MIRŪLÖ 12
Mikah Ṙamā-ang im Tēv Kamëtö Inlēnö Hī Lööngö Talöökö
Tööḵlö ön ngam līpöre Inchōḵ-oṙô tö minë inlēnö hī ṙama-ang im Tēv nö tö pōyen yanöölen tī tö hī i në sakāmö töngamuh. Pōilö nö in u minë kahūich Sòlòmön
TÖ AKAHA ang ngam Tēv Yāvē nö mahayöng? Yēḵ hī hòṅ kētö öp tölöng sanap ṙô ngih intöönö, hòṅ urĕh in sin ngëichkö minë inlēnö re kahëtö Yāvē. Tölöng öng ngih nö inlēnö? Yēḵ chu kēken minë inlēnö, kūö lā urĕh öng min ngih tinrīken chu hēk akahakūö hòng min chu-ö töp chöönyöre tarik? Pōyen nun minë kahūich ök tö akāha rācha Sòlòmön inchōḵ-oṙô inlahen nup taṙòkhöre tinrīken tarik. Ta-a töi ngëichkö në inchō-elmat.
Hayönglenre im Tēv. Yēḵ hī hòṅ köp öi im innôlö tö ngam Tēv Yāvē hòṅ urĕh ayī-ö öi hayönglenre in ò. Ngatī ṙô tī ök Sòlòmön nö kūich: “Keuheūttö ellōn re hayönglenre im Mā Tēv, um hayönglenre inrē i ellōn re. Akahan i nup tökeuheūttöre talöökö meh, ngach anga-aṅ min nö hachip kanröönö meh.” (Inchōḵ-oṙô 3:5, 6) Hòṅ hang nup chööngö in kahëtö ngam Tēv, in e min nö meūkö öp rinātö ellōn hī öi in ò. Rö-ö nöng anū-ö pöi ṙamölōn tī min inrē tö ngam Tēv. Hameuktöre inrē öi lamārītö ò öi sapṙô ngam tö asöklöng intöönö tö ngam Sī-ö.—Inchōḵ-oṙô 27:11.
Milēḵṙen tö holre. Hòṅ möthë in töngamuh öi hang minë inlēnö re ṙama-ang im Tēv, inlēnö kikōnyö tö pihövö hēk kikānö inrē töpihövö më nyīö inrē tö hòṅ hang minë inlēnö re. Ngöṙô an ngam Tēv nö in më tö pihövö kikōnyö: “Ṙamölōn inrē me-eṅ ip pīhö meh tö-ayal.” (Inchōḵ-oṙô 5:18-20) Inlēnö më kikanö töpihövö nup inrē i mat ngam Inchōḵ-oṙô līpöre. Vënyö inlahen ngam tö akāha inpīhö kikanö inrē angu-ö nö mötlö tö töpōiṙāi yanöötö. Lökten öp pīhö ò tö yip kūön ò inrē nö eū an. (Inchōḵ-oṙô, 31 mirūlö) Ōt inrē nup inlēnö yip nyīö hinôtö cha nö hang chööngö yip yöng re. (Inchōḵ-oṙô 6:20) Hameuktu ön inrē ngam innôlö nö töt ṙanāngen, pò ngòh tarik nyin yĕn harēvngöre tö hol re, nö töng mahateungö nup kuilōn re. (Inchōḵ-oṙô 18:1) Mihôiṅ in vāyö inlahen yĕi vāyö hanôl tö hol re, ngach öt löng yĕi vāichö hanôl tö hol re, lökten öi hòṅ akāha öi atöllö hol re.—Inchōḵ-oṙô 13:20; 17:17.
Chumkuöṙen man töre. Tööḵlö aṅ mat ön ngam līpöre Inchōḵ-oṙô tö minë töpōiṙāi inlēnö hinôtö hī lāköre tö nup tö hiyōyhukūö, hòṅ löökö el kuilōn pöri, hòṅ ma-anyre öi lā-al minë tötlöök mufē, pētngen pöri i nup tövai la-en. (Inchōḵ-oṙô 6:6; 14:30; 20:1) Halēnö in inrē tö ngam līpöre öi sōtu hayönglenre i nup inlēnö aṅ i tarik nup töt sāta nö i lōn ngam Tēv. Pò hī yĕi hang minë inlēnö aṅ i tarik töng famukkui kanihngen min ayī-ö. (Inchōḵ-oṙô 14:12) Hōten hī ön inrē öi lāköre i nup töt lēn el kuilōn, Kūö e ‘nö löknyö in e nö hëmnyi ap mak nômö.’—Inchōḵ-oṙô 4:23.
Köönyu ṙôken ngach tarik ikūö ngih panam hamang minë lātulöng inlēnö tö vë-nyu aṅ mat ngih līpöre ngach teūngen töm tökô-en ṙanamölōn. Ṙinātu ellōn chā-a inrē tö ngam Tēv nö tö akāha nö Rācha.
—Lökngörit im līpöre Inchoḵ-oṙô.