö ngöṙô: “Öt tarīkuvö öp ṙamā-ang patīre, mëmre, kahëmre, kanānöre, yöngre, pihöre, kūönre, panamre, töpòkūö Chu, pòkūö ngam tölöök inhānga inrē; Öp töhēngòng taneūngen min i ngih tūmö . . . nö holtö ötinkôlò; ngaich im töyihihvö panam, nö nômuvö tö-örheūheu-aṅ.” (Māk. 10:29, 30) Sön më-eṅ lohten inrē öm akahaiṙen tö ṙôken nup inkòlôre, nö pōyen tö nup inlahen meh harööḵngen re.—Sal. 37:4. w24.03 pěch 9 përa 5

Ik sā yik Kristīön aṅ in yik Yahūti nö meuk ök tökiröng inyāichö, ngaich yik holmaneuk cha aṅ el ngam maṅ Anti-òk “nö kö i kanô-òṅre, nö hòṅ tīnngö mameukṙen yik holre mī-iyöng Yūtā.” (Inl. 11:27-30) Pòrô cha-a nö marôvat tö më holmaneukre aṅ Yūta, sön pöri cha-a nö öt heūlngöre nö i inyööken cha. (1 Yôh. 3:17, 18) Sitih inlahen öi töngamuh hameuktö ngam neukölōnre tö më prötör sistör yěn faltöre minë tökiröng kanihngen. Mihôiṅ öi ilöö kētöre öi hayööken cha, mihôiṅ öi vë-ekūö më minṙöinylen yěi hòṅ vòlöntīör öi kētöre i nup la-en hēk kētö minë kòntripiusön in ngam la-en tö keūheutngöre chūök, ngaich vë-elkui yip prötör sistör inrē. - Lohten inrē nö ōt öp ṙētak, yip prötör sistör nö öt aṅhav in tö nya-aṅkūö re hēk öt chūöku inrē tö patīre. Yē hī min öi tööḵlö tö neūkölōnre ngaich hayööken më prötör sistör min ayī-ö, ngaich yěn yih min ngam Rācha hī ang Yēsū Kristū nö kahôka, ngaich ngöṙô min anga-aṅ nö in hī, ‘Ta-ih, yī-ö tö amīnu tö ngam pūlngö.’—Mët. 25:34-40. w23.07 pěch 4 përa 9-10; pěch 6 përa 12

Sā inlahen Yāvē inrē ang Yēsū nö hameuktö ngam hanangenlōnre nö in yip tahëng. Tīntu anga-aṅ nö ing panam nö ahānga nö in më “töchatngen pököre aṅ patī Israel.” Ik sā ò pöri nö kē-ěvkūö tö ngih la-en ngaich rö-ö anga-aṅ nöng köp nö im inchöngten re. Ik töhěng tak yöngnyīö nö peunyhö kūö ò nö ha-aṅlen ök kūö ò kikānö, ngam tö ‘meūtö el alaha tö ngam tötlöök Sī-ö.’ Ilöö hang ṙô ò ang Yēsū nö hameuktö ngam miṙēlōnre tö ngam yöngnyīö nö halānken ök kūö ò kikānö. (Mët. 15:21-28) Töi ngëichken ngih tahëng inchōḵ elmat. Ngöṙô ang Yēsū ik sā nö ò rulten re nö la-evṙen nö ing panam: ‘Ngòh mamahngen Chu, māhayö min anga-aṅ tö Chu.’ (Mët. 10:33) Ik sā Pītör nö lūöi heuh ṙô nö mahngen Yēsū, ngaich sitih inlahen anga-aṅ? Akahalōn ang Yēsū tö inlahen Pītör nö fē-ěre tö ngam vanāichöre hēk chūök ṙinatö-ellōn inrē anga-aṅ, lökten anga-aṅ nö öt sō-en Pītör. Unôichrit ò pöri nö ha-aṅlöng ngaich meukkūö Pītör anga-aṅ ngaich kētö ṙinatö-ellōn ò anga-aṅ töre ngaich nö aṙēlen ò. (Lūk. 24:33, 34) Īnu an ngam Tēv Yāvē hēk Yēsū inrē tö ngam minlēḵṙen. Lōnu inrē ang Yāvē tö hī öi ngatī inlahen öi hameuktö ngam minlēḵṙen re. w23.07 pěch 21 përa 6-7

Sitih inlahen pöri ayī-ö min öi kētö ṙinatö-ellōn yip tarik töt ṙamatö-ellōnre nö in ngih kinlēḵngô Yāvē. Mihôiṅ öi vë-eny nang cha tö në tö lūöi. Ngam raneh, tö Yāvē nö anga-aṅ kumlēḵngôre. Ngö kinūichngö angū-ö nö im līpöre Inmeukhömat, “Ngaich ngö ṙô Anga-aṅ ök amūichhak nö el kantēra, ‘Yĕh meuk, vī taṙòkhöre Chin nö tufömngöre.’” Lōnu anga-aṅ töre nö ngatī inlahen kūö ò nö īnu tö ngam mikah hēk kumlēḵre nö hateungngö ngam kuilōnre. Innëtö, akahakūö ang Yāvē tö ngam kinlēḵngô ò min nö öt hō nö öt teung, lokten anga-aṅ nö ngö ṙô ngaich nun nö yih. Ngöṙô inrē anga-aṅ, “tökô-en nun në ṙô kanô-en inrē. . . . Ngaich nun nö yih!” Ngam linūöyö, yěn rultenre ang Yāvē nö im la-enre ngaich öthō min anga-aṅ nö öt hateungngen e. Hē e min anga-aṅ nö ngö ṙô, “Chū-ö chin Alfa, Omeka inrē.” (Inm. 21:6) Röhten inlahen min ang Yāvē nö minyônyngö-aṅ ngam Sī-ö. Lökten yěn ōtre min yip tö ngö ṙô, ”Kuchik elnang in öi hangö u, hö ö pöri min anū-ö nö kô-en nö ngatī,” ngaich kò-òṙen më-eṅ öm mikahtö elnang ò öm vë-ekūö ngam Inmeukhömat 21:5, 6 miröökö inrē. Vë-eny nang ò tö Yāvē min nö öt hō nö öt hateungngö ngam kinlēḵngôre hēk sā ṙēngen mö sāin ang Yāvē nö lataṙeū ngam kinlēḵngôre.—Isa. 65:16. w23.11 pěch 7 përa 18-19

Kilēḵngôre ang Yāvē tö ngih nö in Aprahām ik sā ò ngaich nö 75 samyeūheu nöng öl nö kūönu. Meuk taneungtökūö ngih kinlēḵngô hòng ang Aprahām? Hö-ö öp nö keuheūtlöre mat nö meuk minë kinlēḵngô. Unôichrit ò nö chööḵngö öp tahël Yufratīs ngaich 25 samyeūheu anga-aṅ nö hööka. Ngaich löktö in ngam tī re pinngangkūö ang Yāvē nö kētö kūön Aprahām tö Isāk. Unôichrit tö 60 samyeūheu anga-aṅ nö yōmu tö nā Isô hēk Yāköp. (Hep. 6:15) Öt meuklö ṙôkö ngam mikūönöre ang Aprahām hēk öt teunghöt inrē nö im Kinlēḵngô Panam. Sön pöri anga-aṅ nö chiplö nö in Yāvē lökten ò nö kaheūkö nö hol ò. (Yāk. 2:23) Fē-a man yēḵ Aprahām min nö hachohlöng ngaich iṙôken ṙanamlōn min anga-aṅ yēḵ ò nö akahalōn tö yip tamaṙôngö nö teungen tö inkòlò re tö kūö ò nö īnu töm manööyö hēk ṙinatö-ellōnre inrē! (Ran. 22:18) Asūp haköplö hī löktö in e? Lohten in ayī-ö inrē öi öt uroh öi meuk minë kinlēḵngô Yāvē im ṙô-òten re öi aṅ. Yēḵ hī pöri min öi sā Aprahām öi īnu tö ngam manööyö ngaich mihôiṅ min öi ṙatö-ellōnre tö Yāvē nöng rö-ö nö ing töngamuh nö kē-ěkūö hī tö raneushö, pön ip yamih tufömngöre panam inrē min anga-aṅ nö kētö minë tö pōyen inkòlô hī.—Māk. 10:29, 30. w23.08 pěch 24 përa 14

Ik sā Rācha Usiyā nö ṙömöng ṙālö, īnu anga-aṅ tö ngam inyāichngö. Haköplu inrē anga-aṅ nö im “pinhë-eṅkūöre tö ngam tökô-en Tēv.” Kētö inkòlô ò ang Yāvē ik sā ò nö ṙömöng 68 samyeūheu nö löklōn ò. (2 Kin. 26:1-5) Pōyen yip la-al ò töt mihôiṅ tö tī ò hēk kē-ělkūö alahare inrē anga-aṅ nö laklö ngam panam Yerusalem. (2 Kin. 26:6-15) Lohten anga-aṅ nö teūngen tö ṙanamlōnre kūö ò nö hayöökaṙen tö Yāvē. (Mum. 3:12, 13) Kūöre ang Usiyā nö Rācha lökten ò nö örheūheu nö vë-eny nang yip tahëng tö nup tö hòṅ inlahen cha. Angū-ö ngih lāinyngen ò lohten nöng hòṅ kahngenre nö inup kuilōnre. Hěngheuh anga-aṅ nö yôkhöt nö el ök töhet chūök vinë-ekūö Yāvē ngaich kētöre anga-aṅ nö in ngam la-en tötkô nö la-en më rācha. (2 Kin. 26:16-18) Kētöre anga-aṅ nö föng tötahūsa, ik sā ngam Mākūö Kūönṙô Asariyā nö asökngen ò ngaich tāiny anga-aṅ nö in ò. Lökten Yāvē nö kētö sācha ò tö ngam yeūnyö. (2 Kin. 26:19-21) Ngam tövai minë-eny ò nö i linökölōn Yāvē ngaich angū-ö nö öt köpsöṙen. Yē Usiyā öre nö örheūheu nö īnu tö inyāichngö ngaich öthō öre ngam tinrīken ò nö öt vai. w23.09 pěch 10 përa 9-10

Unôichrit Pītör nö hachāmö elkui tö ngam töhet kumlēḵ, sön anga-aṅ nöng vaichköreṙen. Ik 36 C.E., töölô ang Pītör nö chuh patī Kòrnēli ök tahëng mihërö, hachāmö elkui ngaich Kòrnēli tö ngam töhet kumlēḵ. Inmeuktö ngam Tēv angū-ö nö öt atöltuṙen hēk mihôiṅ inrē ngaich yik tahëng mihërö Kristīön nö alaha ngam māṅ Kristū. (Inl. 10:34, 44, 45) Unôichrit e ngaich Pītör nö hanôl yik tahëng mihërö Kristīön nö holkūö cha nö nyā, tö möl lohten anga-aṅ nö ngatī inlahen la-en. (Kal. 2:12) Rīkre pöri yik Yahūti Kristīön tö ngölōn tö cha nö ötkô nö holkūö yik tahëng mihërö nö nyā. Ik sā yik tahëng Kristīön nö yih nö i Antiòk, ṙāngenre ngaich ang Pītör nö holkūö yik tahëng mihërö nö nyā. Lohten anga-aṅ nö vöö tö mufē yik tahëng nö haṙivlōn min tö tī ò. Ik sā Pôl pöri nö meuk inlahen ò nö atölturen, halēnö ò ngaich anga-aṅ. (Kal. 2:13, 14) Unôichrit ngih vanāichöre ngaich ang Pītör nö iṙūöhen nö i linökölōn ngam Tēv. w23.09 pěch 22 përa 8

Yěi chumkūöṙen öi ngëichköre ngaich lohten nö ōt nup tinrīken hī tö hòṅ halööktitvö tö hī. Um haṙivlōn pöri. ‘Tön tö aṙē-ělōn an ngam Mā,’ hayööken meh inrē min öm halööktitre. (1 Pīt. 2:3) Kētö ṙinatö-ellōn hī ang Pītör tö ngam “Tēv . . . nö Anga-aṅ min mahateungten yīö haköpö yīö, hangëken yīö inrē.” Ngölōn ang Pītör töre nö töng öt hō-ov nö ikūö ngam kūön ngam Tēv. (Lūk. 5:8) Öt ṙāngenre pöri anga-aṅ. Löktö i inyöökenre anga-aṅ tö Yāvē hēk Yēsū nö iṙūöhen nö haköpngöre nö löklōn cha. Lökten ang Yāvē nö hō-en Pītör nö el ngam “tö örheūheu pūlngö ngam Mā hī ane inrē mahayööken, Yēsū Kristu.” (2 Pīt. 1:11) Töt insā-av angū-ö nö inlōnti ò tö tī Yāvē! Yēḵ meh më-eṅ min öt heūlngöre, sā inlahen Pītör inrē öm iṙūöhen löklōn Yāvē hēk hō-en minë inköptöre tö ò, ngaich kē-ěvkūö min më-eṅ tö ngam nômö tö-örheūheu aṅ. ‘Kūö ngam ṙinatö-ellōnre inrē min öm teūngen tö ngam inyööken nômö.’—1 Pīt. 1:9. w23.09 pěch 31 përa 16-17

Hěng ök misī elmilūkö el ngam töhet inrūkui tö havīlöng tö ngam hīla tö sā rananglö. El ngih milūkö yik makūö kūönṙö nö la-evṙen misī. Ngaich mās inrē ök chūök sanöich el ngam milūkö, ngam tö tööḵlö aṅ tö mak. Urēhěkūö cha nö kēken nup töhet la-en ngaich söichtī re röönre inrē nö in e. (Man. 30:17-20; 40:6-8) Yip tö ōttit tö hachāmö elkui, hol Yēsū min cha-a nö hayöng nö kūönṙô nö el halīöngö. Urēhěkūö cha pöri nö chuh el halīöngö köp cha-a nö löklōn ngam Tēv nö el milūkö ngam ispirichūöl tempöl nö ing panam. Ngam chūök sanöich lama-uk, fēlen cha angū-ö hēk fēlen hī inrē taṙòkhöre Kristīön öi holtö hanëtö re öi ha-öiny ngam Tēv. Isuh pöri më “tökiröng kiteūm” nö la-evṙen nö holṙen më tö hachāmö elkui hol Kristū? Meukö cha ngam tanīnöṙô Yôh. nö sökhak nö ikūö kantēra ngam Tēv. Tö ngö manah angū-ö tö cha nö ‘lök la-en Ò nö peuheū harap, nö el ngam töhet chūök nö la-uk elmilūkö.” (Inm. 7:9, 13-15) Kirööngen ṙô öi ha-öinyö Yāvē pò ò nö kētö chūök hī öi el ngam ispirichūöl tempöl ò öi ha-öinyan! w23.10 pěch 28 përa 15-16

Löktö in më minṙöinylen tī ang Yāvē nö hangönkö alaha hī. (Isa. 32:1, 2) Yēḵ meh öm kihngen, ngaich vënyö nup pinṙūtö lōn re më-eṅ in yip minṙöinylen. Yēḵ cha min nö hayööken meh ngaich um piyū-u ṙô öm havëkö inyööken re in cha. Pön löktö in cha ang Yāvē nö kētö kumlēḵ meh. Maheūkkuvö in ayī-ö Kristīön tö hī min öi örheūheu aṅ ikūö ngih panam yěn peretāis hēk ōtre inrē yip tö maheūkku töre nö chuh el halīöngö. Löktö in ngam maheukköre ayī-ö öi teūngen tö nganöönöre. (Rōm. 4:3, 18, 19) Yöölen inrē ayī-ööi la-al minë kanihngen re hēk iṙūöhen inrē im la-en inhānga hēk la-evṙen inrē tö nup tö ṙōlkangen la-en el ngam māṅ. (1 Tös. 1:3) Teūngen inrē ang Pôl tö nganöönöre nö löktö in ngam maheukköre.Sā tö ‘kirāchö,’ anga-aṅ “katöngaṙen,” “fëlö” hēk “tiṙōli” inrē. Uroh nö hòṅ söl im kinëngö ngam nômö ò inrē. (2 Kòr. 4:8-10) Teūngen pöri anga-aṅ tö nganönöre kūö ò nö köplōn tö ngam maheūkköre. (2 Kòr. 4:16-18) Köplōn anga-aṅ tö ngam maheūkköre nö chuh el. Afēken e ang Pôl lökten ò nö örheūheu nö “tumfömlöng i tumö sakāmö.” w23.10 pěch 15-16 përa 14-17

Mihôiṅ öi hatöönö re, ‘Tölöng ang ngaich ngih nö ṙētak Yāvē nö sapṙô chu?’ Lohten in ṙung ngölōn tö hī öi hòṅ ilööṙen öi sapöṙô öi vë-ekūötēv. Ngëichken Yāvē pöri ayī-ö nö akahakūö tö öp tölöng ṙētak re nö hayööken hī. (Hep. 4:16.) Yē hī öt ilööṙen teūngen tö sanap nup ṙôre öi vë-ekūötēv ngaich pi-a ayī-ö öi ngöṙô lōn tö Yāvē nö sā tö ngöṙô, ‘Hö-ö chin hòṅ kētö sanapṙô meh.’ Lohten pöri ang Yāvē nö ngöṙô ‘Sapṙô meh chin min, öt ilööṙen pöri.’ Sā inlahen ngam prötör taheui mahavëkö kūö Yāvē tö lanööken re nö im invah re, öt ilöö lööken pöri anga-aṅYē Yāvē öre nö ilööṙen nö kētö lanööken ò ngaich lohten ngam Sī-ö nö sūöchlö inlahen Yāvē nöng hòṅ ha-öinyö lökten nö kētö lanööken ò. (Yōp 1:9-11; 2:4) Hòṅ köpölōn ayī-ö tö Yāvē nö lēnngen tī tö öp ṙētakre min nö kēngö minë taṙòkhöre invah. (Isa. 33:24; Inm. 21:3, 4) Ötkô pöri öi höng meūka töngamuh tö Yāvē min nö lööken tī tö hī. Mihôiṅ ngam prötör nö havëkö kumlēḵre nö lā-al ngam invah re nö in Yāvē hēk kanöpöre inrē nö i linökölōn ò hēk lanāmö elkuilōn re inrē. w23.11 pěch 24 përa 13

Tökiröngen ök fālen Sëmsön, hö-ö pöri anga-aṅ nö ṙāngen re nö chöhtö inlahen re nö hateungngö ngam kinë-ekūöre la-en töYāvē nö la-al më aṅ Filistain. (Kam. 16:28-30.) Lökten ang Sëmsön nö havëkö kumlēḵ re nö in Yāvē, ‘hòṅ ò nö havalvah re nö in më aṅ Filistain.’ Hangṙô ò ngaich ngam tökô-en Tēv ngaich kē-ěkūö ò tö ngam töt insā-av kumlēḵ. Ngamuh ngaich ṙòng ngam inlahen ò, pön pōihöngvah tī nö fëlngen më aṅ Filistain. Pòrô ök Sëmsön nö kihngen tö kūö minë fālen re, sön pöri anga-aṅ nö öt ṙāngenre nö hateungngö ngam kuilōn Yāvē. Ngatī inlahen ayī-ö yēḵ hī öi fāluṙen, halēnö hēk yěn kē-ěyö inrē minë la-en hī, ngaich ötkô ayī-ö ṙāngenre. Hòṅ kööpölōn ayī-ö tö Yāvē nö hīnöre nö aṙēlen hī. Öthō anga-aṅ nö ṙāngen hī, lökten ayī-ö ötkô öi ṙēngen re löklōn ò. (Sal. 103:8, 9) Pòrô öi vaichköreṙen ngaich öt löktu ang Yāvē nö öt kētö kumlēḵ hī öi hateungngö ngam kuilōn ò sā tī ò nö in Sëmsön. w23.09 pěch 6 përa 15-16

Yěi möi ngaich “hō-en hī ngam Tēv”, tö ngö manah angū-ö tö hī yěi aṅhavin töm manööyö ngaich ṙamölōn ang Yāvē nö in hī. Öt tö ngö manah pöri angū-ö tö Yāvē nö ṙamölōn yěn meūkö hī kihngen. Pön ṙamölōn anga-aṅ tö hī yěi möi öi la-al minë kanihngenre hēk köp inrē öi löklōn ò. Reuslöre alaha in öi hāngö Yāvē nö ṙamlōn nö in hī yē hī aṅhavin tö ngam manööyö! (Sal. 5:12) Töi fēkö inlahen Aprahām nö holtö manööyöre nö la-al nup kanihngenre hēk ṙamölōn ang Yāvē nö in ò. Holrevö ṙô ang Yāvē tö ò hēk kaheūkö ò inrē anga-aṅ nö tö akaha. (Ran. 15:6; Rōm. 4:13, 22) Mihôiṅ an inrē Yāvē nö ṙamlōn nö in hī. Ötkūö ṙôken nup la-en hī hēk ötkūö nup taneūngen hī la-en ang Yāvē nö ṙamlōn. Ṙamlōn pöri anga-aṅ nö meuk ngam manööyö hī öi la-al nup kanihngenre hēk chiplö inrē öi in ò. Pôrò öp töng yòh ṙēḵti hī, öp töng inlahen hī, heuneu-en hī inrē, mihôiṅ ayī-ö öi aṅhavin töm manööyö. Köp hòng më-eṅ in Yāvē pòrô öm rònghöichṙen la-al minë kanihngenre? Yěm hòṅ, ngaich mihôiṅ öm ṙātö-ellōnre tö Yāvē nö ṙamlōn nö in meh. Yē hī öi kahāiṙen tö Yāvē nö ṙamlōn nö in hī ngaich lökten in e nö ngönlöre ngam maheuṅkkö hī. w23.12 pěch 11 përa 13-14

Tö hòṅ harunöre takô yin më prötör nö im ṙinô-òvö. Öp prötör tö aṅhavin tö ngih heuneu-en, chumkūöṙen min anga-aṅ nö hangihtö ṙô yip tahëng hēk mikahtö kūöre inrē tö nup mufē elkuilōn cha. (Inch. 20:5) Löktö in minë ṙô ò yěn ṙô òv, arëkūö ò hēk in nup inlahen ò min anga-aṅ nö akahakūö tö nup mufē ò. Yē meh pöri min öm kēnyö ṙētak re öm in yip tahëng ngaich möl min öm akahakūö tö inlahen cha. Kihngen min më-eṅ öm vë-ekūö yip tarik yē cha nö lā kūö meh yēḵ meh töng örheuheu el imēl (email) hēk mësēch (message) öm vë-ekūö cha. Lökten man harunöre yěm meuk kūö yip tarik ngaich vë-ekūö cha. (2 Yôh. 12) Ngòh tö sööngö Kristīön hòṅ heuveu anga-aṅ nö ngëichkö re hēk ngëichkö ngam mikūönö re. (1 Tim. 5:8.) Tövai ngam inlahen meh yěm īnu tö öp töhěng heuneū-en re. Ōthō min öm öt teungen tö kinmanö re. (Inl 18:2, 3; 20:34; Efi. 4:28) Harunöre öm mā-ainyre kēken minë la-en re, ngaich hateungngö minë la-en kinë-ekūö re. Ngatī inlahen më-eṅ öm vī ngam minë-eny re nö vai. Ilööṙen min më-eṅ öm teūngen tö kinmanö re ngaich köp öm in e. w23.12 pěch 27 përa 12-13

Ngam sakāmö Yāvē tö vënyu imat ngam Paipöl, tö ngö manah angū-ö tö e nö ṙētak ò nö ha-etngen yip tö kunyaha elmat tö ò, ngaich laklö yip tarik re. (Isa. 13:1, 6; Isi. 13:5; Sef. 1:8) Ṙōlheuh ang Yāvē misī nö ha-etngen yik tö kunyaha elmat tö ò. Ngatī min inrē ngam sakāmö ò nö rultenre nö ikūö ngam tökiröng Pëpilön ip Armakētòn. Yěi lōnu töre öi öt kò-òngvah ip sakāmö ò, ngaich hòṅ höngöre ayī-ö. Ngatī ṙô inrē ang Yēsū nö vënyö inlahen ngam sakāmö nö in yik haköptöre. Chumkūöṙen tö ṙô ò nö öt ngö ṙô hīnöre yin tö ngam tökiröng kanihngen, pön ngö ṙô anga-aṅ lēntöhëichṙen yī-ö inrē. (Mët. 24:21; Lūk. 12:40) Ngam raneh chitri yik Kristīön aṅ Tösalònikē kahūich Pôl, nö vënyö inlahen ngam tökiröng sakāmö Yāvē. Pōyen nuk inchō elmat kahëtö ò nö mikahtö elmat cha nö sitih inlahen nö lēntöhëichṙen im sakāmö ngam Tēv. Akahakūö pöri ang Pôl tö öp sakāmö nö rö-ö nö im hē e nö yih. (2 Tös. 2:1-3) Sön pöri anga-aṅ nö vënyö nang yik holmaneukre, tö cha nö hòṅ lēntöhëichṙen ip hē ngam sakāmö nö sā inlahen yamih angū-ö ip huṙöch. Pōyen haköplö in inrē ayī-ö töngamuh in minë vahënyö ò. w23.06 pěch 8 përa 1-2

Ik samyeūheu 1978 i Chapān ngam panam Tokyō nö vī ök tö tafūöl anāi tumkölchap patī. Örheūheu yanīhi ngam kumyeūnö nö in e, lökten yik tarik nö ngölōn ‘sitih inlahen öng vö min ngih tö ngatī rò-òlòng patī nö öt fukngö?’ Asuh öp löktö nganöönö ngam patī? Ngam inlahen tī yip vamī ngam tisa-ën tī yip inchinīör nö vī-i e. Ngatī vinī-i tisa-ën angū-ö hòṅ e nö ngön, hēk yapūta inrē, hòn öt lökngöre tö kūö kumyeūnö. Ngatī inlahen yin më Kristīön nö sā ṙôlòng ngih patī, nö sitih inlahen? Hòṅ ṙāpöre ön ngòh Kristīön nö örheūheu, hòṅ hō-en nup inlēnöre inrē. Yěn ōt minë inlahen hī hang minë chööngö Yāvē hēk minë tinöölöṙô hī inrē lök in ngam talöökö kuilōn ò ngaich hòṅ hāngö u ayī-ö, kēken u inrē. Hòṅ iṙūöhen ayī-ö öi hòṅ hang minë chööngö, hòṅ hīnöre inrē. Hòṅ īnu inrē ayī-ö tö ngam ṙanëmen, tö ngö manah angū-ö tö hī yěi kētu inlēnö ngaich hòṅ hō-en minë inlēnöre ayī-ö. (Yāk. 3:17) Yēḵ ngòh Kristīön nö hō-en nup tö ngatī inlēnö ngaich öthō min anga-aṅ nöng lök nup lōnre, öt ngölōn inrē min anga-aṅ tö nup la-enre nö ṙòkhöre nö löng. w23.07 pěch 14 përa 1-2

Ik sā ò inrē ngaich nö kiröng, mā-ainyre ngam sī-ö nö halō-ong kūö ò hēk timlö alaha ò inrē nö halôngö chööngö Yāvē. (Mët. 4:1-11) Sā kumlēḵngô re ngam sī-ö tö ò nö hòṅ vīten Yēsū takô nö köölö fālen, hòṅ ò nö öt teungten nö kētö ngam ṙāi ṙinānyi. Ōtre nuk kanihngen Yēsū ik sā ò nö rultenre nö löklōn Yāvē nö ing panam. Hakihtuṙen anga-aṅ tö yik tökunyaha elmat töre, uroh inrē cha-a nö hòṅ fëlngen ò. (Lūk. 4:28, 29; 13:31) Lā-al nuk ötkumlēḵ-en yik haköptöre inrē anga-aṅ. (Māk. 9:33, 34) Ik sā ò inrē nö kahòkkaṙen, ngaich kiröngen ötlinëken anga-aṅ tö yik tarik hēk miyëḵ inrē cha-a tö ò. Sā inlahen öp tö faluṙen nö hakihtuṙen. (Hep. 12:1-3) Höng kahngenre anga-aṅ nö la-al ngam tökiröng kanihngenre hēk chanökköre im manah ṙētak ò, pön öt hayööken ò ang Yāvē hē-e. (Mët. 27:46) Kô-en ang Yēsū nö kētö ngam tö pōiṙāi nômö re nö ṙāi ṙinānyö hī! Yē hī afēkö minë inlahen Yēsū nö chö-öinyten hī, ngaich sīöplöre ngam hanangenlōn hī tö ò hēk minlēḵṙen inrē. w24.01 pěch 10-11 përa 7-9

Vai ngam innôlö hī min öi in yip tahëng yěi īnu tö ngam manööyö. Chumkūöṙen inrē min öi hangihtöṙô yip holre. (Yāk. 1:19) Köp inrē ngam lanāmö nö ihôi hī. Yē hī min öi īnu tö nup kanihngenre ngaich öthō min ayī-ö öi höng lök inlahen re hēk öthō inrē öi lēkôre töp holre. Rö-ö nöng angū-ö pöi öthō inrē min veūtö tanāinyö yěn haṙivlōn tī öp hol hī tö hī öthō inrē min öi havalvah re öi in ò. Pò hī min öi “kö ṙāpö höö, kö aṙēlen höö.” (Kòl. 3:12, 13) Löngö atöllö min ayī-ö yěi īnu tö ngam manööyö. Öthō inrē min öi höng veut alaha inup la-enre. Pöi kēnyö ṙētakre min öi hatöntöre hēk fēkö öp tö mihôiṅ inrē min inlahen re. Tö sā ngih töhěng inchōḵ elmat, yēḵ hī öre öi chöh kinmānöre ngaich lohten min öi höng ilöö hō öi kē öp raneh taneūngen re kinmānö. Yē hī pöri min öi īnu tö ngam manööyö, ngaich kēnyö ṙētakre min ayī-ö öi fēkö ngam inlahen re nö asuh min mihôiṅ öp lanökngöre ngam mikūönö hī hēk ngam innôlö hī inrē tö Yāvē. Yēḵ hī pöri öi īnu tö ngam manööyö, ngaich öthō min ayī-ö fē unôich yěi löngö kahë tö nup atöllö re. w23.08 pěch 22 përa 8-9

Ngatī ayī-ö mihôiṅ öi kihngen sā inlahen Pôl öi lā-al minë tötlöng kuilōnre hēk hēṙu inrē mihôiṅ öi haṙivlōn. Yē hī pöri min köpölōn tö ngam kinlēḵngôre, ngaich lööṙen min öi löngö katöllö pòrô nö ōt min nupinlō-ongkūö hī. Yē hī öi kētöre in Yāvē, ngaich vamë-enyre ayī-ö öi harööḵngen re in nup kuilōnre nup töt öi lōn Yāvē. (Mët. 16:24) Lökten yēḵ meh pòrô halō-oikūö hēk hakihtuṙen inrē, ngaich akahakūö min më-eṅ tö inlahen re öm lā-al u pò meh urěhangen fēkö minë inlahen re öm chiplö i linöökö lōn Yāvē. Ngaich la-evṙen min më-eṅ tö nup tö ṙamölōn tī tö Yāvē. Yēḵ meh min ngatī inlahen ngaich mahameuktöre min öm sā kumlēḵ lōn Yōp. Pōyen nuk misī kanihngen Yōp sön pöri anga-aṅ nö ngöṙô: “Söl kinpahare chin min chiplö!”—Yōp 27:5 NWT. w24.03 pěch 9 përa 6-7

Örheūheu ngam ‘hanangenlōn ngam Tēv’ Yāvē nö in hī! (2 Kòr. 13:11) Chumkūöṙen anga-aṅ tö ngòh töhěngtak. Ṙatö-ellōnre inrē ayī-ö tö ngam “hanangenlōn Ò nö havīlen hī.” (Sal. 32:10) Yěi fēkö inlahen ngam hanangenlōn Yāvē min tö hī ngatī ṙinatö-ellōn min ayī-ö tö e nö kô-en, ngaich akahaiṙen min ayī-ö töre öi röhta in ò. Öt piyū-u ṙô min ayī-ö vë-ekūötēv öi vë-eny nang ò töre öi ötkô öi öt inū töm hanangenlōn ò. Vënyö nup taṙòkhöre min ayī-ö pinṙūtö lōnre, kanihngenre hēk ṙatö-ellōnre inrē min ayī-ö tö ò nö akahakūö tö hī hēk kapahare inrē nö hòṅ hayööken hī. (Sal. 145:19) Yihtöre ṙung ayī-ö öi chuh in öp tameūiyö el ṙētak unfòvö, ngatī inlahen ayī-ö öi tūöktöre öi in ngam hanangenlōn Yāvē. Tö inū ön ngih hanangenlōn tö kumlēḵre, hěnghöre tö ṙēm inrē. Kô-en ang Yāvē nö kirööngen hanangenlōn tö hī. Ta-a chěi tö ṙòngnyökūö ellōnre öi ngö ṙô: ‘Yāvē, hangenlōn chin tö meh’!—Sal. 116:1. w24.01 pěch 31 përa 19-20

Kô-en yik misī Yahūti nöng akahakūö tö minë-eny ngam Tēv. Hö-ö pöri cha-a nö keuheūtlöre mikahkūö tö minë tinrīken ò. Lökten ngaich ang Yēsū nö mikahtö elnang cha. (Yôh. 1:17, 18) Sā vinënyö e inrē im ṙô Heprāi, tö Yāvē nö tö aṙě-elōn hēk tö tööḵlö tö neūkölōn. (Man. 34:5-7) Ṙūöhtö mikah elmat cha hēk ang Yēsū nö kētö inchōḵ elmat, nö vë-eny inlahen öp töhěngtak inyööngö töp kūön ò inrē. Kiröönngöre ngam kūön ò tö patī ngaich mëichngö nuk rupīö ngam yöngre hēk ötlöngö la-en. Fē-ělre ngaich anga-aṅ tö ngam vanāichöre ngaich haṙivlōn, lökten ngaich anga-aṅ nö havan nö chuh patī. Ik sā ök yöng ò ngaich nö meukö ò, ilöö faltöre anga-aṅ nö in ò ngaich fūölan hēk aṙělen ò inrē. (Lūk. 15:11-32) Löktö in ngih inchōḵ elmat ang Yēsū nö mikahtö elmat hī tö ngam Yöng ò nö tö aṙē-ělōn hēk tö tööḵlö tö neūkölō. w24.02 pěch 10 përa 8-9

Hangëken yip tö haṙivlōn ang Yāvē ngaich teūngen cha-a tö hanöhlöre. Hòṅ sā inlahen Yāvē in hòṅ aṅhav in tö ngam miṙēlōnre tö yip tahëng hēk hareuskö alaha cha inrē. Öi sitih inlahen? Hòṅ asīöp ngam tinrīken re ayī-ö öi i inreuskö alaha yip holre. Töi ngëichken e angū-ö tinrīken. Hòṅ sitih inlahen öi yěi hòṅ iṙūöhen hareuskö alaha höö hēk hangenlōn inrē tö höö? (1 Tös. 4:18) Hòṅ akahakūö ayī-ö tö kanihngen höö hēk hangenlōn inrē tö höö, ngaich hòṅ aṅhav in inrē ayī-ö tö ngam miṙēlōnre tö yip holre. (Kòl. 3:12; 1 Pīt. 3:8.) Yē hī min öi ngatī inlahen ngaich mihôiṅ min ayī-ö ilööṙen hayööken yip holre yip tökihngen hēk hareuskö alaha cha inrē. Ngöṙô inrē ang Yēsū: “Nup yamih nö ellōn hī anū-ö min tö ṙônyu nö im rōi litāk hī. Ngòh tölöök tarik kē-ĕny tölöök chehen, aṅ i nup tölöök chehenre.” (Mët. 12:34, 35) Töt ṙanāngen ön ngam inlahen hī öi kētö inreuskö alaha yip prötör sistör tö kihngen. Löktö in e min cha-a nö akahakūö tö ṙôken ngam hanangenlōn hī tö cha. w23.11 pěch 10 përa 10-11

Hòṅ havëkö inyöökenre in yěi hòṅ akaha elnang tö ṙô minë tö-eūka aṅmat ngam Paipöl. Ngëichkö ngih inchōḵelmat. Asehkūöre man tö inlahenre öm havöt chuh ip panam töt mikahkūöre, holuröön pöri më-eṅ tö öp holre tö keuheūtlöre mikahkūö tö inlahen ngam panam. Akahakūö anga-aṅ tö kamngö öp chūök meh iyöng hēk tö kū-ö nup talöökö inrē. Iṙôken ngam ṙanamlōn meh min pöm hōlu töm holre. Sā inlahen ngam hol hī an inrē Yāvē nö akahakūö tö ngam ṙētak hī öi iyöng ikūö panam hēk tö ngam talöökö inrē chahuh hī nö kū-ö tö yih angū-ö. Lökten min öi hòṅ īnu tö inyāichngö öi havëkö inyöökenre in Yāvē nö mikahtö elnang hī tö ṙô minë tö-eūka. (Tan. 2:28; 2 Pīt. 1:19, 20) Sā inlahen yip tö akaha inyööngö an Yāvē inrē nö lōnu tö yip kūönre nö ṙamlōn hēk kuchīken ip yamih ṙētak. (Yar. 29:11) Öt akahakūö yin Më inyööngö tö inlahen tinrīken më kūönre ip yamih ṙētak, akahakūö pöri ang Yāvē. Mihôiṅ min anga-aṅ nö vënyö nup inlahen ip yamih ṙētak. Lökten anga-aṅ nö kūichhöt minë tö-eūka imat ngam Paipöl, ngaich yěi hakööpö u min ngaich akahakūö min ayī-ö tö inlahen nup tö hòṅ vënyu.—Isa. 46:10. w23.08 pěch 8 përa 3-4