Mareferensiya a txibhukwana txa mitshangano ya Mahanyelo a Wukristu
© 2023 Watch Tower Bible and Tract Society of Pennsylvania
4-10 KA MARÇO
TITHOMBA TA MU KA DIPSWI DA TXIZIMU | MASALMO 16-17
“Hahanze kwako [Jehovha] kuwalo tximwani txi ni tsakisako”
Anu vaphya mi nga sikota kumana wutomi wo tsakisa
SAWULA VANGANA VA VANENE
11 Lera Masalmo 16:3. Dhavhidha a ti ti ziva kulava vangana va vanene. Ene a sawute vangana ava va dhundako Jehovha, se eto ti ‘m’tsakisile.’ Vangana vakwe a ti va dhana ku mba “sawuleki” nguko va ti zama kulondisela milayo ya Jehovha ya mahanyelo o basa. M’bhali mmwani wa Masalmo a bhate tiya mayelano ni vangana va vanene: “Na ti tshanganisa ni vale va kholwako kwako ni vale va xayisako sileleto sako.” (Masalmo 119:63) Nga ha hi nga gonda ka msungo wu wu nga pinda, nawe u nga mana vangana va vanene ka vathu va va randako Jehovha ni ku mu engisa. Phela hi nga ti to u fanete u lava vangana va tanga yako dwe.
w14 15/2 29 ¶4
Ti dile ngu “lirando la MKOMA”
Ka masalmo mamwani Dhavhidha a embelelete Jehovha atxi: “Awe ngawe wuthavelo wangu; kambe u thomba yangu ka mafu ya va va hanyako!” (Mas. 16:5, 6) Dhavhidha a txo bonga ngu kuva Jehovha i di thomba yakwe, mwendo ku, ngu kuva ni wungana wa wunene ni Txizimu ni kuva ni lungelo yo txi thumela. Kufana ni Dhavhidha, ha katekiswa ngutu ngu didhawa da moya hambi hi txi wonisana ni sikarato. Ngu toneto a hi simameni hi ninga lisima wukhozeli wa ditshuri ni ku yotshe mbimo ‘hi pfa lirando la MKOMA ni ku mkhozela Nyumbani kwakwe.’
w08 15/2 3 ¶2-3
A hi simameni hi thangetisa Jehovha masoni kwathu
2 Hi nga gonda to tala ka ti ti nga humelela ka sikombiso sa mu ka Bhiblia, so fana ni Abrahamu, Sara, Mosi, Rute, Dhavhidha, Esteri, Mpostoli Paulo ni vamwani. Kambe madungula mayelano ni vathu ava va si ziwiko ngutu ma nga hi wuyelisa. Kualakanyisisa ngu madungula ya mu ka Bhiblia, ti nga hi vhuna ku hi ti pfananisa ni mapswi ya m’bhali wa masalmo, a ya ma ku: “Yotshe mbimo ni na ni MKOMA masoni kwangu; kha ni na mbi dhukiswa ngu txilo, nguko ene a ka didhawa dangu da txinene.” (Mas. 16:8) Ma txhamusela txani mapswi yawa?
3 Disotxhwa di txi tolovela kuñola ditxhari ngu diwoko da txinene, didhawa donedo di si nga ni txivhikelo txa txitxhavangu atxi txi nga txi ñolwa ngu diwoko da txibhabha. Ngu toneto, di ndi nava di di vhikelekile ngako mngana wa dona atxi lwa a di hafuhi nado ngu didhawa da txinene. Ngako hi txi thangetisa Jehovha, hi maha kudhunda kwakwe ene a na hi vhikela. A hi woneni ti to madungula o kari a mu ka Bhiblia ma nga tsanisa ngu nzila muni likholo lathu kasi ku ‘hi thangetisa Jehovha masoni kwathu.’
Tithomba ta moya
it-2714
Pfhaka ya diso
Mapswi a mambidi aya ma ku i·shohnʹ ni di di ku ʽaʹyin ma womba ku “ndololo ya diso” mwendo ku pfhaka (Dhew 32:10; Mav 7:2), Ngu nzila ayi yi fanako ka Sidilo 2:18 kuthumiswa bath (mwanana) ti txi ningela txhamuselo ya “mwanana wa diso”, mapswi yawa ngu wumbidi wa ona ma txi womba ndololo ya diso mwendo ku pfhaka. Ka Masalmo 17:8 mapswi yawa a mambidi (ʼi·shohnʹ bath-ʽaʹyin) ma patwa kasi kujunyatisa ti txi txhamusela ngu kukongoma “Ndololo ya diso” mwendo ku pfhaka ya diso. Eto ti lava kuwomba ti u wonisako tona ngako u txi ti buka ka diso da mmwani.
Diso di ni wukhuxo ngutu; hambi i txo va txizokoro mwendo txisisiana txi txo maneka mndani ka diso dona da mangala. Txienge txa diso atxi txi ku nga dividro , txi vhikelako ndololo txi lava kuxayiswa kwati, nguko ngako txienge txiya txi txi dawiswa, mwendo txi phumala ngu konaha ka malwati, ti nga maha ti to hi si woni kwati mwendo kumaha dibhofu. Dipswi di di ku “ndololo ya maso” a wena Bhiblia ya di thumisa ngu nzila ya mtamo, yi tshumela yi di thumisa ngu nzila yo ñenga mbimo yi yi womba-wombako ngu si si lavako kuvhikelwa ngutu. Mlayo wa Txizimu wu fanete kuñolwa ngu nzila yoneyo. (Mav 7:2) Dhewuteronome 32:10 yi txi txhamusela nzila yi Txizimu kota tate txi nga xayisa ngu yona Israyeli. ti to txi txi xayisa ditiko diya kufana ni “ndololo ya diso dakwe.” Dhavhidha a mahile mkombelo wo e vhikelwa ngu ku xayiswa ngu Txizimu kota “ndololo ya diso.” (Mas 17:8) Ene a txi lava ti to Jehovha e mvhikela ngu txikuluveta ngako a txi xaselwa ngu valala. (Fananisa ni Zak 2 8 ahawa ku thumiswako dipswi di ku ba·vathʹ ʽaʹyin, “globo ocular.”)—Wona OLHO.
11-17 KA MARÇO
TITHOMBA TA MU KA DIPSWI DA TXIZIMU | MASALMO 18
“MKOMA . . . mtxhatxhisi wangu”
w09 1/5 14 ¶4-5
Ina wa ma pfisisa mapswi ya mu ka Bhiblia aya ma ku mahako u alakanyisisa ngu to kari?
Bhiblia ni yona yi fananisa Jehovha ni silo so mbi nga ni wutomi. Ene wa dhanwa kota “dirigwi da Israyeli”, ni “mkhokhola”. (2 Samuwele 23:3; Masalmo 18:2; Dhewuteronome 32:4) Ngu kuhi kuyelana aku ku kuho? Nga ha dirigwi da hombe di nga tsana ni kwa mbi dekadeka, Jehovha Txizimu a nga va txisima txo tsana txa wu vhikeli wako.
5 Dibhuku da Masalmo di nga ku maha u pimisa ngu mapswi o hambana-hambana aya ma nga kumahako u alakanyisisa ngu wuthu wa Jehovha. Ngu txikombiso, Masalmo 84:11 yi womba Jehovha “liwoningo ni m’vhikeli” Nguku ene txisima txa liwoningo, txa wutomi, txa mtamo ni ku vhikela. Ngu didhawa dimwani, Masalmo 121:5 a womba: “Mkoma ngene mtsudi wako txinene kwako.” Kufana ni mtsudi awu wu nga ku vhikelako ka lisima lo hisa, Jehovha nene a nga vhikela malanda akwe ka sikarato, ngu ku va ninga mtsudi, mwendo kuva vhikela , hahatshi ka “dianza” mwendo ka “mabhapi.”— Isaya 51:16; Masalmo 17:8; 36:7.
it-21161 ¶7
Dipswi
Jehovha wa engisa dipswi da malanda akwe. Avale va thumelako Jehovha ngu moya ni ditshuri va nga dhana Txizimu va txi tsaniseka ka ti to na engisa dipswi dawe ti si khataliseki ti to va txi dhana ngu lidimi muni. Aku Jehovha a tizivako ta mbiluni, hambi hi txi maha mkombelo ngu mbiluni ene wa ‘engisa.’ (Mas 66:19; 86:6; 116:1; 1Sa 1:13; Neh 2:4) Txizimu txa engisa ava va mu dhanako va kombela txivhuno na va di karatekile, txi tshumela txi engisa dipswi ni ku ziva makungo a vathu va va mu wukelako, va mahelako to biha malanda akwe.—Gen 21:17; Mas 55:18, 19; 69:33; 94: 9-11; Jer 23:25.
Hi nga maha txani ti to hi wonisana ni kuvilela?
2. Kualakanyisisa ngu makhambi ya Jehovha a nga kuvhuna. Ngako u txi alakanyisisa ngu sotshe sikarato asi u nga manana naso ka wutomi wako ina wa yi wona nzila yi Jehovha a nga kuvhuna ngu yona? Ngako u txi alakanyisisa ngu nzila ayi Jehovha a hi vhunako ngu yona nyamsi ni nzila yi a nga vhuna ngu yona malanda akwe a kale, ti na hi ninga mtamo ni ku hi na m’themba ngutu. (Mas. 18:17-19) Didhota dimwani di dhanwako ku i Joshua di womba tiya: “Ani ni ni lista ya mikombelo ayi Jehovha a nga xamula. Atiya ti ni vhuna ku ni khumbula sotshe sikhati asi ni nga kombela to kari ka Jehovha ngu kukongoma e tshumela e ni xamula.” Ina, ngako hi txi alakanyisisa ngu nzila ayi Jehovha a nga hi vhuna ngu yona ti na hi ninga mtamo ni ku hi na sikota kuwonisana ni kuvilela.
Tithomba ta moya
it-1432 ¶2
Dikerubhima
Ayiya i singa mifota yo nyenyeza ayi yi nga txi wumbwa ngu sithombe asi si nga ti ni mabhapi si nga txi khozelwa ngu matiko ya wukhozeli wa makuho nga ha vamwani va wombako ngu kona. Ngu kuya ngu wufakazi awu wu nga txi tsimbitisana kumweko ni txihena txa kale txa Vajhudha (Bhiblia kha yi wombi txilo ngu mhaka yiya), makerubhima yawa ma ti ni mazumbelo yo fana ni mʼthu. I ti sivangwa so tshura si nga txi emela tingelozi ni ku si mahilwe ngu nzila yi Mosi a nga ʼkombiswaʼ ngu yona ngu Jehovha. Mpostoli Paulo a ma dhana kota ʼmakerubhima, ma nga txi kombisa wudhumo wa Txizimu, ma txi fenengeta txikhalo txa wumbilu ngu mtsudi wa ona.ʼ (Vaheb 9:5) Makerubhima yawa ma txi tsimbitisana ni ku maneka ka Jehovha: “Se konaho ni nata ni ta womba-womba ni nawe txitimwi ka txikhalo txa wumbilu, ngu hagari ka makerubhima mambidi ma ku txitimwi ka dibhokiso da txifakaziso.” (Eks 25:22; Mit 7:89) Ngu toneto ku txi wombwa ti to Jehovha a ti “txikhaloni txitimwi [mwendo hagari] ka makerubhima.” (1Sa 4:4; 2Sa 6:2; 2Vafu 19:15; 1Mak 13:6; Mas 80:1; 99:1; Isa 37:16) Ngu nzila yo fanekisela makerubhima ma txi thuma kota “txikombiso txa txikotxikani” txa Jehovha, aha a nga txi enda a di kona (1Mak 28:18), niku mabhapi a makerubhima ma txi ningela txivhikelo ni ku kuluvetisa dipfumba. Ngu nzila yoneyo Dhavhidha ka ndando yakwe ya dipoeziya a txhamusete txikuluveta atxi Jehovha a nga ta ngu txona kasi ku eta mu vhuna mbimo yi a nga womba tiya: “Txi puruma txi di gadhile dikerubhima” txi tshumela “txi tsimbila txi di mabhapini ka diphuho.”—2Sa 22:11; Mas 18:10.
18-24 KA MARÇO
TITHOMBA TA MU KA DIPSWI DA TXIZIMU | MASALMO 19-21
“Nzuma yi nuwela wudhumo wa txizimu”
w04 1/1 8 ¶1-2
Votshe va na nuwela wudhumo wa Jehovha
DHAVHIDHA mwanana wa Jese, a kute kota m’dyisi hafuhi ni Bhetlehema. Makhambi a mangi a woni kutshura ka tinyeleti ni wusiku, mbimo yi a nga txi khatalela sihari sa tate wakwe libalani! Kha ti kanakanisi ti to timhaka toneto to xamatisa a nga ti wona kha ta khukha ka mialakanyo yakwe, mbimo yi a nga huhutelwa ngu moya wo sawuleka wa Txizimu a embelete mapswi o tshura aya ma ku ka Masalmo 19: “Nzuma yi nuwela wudhumo wa Txizimu, ani mpfuka wu zivisa mithumo ya manza a txona. Aniko kunuwela ka sona ka hoka ka dotshe ditiko ni kuwombawomba ka sona kuhokile magemeta-mitshi ka mafu.”—Masalmo 19:1, 4.
2 Kha yi wombawombi, kha yi na mapswi, kambe nzuma yo xamatisa yi nga mahwa ngu Jehovha yi nuwela wudhumo wakwe wusiku ni mitshikari otshe masiku. Mtumbuluko yotshe mbimo wu nuwela wudhumo wa Txizimu, ni ku ti hi maha hi alakanyisisa ngu ku tiveka hahatshi kwathu mbimo yi hi ti dilako ngu wufakazi wo mbina diguwa awu wu ningelwako ka “dotshe ditiko” ka votshe ava va hanyako ka dona. Hambiketo kha wu eneli wufakazi wo mbi na diguwa wa mtumbuluko. Vathu vo thembeka va kuzetwa kupateka ngu dipswi do guleka. M’bhali mmwani wa masalmo a wombile tiya ka vakhozeli vo thembeka: “Dhumisani Mkoma ngu konaho ka wuhombe wakwe ni mtamo wakwe! Vekelani Mkoma txithavo txi txi fanelako ditina dakwe.” (Masalmo 96:7, 8) Ava va ku ni wungana wa hafuhi ni Jehovha va tipfa va di tsakile ngu ku kota kuhetisisa txialakanyiso txonetxo. Ngu toneto, kupateka txani ko ningela wudhumo ka Txizimu?
w04 1/6 11 ¶8-10
Mtumbuluko wu nuwela wudhumo wa Txizimu!
8 Dhavhidha a tshumela a womba-womba kambe ngu ku xamatisa ka mtumbuluko: “Txizimu txi akete ditambo m’dhuti nzumani, ditambo di humako ni mixo kufana ni mteki a wukako ngu ha m’bhedhuni kwakwe, kufana ni ndena yo tsakela kumaha mapalisana a kututuma. Dona di huma di txi khukhela makhatoni ka nzuma di tutuma di txi ya manela magwito ka yona nzuma kha ku nga ho txilo txi sikotako kuthava kuhisa ka dona.”—Masalmo 19:4-6.
9 Ditambo di txi fananiswa ni tinyeleti timwani dona di hagari, nem hi nga da hombe nem hi nga da didotho. Kambe ditambo i nyeleti yo xamalisa, ayi yi mahako ti to maplaneta aya ma tenderukelako didhawa ka dona ma woneka i di madotho. Dibhuku dimwani di womba ti to ditambo di nemela konamu ka “tibhiliyoni ni tibhiliyoni ni tibhiliyoni ta ma toneladha ma nga engeletwa kumbidi “—99,9 wa ma porsentu wa ku nemela aku ku patwako ka ma planeta otshe aya ma tenderukelako ditambo! Força de gravidade (mtamo awu wu si wonekiko awu wu mahako ti to txo maha atxi txi ku hadiwaloni txiwa) yi maha ti to mafu me rendzelekela ditambo, ma dipfukani ko dingana 150 wa timiliyoni ta makilometro ma si tshuketi mwendo kuya kule ka ditambo. Miseve ya ditambo ayi yi hokako hamafuni kha yi nga ni mtamo ngutu, kambe yi maha ti to so maha sikota kuya masoni si hanya.
10 M’bhali wa masalmo a wombawombile ngu ditambo ngu nzila yo fanekisela, a txi di fananisa ni “ndena” yi tutumako kukhukhela magemeta-mitshi ka mafu kala magemeta-mitshi kumwani ni mitshikari, se ni wusiku yi humula ka “m’dhuti.” Ngako nyeleti yoneyo yi txi bela magemeta-mitshi nga ha ti wonekako ngu kona u di hamafuni, yi woneka nga yo bela ka “m’dhuti,” yiya humula, ni mixo yi woneka yi txi phatima “kufana ni mteki a wukako ngu ha m’bhedhuni kwakwe.” Dhavhidha kota m’dyisi a txi tiziva ti to ku txi tshuka ku va ni wusiku wu ku ti tilako ngutu. (Genesisi 31:40) A txi ti khumbula ati miseve ya ditambo yi ndi no mfutumetisa tona ngu txikuluveta ni wukhalo wu a nga ti ka wona. Ti hakubasani ti to ditambo di si karali ngu mhaka ya “dipfumba” do khukhela wutxani kala mswa ditambo, kambe di txi fana ni “ndena” ayi yi nga di tiemisete kukhateta dipfumba.
g95 8/11 7 ¶3
M’vangi wu ka masiku athu a wonelwako hahatshi
Kuxolisisa kwati sivangwa sa mtumbuluko ti nga hi vhuna kuziva kwati M’vangi. Jesu a gete dikhambi dimwani vagondiswa vakwe ti to ve wonisisa kwati ati makhoñwa ma kulisako tona a khe Galileya. “Pimisani ati ma kulisako tona makhoñwa a txitinga: Kha ma thumi, kha ma luki. Aniko na mi gela ku khani: Hambi Solomoni ka wotshe wudhumo wa kufuma kwakwe, kha ambala kufana ni dimwedo ka ona.” (Matewu 6:28, 29) Kutshura ka makhoñwa mwendo txiluva txa txitinga txo mbi vhuna txilo ti hi vhuna kupfisisa ti to Txizimu kha txi divali kukhatalela silaveko sa vathu.
Tithomba ta moya
it-11073
Txihebheru
Ku ni kutsimbitisana ka kudotho aku ku si siyaniko (ngu tsimbitisana aku ku akako) aha ko txienge txa wumbidi kha txi tsimbitisani ni mialakanyo ya txo khata, nem kha si kanetani. Kukhata txi kulisa ni kutshumela txi engetela mawonelo. Masalmo 19:7-9 txikombiso txa toneto:
Mlayo wa Mkoma mbwo hetiseka,
wa ninga kuhanya kakuphya.
Sirumo sa Mkoma nzo thembeka;
sa ninga wuzivi ka m’thu wo divala.
Sirumo sa Mkoma nzo lulama;
sa ninga litsako mbiluni.
Sirumo sa Mkoma nzo lulama;
sa woninga mapimo.
Kuthava Mkoma ngunene;
ka simama yotshe mbimo.
Kululama ka Mkoma nga ditshuri;
kambe ku lulamile yotshe mbimo.
Wona ti to txienge txa wumbidi txa fraze yimwani txi hetisisa mialakanyo ya fraze yimwani ni yimwani; ngu toneto ndimana yotshe i wuyelo yo pata ma fraze mambidi. Ngu ma fraze mambidi dwe, o fana ni “wa ninga kuhanya kakuphya” ni “sa ninga wuzivi ka m’thu wo divala” ti maha ti to mleri e tiziva ti to sirumo sa Mkoma ‘mlayo wo hetiseka’ ni ku “Sirumo sa Mkoma nzo thembeka”. Ka kutsimbitisana akuwa ka kudotho ku si siyaniko, kuhambana koneko ka txienge txo khata ni txa wumbidi kuthuma kasi ku m’thu e ema nyana e ndinda moya. Ka ndimana, mialakanyo yiya yo ya txi kula, kambe kha yi siyani. I ngu mhaka yoneyo, mbimo yimwani ti dhanwako ti to ngu tsimbitisana aku ku akako.
25-31 KA MARÇO
TITHOMBA TA MU KA DIPSWI DA TXIZIMU | MASALMO 22
Bhiblia yi profetile to kari mayelano ni lifo la Jesu
w11 15/8 15 ¶16
Va mani Mesiya!
16 Ti di na tikomba Mesiya a di lekilwe ngu Txizimu. (Lera Masalmo 22:1.) Ngu kuya ngu wuprofeti, “ngu txikhati txa wutxhanu ni mune, Jesu a to huwelela ngu dipswi da hombe, a txi khene: “Eloyi, Eloyi, lama sabaktani,” ati ti wombako ku: “Txizimu txangu, Txizimu txangu, u ni lekete txani?” (Marku 15:34) Jesu a sa tshotsha likholo lakwe ngu Jehovha. Txizimu txi lekile Jesu manzani ka vabihi vakwe ngu kwa mbi mvhikela kasi ku kuthembeka ka Jesu kudukwa do gwita. Kuhuwelela ka Jesu ku mahile ti to kuhetiseka Masalmo 22:1.
w11 15/8 15 ¶13
Va mani Mesiya!
13 Dhavhidha a profetile ti to Mesiya a ndi na tseketselwa. (Lera Masalmo 22:7, 8.) Jesu a tseketsetwe mbimo yi a nga ti xaniseka a di ka phande nga ha Matewu a wombako ngu kona: “Se ava va nga ti pinda, va txi mu ruketela, va txi zinginika misungo yawe, va txi kha vona: “Awe u khundumuselako Dithepele da Txizimu, u txi di aketa ngu masiku mararu, ti hanyise ko! Ngako u di Mwanana wa Txizimu, txhika ngu ha phandeni!” Konaho vaphaxeli va hombe, ni vabhali, ni madhota a ditiko, va txi mtseketsela ni vona, va txi kha vona: “A hanyisile vamwani, kambe ene kha sikoti ku ti hanyisa apune. Ngako i di mfumeli wa Israyeli, a na txhike konkuwa ngu ha phandeni, kufela ku hi mtumela!” A thembile Txizimu, inna ko, txi na mu hulukise konakuwa, ngako txi txi m’dhunda, nguko a ti khene: “Ani ni Mwanana wa Txizimu!” (Mat. 27:39-43, NM) Hambiketo, Jesu a tsanisete totshe tiya ngu txixonipho. Txikombiso txa txinene kwathu!
w11 15/8 15 ¶14
Va mani Mesiya!
14 Ku ndina xaxuwa tixolo kasi kuabanwa siambalo sa Mesiya. M’bhali wa masalmo a bhate tiya, “va abanile syambalo sangu, ve xaxuva tixolo ngu dibhaji dangu”. (Mas. 22:18) Se ti mahekile, nguku “msana ka ku mu bethela [Jesu] va to teka tinguwo takwe va txi abanela [masotxhwa a Varoma], va di thangile ngu kuxaxuva tixolo.”—Mat. 27:35; lera Johani 19:23, 24.
Tithomba ta moya
w06 1/11 29 ¶7
A hi kombiseni txixonipho ngu mitshangano yathu yo sawuleka
7 Hi nga kombisa txixonipho ka mitshangano yathu ngu tinzila to hambana-hambana. Yimwani ya kona ngu maneka kasi kuembelela tindando ta mfumo. Wungi wa tona ti bhatwe ngu nzila ya mkombelo, ngu toneto, ti fanete kuembelelwa ngu nzila ya txixonipho. A txi womba-womba ngu Masalmo 22, mpostoli Paulo a bhate tiya mayelano ni Jesu: “Ni na huwelela ditina dako ka vanathu, hagari ka msengeletano ni na embelela wudhumo wako.” (Vahebheru 2:12) Ngu toneto, hi fanete ku ti karatela ku va ka makhalo athu na mthangeli wa mtshangano a si se womba ku hi embelela ndando, se hi ti karatela kupfisisa txhamuselo ya ndando mbimo yi hi embelelako. Nzila yi hi embelelako ngu yona yi na kombise matipfelo a m’bhali wa masalmo, a nga bhala tiya: “Ni na dhumisa MKOMA ngu yotshe mbilu yangu, txikungoni ka valulami ni msengeletanoni ka vathu.” (Masalmo 111:1) Kha ti kanakanisi ti to kudhumisa Jehovha ngu kuembelela txivangelo txa txinene txo hi hoka mitshanganoni ku di nga di ni mbimo, ni kusimama ka yona kala magwito.
w03 1/9 20 ¶1
Dhumisa Jehovha “hagari ka msengeletano”
Kufana ni timbimo ta kale, nyamsi ni kona kumahwa malulamiselo ya ti to ava va ku ni likholo va li kombisa “hagari ka msengeletano.” Mkhanjo wu votshe va ku nawo mbwo ningela tixamulo ta siwotiso asi si mahelwako ava va xalelako mitshangano. U nga thuke u yi wonela hahatshi wuyelo ya yinene ayi yi tiswako ngu toneto. Ngu txikombiso, tixamulo ati ti kombisako nzila yo wonisana mwendo kuvayilela sikarato, ta engetela kutiemisela ka vanathu ko thumisa matshina a milayo ya Bhiblia. Tixamulo ati ti txhamuselako tindimana ta Bhiblia ati ti nga bhalwa, kambe ti nga mbi txhamuselwa, mwendo ti patako mialakanyo ya wuxolisisi wo kari, ti nga kuzeta vamwani ti to ve tshukwatisa gondo yawe ngu kumaha wuxolisisi.
1-7 KA ABRIL
TITHOMBA TA MU KA DIPSWI DA TXIZIMU | MASALMO 23-25
“MKOMA i m’dyisi wangu”
w11 1/5 31 ¶3
“MKOMA i m’dyisi wangu”
Jehovha wa kongomisa tinvuta takwe. Ngako ti si nga ni m’dyisi, makhambi a mangi tinvuta ta mwalala. Ngu nzila yi yi fanako, ha txi lava txivhuno kasi ku hi mana nzila ya yinene ka wutomi wathu. (Jeremiya 10:23) Nga ha Dhavhidha a txhamuselako ngu kona, Jehovha wa kongomisa vathu vakwe “ka lihunga lo nakana” ni ku va yisa “ka mati o tenga.” Wa va kongomisa “ngu tinzila to lulama.” (Ndimana 2, 3) Kupimisa ngu nzila yoneyo ti hi tsanisekisa ti to hi nga themba Txizimu. Ngu kulondisa mkongomiso wa moya wakwe wo sawuleka, wu nga kombiswa mu ka Bhiblia, ti nga hi maha hi va ni wutomi wo tsakisa, wo eneliseka ni kuvhikeleka.
w11 1/5 31 ¶4
“MKOMA i m’dyisi wangu”
Jehovha wa vhikela tinvuta takwe. Ngako m’dyisi a si nga hafuhi, tinvuta ta thava ti si ti zivi to ti nga maha txani. Jehovha a gela malanda akwe ti to kha ti lavi me thava ‘hambi ma txo tsimbila mkovani ka mtsudi wa lifo’ mwendo ka timbimo to karata ngutu ka wutomi wawe. (Ndimana 4) Jehovha wa va khatalela niku yotshe mbimo a ti emisete ku va vhuna. A nga ninga vakhozeli wakwe wutxhari ni mtamo awu va wu lavako kasi kuwonisana ni siduko.—Vafilipiya 4:13; Jakobe 1:2-5.
w11 1/5 31 ¶5
“MKOMA i m’dyisi wangu”
Jehovha wa dyisa tinvuta takwe. Tinvuta ti dhependerwa ngu m’dyisi wa tona kasi ku ti mana sakudya. Athu hi ni txilaveko ngu didhawa da moya atxi hi nga kotako ku txi enelisa ngu kona ha ka txivhuno txa Jehovha. (Matewu 5:3) Ati ti tsakisako ngu ti to Jehovha a ni wuha, ene a lulamisela sakudya so tala sa moya para malanda akwe. (Ndimana 5) Bhiblia kumweko ni mabhuku ya ma nga seketelwa mu ka Bhiblia, yo fana ni muwoneleli awu u gondako konku, txisima txa sakudya sa moya asi si enelisako silaveko sathu so ziva txikongomelo txa wutomi ni txikongomelo txa Txizimu ngu vathu.
Tithomba moya
w11 15/2 24 ¶1-3
Randa wululami ngu yotshe mbilu yako
JEHOVHA ngu kuthumisa dipswi dakwe ni moya wakwe wo sawuleka a kongomisa vathu vakwe ka “tinzila to lulama.” (Mas. 23:3) Kambe ngu kona ha ka kuva hi sa pelela hi tolovela kwa mbi tsimbila ngu nzila yoneyo. Konaho, kasi ku hi tshumela hi maha ti i ku ta tinene ti lava mizamo ya hombe. Nji txani txi no hi vhuna ku hi humelela ka mizamo yoneyo? Kufana ni Jesu, hi fanete hi randa kumaha ati i ku ta tinene.—Lera Masalmo 45:7.
2 Nji txani “tinzila to lulama”? Nzila yi yi wombwako hawa, i nzila yo lulama mwendo yo twim. “Tinzila” toneto ti kongomiswa ngu mlayo wo lulama wa Jehovha. Ngu Txihebheru ni Txigriki, ‘kululama’ ku kombetela ka ti i ku ta tinene i ku ku namarela milayo ya mahanyelo. Nga ha Jehovha i ku wukhalo “amu kuzumbako kona wululamo” vakhozeli vakwe va ni lungelo yo tumelela Ene e va komba nzila ya yinene ayi va fanelako ku yi londisa.—Jer. 50:7.
3 To koteka basi kutsakisa Txizimu ngako hi txi ti karata ngu yotshe mbilu yathu kuhanya hahatshi ka tinzila to lulama. (Dhewut. 32:4) Kukhata, ti lava hi gonda totshe ti hi nga ti kotako mayelano ni Jehovha Txizimu ka Dipswi da txona, i ku Bhiblia. Mbimo yi hi yako masoni hi gonda mayelano ni Jehovha, hi tshuketa masoni kwakwe ditshiku ni ditshiku, lirando lathu ngu wululami wakwe li naya li kula. (Jak. 4:8) Ta laveka kambe ku hi tumela mkongomiso wa Dipswi da Txizimu mbimo yi hi mahako sisungo sa lisima ka wutomi wathu.
8-14 KA ABRIL
TITHOMBA TA MU KA DIPSWI DA TXIZIMU | MASALMO 26-28
Dhavhidha a tsanisile ngu nzila muni txisungo txakwe txo lava kumaha ta tinene
w04 1/12 14 ¶8-9
Tsimbila ngu nzila yo thembeka
8 Dhavhidha a khongete atxi khene: “Ni xolisise, MKOMA, u txi ni duka, xolisisa titsho ni mbilu yangu.” (Masalmo 26:2 Bíblia com referências) Titsho ti zumba kusisalani mndani ka mmidi. Tona ti fanekisela mialakanyo ni matipfelo ya ma nga tshima a m’thu. Niku mbilu yo fanekisela ngu ti m’thu a ku ngu tona ngu mndani, misusumeto, matipfelo ni wuzivi wakwe. Mbimo yi Dhavhidha a nga txi maha mkombelo ka Jehovha a txi kombela ku e m’xolisisa, a ti a nga txi ti lava i ti ku mialakanyo ni matipfelo akwe o tshima si xolisiswa kwati.
9 Dhavhidha a mahile mkombelo ti to titsho takwe ni mbilu yakwe si xolisiswa. Jehovha a xolisisa ngu nzila muni a ti athu hi ku ngu tona? Dhavhidha a embelete a txi: “Ni na dhumisa Jehovha, awu a ni ningako sileletelo. Hambi ni hagari ka wusiku, titsho tangu ti ni layile.” (Masalmo 16:7 Bíblia com referências) Ti lava kuwomba txani toneto? Ti lava kuwomba ti to sileleto sa Txizimu, si gwesile matipfelo a Dhavhidha, si lulamisa matipfelo ni mialakanyo yakwe yo tshima. Eto ti nga hi mahekela nathu, ngako hi txi alakanyisisa kwati ngu sileletelo sa Dipswi da Txizimu, sa vaemeli vakwe ni sa sengeletano yakwe, ni kutumelela ti to sileletelo soneso si zumba mu ka timbilu tathu. Ku maha mkombelo ka Jehovha, hi txi kombela ti to e hi xolisisa ngu nzila yoneyo, ti na hi vhuna kutsimbila ngu wuthembeki.
w04 1/12 15 ¶12-13
Tsimbila ngu nzila yo thembeka
12 Atxi womba-womba ngu tximwani atxi txi nga tsanisa wuthembeki wakwe, Dhavhidha a wombile tiya: “Kha ni zumbi ni va va randako makuhu, kambe kha ni tsimbili ni vakanganyisi. Na nyenya msengeletano wa vabihi, kha ni ti lavi kuhanya ni vasoholoki.” (Masalmo 26:4, 5) Dhavhidha a txi vayilela ‘kuzumba’ ni sindaka milayo. Atxi nyenya vangana vo biha.
13 Se athu ko? Ina ha lamba kuzumba ni vabihi ngu kuthumisa maprograma a televhizawu, mavhidhiyo, cinema, internet mwendo simwani so nga toneto? Ina ha zumbela kule ni va va sisako mahanyelo awe? Vamwani txikolwani, mwendo mthumoni va nga ti maha vangana vathu kuve vo lava ku hi kuta sidzenende. Ina ha ti dhunda ngu ditshuri ku va ni wungana wa hombe ni vathu ava va si tsimbiliko ngu tinzila ta Txizimu? Ngu ku ti maha va vanene, va apostata va nga sisa txikongomelo txawe txo hi maha hi leka kuthumela Jehovha. Se i di ku dibanzani ku ni Makristu a mahanyelo o fana ni lifakanda lo zumbela kutxitxa-txitxa ngu kuya ngu ha li ku kona? Evo ni vona va sisa mahanyelo awe. Jayson, awu konku i ku dilanda da wuthumeli, ati ni vangana vo zumbisa toneto mbimo yi i nga ti ngadi jovhem. Ene a womba tiya: “Ditshiku dimwani, mmweyo wa vangana vangu a ni gete tiya: ‘Kha ku nga ni mhaka ni ti hi ti mahako konku, nguko mbimo yi mafu a maphya ma no hoka, hi nava hi di fite. Nem hi na mbi ziva to hi luzile txo kari.’ Mabhulo oneyo ma ni tute maso. Nguko kha ni lavi kuva ni di fite mbimo yi mafu a maphya ma no hoka.” Jayson, ngu wutxhari a wite wungana navo. Mpostoli Paulo a hi txharihisile a txi: Mi nga ti kanganyiseni: “Vangana vo biha va onhetela mikhuwo ya yinene.” (1 Vakorinto 15:33) Ti ni lisima ngutu kuvayilela vangana vo biha.
w04 1/12 16 ¶17-18
Tsimbila ngu nzila yo thembeka
17 Dithempele kumweko ni txiluvelo txo hisela magandelo, i ti mzinda ka wukhozeli wa ditshuri wa Jehovha khe Israyeli. A txi txhamusela nzila yi a nga txi wu dhundisa tona wukhalo wonewo, Dhavhidha a mahile mkombelo atxi: “MKOMA, ani na randa kuzumba nyumbani kwako, i ku wukhalo wu ku ti kombako wudhumo wako.”—Masalmo 26:8.
18 Ina ha ti dhunda ngu ditshuri kutshangana aha hi gondako mayelano ni Jehovha? Nyumba ya Mfumo yimwani ni yimwani, mzinda ka wukhozeli wa ditshuri aha yi manekako kona, ngu kona ha ka txiemiso atxi txi kuho txa sakudya sa moya. Hahanze keto, dilembe ni dilembe hi na ni kongresu ni masembleya mambidi. “Sileleto” mwendo tigondo ta Jehovha sa txhamuselwa ka mitshangano yoneyo. Ngako hi txi gondela ku “si dhunda ngu yotshe mbilu” hi na tsakela kuxalela mitshangano yoneyo ni kuriya kwati nzeve ka ti ti wombwako. (Masalmo 119:167) Hi nga kutsakisa ka tona kutshangana kumweko ni vanathu ava va ku ni likholo ni kukhatala ngu wunene wa mmweyo ni mmweyo wathu ni ku hi vhuna kusimama hi di thembekile!—Vahebheru 10:24, 25.
Tithomba ta moya
w06 15/7 28 ¶15
Jehovha wa khatalela awu a nga karateka
15 Dhavhidha m’bhali wa masalmo a embelete a txi: “Hambi idiku tate wangu ni mame wangu vo ni leka, MKOMA a na ni xayisa.” (Masalmo 27:10) Ta tsakisa ngutu kuziva ti to lirando la Jehovha la pinda la tate mwendo mame awu a nga hi veleka. Hambi ti txi panda kulekwa, kuxaniswa mwendo kutsukulwa ngu tate mwendo mame, eto kha ti pumbi lirando la Jehovha ngu ngathu. (Varoma 8:38, 39) Khumbula ti to Txizimu txi dhana ava txi va randako ka sengeletano ya txona. (Johani 3:16; 6:44) Ti si nga ni mhaka ni ti to vathu va ku ñote ngu nzila muni, awe wa dhundwa ngu Tate wako wa nzumani.
15-21 KA ABRIL
TITHOMBA TA MU KA DIPSWI DA TXIZIMU | MASALMO 29-31
Kukawuka, txikombiso txa lirando la Txizimu
it-1802 ¶3
Khohe
‘Kutsiva khohe’ ku ni titxhamuselo ta tingi ngu kuya ngu siemo sa kona. Kutsiva khohe ka Jehovha makhambi mamwani kutxhamusela kuthavisa wunene wakwe mwendo mtamo wakwe wo hi khatalela. Eto ti nga maheka ngako m’thu mwendo mtxawa wa vathu vo kari wu si engisi, nga ha ti nga maheka ka ditiko da Israyeli. (Job 34:29; Mas 30:5-8; Isa 54:8; 59:2) Ka siemo simwani ti txhamusela ku Jehovha asi mahi to kari mwendo kwa mbi xamula, atxi emela mbimo ya kona. (Mas 13:1-3) Mkombelo wa Dhavhidha awu wu ku “U nga wone sionho sangu” atxi kombela divalelo ka Txizimu mwendo ku txi pfhuta sotshe sionho sakwe.—Mas 51:9; fananisa ni Mas 10:11.
w07 1/3 19 ¶1
Tsakela ku emela Jehovha
Nzila yi hi wuyelwako ngu yona ngu kukawukwa ngu Jehovha, ku nga fananiswa ni nzila yi mihando yi kulako ngu yona kala kuza yi vitwa. Mayelano ni kukawuka ka Txizimu, Bhiblia yi womba tiya: “Ka vale va nga gondiswa toneto, kutsayiswa kuninga mihando ya kudikha ni ya kululama.” (Vahebheru 12:11, NM) Nga ha mihando yi lavako mbimo ti to yi vitwa, nathu ti lava mbimo ti to hi txitxa mawonelo athu, hi amukela nzila yi Jehovha a hi ningako ngu yona trenamento. Ngu txikombiso, ngako hi txo maha phazamo yi thaviselwa malungelo o kari dibanzani, ku ti emisela kwathu ko rinzela Txizimu, ku na hi vhuna ku hi si godholi mwendo kutshumelela msana. Ka siemo soneso, mapswi ya ma nga bhalwa ngu Dhavhidha ma nga hi vhuna: “Kuhenya kwakwe [ka Txizimu] nga mbimo ya yidotho dwe, aniko wunene wakwe mbwa yotshe mbimo. Ni wusiku hi otela hi txi dila, kambe ni mixo ha peka mikulungwani ya litsako.” (Masalmo 30:5) Hi txi sakulela kutiemisela kwathu ko rinzela ni kuthumisa sialakanyiso asi hi si manako ka Dipswi da Txizimu ni ka sengeletano ya txona, mbimo yathu ya “mikulungwani ya litsako” yi na hoka.
Ti womba txani kutisola ka ditshuri?
18 Kasi kukombisa ti to ngu ditshuri awu a nga thaviswa dibanzani ati sote ti nga lava e xalela mitshangano a si lovhi, ni kulondisa txialakanyiso a txi a nga ningwa ngu madhota txo maha mkombelo mbimo yotshe ni kumaha gondo yakwe apune. Ti nga la kambe e vayilela siemo si si nga mmaha e hokelela txionho txonetxo. Ngako atxi zama kululamisa wuxaka wakwe ni Jehovha a nga tiyiseka to Jehovha a na mu divalela, ni ku madhota ni ona mana mu wuyisela dibanzani. Ditshuri ti to ngako madhota ma txi xolisisa mhaka yo kari, ma khata ngu kuwona txiemo tximwani ni tximwani, se ti va maha ve vayilela kulamula ngu magugu.
Tithomba ta moya
w06 15/5 19 ¶13
Txhamuselo ya mapswi ya ma ku ka dibhuku do khata da Masalmo
31:23—M’thu wu a ti guletako a tsayiswa ngutu ngu nzila muni? Kutsayiswa aku ku wombwako ahawa ngu kawukwa. M’thu wo lulama a amukela kutsayiswa ngu kona ha ka tiphazamo takwe ngu nzila yo kawukwa ayi yi tako ngu ka Jehovha. M’thu wo tiguleta, aku asi ti soli ngu sionho sakwe, a mana kutsayiswa ka hombe ngu kukawukwa aku ku pandako.—Mavingu 11:31; 1 Pedro 4:18.
22-28 KA ABRIL
TITHOMBA TA MU KA DIPSWI DA TXIZIMU | MASALMO 32-33
Ngu kutxani hi sa fanela kusisa sionho sa hombe
w93 15/3 9 ¶7
Wumbilu wa Jehovha wa hi hulukisa ngako hi txi gumelwa ngu themba
7 Ngako hi di ni mnando ngu kumaha tiphazamo ta hombe, hi nga tipfa ti txi hi karatela ku ti tshanza sionho hambi ka Jehovha. Ku nga maheka txani ka siemo soneso? Ka Masalmo 32, Dhavhidha a ti khene: “Mbimo yi ni nga malala, marambu angu ma to karala ngu kudila kwangu dotshe ditshiku. Nguko wusiku ni mitshikari dianza dako di ti ti ni nemela; Ni hisilwe ngu lisani nga tximilwa txa malanga.” (Ndimana 3, 4) Kuzama kusisa txionho txakwe ni ku eyisa livhalo ti mahile Dhavhidha e guma mtamo. Kukarateka ku mhetile mtamo ha koza e fana ni mndonga wo oma ni tximilwa txa malanga. Ti hakubasani ti to ti nga maha a di karatekile ngu didhawa da mialakanyo ni da nyama. Ti si khataliseki to i ngu nzila muni, ene a luzile litsako. Ngako mmweyo wathu atxi maneka ka txiemo atxi txi fanako, ngu tihi ti a fanelako ku ti maha?
cl 262 ¶8
Txizimu atxi “mbimo yotshe txi nga ti emisela kudivalela”
8 Dhavhidha, wamwamna wu a nga ti sola, a wombile tiya: “Ni ti tshanzile kwako sionho sangu, kha na sisa wubihi wangu. . . . Se u divalete mnandu wa txionho txangu.” (Masalmo 32:5) Dipswi adi di ku “u divalete” di hunduluxela dipswi da Txihebheru adi di wombako “kuteka” mwendo “kuthavisa.” Nga ha di nga thumiswa ngu kona hawa, dona di womba kuthavisa “mnando, txionho ni phazamo.” Eto ti wombako ti to Jehovha a tekile sionho sa Dhavhidha asi tshotsha kule. Kha ti kanakanisi ti to eto ti thavisile kutipfa mnando aku Dhavhidha a nga txi wonisana nako. (Masalmo 32:3) Nathu hi nga va ni kuthemba ko tsana ka Txizimu, nguko txona txi thavisa sionho sa va va kombelako kudivalelwa ngu kuva ni likholo ka digandelo da mu hulukisi wathu Jesu.—Matewu 20:28.
w01 1/6 30 ¶1
Ku ti tshanza sionho aku ku wuyelisako
Msana ka kuva Dhavhidha adi wombile txionho txakwe, kha simama e tipfa i si nga wa txilo. Mapswi akwe ma ku ka masalmo a ya a nga bhala mayelano ni ku ti tshanza ma kombisa nzila yi a nga tipfa adi pepile mbiluni ni ku ti emisela kwakwe ko thumela Txizimu ngu kuthembeka. Ngu txikombiso, wona Masalmo 32. Hi txi gonda ka vhersikulo 1: “A katekile awule sionho sakwe si nga divalelwa, awule minandu yakwe yi nga divalelwa.” Ti si khataliseki ti to txionho nja hombe kuhoka hani, ta koteka kuva ni magwito o tsakisa ngako m’thu atxi ti sola ngu ditshuri. Ene a nga kombisa kutisola ka ditshuri, ngu kutumela wutixamuleli wa sionho sakwe, nga ha Dhavhidha a nga maha ngu kona. (2 Samuwele 12:13) Ene kha zama ku ti emelela ka Jehovha mwendo kuninga mnando vamwani. Vhersikulo 5 yi womba tiya: “Ni ti tshanzile kwako sionho sangu, kha na sisa wubihi wangu, ni txi khani: ‘Ni na ti tshanza ka MKOMA, sihambunyeto sangu’; se u divalete mnandu wa txionho txangu.” Kutisola ka ditshuri kutisa kupepa mbiluni, ngu nzila yo m’thu kha ti nga ngadi ti lava e zumba a txi xaniswa ngu livhalo ngu kona ha ka sionho sa kale.
Tithomba ta moya
w06 15/5 20 ¶1
Txhamuselo ya mapswi ya ma ku ka dibhuku do khata da Masalmo
33:6—Nji txani “moya” wa txisofu txa Jehovha? Moya wonewo i moya wa Txizimu mwendo moya wo sawuleka, awu a nga wu thumisa kasi kuwumba nzuma ni mafu. (Genesisi 1:1, 2) Wu dhanwa ti to i moya wa txisofu txakwe, nguko kufana ni kuhefemula ka mtamo, wu nga rumwa ti to wu ya maha to kari kule.
29 KA ABRIL KALA 5 KA MAIO
TITHOMBA TA MU KA DIPSWI DA TXIZIMU | MASALMO 34-35
“Ni na dhumisa Jehovha mbimo yotshe”
w07 1/3 22 ¶11
A hi dhumiseni kumweko ditina da Jehovha
11 “Ni na dhumisa MKOMA yotshe mbimo; ni na huwelela wudhumo wakwe ngu txisofu txangu, ni si gwiti.” (Masalmo 34:1) Aku a nga txi zumbela kututuma tutuma, mbimo yimwani Dhavhidha a txi karateka ngu ti to a na dya txani, kambe nga ha ma kombisako ngu kona mapswi yawa, silaveko sakwe sa ditshiku ni ditshiku kha sa va sa lisima kupinda kutiemisela kwakwe ko dhumisa Jehovha. Txikombiso txa txinene kwathu mbimo yi hi mananako ni sikarato. Ti si khataliseki ti to hi txikolwani, mthumoni, ni vanathu mwendo hi kutxhumayelani, kutiemisela kwathu ku fanete ku va ko dhumisa Jehovha. Pimisa ngu sivangelo sa singi asi hi ku naso so maha toneto. Ngu txikombiso, hi nga mana to tala to tsakisa ni ku xamatisa ka mtumbuluko wa Jehovha. Wona ati a ti hetisisako ngu kuthumisa txienge txa sengeletano yakwe ya hamafuni. Ka timbimo ta ngweno, Jehovha a thumisa vathu vo thembeka hambi ku va nga mbi pelela. Ina hi nga fananisa mithumo ya Jehovha ni ya vathu ava va mahwako sizimu? Khu tumelelani ni Dhavhidha a nga bhala tiya: “Kha si nga ho sizimu si si dinganako ni nawe, MKOMA; kuwalo wu a sikotako kumaha ati awe u mahako”?—Masalmo 86:8.
w07 1/3 22 ¶13
A hi dhumiseni kumweko ditina da Jehovha
13 “MKOMA ngene wudhumo wangu! vathu va i ku sisiwana va na engisa, kambe va na tsaka ngu mhaka ya toneto.” (Masalmo 34:2) Ahawa, Dhavhidha a si ti guleti ngu mithumo yakwe. Ngu txikombiso, kha nga ti guleta ngu nzila yi a nga kota ku kanganyisa ngu yona mkoma wa Gati. Ene a ti ti ziva ti to Jehovha ngene a nga mu hulukisa mbimo yi a nga ti Gati. (Mavingu 21:1) Ngu nzila yoneyo kha nga ti guleta, kambe a tumete ti to wotshe wudhumo wu lumba Jehovha. Ngu mhaka yeto, vo thutha va ndindetwe kwakwe. Ngu ha kufanako, Jesu atxi dhumisa ditina da Txizimu se eto ti txi ndinda vathu vo ti veka hahatshi ve kholwa ka Jehovha ni kutiemisela kugonda ngu ngene. Nyamsi vathu vo thutha va matiko otshe va ndindwa va ta ka dibanza da Makristu a ha Jesu i ku msungo. (Vakolosa 1:18) Vathu vonevo vo thutha, va gweswa timbilu tawe va txi pfa ditina da Txizimu atxi txi dhumiswako ngu malanda a txona o ti veka hahatshi ni kupfa didungula da mu Bhiblia adi moya wo sawuleka wa Txizimu wu va vhunako ku di pfisisa.—Johani 6:44; Mithumo 16:14.
w07 1/3 23 ¶15
A hi dhumiseni kumweko ditina da Jehovha
15 “Ni lavile MKOMA, se ene a ni xamute, a txi ni hulukisa kambe, aha ka dizowa dangu.” (Masalmo 34:4) Txiperiyensia txiya txi ve txa lisima ngutu ka Dhavhidha. Ngu toneto, ene a simamile e womba tiya: “Ngako txisiwana txi txi dhana Mkoma, ene wa txi xamula, kambe wa txi hulukisa ka sotshe sixaniso.” (Masalmo 34:6) Ngako hi txi tshangana kumweko ni vanathu, hi ni mikhanjo ya yingi yo bhulisana ni vanathu ngu timhaka to aka, mayelano ni nzila yi Jehovha a hi vhunako ngu yona kuwonisana ni siduko. Eto ta tsanisa likholo la vanathu, kufana ni mapswi a Dhavhidha ma nga tsanisa ava va nga txi mseketela. Ka txiemo txa Dhavhidha, ava va nga txi mseketela ‘va woni [Jehovha] va tala ngu litsako, kha va nga va ni kuwiswa tingana.’ (Masalmo 34:5) Hambiku va nga txi tutuma Mkoma Sawule, vona kha va nga theleka tingana. Va txi themba ti to Txizimu txi txi seketela Dhavhidha, ni ku tikhohe tawe ti tate ngu litsako. Ngu nzila yi yi fanako, ava va ku nga di kutsakela, kufana ni va i ku kale i ti Makristu va tutumela ka Jehovha kasi kumana txivhuno. Aku va nga pfa txivhuno txa Jehovha ngu kukongoma, ti khohe tawe ta litsako ti kombisa kutiemisela kwawe ko simama va di thembekile.
Tithomba ta moya
w11 15/8 14 ¶9
Va mani Mesiya!
9 Tifakazi ta makuho ti ndi na wukela Mesiya. Dhavhidha m’bhali wa Masalmo a wombile tiya: “Tifakazi ta makuhu ti ni wukete, ti ni wotisile ngu timhaka ti ani ni nga mbi ti maha.” (Mas. 35:11) Nga ha ti nga profetwa ngu kona, “vaphaxeli va hombe ni dotshe dibanza va to lava wufakazi wa makuhu ha mmidi ka Jesu, kasiku e mana kudawa.” (Mat. 26:59) “Vavangi va to fakaza makuhu ngu ngene, aniko wufakazi wawe wu so hambana.” (Marku 14:56) Valala vale va Jesu va nga di tiemisete ku m’daya va si khataliseki ti to tifakazi tile ti txi womba makuho mwendo ahim-ahim.