GONDO 04

I mani Txizimu?

Dibhuku do ganjwa

Kukhukhela kale, vathu va khozela sizimu so tala so hambana-hambana. Kambe Bhiblia yi womba ti to ku ni Txizimu atxi i ku txa “hombe kupinda sizimu sotshe.” (2 Makronika 2:5) Ngu txihi Txizimu txa kona? Ngu kutxani txona i di txa hombe kupinda sotshe asi vathu va si khozelako? Ka gondo yiya, hi na wona nzila yi Txizimu txi ti zivisako ngu yona kwako.

1. I mani ditina da Txizimu? Hi ti zivisa kutxani ti to txi lava hi ziva ditina da txona?

Txizimu txi wombile ditina da txona amu ka Bhiblia. Txona txi womba tiya: “Ani ngani Jehovha. Edo ditina dangu.” (Lera Isaya 42:5, 8, NM.) “Jehovha” ditina da Txizimu, adi di tako ngu ka Txihebheru, di txhamuselako ku: “Ene a Maha ti to Timaheka.” Jehovha a lava ti to u ziva ditina dakwe. (Eksodha 3:15) Hi tizivisa kutxani toneto? Nguko amu ka Bhiblia, ditina dakwe di bhatwe kona mu ka makhambi aya ma pindako 7.000!a Ditina adi di ku: Jehovha di lumba “Txizimu txa ditshuri txitimwi nzumani, ni hahatshi ha mafuni.”—Dhewuteronome 4:39.

2. Ngu tihi ati Bhiblia yi ti wombako ngu Jehovha?

Bhiblia yi womba ti to ka sotshe sizimu asi si khozelwako ngu vathu, Jehovha ngene dwe i ku Txizimu txa ditshuri. Ngu kutxani? Ku ni sivangelo so tala. Jehovha a gulekile ngutu ni ku ngene ekha i ku ‘Nyatxitimwi ka otshe mafu!’ (Lera Masalmo 83:18.) Ene, “Txizimu txa mtamo wotshe” ati ti wombako ti to a ni mtamo wo maha ati a sawulako kutimaha. Jehovha a “vangile sotshe simaha,” nzumani ni ha mafuni. (Mtuletelo 4:8, 11) Kuhambana ni sotshe sizimu asi si khozelwako ngu vathu, Jehovha mbimo yotshe a veho ni ku a na vaho kala kupinduka.—Masalmo 90:2.

ENGETELA WUZIVI WAKO

Xolisisa kuhambana aku ku kuho ka sithopo sa Txizimu ni ditina da txona. Wona to ngu kutxani txi di zivisile ditina da txona kwako ni ku txi mahisile kutxani toneto.

Dijaha di txi wonetela nzumani ni wusiku. Ditina da Jehovha di txi kombiswa ka mtxima.

3. Txizimu txi ni sithopo so tala, kambe txo wa ni ditina dimwedo dwe

Wona kuhambana aku ku kuho ka ditina da m’thu ni sithopo sakwe, xalela VHIDHIYO, mi gwita mi bhula ngu siwotiso asi si londiselako.

VHIDHIYO: Sithopo so tala, kambe ditina dimwedo (0:41)

Ngu kuhi kuhambana aku ku kuho ka txithopo atxi txi ku “Mkoma,” ni ditina?

Bhiblia ya womba ti to vathu va khozela sizimu so tala ni vakoma vo tala. Lera Masalmo 136:1-3, mi gwita mi bhula ngu txiwotiso txiya:

I mani “Txizimu txa sizimu” ni “Mkoma wa vakoma”?

4. Jehovha a lava ti to u ziva ditina dakwe ni ku di thumisa

Hi tizivisa kutxani ti to Jehovha a lava u ziva ditina dakwe? Xalela VHIDHIYO, mi gwita mi bhula ngu siwotiso asi si londiselako.

VHIDHIYO: Ina Txizimu txi ni ditina?—Txienge (3:11)

Mfota wa vhidhiyo ayi yi ku ‘Ina Txizimu txi ni ditina?—Txienge.’ Wamwamna a txi wona ditina da Txizimu i ku Jehovha, ka Masalmo 83:18 amu ka Bhiblia ya ‘Versão Rei Jaime’ ya 1611.

Ina wa kholwa ti to Jehovha a lava u ziva ditina dakwe? Ngu kutxani?

Jehovha a lava ti to vathu ve thumisa ditina dakwe. Lera Varoma 10:13, mi gwita mi bhula ngu siwotiso siya:

Ngu kutxani i di ta lisima kuthumisa ditina da Jehovha?
U tipfisa kutxani ngako m’thu a txi khumbula ditina dako ni kutshumela e di thumisa?
U pimisa ti to Jehovha a tipfisa kutxani ngako hi txi thumisa ditina dakwe?

5. Jehovha a lava to u va mngana wakwe

Wamsikati awu a dhanwako ku i Soten wa Camboja a womba ti to mbimo yi a nga ziva ditina da Txizimu a tsakile ngutu aha koza atxi nga a no ya gwesa nzuma. Xalela VHIDHIYO, mi gwita mi bhula ngu txiwotiso atxi txi londiselako.

VHIDHIYO: Mizamo yangu yo lava Txizimu txa ditshuri (8:18)

Mfota wa vhidhiyo ayi yi ku: ‘Mizamo yangu yo lava Txizimu txa ditshuri.’ Soten a di khalahatshile txitingani a txi maha mkombelo ka Txizimu txa ditshuri.

Soten a ti pfisile kutxani mbimo yi a nga ziva ditina da Txizimu?

Ngako u txi lava kumaha wungana ni m’thu u khata ngu kulava kuziva ditina dakwe. Lera Jakobe 4:8a, mi gwita mi bhula ngu siwotiso siya:

Jehovha a lava ku u maha txani?
Ngu kutxani kuziva ditina da Txizimu ni ku di thumisa ti nga kuvhunako ti to u va mngana wakwe?

NGAKO VATHU VA TXI KHONA: “Txizimu Njizimu kha txi na ditina.”

Ina wa kholwa to ditina da Txizimu i Jehovha?
U nga va vhunisa kutxani vamwani ve wona ti to Txizimu txi lava hi thumisa ditina da txona?

ATI HI NGA TI WONA

Jehovha, ditina da Txizimu txa tximwetxo txa ditshuri. Ene a lava ti to hi di ziva ni kutshumela hi di thumisa kasi ku hi va vangana vakwe.

Ngu tihi ti u nga ti gonda

Ngu kutxani Jehovha a txi hambana ni sotshe sizimu asi si khozelwako ngu vathu?
Ngu kutxani hi di fanete kuthumisa ditina da Txizimu?
Nji txani txi kombisako ti to Jehovha a lava u va mngana wakwe?

Ni hetile gondo yiya ngu:

U nga maha tiya

Ngako u txi womba-womba ngu Txizimu thumisa ditina da txona, i ku Jehovha

Mwendo tiya:

Your other goal

XOTA TIMWANI

Xolisisa 5 wa sivangelo si hi mahako hi kholwa to Txizimu txiho.

“Ina Txizimu txiho?” (Msungo mhaka wu ku ka site)

Xolisisa ti to ngu kutxani kukholwa ti to Txizimu txi veho mbimo yotshe ti txi pfisiseka.

“I mani a nga vanga Txizimu?” (Muwoneleli wa 1 ka Agosto wa 2014)

Wona ti to ngu kutxani hi di fanete kuthumisa ditina da Txizimu, hambiku ati di nga ti dhaniswa tona kale ti si zivekiko.

“I mani Jehovha?” (Msungo mhaka wu ku ka site)

Ina ta sunga kudhana Txizimu ngu ditina da txona? Wona ti to ngu kutxani hi wombako ti to Txizimu txo va ni ditina dimwedo dwe.

“Txizimu txi ni matina mangahi?” (Msungo mhaka wu ku ka site)

a Ti to u ziva to tala mayelano ni ditina da Txizimu ni ti to ngu kutxani di di thavisilwe ka Mabhiblia o tala, wona Apêndice A4 ka Tradução do Novo Mundo da Bíblia Sagrada.