Ina wa khumbula?

Ina u gondile kha kwati marevhista a Muwoneleli ya dilembe diya? I di toneto zama kuxamula siwotiso siya:

Tiwomba txani ‘kuphinduka amu ka mapimo’? (Var. 12:2)

Kha ti lavi basi hi tshurisela wutomi wathu ngu mithumo yo kari ya yinene. Tilava hi xolisisa m’thu wu hi ku ene ngu mndani ka mbilu, hi maha kutxitxa a ku ku lavekako kasi kutsakisa Jehovha.—w23.01, paj. 8-9.

Hi nga kombisisa kutxani kudinganisela mbimo yi hi wonako a ti ti mahekako hamafuni?

Athu ha khatala ngu ti ti mahekako hamafuni, nguku ku tala ka tona ti hetisisa wuprofeti wa mu ka Bhiblia. Kambe hahanze ko zama kuhuta a ti ti no maheka, a ti ti no maha ti to ku si vi ni wumwewo hagari kwathu, i nga va tshuko ku mbimo yotshe hi wona madungula ya ma tako ngu ka Sengeletano ya Jehovha. (1 Vak. 1:10)—w23.02, paj. 16.

Bhabhatiso ya Jesu yi hambana ngu nzila muni ni ya valondeteli vakwe?

Ene kha ta nga lava ku e tiningetela ka Jehovha, nguko a velekilwe ka ditiko di di nga ti ti ningetete ka Txizimu. Ene i ti wamwamna wo pelela, ngu toneto, ti si lavi ku e ti sola ka sionho.—w23.03, paj. 5.

Hi nga va vhunisa kutxani vamwani ku ve xamula mitshanganoni?

Hi nga ningela tixamulo to koma, ngu toneto vamwani ni vona va na va ni mkhanjo wo ve xamula. Hahanzi keto kha tilavi hi tatela to womba. Ngako u txi xamula yotshe paragrafu ti no sala ta tidotho to vamwani ve xamula.—w23.04, paj. 23.

Nji txani “Nzila yo Sawuleka” yi nga wombwa ka Isaya 35:8?

Nzila yoneyo yo fanekisela ku txi wombwa liendo a li Vajudha va di no li maha kukhukhela Bhabhilona kala Jerusalema. Kambe yi txhamusela txani kwathu nyamsi? Malembe o tala msana ku se kuhoka 1919, ku lulamisetwe nzila yo fanekisela—yo pata wuhunduluxeli, wuganji, ni timwani. Vathu va Jehovha va tsimbila ka “Nzila yo Sawuleka” va txi kongoma ka paradhise ya moya, a yi yi no hi kongomisa ka makatekwa a Mfumo.—w23.05, paj. 15-19.

Mavingu kapitulo 9 yi hi ninga sileleto mayelano ni vavasikati vavambidi vo zumbisa kutxani?

Mavingu a womba-womba ngu “wamsikati wa txiphukuphuku” a wu a mahako txirambo a txi txi yisako ‘kufani’ ni wamsikati awu a emelako “wutxhari wa ditshuri,’’ a mahako txirambo a txi txi yisako “ka nzila yo pfisisa” ni ka wutomi. (Mav. 9:1, 6, 13, 18)—w23.06, paj. 22-24.

Jehovha a kombisile ngu nzila muni ti to mbwo tiveka hahatshi ni kudinganisela mbimo yi a nga txi bhulisana ni Loti?

Jehovha a gete Loti ti to e thavela Sodhoma ka didhoropa da mmangoni. Kambe Loti a kombete Jehovha ku e thavela ka didhoropa da Zowara, ni ku Jehovha a engisile txikombelo txakwe.—w23.07, paj. 21.

Nji txani a txi wamsikati a nga txi mahako ngaku mwamna wakwe a txi xalela sithombe sa nzambwa?

Wamsikati a fanete kukhumbula ti to hi nga mnando wakwe. A fanete kuveka mapimo ka wungana wakwe ni Jehovha ni ku alakanyisisa ngu sikombiso sa vavasikati va mu ka Bhiblia va nga tipfa va txi karateka kambe va nga mana ku thavelelwa. A nga vhuna mwamna wakwe ku e vayilela siemo a si si nga m’betako txibeheni.—w23.08, paj. 14-17.

Ngako hi txi wotiswa mayelano ni ti hi ti kholwako, kupfisisa txiemo ti nga hi vhunisa kutxani ku va vo thutha?

Hahanze ko wona txiwotiso nga vo hi wukela i nga va mkhanjo wo ziva a ti i ku ta lisima ka m’thu eneyo. Hi txi maha toneto hi na sikota kuxamula ngu nzila yo thutha.— w23.09, paj. 17.

Mariya a hi vhunisa kutxani mayelano ni ku lava txivhuno?

Mbimo yi a nga ziva ti to a ndi na va mame wa Mesiya a lavile txivhuno txa vamwani. Ngelozi ayi yi dhanwako ku i Gabriyeli ni Elizabheti va tsanisile Mariya ngu kuthumisa mibhalo. Nathu hi nga amukela mtamo wu hi wu lavako ngu txivhuno txa vanathu.—w23.10, paj. 15.

I ngu nzila muni ti nga mahako Jehovha e xamula mikombelo yathu?

Ene a thembisa kuengisela mikombelo yathu ni ku wa yi tekela ha msungo nzila yi mikombelo yathu hi yelanako ni kuranda kwakwe. (Jer. 29:12) Jehovha a nga xamula mikombelo yo fana ngu tinzila to hambana kambe mbimo yotshe a na hi vhuna.—w23.11, paj. 21-22.

Varoma 5:2 yi womba-womba ngu “kuthemba,” se ngu kutxani vhersikulo 4 yi txi tshumela yi womba-womba ngu “kuthemba”?

Ngu kupfa mahungu a manene, m’thu a nga va ni themba yo hanya ngu ha ku si gumiko ka paradhise hamafuni. Kambe mbimo yi a wonisanako ni sikarato, ku kota kutsanisela , ni ku tipfa a txi tsakelwa ngu Jehovha themba yoneyo ya ya yi tsana ngutu ni ku va ya lisima ngutu.—w23.12, paj. 12-13.