Dezembro

Ina Jehovha a ni mtamo wo wusa va va nga fa? Kha ti kanakanisi! Nguko ene “i nyamne wa mtamo.” (Mtu. 1:8) Ene a ni mtamo wa hombe wo xula votshe valala vakwe kupata ni lifo. (1 Vak. 15:26) Txivangelo tximwani txi hi mahako hi kholwa to Jehovha a ni mtamo wo wusa vafi ngu ti to mialakanyo yakwe kha yi gwitelwi, ene wa sikota kudhana nyeleti yimwani ni yimwani ngu ditina da yona. (Isaya 40:26) Ni ku, ene wa va khumbula ava va nga fa. (Jobe 14:13; Luka 20:38) Ta m’hehukela kukhumbula hambi ta tidotho ta vale a no ta va wusa, kupata ni ti va nga mahiswa tona, txiperiyensiya txawe txa wutomi ni mialakanyo yawe. Hi nga kholwa txithembiso txa Jehovha txa mbimo yi yi tako txo wusa vafi nguko ene a ni minavelo ni mtamo yo txi hetisisa. Wona txivangelo tximwani txi hi mahako hi kholwa ka txithembiso txa Txizimu txo wusa vafi: Jehovha a wusile vathu. Ka timbimo ta Bhiblia ene a ningile vavamna vo thembeka kupata ni Jesu mtamo wo wusa ava va nga fa. w23.04 9-10 ¶7-9

Ngaku hi txi txhamusela m’thu ngu ti hi ti kholwako ngu nzila yo thutha ni ku mu alakanyela, ti nga mu maha e tsakela ku hi engisela ni ku simama ni dibhulo. Ngako m’thu a txo mahela ku hi poyilela kha ti sungi ku hi simama ni dibhulo. (Mav. 26:4) Hambiku vamwani va mahako toneto, hi nga votshe va no ti maha. Ti ha kubasani ti to ha wuyelwa ngutu ngaku hi txi gonda kuva vo thutha. Maha mkombelo ka Jehovha u kombela mtamo wo u simama u va wo thutha mbimo yi u xamulako siwotiso so hi lumbeta asi si nga dukako likholo lako. Khumbula ti to kuxamula ngu nzila yo thutha ku nga tsivela ti to kuhambana ka mawonelo ku va dizunga. Nzila yo thutha ni ya txixonipho yi u nga xamulako ngu yona, yi nga maha to vamwani ve txitxa mawonelo ya va ku nawo ngu ngathu ni ditshuri da mu ka Bhiblia. ‘Hi zumba kambe hi di longile nzila ya ku ti angulela’ ka ti hi ti kholwako mbimo yotshe “ngu kuthutha ni txithavo.” (1 Pedro 3:15) Ina, kuthutha ku na ve mtamo wako! w23.09 19 ¶18-19

Wona mune wa tinzila ti hi nga kombisako ngu tona kulaphisa mbilu. Yo khata, m’thu wo laphisa mbilu wa swela kuhenya. Ene a zama kuzumba a di thuthile e vayilela kuphota ngako vamwani va txi mvhuka mwendo a di ni txitrese. (Eks. 34:6) Ya wumbidi, m’thu wo laphisa mbilu a nga emela a di thuthile. Ngako ti ati emelako ti txi swela kumaheka, wa vayilela kujujeka msungo. (Mat. 18:26, 27) Ya wuraru, m’thu wo laphisa mbilu a khata ngu kupimisa a si se maha to kari. Ngako a di ni mthumo wa lisima awu a fanelako ku wu maha, a zama ku a si wu mahi ngu kujaha. Makhaloni keto wa tiha mbimo ayi yi lavekako kasi ku wu maha kwati mthumo wonewo. Ngu toneto ene wa maha mthumo wonewo ngu mbimo ya yinene. Ya wumune, m’thu wo laphisa mbilu wa maha mizamo yo tsanisela sikarato na a si ngura nguri. A maha totshe ti a nga tikotako kasi ku e simama e tsanisela ngu kupimisa ngu totshe ta tinene ti ti mahekako wutomini kwakwe. (Vakl. 1:11) Kota Makristu hi fanela kukombisa totshe tinzila tiya to laphisa mbilu. w23.08 20-21 ¶3-6

Txivangelo txa lisima txo vhikela mbilu yathu yo fanekisela ngu ti to Jehovha wa wona timbilu tathu. Eto ti womba ti to Jehovha kha hi woni nga ti vathu va hi wonisako tona, kambe a wona ati hi ku ngu tona mndani. Ene a na hi randa ngako hi txi tata mialakanyo yathu ngu wutxhari wakwe. (Joh. 4:14) Ka mialakanyo yathu kha hi na mbi va ni wukhalo wo veka phozeni ayi yi tako ngu ka Sathani ni mafu akwe. (1 Joh. 5:18, 19) Mbimo yi hi yako hi tshuketa ka Jehovha, txixonipho ni lirando lathu ngu ngene si na kula. Aku hi si laviko kuhenyisa Tate wathu wa nzumani hi na vayilela kumaha sionho, hambi ngu mialakanyo. Mwanathu Marta wa khe Croácia, awu a nga dukwa kumaha wugango a bhate tiya: “Ti txi ni karatela kupimisa ta tinene ni kuxula minavelo yo maha to biha. Kambe kuthava Jehovha ku ni vhikete.” Kuthava Jehovha ku mu vhikete ngu nzila yihi? Marta a womba ti to a alakanyisisile ngu ti ti ndi no humelela ngako a txo maha txionho. Nathu hi nga maha toneto. w23.06 20-21 ¶3-4

Jesu a txi tiziva ti to txikongomelo txa Jehovha i ti kubasisa ditina dakwe ni ku kaneta ati ti nga ti wombilwe mayelano ni ditina dakwe. I ngu txivangelo txonetxo a nga gondisa valondeteli vakwe kumaha mkombelo va txi: “Tata wathu, u ku nzumani, ditina dako di na sawulwe.” (Mat. 6:9) Jesu a txi ti pfisisa ti to mhaka yiya yi txi gwesa wotshe mtumbuluko. Kha txi ngaho txivangwa tximwani ha mafuni kotshe atxi txi nga tikarata kasi kusawulekisa ditina da Jehovha kupinda ati Jesu a nga mahisa tona. Kambe mbimo yi Jesu a nga ñolwa, valala vakwe va mlumbetile kwa mbi kombisa txixonipho ngu Tate wakwe. Jesu a txi tiziva ti to kwa mbi thumisa kwati mwendo kuwomba-womba kubiha ngu ditina do sawuleka da Tate wakwe i ti txionho txa hombe ngutu a txi m’thu a ndi no txi maha. Kulumbetwa ni kuningwa mnando ngu txionho txo nga etxo ti mu karatile ngutu. Ti nga maha etxo i di txona txivangelo a txi txi nga mmaha e ‘tala ngu kupandiseka’ msananyana ka ku asi se ñolwa.—Luka 22:41-44. w24.02 11 ¶11

Ka mnava wathu wa wutomi hi fanete kuranda Jehovha ni Jesu kupinda va hamwayani kwathu. (Mat. 10:37) Eto kha ti wombi to kha ha fanela ku khatalela mwaya wathu nga vona vo hi tsivela kutsakisa Txizimu ni Kristu. Kambe ti to hi amukeleka ka Txizimu ni ka Kristu ti lava hi hetisisa wutixamuleli wathu ha mwayani. (1 Tim. 5:4, 8) Hi txi maha toneto hi nava vo tsaka ngutu. Jehovha a mahile timwaya ti to ti tsaka ngako mwamna ni msikati va txi randana ni ku xoniphana. Vaveleki va fanete kugondisa ni kuranda vanana vawe, se vanana ni vona ve engisa vaveleki vawe. (Vaef. 5:33; 6:1, 4) Ti si khataliseki ti to ngu wuhi wutixamuleli wako hamwayani u nga mahi ti u alakanyako to ngu tona i ku tatinene kambe thumisa wutxhari awu wu manekako mu ka Bhiblia. Thumisa kwati mabhuku athu a ya ma nga seketelwa mu ka Bhiblia. Ona ma nga hi vhuna kuwona nzila yi hi nga thumisako ngu yona matshina a milayo ya Bhiblia. w23.08 28 ¶6-7

Mwanathu wa txisikati ti lava e gonda timhaka ati ti no m’vhuna ngu nzila yo kongoma ditshiku ni ditshiku. Timwani ka timhaka toneto a nga gonda i di ngadi mwanana se ti na m’vhuna ka wutomi wakwe wotshe. Ngu txikombiso, Gondela kulera ni kubhala kwati. Ka makhalo mamwani vathu va pimisa ti to vavasikati kha ti sungi ku ve gondela kulera ni kubhala kwati. Kambe wonewo wusikoti wa lisima ngutu ka otshe Makristu. (1 Tim. 4:13) Ngu toneto, u nga leki txilo txi kutsulupetela kugondela kulera ni kubhala kwati. I nava yihi wuyelo ya toneto? Wusikoti wonewo wu nga kuvhuna kumana mthumo wu u wu lavako kasi ku ti hanyisa. U na tshumela u va mgondi wamnene wa Bhiblia ni ku, kualakanyisisa ti na kuvhuna ku u gondisa vamwani. Kambe txa lisima ka totshe, toneto ti na ku tshuketisa ngutu ka Jehovha.—1 Tim. 4:15. w23.12 20 ¶10-11

Kombela Jehovha ti to e ku vhuna u xula siduko. Aku hi ku vathu vo mbi pelela mbimo yotshe ha dukwa kumaha ti iku to biha. Sathani a maha totshe ti a nga ti kotako ti to sikarato si ya si nemela ngutu. Yimwani ya tinzila yi a yi thumisako kasi kujikisa mialakanyo yathu misakano yo biha. Misakano yoneyo yi nga maha ti to mialakanyo yathu yi tala ngu timhaka ta nzambwa, ni ku eto ti nga hi maha hi wela ka sionho sa hombe. (Marku 7:21-23; Jak. 1:14, 15) Hi lava txivhuno txa Jehovha kasiku hi xula txiduko txo maha to biha. Ka mkombelo wu a nga gondisa valondeteli vakwe Jesu a patile tiya: “U nga hi leki hi txi wa kudukwani, kambe hi thuse ka m’bihi.” (Mat. 6:13) Jehovha a lava ku hi vhuna, kambe hi fanete kukombela txivhuno. Msana keto, hi fanete kuhanya ngu kutumelelana ni mikombelo yathu. w23.05 6-7 ¶15-17

Ngako ava va nga tekana va txi ninga lisima wuxaka wawe ni Tate wawe wa nzumani, va na thumisa sialakanyiso sakwe asi si no va vhuna kuvayilela mwendo kuxula sikarato asi si nga mahako ti to lirando lawe li hola. Hambi vanathu ava va nga vitwa ngu didhawa da moya ti nga va karatela ku etetela Jehovha ni kusakulela tifanelo ati a ti kombisako to fana ni wunene, wumbilu ni kudivalela. (Vaef. 4:32–5:1) Ngako vatekani va txi ti karatela kukombisa tifanelo tiya, lirando lawe li na kula. Mwanathu wa txisikati awu a dhanwako ku i Lena, a ku ni 25 wa malembe a di txhadhile a khene: “Ta hehuka kuxonipha ni kuranda m’thu awu a nga vitwa ngu didhawa da moya.” Mbimo yi Jehovha ti nga lava e sawula mpatwa wu wu ndi no va vaveleki va Mesiya wu a nga thembiswa, ene a sawute Josefa ni Mariya ka lotshe liveleko la Dhavhidha. Nguko vona va ti ni wungana wo tsana ni Jehovha. Ni ku ene atxi ti ziva to va ndi na tsanisa wukati wawe ngu lirando li va ku nalo ngu ngene. w23.05 21 ¶3-4

Hambiku Mkoma wathu Jesu Kristu i ku wo pelela, avale a va thumisako ku e thangela hamafuni kha va pelela. Mpostoli Pedro a ningilwe sileletelo asi si nga mbi mtsakisa makhatoni. Mbimo yi a nga leletelwa ngu ngelozi kudya sihari si ka mlayo wa Mosi si nga sa basa, Pedro a lambile kuraru! (Mith. 10:9-16) Ngu kutxani? Nguku mkongomiso wuwa wa wuphya a txi wu wona wu si pfali. Se mpostoli Paulo ene ati tiemisete kuengisa hambi mbimo si vavamna va Judha ava va ngati kuti ngu tanga va nga mgela ku e teka muni wa vavamna e tsula navo dithepelani ve ya basiswa kasiku kombisa to a txi wu xonipha mlayo wa Mosi. Paulo a txi ti ziva to Makristu ma si ngadi hahatshi ka mlayo wa Mosi. ‘Di di txite, Paulo a do teka vavamna vale e tsula, se e ya ti basisa navo.’ (Mith. 21:23, 24, 26) Kuengisa ka Paulo ku tisile wumwewo hagari ka Makristu.—Var. 14:19, 21. w23.10 10 ¶15-16

Ti nga maha u si khali kupimisa to kuthava i nga va fanelo ya lisima ka va i ku vangana va hombe. Hambiketo, ava va lavako kuva ni wungana wa hombe ni Jehovha va fanete ‘ku mthava.’ Ti si nga ni mhaka ni ti to hi ni mbimo muni hi txi thumela Jehovha, hotshethu ti lava hi simama hi mthava. Kambe, ti womba txani kuthava Txizimu? M’thu awu a thavako Jehovha ngu nzila ya yinene wa mu randa ni ku wa vayilela kumaha to kari ati ti nga onhako wungana wakwe nayo. Jesu nene a di ni “kuengisa” mwendo kuthava Txizimu. (Vaheb. 5:7) Kambe ene a si ngo thava Jehovha aha koza e dhudhumela. (Isaya 11:2, 3) Hahanze keto, a txi mu randa ngutu Tate wakwe ni ku a txi ti lava ku mu engisa. (Joh. 14:21, 31) Kufana ni Jesu, nathu ha tiziva ti to Jehovha wa hi randa ni ku nzila yi hi amukelako ngu yona mkongomiso wakwe ya mu gwesa. Ngako hi si engisi Jehovha, ene a na henya, kambe ngako hi txi mu engisa hi na tsakisa mbilu yakwe.—Mas. 78:41; Mav. 27:11. w23.06 14 ¶1-2; 15 ¶5

Mbimo yi Mkoma Uziya a nga va ni wusikoti, a divate ti to Jehovha i ti ene Txisima txa mtamo wu a nga ti nawo. Hi gonda txani? Ndinene kukhumbula ti to otshe makatekwa ni malungelo ya hi ku nawo ma ta ngu ka Jehovha. Hahanze ko ti guleta ngu totshe ti hi kotako ku ti hetisisa, hi fanete kuninga wudhumo Jehovha ngu wotshe wusikoti wathu. (1 Vak. 4:7) Ngu ku tiveka hahatshi hi fanela hi pfisisa to kha ha hetiseka ni ku ha lava mkongomiso. Mwanathu wu a ku ni kona mu ka 60 wa malembe a bhate tiya: “Ni gondile kwa mbi henya mwendo kugodhola ngako vamwani va txi wona tiphazamo ta mina. Ngako ni txi ndindwa nzeve ngu mhaka ya tiphazamo ta mina, ni zama kusimama ni lulamisa txiemo ni si tshumeleli msana.” Ditshuri ngu di do ngako hi txi thava Jehovha ni kusimama hi tiveka hahatshi, hi na va ni wutomi wo tsakisa ngutu.—Mav. 22:4. w23.09 10 ¶10-11

Makristu o khata ti lavile me tsanisela. Hahanze ko wonisana ni sikarato asi si nga toloveleka ka votshe vathu, vona va wonisanile ni simwani sikarato. Mtalo wawe va xanisilwe i singa ngu vathangeli va wukhongeli va Vajudha mwendo wukoma wa Varoma dwe, kambe ni ngu maxaka awe. (Mat. 10:21) Dibanzani ni kona, mbimo yimwani ti lavile ve lwisana ni mkuzetelo wa vaapostata ni tigondo tawe to abanisa dibanza. (Mith. 20:29, 30) Hambi keto, Makristu yawa ma tsanisete. (Mtu. 2:3) Ngu nzila muni? Vona va alakanyisisile ngu sikombiso sa Bhiblia sa vathu va va nga tsanisela so fana ni txa Jobe. (Jak. 5:10, 11) Ona ma txi khongela, me kombela mtamo. (Mith. 4:29-31) Ni ku vona va txi veka mapimo ka wuyelo ya yinene ya kutsanisela kwawe. (Mith. 5:41) Nathu hi nga tsanisela ngako hi txi gonda ngu sikombiso sa mu ka Bhiblia ni sa mabhuku athu, sa vathu va va nga tsanisela hi tshumela hi alakanyisisa ngu sona. w23.07 3 ¶5-6

Jehovha ni Jesu kha va nge thuki va hi tsukula. Msana ko va mpostoli Pedro a di lambile Jesu ti lavile e maha txisungo txa lisima txo a na simama e londeta Jesu mwendo a na tsukula. Jesu a ti kombete Jehovha ti to likholo la Pedro li si holi. Ngu msana, Jesu a gete Pedro ngu mkombelo wu a nga ti m’mahete ni ku m’tsanisekisa ti to a ndina sikota kutsanisa vamwani. (Luka 22:31, 32) Alakanya ngu nzila yi a nga tsana ngu yona Pedro ngu kukhumbula mapswi a Jesu. Ngako ti txi lava hi maha sisungo sa lisima, Jehovha a nga thumisa madhota ku me hi tsanisa hi simama hi di thembekile. (Vaef. 4:8, 11) Nga ha Jehovha a nga khatalela ngu kona silaveko sa nyama sa Pedro ni sa vapostoli vamwani, ene a na khatalela silaveko sathu ngaku hi txi thangetisa Mfumo wa Txizimu. w23.09 24-25 ¶14-15

Jehovha wa wona hambi wunene wa wudotho awu hi wu kombisako ka vamwani. Ene a wona toneto kota digandelo da lisima ni txikweneti txi a no txi hakela. Se ngako u di thumile kota mvhuneteli wa madhota. Jehovha wa khumbula mithumo yi u nga yi maha ni lirando li li nga ku susumetela kasiku u yi maha. (1 Vak. 15:58) Ni ku ene wa li wona lirando li u simamako u li kombisa. Jehovha a lava ti to hotshethu hi kulisa lirando lathu ngu ngene ni ngu vamwani. Hi nga kulisa lirando lathu ngu Jehovha ngu kugonda Dipswi dakwe ni kualakanyisisa ngu dona, ni ku mbimo yotshe hi womba-womba nayo ngu mkombelo. Hi nga kulisa lirando lathu ngu vanathu ngako hi txi va vhuna ngu simaho. Se mbimo yi lirando lathu li kulako hi na tshuketa ka Jehovha ni ka mwaya wathu wa moya, ni ku hi na tidila ngu wungana wuwa ngu ha ku si gumiko! w23.07 10 ¶11; 11 ¶13; 13 ¶18

Mkristu mmwani ni mmwani a fanete kumaha txisungo txa nzila yi a no khatalela ngu yona dihanyo dakwe. Mbimo yi Mkristu a sawulako nzila yi a no khatalela ngu yona dihanyo dakwe a fanete kuengisa milayo ya Bhiblia mayelano ni ku vayilela mnoha ni wuñanga. (Mith. 15:20; Vag. 5:19, 20) Se ka timwani a nga ti mahela txisungo apune. Ti nga maha hi pimisa ti to nzila yi hi yi thumisako ti to hi khatalela dihanyo dathu ngu yona i ku ya yinene kasi ya vamwani hi nga ya yinene. Kambe ti lava hi xonipha sisungo sa vamwani ti txi ta ka mhaka yo khatalela dihanyo. Se ka mhaka yiya hi fanete ku khumbula tinzila tiya ta mune: 1) Mfumo wa Txizimu ngu wona dwe wu no gumisa malwati otshe. (Isaya 33:24) 2) Mkristu mmwani ni mmwani a fanete e “kholwiseka” ka ti i ku ta tinene kwakwe mbimo yi a mahako txisungo mayelano ni nzila yi a no khatalela ngu yona dihanyo dakwe. (Var. 14:5) 3) Kha hi lavi ku lamula vamwani mwendo ku va khuvekisa. (Var. 14:13) 4) Makristu ma kombisa lirando ni ku ma ti pfisisa ti to wumwewo dibanzani ngu wona i ku wa lisima ngutu kupinda mawonelo awe.—Var. 14:15, 19, 20. w23.07 24 ¶15

Ina wa ninga lisima wungana wako ni Jehovha? Ditshuri, ni ku hi ngawe wekha! Kukhukhela kale, vathu wo tala va ti pfite ngu nzila yi u ti pfako ngu yona. (Mas. 104:33, 34) Vavangi va mahile mizamo kasi ku ve khozela Jehovha. Ngu toneto Vanazira ti wombako “Kutiningetela”, va Israyeli wa kale va nga ti maha. Vanazira i ti Vaisrayeli vo hiseka, va nga txi maha mizamo kasi kuthumela Jehovha ngu nzila yo sawuleka. Mlayo wa Mosi wu txi tumelela ti to wamwamna mwendo wamsikati e maha txixambanyo txo sawuleka ka Jehovha, atxi sawula kuhanya kota Mnazira ngu mbimo nyana yo kari. (Mit. 6:1, 2) Mbimo yi Muisrayeli a nga txi maha txixambanyo txo va Mnazira ti txi lava e londisa milayo yo kari, ayi Vaisrayeli vamwani ti nga si sungi ku ve yi londisa. Se ngu kutxani Muisrayeli a ndi no sawula kuva Mnazira? Ti nga maha i ti ngu lirando li a nga ti nalo ngu Jehovha, ni kubonga makatekwa aya ma nga txita ngu kwakwe.—Dhewut. 6:5; 16:17. w24.02 14 ¶1-2

Ka Bhiblia dipswi da txihebheru di di ku “kuthembeka,” mwendo “lirando lo mbi guma,” mbimo yotshe di txhamusela nzila yi Jehovha a kombisako ngu yona lirando lo mbi guma ka malanda akwe. Dipswi donedo di tshumela di txhamusela nzila yi malanda akwe ma kombisanako ngu yona lirando. (2 Sam. 9:6, 7) Ngu kutsimbila ka mbimo kuthembeka kwathu ku nga ya ku txi tsana. Wona nzila yi ti nga maheka ngu yona ka Dhaniyeli. Ku ve ni makhambi o tala ka wutomi wa Dhaniyeli ti nga lava e kombisa ti to a ndi na simama a di thembekile ka Jehovha mwendo nem. Kambe txiduko txa hombe txi tile mbimo yi a nga ti ni kona mu ka 90 wa malembe. Vathu va nyumba ya wukoma va si dhundi Dhaniyeli ni ku va si xoniphi Jehovha Txizimu txakwe. Se va to maha makungo o daya Dhaniyeli. Va to veka mlayo awu wu ndi no duka Dhaniyeli to a ndi na simama a di thembekile ka Txizimu mwendo ka mkoma Dhariyo. Ati Dhaniyeli a nga ti fanete kumaha kasi kukombisa to wa thembeka ka mkoma Dhariyo i ti kuleka kumaha mkombelo ka Jehovha kudingana 30 wa masiku ti to a si tsayiswi. Dhaniyeli a lambile kumaha toneto.—Dhan. 6:12-15, 20-22. w23.08 5 ¶10-12

Jehovha a lava hi tsanisela ko simama hi kombisa lirando ka vanathu. Ngaku vanathu va si hi ñoli ngu nzila yi mkristu a fanelako ku hi ñola ngu yona, hi nga themba ti to vona kha va ngo maha khakwenye ni ku va zama ku maha ati i ku tona masoni ka Jehovha. (Mav. 12:18) Jehovha wa ma dhunda malanda akwe o thembeka ti si nga ni mhaka ni tiphazamo tawe. Hambi hi txi phazama ene wa simama eva mngana wathu ni ku kha hi vekeli txiviti. (Mas. 103:9) Nda lisima ngutu ku etetela tate wathu awu a divalelako. (Vaef. 4:32–5:1) Khumbula kambe ti to, mbimo yi magwito ma yako me tshuketela ti lava hi simama hi va hafuhi ka vanathu. Mbimo yi txiemo txi yako txi karata, hi nga thuka hi ñolwa ngu kona ha ka likholo lathu. Ngako eto ti txi maheka, hi na va lava ngutu vanathu.—Mav. 17:17. w24.03 15-16 ¶6-7

Bhiblia yi ni matimu ya majovhem aya ma nga tshuketa ka Jehovha, me amukela txivhuno txakwe, ni kuva ni wutomi wo tsakisa. Dhavhidha i ve mmweyo wa kona. Mbimo yi i nga ti m’dotho ene a sawute kuthumela Jehovha ni ku ngu kutsimbila ka mbimo i ve mkoma wo thembeka. (1 Vafu. 3:6; 9:4, 5; 14:8) Ngako u txi gonda ngu Dhavhidha, txikombiso txakwe txi nga kukuzeta ku u simama u thumela Jehovha ngu kuthembeka. U nga tshumela u gonda to tala ka txikombiso txa Marku mwendo Timoti. Vona va khatile kuthumela Jehovha i di ngadi vadotho ni ku va simamile ve mthumela ngu kuthembeka. Txisungo txawe txi tsakisile Jehovha. Nzila yi u hanyako ngu yona wutomi wako konku, ngu yona yi no kombisa ti to u na va ni wutomi wo zumbisa kutxani ka mbimo yi yi tako. U txi themba Jehovha konku i singa kuthemba tinzila tako a na kuvhuna kumaha sisungo sasinene. U na va ni wutomi wo tsakisa ni wuyelo ya yinene. Khumbula ti to, Jehovha wa ninga lisima ati u mahako kasi ku mtsakisa. Ina yiho nzila ya yinene u nga hanyako ngu yona ka wutomi wako i singa kuthumela Jehovha Tate wako wa nzumani? w23.09 13 ¶18-19

Mpostoli Paulo a txi ti ziva ti to vanawe va sa pelela. Ngu txikombiso, mbimo yi a nga lava ku ti pata ni dibanza, vagondiswa vamwani va kanakanile ti to nene i ti m’gondiswa. (Mith. 9:26) Ngu kutsimbila ka mbimo vamwani va khatile ku womba-womba kubiha ngu ngene kasi kugoha nduma yakwe. (2 Vak. 10:10) Paulo a woni mwanathu awu a nga ti ni wutixamuleli a txi maha txisungo txo biha atxi txi ndi no khuvekisa vamwani. (Vag. 2:11, 12) Ni ku Marku i nga ti mmweyo wa vangana vakwe a mu godholisile. (Mith. 15:37, 38) Paulo a di tumelete ti to tximwani ni tximwani txa siemo siya si mu maha e ema ku ti pata ni vathu va le va nga ti mu gohete. Ene kha maha toneto, hahanze keto, a simamile e veka mapimo ka tifanelo tatinene ta vanathu vale, ni ku simama e hiseka ka mthumo wa Jehovha. Nji txani txi nga mu vhuna ku e tsanisela? Paulo a ti va dhunda vanathu. Lirando li Paulo a nga ti nalo ngu vanathu li mvhuni kuveka mapimo ka tifanelo tawe ta tinene i si nga ka tiphazamo tawe. Lirando li Paulo a nga ti nalo li tshumete li mu kuzeta kumaha ti a nga bhala ka m’bhalo wa nyamsi. w24.03 15 ¶4-5

Bhiblia yi ni matimu o tala ma kombisako lisima la ku va wo thutha. A hi woneni txikombiso txa Isaake. Mbimo yi Isaake a nga aka khe Gerara ditiko da Vafilista, vaakelani wakwe va to m’bavela, ve kuletela sisima si si nga ti ketwe ngu malanda a tate wakwe. Hahanze ko txiwusa, ene a to rurisa mwaya wakwe va txiya ka ditiko dimwani va txi ya kela sisima simwani. (Gen. 26:12-18) Kambe Vafilista va to mlondisa va txi ya khona ni ona ya i mati athu. Hambi ni mazunga yawa, Isaake a simamile i di wo thutha. (Gen. 26:19-25) Nji txani txi nga m’vhuna ku simama a va wo thutha hambi ku va nga di tiemisete ku mu vhuka? Ha tsaniseka ti to ene a gondile ngu txikombiso txa vaveleki vakwe, e gonda ngu nzila yo rula ya Abrahamu, ni “moya wo thutha ni wa kudikha” wa Sara.—1 Pedro 3:4-6; Gen. 21:22-34. w23.09 15 ¶4

Tate wathu wo randeka Jehovha, ngu mbimo yakwe a rumete mwanana wakwe wa matiwula e ta ha mafuni kasi ku ta gondisa vathu mayelano ni Mfumo ni ku ningela wutomi wakwe kasi ku hi terula ka txionho ni lifo. Jesu a wusilwe ka va kufa e tshumela e ya nzumani e ya va Mkoma wa Mfumo wa Txizimu. Msungo mhaka wa hombe wa Bhiblia ngu ti to ditina da Jehovha di na basiswa mbimo yi a no hetisisa makungo akwe mayelano ni mafu ngu kuthumisa Mfumo wu wu ku manzani ka Kristu. Makungo ya Jehovha kha ma na kutxitxa. A thembisile to totshe ti na maheka nga ha a nga womba ngu kona. (Isaya 46:10, Vaheb. 6:17, 18) Ka mbimo yoneyo, mafu ma na txitxa me va paradhise aha vanana va Adhamu ni Evha vo pelela ni vo lulama va no “hanya tatinene kala kupinduka.” (Mas. 22:26) Ku ni timwani to engeteleka ti Jehovha a lavako ku ti hetisisa. Dikungo dakwe do gwita ngu tshanganisa otshe malanda akwe a nzumani ni ya ha mafuni. Konaho otshe malanda yawa ma na engisa Jehovha kota Mfumeli. (Vaef. 1:8-11) Ina kha yi ku xamatisi nzila yo tshura yi Jehovha a hetisisako ngu yona makungo yakwe? w23.10 20 ¶7-8

Mbimo yi Majudha ya ma nga txi hanya Bhabhilona ma nga wuiyela Jerusalema, ma wonisana ni sikarato sa timale, tipolitika ni ku wukelwa. Vamwani kwawe ti va karatete kuveka mapimo ka ku wusetwa ka dithepele da Jehovha. Se Jehovha a rumite vaprofeti vambidi, Hagayi ni Zakariya ti to ve ya tsanisa vathu va Txizimu, ve wuseta wukhozeli. (Hag. 1:1; Zak. 1:1) Ku di pindile 50 wa malembe, Majudha ya ma nga wuya Jerusalema, ti lavile me tsaniswa kambe. Ezra kopista wa hombe wa mlayo a tile Jerusalema a txi khukhela Bhabhilona kasiku ta tsanisa vathu va Txizimu ku ve thangetisa wukhozeli wa ditshuri ka wutomi wawe. (Ezra 7:1, 6) Nga ha wuprofeti wa Hagayi ni Zakariya wu nga vhuna vathu va Txizimu ka timbimo ti ti nga pinda ku ve simama ve themba Jehovha mbimo yi va nga txi wukelwa, wona wu nga hi vhuna nyamsi ku hi simama hi themba txivhuno txa Jehovha ti si nga ni mhaka ni sikarato si hi wonisanako naso.—Mav. 22:19. w23.11 14-15 ¶2-3

Hi li kombisisa kutxani lirando lathu ngu vanathu? Yimweyo ya tinzila, ngu va thavelela. Hi na sikota ‘kuzumba hi txi thavelelana’ ngu kususumetelwa ngu wumbilu. (1 Vat. 4:18) Hi nga simamisa kutxani hi txi kombisana lirando lo tsana? Ngu kumaha totshe ti hi nga tikotako kasi kudivalela tiphazamo ta vamwani. Ngu kutxani nyamsi i di ta lisima ngutu ku hi kombisana lirando? Wona txivangelo txi Pedro a nga txi womba: “Se magwito a sotshe simaha ma hafuhi. Ngu toneto, . . . khatalelani kurandana.” (1 Pedro 4:7, 8) Mbimo yi magwito ya mafu yawa ma yako ma txi tshuketa, ngu tihi ti hi fanelako ku tiemela? Jesu a wombile tiya mayelano ni ti ti ndi no humelela vagondiswa vakwe: “Mi na vengelwa ngu votshe vathu, ngu mhaka ya ditina dangu.” (Mat. 24:9) Kasi kutsanisela livengo lonelo, ti lava hi simama hi di ni wumwewo. Hi txi maha toneto, mizamo ya Sathani yo lava ku hi hambanisa yi na feyila nguko hi na va hi di wumbilwe ngu lirando.—Vaf. 2:1, 2. w23.11 13 ¶18-19

Mapswi a ditshuri a Dipswi da Txizimu ma ni mtamo ngutu. Ta tsakisa ngutu kugondisa vathu mayelano ni Jehovha ni ti a nga zumbisa tona. Didhamba adi Sathani a nga fenengeta ngu dona maso a vathu dawa, se va khata kuwona tifanelo to tsakisa ta Tate wathu. Vona va xamatiswa ngu mtamo wo mbi gwitelwa wa Jehovha. (Isaya 40:26) Vona va gonda ku mthemba ngu konaha ka wululami wakwe wo pelela. (Dhewut. 32:4) Vona va gonda ngutu ngu wutxhari wakwe wa hombe. (Isaya 55:9; Var. 11:33) Ni ku tshumela ve tsaniswa mbimo yi va gondako to Jehovha lirando. (1 Joh. 4:8) Mbimo yi va yako ve tshuketa ka Jehovha, themba yawe yo hanya ngu ha ku si gumiko yiya masoni yi va ya ditshuri. I lungelo ya hombe ngutu hi ku nayo yo vhuna vathu ku ve tshuketa ka Tate wathu! Mbimo yi hi mahako toneto Jehovha a hi teka kota “vavhuneteli” vakwe.—1 Vak. 3:5, 9. w24.02 12 ¶15

Ngako u di txigondiana txa Bhiblia mwendo u txi kuliswa ngu vaveleki ava i ku Tifakazi ta Jehovha, ina wa alakanya ngu kubhabhatiswa? Edo dikungo da dinene! Kambe, u si se bhabhatiswa u fanete kutiningetela ka Jehovha. U tiningetelisa kutxani ka Jehovha? U tiningetela ka Jehovha mbimo yi u mahako mkombelo u mthembisa ti to u na khozela ene dwe ni kuthangetisa kumaha kudhunda kwakwe ka wutomi wako. Ngu ditshuri awe u thembisa Jehovha to u na simama u mranda “ngu yotshe mbilu yako, ni wotshe muhefemulo wako, ni otshe mapimo ako ni wotshe mtamo wako.” (Marku 12:30) Kutiningetela koneko u kumaha wekha awe ni Jehovha. Ngu didhawa dimwani bhabhatiso yi mahwa hakubasani, kasi kukomba vamwani ti to u tiningetete ka Jehovha. Kutiningetela kwako i mhaka ya lisima ngutu, se u na maha totshe kasi kuhetisisa txixambanyo txako ni ku Jehovha a emela toneto.—Ekl. 5:4, 5.w24.03 2 ¶2; 3 ¶5

Votshe va va nga tekana va wonisana ni sikarato. Bhiblia yi ti veka ha kubasani ti to ava va nga txhadha “va na mana sixaniso sa ha mafuni.” (1 Vak. 7:28) Ngu konaha ka txani? Nguku mtxhadho wu pata vathu vavambidi a va va nga mbi pelela, mmwani ni mmwani ani mazumbelo ni mamahelo o hambana ni ya mkwawe. Nguko ti nga maheka va txi ta ngu ka midhawuko yo hambana. Ti nga maha ngu ku tsimbila ka mbimo, ve kombisa mahanyelo aya va nga si se ma tumbula va si se txhadha. Simwani ni simwani ka sikarato soneso si nga wusa mpusi. Hahanze ko tumela phazamo yawe ni ku thuma kumweko kasi ku lulamisa txiemo, va nga ningana mnandu. Ti nga maha ve wona ti to i tshuko kuhambana mwendo ku wila mtxhadho. Ina i nga va ti to ku wila mtxhadho i nzila ya yinene yo xula txikarato? Ahim-him. Jehovha a ruma ti to ava va nga txhadha ve xonipha mawonelo a Jehovha ngu mtxhadho hambi ti txi karata. w24.03 16 ¶8; 17 ¶11

Msana ka kuva u di bhabhatisilwe u na simama u ziva Jehovha ni ku lirando lako ngu ngene li naya li kula. Ngu nzila yoneyo themba yako yo ta hanya hamafuni yi naya yi tsana ngutu. (Vaheb. 5: 13–6:1) Awe u na tsaniseka ka ti Varoma 5:2-4 yi ti wombako. Ti hakubasani ti to u pindile ngu ka sikarato so tala kambe u simamile u tsanisela ni ku Jehovha a kombisile ti to wa tsaka ngu ngawe. Ngu kuziva ti to Jehovha wa kuranda, konku u ni txivangelo tximwani txo zumba u txi verela ati Jehovha a nga thembisa. Themba yako yi tsani ngutu kupinda mbimo yi u nga ziva ditshuri. Konkuwa themba yoneyo nja ditshuri ngutu kwako, ni ku yi ni txhamuselo yo sawuleka ngutu kwako. Yona yi gwesa totshe ti u ti mahako ka wutomi wako. Yi txitxa nzila yi u ñolako ngu yona va mwayani kwako, nzila yi u mahako ngu yona sisungo ni nzila yi u thumisako ngu yona mbimo yako. Mpostoli Paulo a simama a womba-womba ngu mhaka yo xamatisa ngutu mayelano ni themba ayi hi ku nayo msana ko hi di amuketwe ngu Jehovha. Ene wa hi tsanisekisa ti to themba yathu yi na hetiseka ngu ditshuri.—Var. 15:13. w23.12 12-13 ¶16-19

Ngako hi txi manana ni sikarato hi nga khata kupimisa ni kumaha timhaka ngu nzila yi hi nga mbi tolovela kumaha ngu yona. Kufana ni ngalava yi pekwako ngu moya wa hombe yi txi rethwa ngu mavimbi yi txi ya khe ni khe, nathu hi nga ti pfa hi txi xaniswa ngu matipfelo o hambana-hambana o londiselana. Jehovha a nga hi vhunisa kutxani ngako hi txi ti pfa hi txi xulwa ngu matipfelo athu?Ene a thembisa ku hi tsanisa ngu didhawa da moya ni da matipfelo. Ngu txikombiso, ngako ku di ni moya wa hombe hagari ka linene, dibhoti ngu mtoloveto di rethwa kuya khe ni khe. Kasiku mabhoti a mangi me mana kupinda ka txiemo txonetxo ma ni tisimbi ngu hahatshi ka mati ati ti ma tsanisako. Tisimbi toneto ti tsanisa dibhoti ti to di si xulwi ngu mavimbi ngu nzila yoneyo vathu va ti pfa va di vhikelekile va di ka liendo lo tshamba. Txo xamatisa ngu ti to wungi wa tisimbi toneto ti maha mthumo wa tona mbimo yi dibhoti di ku kutsimbilani. Ngu ha kufanako, Jehovha a na hi tsanisa ngu didhawa da moya ni da matipfelo ngako hi txi simama hi txi mthumela hi di thembekile hambi hi txi wonisana ni sikarato. w24.01 22 ¶7-8

Ngako u txi tipfa u txi thava ti wotisi tiya: ‘Ngu tihi ati Jehovha a nga timaha?’ U nda tsem u alakanyisisa ngu mtumbuluko, ‘u wonisisa’ nzila yi Jehovha a khatalelako ngu yona sinyana ni mafilori hambiku sona si nga mbi mahwa ngu txifananiso txa Txizimu ni ku nem kha si na ku txi khozela, se athu hi nga themba ngu ditshuri ti to a na hi khatalela. Kupimisa ngu nzila eyo ti na engetela kuthemba kwako Jehovha. (Mat. 6:25-32) U nga tshumela u pimisa ngu ti Jehovha a nga mahela malanda akwe. U nga gonda mayelano ni m’thu wo kari wa mu ka Bhiblia a nga ti ni likholo lo tsana, mwendo kugonda matimu a Tifakazi ta Jehovha ta masiku athu. Hahanze keto, tshumela u alakanyisisa ngu ti Jehovha a ku khatalelisako tona. Nji txani txi a nga txi maha kasiku u gonda ditshuri? (Joh. 6:44) A xamute ngu nzila muni mikombelo yako? (1 Joh. 5:14) Ngu tihi tatinene ti mahekako ka wutomi wako, ti kotekako ngu kona ha kova Jehovha a di hi ningile mterulo?—Vaef. 1:7; Vaheb. 4:14-16. w24.01 4 ¶6; 7 ¶17