“Amen” wako wa tsakelwa ngu Jehovha

JEHOVHA wa wu ninga lisima wukhozeli wathu. Ene “wa riya nzeve a txi engisela” malanda akwe, se sotshe simaho so mu dhumisa, hambi i di sidotho, ene wa si ninga lisima. (Mal. 3:16) Ngu txikombiso, alakanya ngu dipswi adi hi tolovelako ku di womba makhambi o tala. I ku “amen.” Ina Jehovha wa ninga lisima dipswi donedo da didotho? Ina! Ngu kutxani? He woni ati dipswi donedo di wombako tona ni nzila yi di nga thumiswa ngu yona mu ka Bhiblia.

“VATHU VOTSHE VA NA WOMBA VA TXI KHA VONA: “AMEN!””

Dipswi di di ku “amen” di womba ku “ti na maheke” mwendo “ngu ditshuri.” Di ta ngu ka dipswi da Txihebheru di wombako “kuthembeka,” “ta ditshuri.” Yimwani mbimo di ti thumiswa ka timhaka ta mlayo. M’thu na a si se maha txixambanyo, ene a ti fanete kuwomba ku “amen” ti to e tsanisa ku ati a nga womba ditshuri ni ku tisunga apune ka wuyelo ayi yi no va ho ngu ti a nga womba. (Mit. 5:22) Ngako a txi womba ku “amen,” a ti tsanisekisa mapswi aya a nga womba.—Neh. 5:13.

Txikombiso txo xamalisa txa mathumiselo a “amen” txi bhatwe ka dibhuku da Dhewuteronome txipimo 27. Msana ka ku va Vaisrayeli va di wulete ka Ditiko da Txithembiso, va ti fanete ku ya tsanganelana hagari ka Mmango wa Ebhali ni Mmango wa Garizime ti to ve gondelwa Mlayo. Hi nga ti to va ndi no ya engisela dwe, kambe va ti fanete kutshumela ve womba ti to Mlayo wonewo va wu tumela. Va ti xamula va txi “Amen!” mbimo yi kulerwako wuyelo yo mbi engisa. (Dhewut. 27:15-26) Alakanya mpfumawulo wa mapswi a mazana a vavamna, vavasikati ni vanana va txi xamula ngu dipswi do guleka! (Jox. 8:30-35) Ngu ditshuri mapswi aya va nga ma womba ditshiku donedo, kha va ma divala. Se Vaisrayeli vonevo va xayisile dipswi dawe, nguko Bhiblia yi womba tiya: “Israyeli a thumete MKOMA amu ka otshe masiku a kuhanya ka Joxuwa, ni ka masiku otshe a madhota awa ma nga hanya msana ka kufa ka Joxuwa, i ku vale va nga ziva mithumo yotshe yile, MKOMA a nga yi maha ka vanana va ka Israyeli.”—Jox. 24:31.

Jesu nene a thumisile “amen” kasi ku e tsanisekisa taku ati a nga womba ditshuri, kambe ene a mahile toneto ngu nzila yo sawuleka. Hahanze ko mu thumisela kuxamula mhaka yo kari, ene a thumisile “amen” (ti wombako ku “kha ditshuri”) ti to e khata kuwomba timhaka ta ditshuri. Mbimo yimwani, ene a wuyeletile dipswi, a txi khene “amen amen.” (Mat. 5:18; Joh. 1:51) Ene a ti tsanisekisa vaengiseli vakwe ti to mapswi akwe nga ditshuri do tala do hetiseka. Jesu a ti womba-womba ngu kutsaniseka koneko nguko ngene awu a nga ti tumeletwe kuhetisisa sikongomelo sa Txizimu.—2 Vak. 1:20; Mtu. 3:14.

“VOTSHE VA TO KHA VONA: AMEN! SE VE DHUMISA MKOMA”

Vaisrayeli va ti tshumela ve thumisa “amen” mbimo yi va nga txi dhumisa ni kumaha mikombelo ka Jehovha. (Neh. 8:6; Mas. 41:13) Ngu kuwomba dipswi donedo msana ka mkombelo, ava va engiselako va ti kombisa ti to va teka mkombelo kota wawe. Votshe va nga ti maneka va ti pateka ni vona, ve khozela kumweko Jehovha. Eto ngu ti ti nga maheka mbimo yi Mkoma Dhavhidha a nga wuyisa Dibhokiso da Jehovha Jerusalema. Ngu m’buso wu wu nga londisela, a mahile mkombelo wo tsakisa wo nga ndando wu wu nga bhalwa ka 1 Makronika 16:8-36. Ava va nga ti ho va susumetilwe ngu mapswi onewo se, “votshe vathu va to kha vona: Amen! Se ve dhumisa MKOMA.” Phela xamulo yawe yo patana, yi engetete litsako ditshiku donedo.

Makristu a mbimo ya vapostoli ni ona ma ti thumisa “amen” mbimo yi va nga ti dhumisa Jehovha. Vabhali va Bhiblia va di thumisile mbimo yo tala. (Var. 1:25; 16:27; 1 Pedro 4:11) Dibhuku da Mtuletelo di womba-womba ngu sivangwa sa nzumani si txi dhumisa Jehovha ngu kuwomba ku: “Amen! Haleluya!” (Mtu. 19:1, 4) Makristu o khata ma ti tolovela kuwomba “amen” msana ka mkombelo mitshanganoni. (1 Vak. 14:16) Hambi keto, va si ngo di womba dwe.

INA TI NI LISIMA KUWOMBA KU “AMEN”

Msana ko gonda nzila yi malanda a Jehovha ma nga thumisa ngu yona “amen,” se ha ti wona ti to ngu kutxani ti di ni lisima kuvhala ngu dona mkombelo. Hi txi di thumisa msana ka mkombelo wathu hokha, hi tsanisekisa ati hi nga womba. Ka mkombelo wu hi ku vangi, hi txi xamula ngu “amen” hi kombisa ti to ha tumela ati ti nga wombwa. Wona timwani ati ti mahako “amen” e va ni lisima.

Hi kombisa kukhatala ngu wukhozeli wathu. Ku txi mahwa mkombelo hi khozela Jehovha i si nga ngu ti hi wombako dwe, kambe ni ti hi tiñolisako tona. Minavelo yathu yo lava kuwomba “amen” wa ditshuri, yi nga hi vhuna kuveka mialakanyo yathu ka mkombelo.

Yi hi patanisa kota vakhozeli. Mkombelo wa ha ka vathu vo tala wu womba-womba ngu votshe va dibanzani. (Mith. 1:14; 12:5) Ngako hi txi xamula ngu wumwewo ni vanathu, hi maneka hi di patanile. Mwendo hi womba ti pfala mwendo ngu mbiluni, “amen” wathu a maha ti to Jehovha e engetela txivangelo txo xamula ngu kuya ngu txikombelo txa hotshethu.

Mwanathu wa txisikati a txi namisa msungo a txi engisela mkombelo wa dibanzani ngu kuthumisa fone — “Amen” wathu a seketela kudhumisa Jehovha

Hi dhumisa Jehovha. Jehovha wa wona simaho sathu sa sidotho so mdhumisa. (Luka 21:2, 3) Ene wa wona minavelo yathu ni ti ti ku mbiluni kwathu. Hambi i di ti to hi engisela mitshangano ngu telefone, hi nga tsaniseka ti to “amen” wathu wo ti veka hahatshi mbwa lisima ka Jehovha. Mbimo yi hi wombako ku “amen” hi di mitshanganoni hi dhumisa Jehovha.

“Amen” wathu a nga woneka i si nga wa txilo, kambe a ni lisima ngutu. Dibhuku dimwani da titxhamuselo ta Bhiblia, di womba ti to malanda a Txizimu ma ndi na kombisa “kuthemba kwawe, kutumela kwawe, ni themba yawe yi ku mndani ka timbilu tawe ngu kuthumisa dipswi diya da dimwedo.” Hi navela ti to “amen” wuhi ni wuhi hi mu wombako, e tsakisa Jehovha.—Mas. 19:14.

INA MBIMO YOTSHE HI FANETE KUWOMBA “AMEN”?

Dipswi “Amen” nda lisima ngutu. Hambi keto, ngako awu a mahako mkombelo e thuka e womba timhaka ati i si ngako tona, ina hi fanete hi malala hi si wombi ku “amen”? Hi nga mbimo yotshe. Phela Jehovha wa ti ziva ti to athu ha phazama ngu sisofu sathu, se ene wa divalela tiphazamo toneto. Se, hahanze ko sola-sola, ngako hi txi veka mapimo athu ka timhaka ta moya, i si nga ka mapswi, hi nga tipfa ti di fanete kuwomba ku “amen” ka ti ti nga wombwa.

Kambe, kha hi wombi ku “amen” ti pfala mwendo ngu mbiluni ka mkombelo wo mahwa ngu wu a si kholwiko. Se hi nga txani ngako aha hi ku kona ku txo thuka kumahwa mkombelo? Ngu txikombiso, ti nga maheka hi di ka tximahakalo txo kari txo kari ni vamatiko, se ku kombelwa m’thu wo maha mkombelo. Mwendo siro simwani sa mwaya si di ka wukhongeli wumwani, se msungo wa mwaya awu i si ngako Fakazi, e lava kumahela mwaya mkombelo. Hi nga maha txani?

Hi txi thuka hi va ka txiemo txonetxo, hi nga malala hi kombisa txixonipho. Hi na mbi seketela ngu “amen”; nem hi na mbi ñolana mawoko ni vamwani mbimo yi mkombelo wu mahwako, ati ti nga kombisako ti to hi navo ka mkombelo. Hi nga sawula ku ti mahela mkombelo wathu wa mbiluni, kambe hi na vayilela kuwomba “amen” wo pfala ti to vamwani va si alakanyi ti to hi manekile ka mkombelo wawe. Ngako va txi khukha ve ema, ngathu hi no sunga ku nathu ha khukha kani. Kukhukha u ema mwendo kunamisa msungo, toneto dwe hi nga kukhozela. Tiya ngu Mkristu mmwani ni mmwani kuwona ti to ngu tihi i ku ta tinene ka txiemo txo kari, kambe kha kulaveki ni wamweyo wo sola ka siemo so nga soneso.

Siemo si si nga kombiswa txitimwi hawa ni sona si kombisa ti to ngu kutxani “amen” i di wa lisima ka Jehovha.