Mareferensiya a txibhukwana txa mitshangano ya Mahanyelo a Wukristu
© 2025 Watch Tower Bible and Tract Society of Pennsylvania
1-7 KA SETEMBRO
TITHOMBA TA MU KA DIPSWI DA TXIZIMU MAVINGU 29
Vayilela sihena asi si nga mbi seketelwa amu ka Bhiblia
wp16.06 6, ni dikwadru
Miwoniso ya nzumani
Vathu vavangi nyamsi sibotxhwa sa madhimoni ni ku va yi thava mimoya yoneyo yo biha. Kasiku ve tivhikela, va thumisa siambalo so kari, malinya mwendo mifungo ni mirende yo kari. Kambe kha ti lavi u thumisa silo soneso kasiku u tivhikela. Jehovha Txizimu txathu a ni mtamo ngutu kupinda Sathani. Ngaku u txi themba Jehovha ene ana kuvhikela. Bhiblia yi hi thembisa tiya: “Nguko maso a Mkoma ma wona kotshe hamafuni kasi kutsanisa ava i ku vakwe ngu timbilu tawe totshe.”—2 Makronika 16:9.
Kasiku hi mana kuvhikelwa ngu Jehovha, hi fanete kugonda ni kuthumisa ati hi ti gondako. Ngu txikombiso, Makristu akhe Efesu ma sengeletile otshe mabhuku awe aya ma nga txi tsimbitisana ni madhimoni ve ma hisa. (Mith 19:19, 20) Nguha kufanako, kasiku hi vhikelwa ngu Jehovha, hi fanete kuhambana ni sotshe silo asi si tsimbitisanako ni madhimoni hi tshumela hi si tshotsha. Eso si pata siambalo, mifungo, mirende yo tivhikela ngu yona ka madhimoni, kuphaxa kumweko ni masinda o “tivhikela” ngu ona.
U nga kanganyiswi ngu makuhu mayelano ni vafi
U nga maha txani ngako u txi kana-kana ngu tximaho mwendo txihena txo kari? Maha mkombelo ka Jehovha, ngu likholo kombela wutxhari. (Lera Jakobe 1:5.) Gwita u maha wuxolisisi ka mabhuku athu. U nga wotisa madhota a dibanza ti txi laveka. Ona ma na mbi kugela to maha tiya; kambe ma na kuvhuna ngu matshina a milayo ya Bhiblia o fana ni ya ma nga kombiswa hawa. Mbimo yi u mahako toneto, u tolovetisa “[mtamo wo alakanya, Tradução do Novo Mundo]” se mtamo wonewo wu na kuvhuna “kuhambanisa to tshura ni to biha.”—Vaheb. 5:14.
‘Ni na tsimbila ngu tinzila tako ta ditshuri’
Sihena ni timhaka ati ti si tsakisiko Jehovha. Maxaka, vathumi kulothi ni vagondi kulothi ti nga maha ve duketa ku hi kuzetela ti to hi maneka navo ka mibuso ya makhesemusi. Hi nga vhunwa ngu txani ti to hi si beli ka sihena ni mibuso ayi yi si tsakisiko Jehovha? Ti lava hi tiziva kwati ti to ngu kutxani Jehovha a si si lavi sihena soneso. Hi nga xola ka mabhuku athu ti to hi khumbula ti to makhesemusi ma khatisile kutxani. Ngako hi txi alakanyisisa ngu sivangelo sa mu ka Mibhalo asi si mahako hi si beli ka makhesemusi onewo, ha tsaniseka ti to hi tsimbila ngu nzila ayi ‘yi tsakisako Mkoma.’ (Vaef. 5:10) Ngako hi txi themba Jehovha ni Dipswi dakwe, hi na mbi thava ati vamwani va no pimisa tona.—Mav. 29:25.
Tithomba ta moya
it “Kuxenga” ¶1
Kuxenga
Kundunduzela ngu nzila yo biha ti womba kugela m’thu mapswi o kari kasiku mtsakisa, ku m’dhumisa, ku m’guleta ngu nzila yo biha mwendo ku mxenga. Eto ngu m’tolovelo ti mahelwa kutsakisa m’thu mwendo ku mmaha e huma makata, ngu toneto, eto ti nga m’beta txibeheni. Txikongomelo txo ndunduzela m’thu ngu nzila yiya ngu m’bhabha kasiku hi mana so kari mwendo ku m’dhumisa. Kumaha toneto ngu mriyela mlawu. (Mav 29:5) Phela kundunduzela ngu nzila yiya kha ti kombisi ti to hi malanda a Jehovha, kambe ti kombisa mahanyelo o biha a vathu va ditiko diya i ku o tiguleta, wukanganyisi ni txisawusawu. (Jak 3:17) Kuhemba ni kudhumisa vathu kasiku hi wuyelwa, eto ta swira Jehovha.—2Vak 1:12; Vag 1:10; Vaef 4:25; Vak 3:9; Mtu 21:8.
8-14 KA SETEMBRO
TITHOMBA TA MU KA DIPSWI DA TXIZIMU MAVINGU 30
“U nga ni ninge hambi wusiwana mwendo tithomba”
Ngu lihi lirando ali li tisako litsako?
Ditshuri ti to hotshethu ha yi lava male. Yona njivhikelo txathu. (Ekl. 7:12) Kambe ina hi nga tsaka ngu kuva ni so kota kuhanya dwe? Ina! (Lera Ekleziyaste 5:12.) Aguri mwana Jake a bhate tiya: “U nga ni ninge hambi wusiwana mwendo tithomba; ni ninge sakudya sa ku ni enelela.” Ta pfala aku Aguri a nga mbi la kuva txisiwana. A ti khene kha lavi kubela ka txiduko txo pa, nguko toneto kha ti dhumisi Txizimu. Se ngu kutxani a nga ti si lavi ku va ni tithomba? A ti khene: “Kasi ngu kupfa kukhura, ni si ku kaneti, ni txi khani: I mani MKOMA kani?” (Mav. 30:8, 9) Ti nga maha u txi ziva vathu va va thembako tithomba i singa Txizimu.
M’thu wu a randako male a nge txi tsakisi Txizimu. Jesu a ti khene: “Ku walo m’thu wu a si kotako kuthumela vakoma vambidi, nguko mwendo a na vengela mmweyo e dhunda mmwani, mwendo a na namarela ka mmweyo e kanyisa mmwani. Kha mi na kusikota kuthumela Txizimu ni thomba ya mafu.” A tshumete a txi khene: “Mi nga ti sengeleteleni tithomba ha mafuni, ahawa kubhirela ni sumba si dyako, ni hawa makhokhokho ma dolako ma txi pa. Aniko sengeletelani tithomba tanu nzumani, ahawa sumba ni kubhirela si si dyiko, ni hawa makhokhokho ma si doliko ma txi pa.”—Mat. 6:19, 20, 24.
Malanda a mangi a Jehovha ma zama kuhanya wutomi wo hehuka. Ma ti wona ti to kumaha toneto ti ma ninga mbimo yo tala yo thumela Jehovha ni ku eto ti ma ninga litsako. Jack wa Estados Unidos, a xavisile mti wawe ni dibhindu da hombe ti to ene ni msikati wakwe ve kota ku va vanyaphandule. A khene: “Ti si hehuki kuleka mti wathu hombe wo tshura ni kusiya tithomba ka ditiko donedo.” Kambe malembe msana a ti zumbela ku va ni sikarato sa mthumoni. A khene: “Msikati wangu i nyaphandule, mbimo yotshe a tsakile. Ene a ndina khene: ‘Ni ni mlungo wa mnene kupinda votshe!’ Se konkuwa, aku nani ni ku nyaphandule, hotshethu hi thumela M’thu mmweyo, Jehovha.”
w87 15/5 30 ¶8
Thava Jehovha u na mana litsako
◆ 30:15, 16—Ngu yihi pontu ya lisima yi nga junyatiswa ka tindimana tiya?
Tona ti kombisa kwambi eneliseka ka m’thu wa makolo. Kufana ni mtshundwa wu si kolwiko ngu kubumela mnoha, m’thu wa makolo kha kolwi ngu kulavetela tithomba ni kulava kudhumiswa. Phela ene a tshumela e fana ni lifo li si enelisekiko ngu vathu ava va fako, a tshumela e fana kambe ni wamsikati wa txifule a ‘dilako’ a txi lava vanana. (Genesisi 30:1) Vathu va makolo va fana ni mafu ya ma ku ni txihala, ngaku ku txi wa mati ona ma ndinda mati oneyo se kuoma ngu txikuluveta. Va tshumela ve fana ni mndilo wo u txi wu theletela sinzanzuana wuya masoni wu tura aha ko wu nga tshapela asi si ku hafuhi. Kambe vathu ava va kongomiswako ngu wuzivi wa Jehovha, va eneliseka ni ku kha va nga ni makolo ni timbiti to zumbela kulavetela tithomba.
w11 1/6 10 ¶4
Nzila yo hanya ngu si u kunaso
Ziva kupopara male. Phela kupopara male ti nga woneka nga ti pindetwe, kambe eyo i nzila yo vayilela kuzumba hi di txoni. Ngu kumaha toneto, vathu vavangi va vayilela kumaha sikweneti asi si tekako mbimo yo lapha kasi kusihakela. Bhiblia yi womba ti to titshokoti ti ni “wutxhari,” nguku ngu “mbimo ya kuhisa ti sengeletela sakudya sa tona” kasiku ti ta dya ka mbimo ayi yi tako.—Mavingu 6:6-8; 30:24, 25.
Vana mpfhumba wa Jehovha ngu ha ku si gumiko!
I nga va tinene ku hotshethu hi ema hi alakanyisisa ti to ngu yahi mawonelo athu mayelano ni male. Tiwotise tiya: ‘Ina ni zumbela kupimisa ngu male ni si ni ndi no xava ngako ni di kova ni male yayingi? Ngako m’thu atxi ni lomba male, ina na swela ku m’hakela ngu kupimisa ti to awule a nga ni lomba a ni male yayingi? Ina ni tipfa ni di wa lisima kupinda vamwani nguku ni ku ni male yayingi? Ina ta ni karatela kukombisa wuha ka vamwani? Ina ka ngava m’thu a di ni male ni womba ti to wa dhunda tithomba? Ina ni dhunda kumaha wungana ni vathu va va ku ni male ni si theli kota sisiwana?’ Hotshethu hi ni lungelo ya hombe yo rambwa ti to hi va vapfhumba va Jehovha. Kambe ngako hi txi lava kusimama hi va vapfhumba va Jehovha hi fanete ku ti wonela ti to hi si dhundi ngutu male. Hi txi dhunda ngutu Jehovha kupinda male, Jehovha kha nambi thuka adi hi lekile!—Lera Vahebheru 13:5.
Tithomba ta moya
w09 15/4 17 ¶11-13
Mtumbuluko wu kombisa wutxhari wa Jehovha
Txikarapitana njihari txa txidotho atxi txi nga hi gondisako tigondo ta lisima. (Lera Mavingu 30:26.) Txikarapitana txi fana ni mnvunza kambe tinzeve ta txona tidotho, nda siredhondana ni ku minenge ya txona yi komile. Txihari txiya txi dhunda kuzumba ka makhalo aya ku ku ni marigwi. Maso ya txona o wona ngutu ni matshoko ya mu ka marigwi ma txi vhuna kutivhikela ka valala va txona. Sikarapitana si mahilwe ngu nzila yo si zumba kumweko, ngu toneto ta si vhuna ku si zumba si di vhikelekile ni kupfa kufutumela ngu mbimo yo titila.
Hi nga gonda txani ka txikarapitana? Txo khata, txona kha txi tigwevhisi ka valala va txona, txi zumba txi txi wonelela. Txi tshumela txi thumisa maso a txona o wona ngutu kasiku txi wona valala va di kule ni kuzumbela hafuhi ni m’bhala mwendo mkeleni kasiku mbimo yi txi wonako valala va txona txi tutuma txi ya barama. Nathu hi fanete kuva ni maso o wona ngutu ngu didhawa da moya kasiku hi tivhikela ka milawu ya Sathani. Mpostoli Pedro a txharihisile Makristu a txi khene: “Ti pimelani, mi txi ti wonela; nguko Sathani, mlala wanu, wa mi horolokela nga ngonyamo yi yi bhongako, yi txi lava wo m’kakatxula.” (1 Pedro 5:8) Mbimo yi Jesu a nga ti hamafuni, mbimo yotshe a ti zumba a txi wonelela kasiku a si zwetwi ngu marindi ya Sathani. (Mat. 4:1-11) Ene a siyete txikombiso txa txinene valondeteli vakwe!
Nzila yimwani yo simama hi txi wonelela ngu londola totshe tinzila ti Jehovha a ti thumisako kasiku hi vhikela. Mbimo yotshe hi fanete ku ti teka i di ta lisima kugonda Bhiblia ni kuxalela mitshangano. (Luka 4:4; Vaheb. 10:24, 25) I singa eto dwe, kufana ni sikarapitana si zumbako kumweko, nathu hi fanete ku ti teka i di ta lisima kuva ni vanathu kasiku hi “thavelelana.” (Var. 1:12) Ngaku hi txi londola tinzila ti Jehovha a ti thumisako kasiku hi vhikela, hi kombisa ti to ha tumelelana ni ti Dhavhidha a nga ti womba atxi khene: “Mkoma, dirigwi dangu, ni mkhokhola wangu wo tsana, kambe mtxhatxhisi wangu; Txizimu txangu mkhokhola wangu, buthavelo wu ni thembako wona.”—Mas. 18:2.
15-21 KA SETEMBRO
TITHOMBA TA MU KA DIPSWI DA TXIZIMU MAVINGU 31
Ati hi ti gondako ka sialakanyiso sa mame awu a ku ni lirando
w11 1/2 19 ¶7-8
Gondisa vanana vako kuva ni mahanyelo a manene
Gondisa vanana vako dotshe ditshuri mayelano ni timhaka ta mataho. Sialakanyiso sa laveka. (1 Vakorinto 6:18; Jakobe 1:14, 15) Kambe, Bhiblia yi womba ti to timhaka ta mataho i ningo yo ta ngu ka Jehovha i singa mlawu wa Sathani. (Mavingu 5:18, 19; Ndando ya Tindando 1:2) Kubhula ni vanana vako mayelano ni tiphango ati ti kuho ngu timhaka ta mataho dwe, ti nga va maha ve va ni mawonelo o biha mayelano ni mhaka yoneyo. Corrina, dijovhem da França, a womba tiya: “Mbimo yotshe vaveleki vangu va ti zumbela kubhula ni nani mayelano ni tiphango ti ti kuho ngu kutiñola ko biha ngu timhaka ta mataho, se ti txi ni karatela kuwona timhaka ta mataho kota ningo ayi yi tako ngu ka Jehovha.”
Tsaniseka ti to mwanana wako wa di ziva dotshe ditshuri mayelano ni timhaka ta mataho. Nadia, i ku mveleki awu a zumbako México, a womba tiya: “Mbimo yotshe ni zamile kuvhuna vanana vangu ve pfisisa ti to timhaka ta mataho nda mtumbuluko ni ku i ningo ya lisima ayi Jehovha a nga ninga vathu kasiku ve tidila ngu yona ni kumana litsako. Kambe ni tshumela ni va gondisa ti to timhaka ta mataho ndatinene ka wamwamna ni wamsikati ava va nga txhadha. Ngu kuya ngu nzila yi hi yi thumisako ngu yona ningo yiya, hi nga mana litsako mwendo ku ti tisela sikarato.”
ijwhf gondo 4 ¶11-13
Nzila yo womba-womba ni mwanana wako mayelano ni wusuke
Vana wo khata kubhula ngu mhaka yiya. Mveleki mmwani wa Grã-Bretanha a dhanwako ku i Mark, a womba tiya: “Vanana ti nga va karatela kupfisisa mhaka ya wusuke. Ni wotisile mwanana wangu wa 8 wa malembe ti to ina ti bihile kusela wusuke mwendo nem. Ni m’wotisile mhaka yiya hi di mu ko bhula, ngu toneto, a tipfite a di txhatxhakile kuwomba mawonelo akwe.”
Ngaku u txi womba-womba ngu wusuke ka siemo so hambana-hambana ti na mvhuna ku e tivekisa hamsungo. Kubhula ngu mhaka ya wusuke ti maha txienge txa mabhulo a lisima o fana ni kutiwonela a txi tsimbila txitaratoni ni timhaka ta mataho.
Va vekele txikombiso. Mwanana a fana ni txiponji, wa surela sotshe asi si ku hafuhi nayo. Matimu ma womba ti to vaveleki ngu vona va ku ni mkuzetelo wa hombe ka vanana vawe. Eto ti lava kuwomba ti to, ngaku ma di kwete se u ma releta ngu wusuke, mwanana wako a na gonda ti to nzila yo xula txitrese ngu peka tikopo. Ngu toneto, vana txikombiso txa txinene. U fanete kudinganisela ka nzila yi u selako ngu yona wusuke.
g17.6 9 ¶5
Gondisa mwanana wako kutiveka hahatshi
Gondisa mwanana wako ku eva ni wuha. Komba mwanana wako ti to “kuha ka ninga ngutu litsako kupinda kuhiwa.” (Mithumo 20:35) U nga ti mahisa kutxani toneto? Maha nayo lixta ya vathu ava va lavako kuvhunwa kutsula merkadhu, kulungiselwa txo maha mwendo ku ve ningwa bholeya. Tsula ni mwanana wako mbimo yi u ku ya vhuna vathu vonevo. Mleke e wona litsako ali u li pfako ngu kuvhuna vathu ava va ku ni txilaveko. U txi maha toneto, u na m’gondisa kutiveka hahatshi ngu txikombiso txako.—Ditshina da mlayo: Luka 6:38.
Tithomba ta moya
Majovhem ya txisikati, mi nga mahisa kutxani ti to mi va Makristu ya ma nga vitwa
Ziva nzila yo womba-womba ni vathu. Nda lisima ngutu ku mkristu e ziva kuwomba womba kwati ni vamwani. Ka mhaka yoneyo mpostoli Jakobe a ningete txialakanyiso txiya: “M’thu wuhi ni wuhi a na kuluvete kuengisa, a txi swela kuwomba.” (Jak. 1:19) Mbimo yi u riyako nzeve u engisa ti vamwani va ti wombako awe u kombisa “wumbilu” ti ti wombako to wa khatala ngu vamwani. (1 Pedro 3:8) Ngako u si tsaniseki ti to u ti pfisisile ti m’thu a nga ti womba mwendo ati a ti pfisako tona, maha siwotiso ngu nzila ya yinene. Se tihe mbimo yo alakanyisisa u si se simama u womba-womba. (Mav. 15:28) Ti wotise tiya: ‘Ati ni lavako kuwomba ditshuri ni ku ti na mtsanisa? Ina ti na kombisa txixonipho ni wunene?’ Zama kugonda ka vanathu va txisikati ava va riyako kwati nzeve ni kuwomba womba ngu nzila ya wutxhari. (Lera Mavingu 31:26.) Riya kwati nzeve ka nzila yi va womba-wombako ngu yona. Kuziva ku womba-womba kwati ni vathu ti na kuvhuna ku u va ni vangana va vanene ni kusimama u va ni kurula ni vamwani.
22-28 KA SETEMBRO
TITHOMBA TA MU KA DIPSWI DA TXIZIMU EKLEZIYASTE 1-2
Simama u trenara majovhem
“Timhaka tiya ti vekilwe manzani ka vavamna vo thembeka”
Ha m’dhunda Jehovha ni m’thumo wu a nga hi ninga wona. Wungi wathu hi tidila ngu mthumo wu hi nga ningwa, ni ku hi navela ti to hi ya masoni hi maha toneto. Kambe, ngako m’thu a txi kumba, kha ngadi e sikota kumaha ati a nga txi ti maha i di ngadi mphya. (Ekleziyaste 1:4) Etxo ngu txona txikarato txa vathu va Jehovha. Nyamsi, mthumo wo txhumayela wu ya masoni, se sengeletano ya Jehovha yi thumisa mitxhini ya ngweno ti to yi hokisa mahungu a manene ka vathu votshe. Kambe toneto ti nga va karatela ngutu vathu va hombe. (Luka 5:39) Se kha ti xamalisi ngako vathu va hombe va gumelwako ngu mtamo wawe. (Mavingu 20:29) Hambiketo, ndinene ngako va hombe va txi gondisa vaphya ku ve va ni malungelo ka sengeletano ya Jehovha.—Lera Masalmo 71:18.
Kha ti hehuki ka va va ku ni wutixamuleli kuninga vaphya mthumo. Vanathu vamwane ti nga va karatela kualakanya ngu kuningela mthumo awu va wu dhundako ngutu. Ti nga va henyisa kualakanya kuleka mthumo wo sawuleka awu wu va tsakisako. Tinga maha ve alakanya ti to ngako va si wukongomisi, ku nga moxekela to tala. Mwendo va txi khona kha va na mbimo yo gondisa vamwane. Yimwane mbimo, vaphya ti lava ve timisela ngako va txi wona ti to kha va ningwi txilo.
Tithomba ta moya
Anu vaphya, Mvangi wanu a lava ti to mi tsaka
Solomoni a ti ganyile kupinda vathu votshe ni ku i ti mkoma wa hombe, ene a duketile to maha. A ti gete tiya: “Ngono, ni ta kuduka ngu kutsaka; ti phine ngu litsako [ti to u wona ku ngu yihi wuyelo ya kona, Tradução do Novo Mundo].” (Ekleziyaste 2:1-10) Se Solomoni a to aka tinyumba to dhula ngutu, e hamba ni majaradhi o tshura ni makhalo o pepa ka wona ni txihi atxi a nga txi lava. Ina a enelisekile ni kumana litsako? Mbimo a nga gwita e wona totshe ti a nga mahetela, a ti khene: “Kambe wona taku eto ni tona i ti ti wukanganyisi.” A tshumete a txi khene: “Totshe i ti ti wukanganyisi.” (Ekleziyaste 2:11) Ina u gonda txo kari ka ti Solomoni a nga duketa kumaha?
29 KA SETEMBRO KALA 5 KA OUTUBRO
TITHOMBA TA MU KA DIPSWI DA TXIZIMU EKLEZIYASTE 3-4
Tsanisani wukati wanu
ijwhf gondo 10 ¶2-8
Nzila ya yinene yo thumisa fone
● Phela wukati wu nga tsakisa ngaku hi txi yi thumisa kwati fone. Ngu txikombiso, ava va nga tekana va nga bhula ngu kuthumisa fone ngaku va si nga votshe.
“Phela ngaku u txo rumela mensaji u txi ‘Na kuranda’ mwendo u txi ‘Na kuxuva’ eto ti nga tsanisa wukati wanu.”—Jonathan.
● Ngaku ava va nga txhadha va si yi thumisi kwati fone, yi nga va tisela sikarato. Ngu txikombiso, vamwani va heta mbimo yo tala va txi dheketela fone, se eto ti nga maha ti to vona va si kombisani lirando.
“Makhambi mamwani mwamna wangu a txi lava kubhula ni nani, kambe ni ti bhisi ngu kudheketela fone.”—Julissa.
● Vamwani va womba ti to va sikota kubhula ni va va nga tekana navo hambi va txi dheketela fone. Vamwani va pimisa ti to kumaha mithumo yo hambana-hambana ngu mbimo yimweyo ndatinene. Kambe eto hi nga ditshuri. Sherry Turkle, a womba ti to: “Kupimisa ti to u nga sikota kumaha mithumo yayingi ngu mbimo yimweyo ngu ti xenga.” A tshumela e womba tiya: “Ngaku hi txi duketa kumaha mithumo yayingi ngu mbimo yimweyo ti na huma txibhabha.”
“Phela ta tsakisa ku tidila ngu mabhulo ni mwamna wangu ngaku a si thumi txilo. Ni txi bhula nayo a txi dheketela fone ti ni maha ni tipfa nga kha nga ni mhaka ni nani mwendo ku no m’dyela mbimo yakwe.”—Sarah.
Ditshuri ngu diya: Nzila ayi u yi thumisako ngu yona fone yi nga tsanisa mwendo kumoxa wukati wako.
Maha ti to “titshatsha mwendo kutura ka MKOMA” ku simama
Ava va nga tekana va nga etetelisa kutxani txikombiso txa Akila ni Prisila? Alakanya ngu timhaka to tala ati awe ni mkatako ti lavako mi ti maha. Ina ku ni mithumo yo kari ayi mi nga yi mahako kota mpatwa hahanze ko yi maha wekha? Ngu txikombiso, Akila ni Prisila va txi txhumayela votshe. Ina ma ti vekela makungo o maha ati ti fanako? Akila ni Prisila va txi thuma votshe. Ti nga maha awe ni mkatako mi si nga ni mithumo yo fana, kambe ti ngo txani mi txo maha motshe mithumo ya ha mtini? (Ekl. 4:9) Ngako mi txi vhunana ka mithumo yanu mi na thuma kota mtxawa, mi na va ni mbimo ya yingi yo bhula. Robert ni Linda va ni 50 wa malembe va di txhadhile. Robert a womba tiya: “Kuwomba ditshuri, kha hi nga ni mbimo yo sakana kumweko,” kambe mbimo yi ni kuwulako maparato, msikati wangu a txi omisela mwendo ni di hahanze ni txi khatalela jaradhi e ta eta ni vhuna, ni ti pfa ni di tsakile. Kumaha to maha hi di kumweko ti hi maha hi tshuketelana, ni ku lirando lathu la simama li kula.”
Khumbula ti to hi nga mbimo yotshe ku va kumweko ti wombako to mi na va ni wumwewo. Wamsikati wo kari awu a nga txhadha wa khe Brasil a womba tiya: “Nyamsi, ku ni silo sa singi asi si nga hi tsulupetelako. Ni tumbute to mbimo yimwani hi nga pimisa to ha heta mbimo hi di kumweko ngu ku hi zumbako hotshe. Ni gondile to kha ta enela kuzumba hotshe, ti lava ni maha to kari. Eto ti pata ku ni ti ninga mbimo yo khatalela silaveko sa mwamna wangu.” Wona nzila ayi Bruno ni msikati wakwe Tays va khatalelanako ngu yona. Bruno a womba tiya: “Hi veka kule mafone athu kasiku hi kota kulondola kwati mbimo yi hi nga ti vekela ti to hi va kumweko.”
Se u nga maha txani ngako awe ni mkatako mi si renderi ngu kuheta mbimo mi di motshe? Ti nga maha mi di ni mawonelo o hambana mwendo ngu kuva mi di henyisanile. Khumbula txikombiso txa mndilo atxi hi nga bhula ngu txona makhatoni. Phela u txi layitha mndilo kha wu tekeli kubhata, ti lava u wu hembenyetela. Ngu ha ku fanako, nanu mi nga sawula mbimonyana ya yidotho ti to mi zumba motshe ditshiku ni ditshiku. Mahani timhaka ati motshe mi ti tsakelako, i si nga ti ti no wusa dizunga. (Jak. 3:18) Mi txi khata ngu timhaka toneto ta tidotho, ti nga maha ti to lirando lanu li kula.
Maha ti to “titshatsha mwendo kutura ka MKOMA” ku simama
Kasi ku “titshatsha mwendo kutura ka MKOMA” ku simama, mwamna ni msikati va fanete kumaha mizamo yo tsanisa wuxaka wawe ni Jehovha. Kutsanisa wuxaka wawe ni Jehovha ti nga va vhunisa kutxani ka wukati wawe? Ngako va txi ninga lisima wuxaka wawe ni Tate wawe wa nzumani, va na thumisa sialakanyiso sakwe asi si no va vhuna kuvayilela mwendo kuxula sikarato asi si nga mahako ti to lirando lawe li hola. (Lera Ekleziyaste 4:12.) Hambi vanathu ava va nga vitwa ngu didhawa da moya ti nga va karatela ku etetela Jehovha ni kusakulela tifanelo ati a ti kombisako to fana ni wunene, wumbilu ni kudivalela. (Vaef. 4:32–5:1) Ngako vatekani va txi ti karatela kukombisa tifanelo tiya, lirando lawe li na kula. Mwanathu wa txisikati awu a dhanwako ku i Lena, a ku ni 25 wa malembe a di txhadhile a khene: “Ta hehuka kuxonipha ni kuranda m’thu awu a nga vitwa ngu didhawa da moya.”
Tithomba ta moya
it “Lirando” ¶39
Lirando
“Mbimo yo kombisa lirando.” Txizimu txa kombisa llirando ka votshe vathu kala ve za ve tiveka hakubasani ti to kha va txi lavi. Lirando kha li kombiswi ka vale va si tsakisiko Jehovha mwendo va simamako ni simaho sawe so biha. Ngu toneto, lirando la txona la mana mtsudi li humula. Jehovha ni Jesu va dhunda wululami ni ku va wu nyenya wubihi. (Mas 45:7; Vaheb 1:9) Ava va nyenyako Jehovha kha va fanelwi ngu kukombiswa lirando. Ngu toneto, ngu ti hetela mbimo kusimama u kombisa lirando ka vathu vonevo, nguku avale va si dhundiko Jehovha kha va nambi kombisa kubonga ngu lirando lonelo. (Mas 139:21, 22; Isaya 26:10) Ngu ditshuri, Jehovha wa va nyenya vathu vonevo ni ku ava vekete mbimo yo ta va lovisa.—Mas 21:8, 9; Ekl 3:1, 8.
6-12 KA OUTUBRO
TITHOMBA TA MU KA DIPSWI DA TXIZIMU EKLEZIYASTE 5-6
Xonipha Jehovha Txizimu txathu
w08 15/8 15-16 ¶17-18
Dhumisa Jehovha ngu kukombisa txixonipho
Hi fanete kukombisa txixonipho hi txi khozela Jehovha. Dibhuku da Ekleziyaste 5:1 di womba tiya: “Xayisa mkondo wako, u txi wulela Nyumbani ka Txizimu.” Mosi ni Joxuwa va ti fanete ku ambula masandaliya ngaku va txi wulela ka wukhalo wo sawuleka. (Eks. 3:5; Jox. 5:15) Kumaha toneto i ti nzila yo kombisa txixonipho. Vaprista ti txi sunga ku ve ambala makalsawu o basa “kasiku ve sisa mmidi wawe.” (Eks. 28:42, 43, NM) Eto ti txi maha ti to ve xonipheka mbimo yi va nga txi ya thuma altarini. Votshe ava va nga txi ta ngu ka mwaya wa mprista va ti fanete kuxonipha milayo ya Jehovha.
Ngu toneto, kukhozela Jehovha ngu nzila ayi yi fanelekako tipata kuva ni txixonipho. Kasiku hi xoniphwa hi fanete kuhanya ngu nzila ya yinene. Txixonipho atxi hi fanelako ku txi kombisa kha txa fanela kuva txa wukanganyisi mwendo ku txi kombisa ngu kulava kuwonwa, kambe txi fanete kukhukhela mbiluni. (1 Sam. 16:7; Mav. 21:2) Txixonipho txi fanete kumaha txienge txa wutomi wathu, txi gwesa nzila yi hi hanyako ngu yona, ati hi ti mahako ni nzila yi hi ñolako ngu yona vamwani. Hi fanete kukombisa txixonipho ka sotshe siemo, ka totshe ati hi ti wombako ni ti hi ti mahako. Ngaku hi di ni mahanyelo a manene, hi txi ambala ngu nzila ya yinene ni ku ti txhuna ngu nzila ya yinene, ti na kombisa ti to ha engisa mapswi a Paulo, aya ma ku: “Kha hi lavi kukhuvekisa m’thu ni wammweyo kufela ku mthumo wathu wu si solwi. Aniko, ka totshe hi dhunda kukombisa ti to hi sithumi sa Txizimu.” (2 Vak. 6:3, 4) Hi ‘ninga lisima gondo ya Txizimu, Muhanyisi wathu ka totshe.’—Tit. 2:10.
w09 15/11 11 ¶21
Tshukwatisa mikombelo yako ngu kumaha gondo ya Bhiblia
esu a ti maha mikombelo adi ni likholo ni ngu nzila ya txixonipho. Ngu txikombiso, a si se wusa Lazaro, “Jesu a to gula maso e wona nzumani a txi khene: ‘Tata, na kubonga nguko u ni engisile. Phela ani na ti ziva ti to mbimo yotshe wa ni engisa.’” (Joh 11:41, 42) Ina mikombelo yako ya kombisa ti to u ni txixonipho ni likholo? Pimisa ngu mkombelo wu Jesu a nga gondisa vagondiswa vakwe ku ve wu maha. Ene a wombawombile ngu kubasiswa ka ditina da Jehovha, kuta ka Mfumo wakwe ni kumaha kudhunda kakwe. Eto i ti ti mhaka ta lisima ka mkombelo wonewo. (Mat. 6:9, 10) Alakanyisisa ngu mikombelo yako. Ina ya kombisa ti to wa ninga lisima Mfumo wa Jehovha, kumaha kudhunda kwakwe ni kubasisa ditina dakwe?
“Hetisisa txixambanyo txako”
Mbimo yi u nga bhabhatiswa, u thembisile Jehovha ti to u na mthumela ni ku mu engisa wutomi wako wotshe. Kambe bhabhatiso ku ve makhato dwe. Ngako mbimo yi txi tsimbila, hotshethu ti lava hi ti xolisisa. Hi nga mahisa ku txani? Hi nga ti wotisa tiya: ‘Wuxaka wangu ni Jehovha wu kuti ngu nzila yihi kukhukhela mbimo yi ni nga bhabhatiswa? Ina ni ngadi ni thumela Jehovha ngu yotshe mbilu yangu? (Vakolosa 3:23) Ni ngadi ni txi maha mkombelo? Na lera Bhiblia ditshiku ni ditshiku? Na ya mitshanganoni mbimo yotshe? Ina na tsula ka mthumo wa thembwe? Mwendo se na khata kugodhola?’ Mpostoli Pedro a ningete txialakanyiso txa nguzi yi yi ku ho yo thuka hi hola ka mthumo wathu ka Jehovha. Hi nga vayilela phango yoneyo hi txi tikarata ti to hi kula amu ka likholo, ka wuzivi, ka kutimisela ni ka kutiningetela ka Jehovha.—Lera 2 Pedro 1:5-8.
Tithomba ta moya
Tixamulo ta siwotiso sa vagondi
Ekleziyaste 5:8 a womba-womba ngu mfumeli awu a xanisako sisiwana ni ku kha si ñoli ngu nzila yo lulama. Mfumeli eneyo a fanete ku khumbula ti to wa wonelelwa ngu mfumeli awu a ku txitimwi kwakwe mwendo a ku ni wukoma wo guleka kupala wakwe. Hambiketo, ti nga maha ku di ni vamwani vo guleka ngutu kupala mfumeli eneyo. Txo mbi tsakisa ka wukoma wa vathu ngu ti to ti nga maha vakoma vonevo votshe va di ni wukanyisi, se vathu va fumwako ngu vona va xanisekako.
Ti si nga ni mhaka ni ti to txiemo txa nemela ha ko za hi pwata themba kambe ta hi thavelela kuziva ti to Jehovha a woneleta “wule aku txitximwi ngutu” ka wukoma wa vathu. Hi nga gela Jehovha kukarateka kwathu hi kombela txivhuno. (Mas. 55:22; Vaf. 4:6, 7) Ha ti ziva to “Maso a MKOMA ma wona totshe ha mafuni, kutsanisa ava i ku vakwe ngu timbilu tawe totshe.”—2 Mak. 16:9.
Ndimana ya Ekleziyaste 5:8 yi womba-womba ngu ti ti mahekako ngu wukoma wa vathu i ku ti to mbimo yotshe ku ni wu i ku wa hombe kupala vamwani. Txa lisima ngutu ngu ti to ndimana yiya yi hi vhuna ku hi khumbula to Jehovha Mkoma awu a nga guleka ngutu ka vakoma va vathu. Konkuwa ene wa fuma ngu kuthumisa Jesu Kristu i ku Mkoma wa Mfumo wa Txiximu. Jehovha Nyamitamo, ene wa wonelela sotshe ni ku a lulamile. Kufana ni Jehovha, Jesu nene a lulamile ni ku wa khatala ngu vathu.
13-19 KA OUTUBRO
TITHOMBA TA MU KA DIPSWI DA TXIZIMU EKLESIYASTE 7-8
“Thavelela va va nga felwa”
it “Kudila” ¶9
Kudila
Mbimo yo dila. Dibhuku da Ekleziyaste 3:1, 4 di womba ti to ku ni “mbimo ya kudila, ni mbimo ya kuseka; mbimo ya xomulo, ni mbimo ya kusinya.” Aku hotshethu hi fako, Bhiblia yi womba ti to mbilu ya vale va ku ni mapimo yi maneka “ nyumbani ka madila” i si nga nyumbani ka m’buso. (Ekl 7:2, 4; fananisa ni Mav 14:13.) Ngu toneto, m’thu wa wutxhari a thumisa mbimo yoneyo kasi kuthavelela vamwani i si nga kuva bhisi ngu mibuso. Eto ta hi vhuna kupfisisa ti to hotshethu ha fa ni ku hi va ni mawonelo a manene ngu Mvangi wathu.
U nga leki ku va vhuna
William awu a nga felwa ngu msikati malembe msana a khene: “Na bonga ngako vamwani va txi khumbula to kari ta msikati wangu; ti ni tsanisekisa to vathu va ti mu dhunda ni ku mxonipha. Mamahelo onewo ma ni vhuna ngutu. Mapswi awe ma ni tsanisa ngutu nguko msikati wangu i ti wa lisima ngutu kwangu ni ku hi hanyile ngutu hotshe.” Bianca wu i ku noni a khene: “Na thaveleleka ngako vamwani va txi maha mkombelo ni nani ve tshumela ve lera m’bhalo wumwewo mwendo yimbidi hi di hotshe. Eto ta ni vhuna mbimo yi va tako ve ta bhula ni nani ngu mwamna wangu ni mbimo yi va ni engiselako ni txi womba-womba ngu ngene.”
‘Dilani ni va va dilako’
Mikombelo yathu yi nga vhuna vanathu ava va dilako. Hi nga va pata ka mikombelo yathu mwendo kukhongela hi di navo. Hambi i di ti to u wona ti txi karata ngu ku va u txi pfa ti to nawe u nga thuka u dila, u nga divali ti to ngako wu txi ta ngu mbiluni wu nga va ni mtamo ngutu. Danele a khene: “Mbimo yimwane ni txi pfuxelwa ngu vanathu, na thuka ni va kombela ti to ve maha mkombelo. Va txi khata kuwombawomba, wumwane mkama dipswi da lamba kuhuma, kambe va txi simama, va maha mkombelo wo ta ngu mbiluni. Likholo lawe lo tsana, lirando lawe ni kukhatala kwawe ka ni tsanisa ngutu.”
‘Dilani ni va va dilako’
Kha ti koteki kuziva ti to i mbimo muni ayi m’thu a no yi heta a txi dila. Ngako hi txi felwa, vangana ni maxaka a hafuhi ma nga hi thavelela. Kambe msana ka masikunyana, va txi tshumela ve ya ti thumela tawe, ava va nga felwa va ngadi va txi ti lava kuthavelelwa. U nga leke ku va vhuna. “Awule i ku mndoni wa m’thu wa m’randa yotshe mbimo; a maneka i di mwanawe ka mbimo ya dikhombo.” (Mavingwa 17:17) Ti lava hi ti emisela ku va vhuna ngu mbimo yi va hi lavako ngu yona.—Lera 1 Vatesalonika 3:7.
Khumbula ti to ti nga maheka m’thu e karateka mbimo yo lapha ngutu. Ngu txikombiso, ti nga thuka ti vangwa ngu loko ku txi hoka masiku ya va nga txhadha ngu ona, kuwona mifota, kuva ka wukhalo wo kari ni wutxenje wo kari ti nga thuka ti maha ti to m’thu e khumbula awu a nga luza. Ngako m’thu a di fetwe ngu mngana wakwe wa wukati, ti nga thuka ti panda ngutu kuxalela mtshangano wa txigava mwendo txialakanyiso a di ekha. Mwanathu mmwane a khene: “Ni ti ti ziva ti to ti na karata ngutu ku txi hoka ditshiku adi hi nga txhadha ngu dona. Ti si hehuki. Kambe vanathu va lulamisete sokarinyana a ha ni nga tipfa ni singa nokha.”
U nga divali ti to ava va dilako va lava kutsaniswa i singa ngu mbimo yo sawuleka dwe. Junia a khene: “Hambi ku singa ni m’busu, ndinene kutsaniswa ngu vanathu.” Kambe ta tsakisa ngutu ngako hi txi va ka simahakalo soneso. Ditshuri ti to kha hi na ku si kota kuthavisa kupanda ni txiwunda atxi va txi pfako, kambe hi nga maha to kari hi di navo. (1 Johane 3:18) Gaby a khene: “Ngu ditshuri na bonga ngutu Jehovha ngu madhota aya ma ku ni lirando aya ma ku ni nani ka txikarato txihi ni txihi. Ti maha ti to ni tipfa ni di manzani ka Jehovha.”
Tithomba ta moya
“Ngu toneto va no mi zivisa tona ti taku mi vagondiswa vangu”
Mbimo yimwani ti nga lava hi tshuketela mwanathu awu a nga hi henyisa. Kambe txo khata ti lava hi ti wotisa siwotiso so fana ni siya: ‘Ina na yi ziva kwati mhaka?’ (Mav. 18:13) ‘Ina a to ni henyisa kha kwenye?’ (Ekl. 7:20) ‘Ina ni khala kumaha phazamo yo fana?’ (Ekl. 7:21, 22) ‘Ngako ni txo mu yela, ina kha ni njo ya vhuka mifi?’ (Lera Mavingu 26:20.) Ngako hi txi tiha mbimo yo alakanyisisa ngu siwotiso siya hi nga tumbula to lirando lathu ngu mwanathu wule li nga hi susumetela ku m’divalela.
20-26 KA OUTUBRO
TITHOMBA TA MU KA DIPSWI DA TXIZIMU EKLEZIYASTE 9-10
Wonisana ni sikarato sako ngu nzila ya yinene
w13 15/8 14 ¶20-21
U nga ‘henyele Jehovha’
U nga ninge mnandu Jehovha. Ngu kutxani? Mbimo yimwani hi fanete kutumela wuyelo yo biha ayi hi yi manako ngu konaha ka simaho sathu. (Vag. 6:7) U nga ninge mnandu Jehovha ngu konaha ka simaho sako. Ngu kutxani? Ngu txikombiso: Alakanya ngu mmovha awu wu ku ni livilo la hombe. Se motorixta wa mmovha wonewo e wu kanda kuphinda mpimo aha koza e maha asidhenti. Ina awu a nga maha mmovha wonewo ngene a ku ni mnandu? Nadha! Nguha kufanako, Jehovha a hi vangile hi di ni wusikoti wo ti mahela sisungo. Kambe a tshumela e hi ninga mkongomiso awu wu hi vhunako kumaha sisungo sasinene. Se, ngu kutxani hi txi ninga mnandu Mvangi wathu ngu konaha ka tiphazamo tathu?
Hi nga mbimo yotshe sikarato si tiswako ngu tiphazamo tathu mwendo ngu simaho sathu so biha. Timwani ti maheka ngu mhaka ya ‘mbimo ni si mahakalo so mbi rinzelwa.’ (Ekl. 9:11) Hi nga thukeni hi divala ti to Sathani ngene mvangi wa sikarato. (1 Joh. 5:19; Mtu. 12:9) Phela mlala wathu i Sathani i singa Jehovha!—1 Pedro 5:8.
Jehovha wa ninga lisima ava vo tiveka hahatshi
Kutiveka hahatshi ti tshumela ti tshukwatisa wutomi wathu. Ka wutomi hi nga thuka hi wona timhaka to kari ti si tsimbili kwati. Mkoma Solomoni a wombile tiya: “Ni woni tikhumbi ti di gadhile mahantxhi, ni vathangeli va nga ti ti tsimbila ngu mikondo, kufana ni tikhumbi ha mafuni.” (Ekl. 10:7) Mbimo yimwani vathu va va ku ni wusikoti va nga tekelwa hahatshi. Kambe, ava vo mbi ziva to tala ve tekelwa txitimwi. Hambi keto, Solomoni a ti woni to i tshuku kugula ngu maso hi txi wonetela i si nga kuswireka ngu timhaka toneto. (Ekl. 6:9) Loko hi txi tiveka hahatshi, hi na mbi zumba hi txi karateka ngu timhaka ti hi ti wonako ti si tsimbili kwati.
w11 15/10 8 ¶1-2
Ina ku tiha mbimo yo hungala ti ni txivhuno?
BHIBLIA yi womba ti to Jehovha kha njo lava hi hanya basi, kambe a lava ti to hi tidila ngu wutomi hi di tsakile. Ngu txikombiso, ka Masalmo 104:14, 15 Jehovha a womba ti to ‘wa kulisa mwasi wa sihari ni mindonga yi vathu va phayako kasi kumana sakudya ka yona, wa maha vhinya yi yi tsakisako timbilu, mafura aya ma tshurisako tikhohe ni sakudya si si va ningako mtamo.’ Jehovha a maha ti to mafu me humisa sakudya kasiku hi ti busa ngu sona. Kambe vhinya ya ‘tsakisa timbilu.’ Ene a hi ninga so pinda asi hi si lavako kasiku hi hanya ni kutshumela si engetela litsako lathu. (Ekl. 9:7; 10:19) Ngu ditshuri, Jehovha a lava ti to hi tidila ngu litsako ni ku ‘timbilu tathu ti tala ngu litsako.’—Mith. 14:16, 17.
Phela kha ta biha ku tiha mbimo yo pasiyaranyana hi wona mtumbuluko, hi ‘wona kwati sinyana,’ “makhoñwa a txitinga” mwendo kumaha timhaka timwani ati ti hi tsakisako. (Mat. 6:26, 28; Mas. 8:3, 4) Ngu ditshuri, wutomi wo tsakisa i ‘ningo yo ta ngu ka Txizimu.’ (Ekl. 3:12, 13) Mbimo yi hi yi thumisako kasiku hi humula mwendo kupasiyara i ningo ayi yi tako ngu ka Jehovha, ngu toneto hi fanete ku yi thumisa ngu kumaha timhaka ati ti mtsakisako.
Tithomba ta moya
it “Manzenze, Kulumbeta” ¶4, 8
M’thu wa manzenze a nga lumbeta vamwani se e mana mahungu. Ngu toneto, dibhuku da Ekleziyaste da hi txharihisa di txi: “Livengo li kujetela mazunga, aniko lirando la fenengeta sotshe sihambunyeto. Txisofuni ka txhari kumaneka wutxhari, aniko limhika li peka msana wa wule wo pwata mapimo. Titxhari ta ti xayisela wutxhari, aniko txisofu txa txiphukuphuku txo hasamula.
Kuva m’thu wa manzenze ti bihile aha ko mbimo yimwani ti nga khuvekisa vamwani (kuva m’thu wa manzenze ti nga kumaha u va mlumbeti). Kulumbeta kubihile ni ku ku nga hi tisela sikarato. Hambi i di ti to u pimisa to wo sakana, kulumbeta vamwani ta henyisa Jehovha, nguku ‘kuphaya mazunga ka vanathu,’ i ku timhaka ati ti nyenyezako Jehovha. (Mav 6:16-19) Dipswi da txigriki adi di ku di·aʹbo·los di womba “mlumbeti” mwendo “m’hembi.” Dipswi diya di tshumela di thumiswa mu ka Bhiblia kota txithopo txa Sathani “Dhawulosi,” mlumbeti wa hombe wa Txizimu. (Joh 8:44; Mtu 12:9, 10; Gen 3:2-5) Eto ti kombisa ti to Sathani ngene mlumbeti wa hombe.
27 KA OUTUBRO KALA 2 KA NOVEMBRO
TITHOMBA TA MU KA DIPSWI DA TXIZIMU EKLEZIYASTE 11-12
Vana ni wutomi wo tsakisa ni dihanyo da dinene
g 3/15 13 ¶6-7
Masani ni moya “Sa vhuna”
Masani ma ni si si lavekako kasiku daya sipungwana. Direvhista da Journal of Hospital Infection di txhamusela ti to “sipungwana so tshapelana asi si humako mbimo yi hi hefemulako si vangako malwati, kha si sikoti kuhanya ngaku ku di ni lisani.
U nga londolisa kutxani masani oneyo? Tihe mbimo yo huma u pekwanyana ngu masani ni kumananyana moya. Phela eto ndatinene ka dihanyo.
Xonipha wutomi i ku ningo ya Txizimu
Hambiku Bhiblia i si ngako dibhuku do txhamusela timhaka ta dihanyo ni ta madyelo, dona da hi gela mawonelo a Jehovha mayelano ni toneto. Ngu txikombiso, ene a hi kuzeta ti to hi “hambana ni kuxaniseka ka nyamani” aku ku nga onhako mmidi wathu. (Ekl. 11:10) Bhiblia ya tsimbisa simaha siya sa simbidi i ku kusela ngutu ni kuva mthu wa txinyama-nyama. (Mav. 23:20) Jehovha a emela ti to hi ziva ku ti pimela ti txi ta ka mhaka yo dya ni kusela.—1 Vak. 6:12; 9:25.
Hi nga maha sisungo asi si kombisako ti to ha bonga ningo ya Txizimu i ku wutomi ngu kuthumisa kwati wusikoti wathu wo alakanyisisa. (Mas. 119:99, 100; lera Mavingu 2:11.) Ngu txikombiso, hi nga maha sisungo sa wutxhari ngu kusawula kwati asi hi dyako. Ngako hi txi dhunda sakudya so kari kambe hi tumbula to sa hi vangela malwati hi na vayilela sakudya soneso. Hi nga kombisa ti to hi txharihile ngako hi txi otela ngu mbimo ya yinene, hi txhukumisa mmidi mbimo yotshe, hi zumba hi di basile ni kubasisa mti wathu.
“Mahani valondeteli va Dipswi”
Kota vakhozeli va Jehovha athu hi zumba hi di tsakile. Ngu kutxani? Hi ni sivangelo sasingi, kambe txo khata ngu ku hi gondako Bhiblia ditshiku ni ditshiku, ni ku maha mizamo yo thumisa ati hi ti gondako.—Lera Jakobe 1:22-25.
Ku ni wuyelo ya hombe ngu kuva “valondeteli va dipswi.” Ngu txikombiso mbimo yi hi thumisako ati hi ti gondako a mu ka Dipswi da Txizimu hi tsakisa Jehovha, ni ku eto ti hi maha hi va ni litsako. (Ekl. 12:13) Ngako hi txi hanya ni kutsimbitisana ni ti hi ti gondako ka Dipswi da Txizimu, mwaya wathu wa tsaka ni ku ha va ni wuxaka wo tsana ni vanathu. Eto ti nga maha u di tiwoni ti txi humelela ka wutomi wako. Hahanze keto ha vayilela sikarato asi si manwako ngu vathu ava va si thumeliko Jehovha. Ti hakubasani ti to ha tumelelana ni ti Mkoma Dhavhidha a nga ti womba. Msana ko embelela mayelano ni wulamuli ni milayo ya Jehovha ene a hokelete magwito ya ti to: “Awule a yi xayisako wa mana hakhelo.”—Mas. 19:7-11.
Tithomba ta moya
Jehovha a dhunda ava va ‘velekako mihando ngu kutimisela’
Kha ha fanela kudivala nzila yi kutxhumayela kwathu ku nga gwesako vathu ngu yona, hambi ti txi woneka nga kha va tsakeli. (Lera Ekleziyaste 11:6.) Vathu va hi wona. Vona va ma ziva maambalelo athu a manene ni ku hi ni txixonipho ni txingana. Eto ti nga va xamatisa, ngu kutsimbila ka mbimo hambi va va nga ti ni mawonelo o biha ngu ngathu va nga txitxa mawonelo ve tsakela. Sergio ni Olinda va ti woni toneto.
Sergio a ti khene: “Hi zumbilenyana hi si yi txititxini, ngu mhaka ya malwati. Se mbimo yi hi nga tshumela, vathu va xamate va txi khona: ‘Mi hi kalete! Hi ti mi xuva.’” Olinda a engetete a txi seka: “Va tsimbitisi va sibhomba ni va va nga ti mndani mule va hi gulete mawoko va txi: ‘Thumani kwati!’ Vona va tshumete ve hi kombela marevhista.” Sergio ni Olinda va xamate ngutu mbimo yi dijaha dimwani di nga ya hale va nga ti txhumayela kona, di ya va losa di va ninga siluva ni ku va bonga ngu mthumo wawe.
Hotshethu ‘hi nga khalahatsheni ngu mawoko’ hi si geli vamwani ngu Mfumo wa Txizimu. Hi ni mthumo wa lisima wo ningela “wufakazi ka yotshe mifumo.” (Matewu 24:14) Hi nga va ni litsako la hombe nguko ha ti ziva ti to hi tsakisa Jehovha. Ene wa va randa ava va “velekako mihando ngu kutimisela”!